2008年6月24日星期二

烘多士 & 水果茶



材料:
方包
香蕉
蒜茸醬
水果茶包
       


        一睇就知係懶人餐啦!烘四塊多士加一杯橙味水果茶,咁就係我lunch 啦!


        用四塊白麵飽,其中兩塊係搽香草蒜茸醬,呢隻蒜茸醬幾 OK o架,係 McCormick 出品,味道恰到好處,香得又唔會太濃,焗出金黃色又非常吸引。最重要係佢唔係用牛油做,而係全用大豆油,應該會健康,同埋無我最怕牛油羶味,可能當初媽咪買番試時,都係因為呢個原因。


        另外兩塊就搽香蕉茸係面,呢個 idea 係我睇 "都市閒情" 學番,個營養師話樽裝果醬好多時糖份都好高,唔係咁健康,所以佢建議用香蕉代替,一來天然,含豐富纖維素及營養,而且亦有一定 甜度,係唔錯選擇,但係就一定要揀熟到起黑點香蕉,如果唔係就會唔夠甜 o架啦!


2008年6月16日星期一

冬菇蠔豉炆海參

        我成日都覺得只會係過時過節先會煮呢個餸,特別有過節 feel。原來整呢個餸都唔係想像中咁難噃。




材料:
冬菇
蠔豉
海參
蒜頭


汁料:
紹酒
蠔油
麻油


        首先預備好所有材料:冬菇先用水浸腍,去蒂洗淨,蠔豉用熱水略為浸軟;海參就預先用薑蔥出水,蒜頭切碎。


        放蒜頭落鑊爆香,加入冬菇、蠔豉略炒一陣,跟住就贊酒,等佢有啲香味,校細火後炆一陣間,之後再落埋啲海參一齊炆 (海參記得唔好咁早落鑊炆,因為過火會煮到溶哂),跟住就落埋蠔油、糖調味,唔駛落鹽,因為有蠔油已經夠鹹。校到最細火炆至所有材料腍身就攪掂,最後加少許麻油,上碟!


        啱炆起熱辣辣果陣,真係好香、好吸引,我就用佢嚟撈米線,冬菇爽、蠔豉香、海參滑,效果唔錯。

        媽咪教過我,如果想啲冬菇快啲浸腍,千祈唔好用熱水浸,因為啲冬菇會變韌,只要喺凍水度落啲砂糖,啲冬菇就好快腍 o架啦。依家我個冰箱度都雪一盒已經發好海參,另一間屋都仲有一盒 o添,點解會有咁多?因為媽咪囉,佢知道自己就快要走,所以佢就不斷咁諗有乜嘢要喺走之前完成哂佢,發海參就係其中一樣。佢叫我攞哂所有乾海參出嚟,教我點發海參,等我之後可以隨手拎嚟煮,唔駛慢慢發咁麻煩,所以發咗好多,有次伯伯同伯娘入嚟探佢果陣,仲俾啲佢哋 o添呀!


2008年6月10日星期二

木瓜雪耳糖水


材料:
木瓜
雪耳
南北杏
冰糖
清水
       


        屬於簡單易做中式糖水之一。木瓜去皮去籽,洗淨切件 (最好揀比較熟嘅,除因為顏色紅啲之外,仲可以令到啲糖水甜 );雪耳浸熱水,待發脹之後,剪去底部木頭部份,洗淨後汆水備用。煲滾水後,將所有材料加入清水中,再次煲滾後,就可以番落個真空煲度,食之前再煲一煲就掂哂!


        好好味,好滋潤呀。


       


2008年6月4日星期三

自製班戟 & 玉桂香草咖啡



材料:
麵粉
砂糖
泡打粉

雞蛋


        第一次整 pancake 都幾成功呀,係跟 Shadow Kwan 喺 Amway 本月刊裡面個食譜嚟做。做法都好簡單,先將所有液態材料混合好,跟住將已過篩嘅糖同粉加埋落去,攪拌均勻就可以將麵糊倒落平底鑊度煎 o架啦,食起都好軟熟,唔會硬,加埋啲無糖士多啤梨果醬一齊食,又有另一番風味糖漿都係自己煮 o架,不過就稀啲,但甜味就啱好。


        之於杯咖啡哩,我就加啲玉桂粉同新鮮 Rosemary (迷迭香) 落去,啲Rosemary 係阿珊自己種 o架,佢知我鍾意用香草煮餸,所以咪特登拎啲俾我囉,果然新鮮香草係比乾嘅香好多