2011年6月29日星期三

焦糖紅茶南瓜布甸 Caramel & Tea Pumpkin Pudding

        南瓜精又出動喇!食完咁好味菠蘿吞拿魚 pizza,歎番個焦糖南瓜布甸,今餐夠哂滿足喇!



焦糖漿


材料:
糖              50 克
凍水          25 毫升
熱水          15
毫升


- 將糖同凍水放入煲內加熱,煮至淺啡色後離火。


- 立即加入熱水,拌勻即成焦糖漿。


- 將焦糖漿倒入已搽油嘅布甸杯內,攤凍後放入雪櫃雪至硬身。



紅茶南瓜布甸


材料:
南瓜          250
水              270 毫升
淡忌廉      65 毫升
紅茶包      1 個
雞蛋          2 隻
糖              65 克


- 雞蛋拂打成蛋液;南瓜去皮、去瓤,切片後放碟上,隔水蒸熟至腍身。


- 與此同時,將水同茶包放入煲內,煮成濃茶。


- 加入淡忌廉,煮滾後將茶包拎出,備用。


- 南瓜趁熱壓成蓉,加入糖後,用電動打蛋器攪拌均勻。


- 將蛋液倒入南瓜蓉內,用低速拌勻後,再拌入紅茶忌廉。


- 喺雪櫃拎出布甸杯,將混合物過篩入杯內,然後放上烤盤上。


- 烤盤內倒入熱水,之後放入已預熱至 170 °C 嘅焗爐內焗約 1鐘。


- 烤好後出爐攤凍,再放入雪櫃內雪凍。


- 拎出布甸,用小刀圍繞布甸劃一圈,然後倒扣喺碟上,即可享用。


以上材料份量可做布甸 4 杯


食譜出自《番薯‧栗子‧南瓜之午茶小點心》。





布甸啱啱焗好出爐。


 



脫模脫得好樣衰呀!! 不過味道就超乎想像咁好,南瓜蓉又香又濃又
幼滑,至於個焦糖漿,老竇食完之後都不斷讚夠哂香濃。呢個甜品
簡直要 encore、encore、再 encore 至得喇!
 


Notes
- 用插針換入布甸內,抽出後並無任何布甸混合物黏附,即代表已經熟透。


- 原食譜係用 50 毫升水加 220 毫升奶,煮紅茶液時先落水,煮成濃茶液後再落奶。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


菠蘿吞拿魚薄餅 Pineapple & Tuna Pizza

        每次喺餐廳食 pizza,我都一定會揀厚批底,因為食過一次薄批,覺得過份香口同比較乾身,完全唔係我杯茶,但其實薄批先至係正宗意大利風味。

        以前未識整包時,一直都以為薄批同厚批嘅整法,分別在於將麵糰擀薄與否,但睇過食譜先知,原來係唔落糖之餘仲要增加鹽嘅份量,藉此抑制酵母嘅活躍度,減低麵糰發酵程度,從而令麵糰變得較薄。



2011年6月28日星期二

自製豆漿 & 豆腐花

        一到夏天我就會煮豆漿,煮好之後就放入雪櫃,隨時都有冰涼豆漿飲。

        反正都係喇,煮多少少,用嚟試吓整豆腐花先!



2011年6月27日星期一

韓式泡菜年糕

        之前醃好嘅泡菜,最啱就係用嚟煮韓國年糕,風味夠哂地道!



材料:
韓國年糕
泡菜
炸魚蛋
木耳絲
清雞湯
蒜茸
蔥段

調味料:

生抽
韓國辣椒醬


- 泡菜切件;魚蛋沖洗乾淨後切開邊。


- 木耳絲用水浸發、洗淨,放入白醋水內汆水,過冷河後瀝乾水份,備用。


- 年糕放入滾水內煮約 4 - 5 分鐘,之後過冷河,瀝乾水份。


- 慢火熱鑊,將調味料及蒜茸放入鑊內拌勻,加入泡菜、木耳絲及魚蛋兜炒。


- 加入年糕,拌勻後加適量清雞湯及水,用中慢火繼續煮。


- 當年糕煮至軟身及汁開始變得濃稠時,就可以加入蔥段,兜勻後就可以熄火上碟



非常好味,年糕又辣又煙韌,好好食呀!


