2014年5月29日星期四

日式素雜煮飯 Vegan Takikomi Gohan

        自從 Youtube 度搵到日本型仔廚師