 



雖然配料唔多,但有好味嘅自製泡菜做配料,已經非常滋味。


 


Notes
- 煮年糕時記得邊煮邊兜炒,以防黐底。


- 若年糕未煮夠軟身但水份唔夠的話,需酌量加水。


- 由於泡菜同清雞湯已經有鹹味,所以唔駛落鹽煮,若試味後覺得太鹹的話,就酌量
  加糖調味。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


朱古力磚 (咖啡味) Pavé au chocolat (Coffee Flavor)

        我又整朱古力磚喇!今日試做咗咖啡味,煮緊果陣時已經香到暈喇!


        不過整完呢次之後,都會有一排唔再整喇,最快都要等到秋涼先會再整,因為天氣實在太熱,朱古力雪櫃拎出嚟無幾耐已經係咁溶,軟身到呢,簡直可以整成咩形狀都得!好彩我醒目,見到啲朱古力好似唔係好對路,嗱聲即刻影低呢幅相先,如果唔係,呢篇 blog 就會成為第一篇無成品相片blog 喇!



材料:
朱古力              135 克
淡忌廉              100 毫升
麥芽糖              10 克
即溶咖啡粉      1 湯匙
可可粉              適量


以上材料份量可做 12 厘米 X 15 厘米朱古力一底。


- 將淡忌廉、咖啡粉同麥芽糖倒入煲內加熱。


- 當咖啡粉同麥芽糖完全溶解並與淡忌廉拌勻後,倒入朱古力內。


- 攪拌至朱古力完全溶化及與忌廉混合好。


- 將朱古力漿倒入已墊入爐紙嘅長形模內,輕輕掃平表面。


- 放入雪櫃雪至凝固後,喺表面灑上可可粉,之後反轉再灑可可粉。


- 將朱古力切成粒狀,之後逐粒放入裝有可可粉嘅碗內,將其餘表面均勻沾上可可
  粉即成。



Notes

- 製作重點及注意事項,請參考《朱古力磚》。


        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2011年6月26日星期日

燕麥全麥香蕉蛋糕 Whole Wheat & Oat Banana Cake

        講開香蕉,都好耐無整香蕉蛋糕喇,就整番個食先!不過今日呢個蛋糕唔係用急凍香蕉整,係用老竇早幾日買返嘅新鮮香蕉整 o架!



材料:
低筋麵粉      150 克
全麥麵粉      50 克
燕麥片          20 克

泡打粉          1 茶匙
梳打粉          1/4 茶匙
鹽                  1/4 茶匙
牛油              125 克
黃糖              125 克
雞蛋              2 隻
香蕉              2 隻 

- 牛油室溫放軟;所有粉類同鹽先過篩 3 次,之後加入麥片拌勻。


- 用膠刮將牛油壓成忌廉狀,加入黃糖拌勻後,用電動打蛋器打至發白。


- 將粉類混合物倒入牛油霜內,用電動打蛋器低速拌勻成粗粒狀。


- 香蕉去皮後直接加入麵糊內,再加入雞蛋,以低速拌勻。


- 將麵糊倒入焗模,之後將麥片灑於麵糊上。


- 放入已預熱至 170°C 焗爐內,焗約 50 - 60 分鐘至蛋糕熟透。


以上材料份量可做 21cm X 11cm X 6cm 長型蛋糕一個



今次除咗用熱風烘焗,仲開埋爐頂支石英管,做到烤焗功能,
果然唔再出現 S 字割紋。


 



咗全麥粉同燕麥片,令蛋糕變得高纖又健康。



 


Notes
- 當麵糊同香蕉及雞蛋拌勻後就要立即停止攪拌,以防麵糊起筋,令蛋糕唔夠鬆軟。


- 香蕉亦可預先用叉壓成香蕉蓉,但會失去粒粒香蕉口感。


- 若果用即食燕麥片整的話,麥片會因為受熱而完全溶入麵糊內;如果用原片燕麥片
  ( rolled oat ) 的話,則可以保留煙韌麥片口感,可因個人喜好選擇燕麥片。


 


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


冷藏儲存香蕉 II

        上次冷藏儲存香蕉 I》都同大家分享過將香蕉急凍保存嘅方法,但係發覺原來香蕉擺得耐始終都會變深啡色,而且之後解凍仲會勁出水,所以上次個方法都係唔夠完美。後來我試吓連皮一齊急凍,睇吓會唔會好啲,可以擺更長時間都唔變色,結果 ……



將香蕉拎出嚟室溫解凍,表面即刻結霜。


 



溶雪後睇到,成隻蕉都係一樣變到深啡色。


 



但剝開蕉皮後,裡面嘅香蕉肉仍然係非常雪白 o架,成功!!


 


        下次你哋想將香蕉急凍的話,記得連皮一齊雪喇!到用之前預早 30 分鐘拎出嚟室溫解凍,等到蕉皮稍為軟身就可以剝皮,千祈唔好等到佢完全解哂凍先剝皮呀,因為其實香蕉經冷藏後已經變成一嚿 "冰",到完全解凍後就會幾乎化為水,完全用唔到 o架啦!所以一定要趁佢仲係少少硬身就即刻 "夾硬" 剝皮,雖然係會難剝啲,但係個質地就可以 keep 到好似新鮮香蕉咁 o架喇!


2011年6月25日星期六

自家醃製韓式泡菜 Homemade Kimchi

       喺我眼中,韓國泡菜應該係平民食品,除咗辣椒粉之外,其餘材料都係平價貨,但係街賣就真係好貴,真係買唔落手,所以我一直都想自己郁手醃泡菜。


        坊間教整泡菜嘅食譜真係周街都係,但係有啲食譜一望就知道係改良過,有啲又好鬼求其。後來我喺圖書館度見到一本食譜,成本都係教整韓國泡菜,望落材料比較正宗,而且做法比較複雜,醃嘅時候又會用到韓國傳統醃菜缸,最重要仲係,書中仲介紹埋韓國唔同地方醃泡茶嘅特色,全羅道、京畿道、慶尚道、濟州道 …… 通通都有介紹,覺得呢本食譜應該靠得住啦!


        不過,正因為夠哂正宗嘅關係,佢係教先用鹽將菜鹽至軟身,夏天要約 4 - 6 個鐘,冬天就要十幾粒鐘,醃好調味之後,仲要室溫放 2 - 3 日等發酵熟成,真係夠哂長命!所以呢本食譜其實已經係上年冬天借咗返嚟,一直等到呢排天氣勁熱先郁手醃囉!



材料:
娃娃菜      3 棵
粗鹽          1 杯
白蘿蔔      半條
韭菜          適量
水              5 杯


醃料:
辣椒粉      3/4 杯
蝦醬          1 1/2 湯匙
魚露          1 1/2 湯匙
蒜蓉          適量
薑蓉          適量
糯米糊      半杯
水              適量


- 用刀將娃娃菜底部切開,之後用手將菜撕開兩邊,再用刀垂直將兩邊分別切半。


- 將 3/4 杯粗鹽加入水內拌勻成鹽水,跟住將菜放入浸約 5 分鐘。


- 拎出娃娃菜,用剩餘嘅粗鹽塞入菜頭葉瓣內,令到菜梗更加容易軟化。


- 將切口向上逐條排好,醃約 4 個鐘,直至菜梗變軟身,軟到對接而不斷開為準。


- 醃好後,用清水將菜過水 3 次,洗去多餘鹽份後,排放於筲箕上瀝乾水份。


- 之後切去菜頭最硬嘅底部,備用。


- 蘿蔔刨皮後切成幼絲,加少量辣椒粉撈勻;韭菜洗淨後切段。


- 將所有醃料材料 ( 水除外 ) 拌勻,之後倒入蘿蔔絲內均勻混合,再拌入韭菜。


- 額外加入適量糖及鹽調味,跟住將瀝乾水嘅娃娃菜加入,徹底拌勻至所有菜葉染
  紅。


- 將醃料連蘿蔔絲及韭菜均勻放入菜葉之間,之後將菜捲起包好。


- 捲好嘅醃菜放入玻璃密實盒內,整齊排好。


- 用適量水拌勻剩底嘅醃料,加半湯匙鹽及半茶匙糖調成醬汁,倒入玻璃盒內至完全
  蓋過所有醃菜。


- 冚好蓋之後,於室溫發酵 2 - 3 日至熟成即可食用。


食譜參考自《韓式泡菜》。




泡菜包好之後逐件排好放入密氣盒內發酵。


 



味道同買返差唔多,唔太酸又唔太鹹,好味!


 


Notes
- 唔用刀直接將菜切開兩邊而要用手撕開兩份,係因為將菜撕開時可將菜葉之間拉鬆
  散,方便塞入粗鹽醃漬。


- 用粗鹽醃菜時,記得不時將菜翻轉,令到菜葉能夠均勻醃入味。


- 糯米糊做法:用半杯水將半湯匙糯米粉開勻,之後加熱煮至濃稠成漿糊狀即成,攤
  凍備用。泡菜嘅酸味就係嚟自發酵後嘅糯米,所以若果糯米太多的話就會變得好
  酸。


- 原本應該係用大白菜醃製,而韭菜亦只係我自己加入,原食譜係用蔥、水芹同細
  蔥。


- 食譜上寫住 20 °C 室溫約需 3 日發酵熟成,呢幾日天氣咁熱,我只係發酵 2 日。


- 醃好熟成嘅泡菜可放入雪櫃內保存。


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans



自家醃製韓式泡菜 Homemade Kimchi

          喺我眼中,韓國泡菜應該係平民食品,除咗辣椒粉之外,其餘材料都係平價貨,但係街賣就真係好貴,真係買唔落手,所以我一直都想自己郁手醃泡菜。

        坊間教整泡菜嘅食譜真係周街都係,但係有啲食譜一望就知道係改良過,有啲又好鬼求其。後來我喺圖書館度見到一本食譜,成本都係教整韓國泡菜,望落材料比較正宗,而且做法比較複雜,醃嘅時候又會用到韓國傳統醃菜缸,最重要仲係,書中仲介紹埋韓國唔同地方醃泡茶嘅特色,全羅道、京畿道、慶尚道、濟州道 …… 通通都有介紹,覺得呢本食譜應該靠得住啦!

        不過,正因為夠哂正宗嘅關係,佢係教先用鹽將菜鹽至軟身,夏天要約 4 - 6 個鐘,冬天就要十幾粒鐘,醃好調味之後,仲要室溫放 2 - 3 日等發酵熟成,真係夠哂長命!所以呢本食譜其實已經係上年冬天借咗返嚟,一直等到呢排天氣勁熱先郁手醃囉!
 

2011年6月23日星期四

淮鹽七味雞翼

        今晚教琴夜返,但係又要煮飯,真係要整啲快、靚、正嘢!


        晏晝用真空煲煲好雜菜湯,放工返到屋企明火煲番廿分鐘就有靚湯飲兼有雜菜做餸。除咗咁,仲要整啲肉俾老竇食,所以煲落湯之後,我就醃定啲雞翼喺雪櫃,返到嚟煲番滾啲湯時就開爐焗雞翼,真係完全唔嘥時間,夠哂快手又方便!



材料:
雞翼
麥芽糖


醃料:
淮鹽
七味粉

紹酒
日本醬油
老抽


- 雞翼解凍,洗淨後用抹手紙索乾水份。


- 將全部醃料材料撈勻,之後放入雞翼醃好。


- 雞翼醃好之後,放上烤盤,放入已預熱至 220 °C 嘅焗爐內焗 10 分鐘。


- 將雞翼反轉,再焗多 7 - 8 分鐘。


- 用麥芽糖搽勻雞翼表面,放番入爐,用烤焗功能 ( grill ) 焗多 2 分鐘就攪掂。



味道有多種層次,鹹、辣、甜都食到,最特別係淮鹽味,
一食就食得出!


 


Notes
- 無淮鹽的話,可用普通鹽代替。


- 麥芽糖可預先用熱水座熱或放上焗爐頂用熱力軟化,會更加容易搽上雞翼表面。


- 鍾意的話,雞翼出爐後可以再灑上七味粉,令味道更加香辣。



        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans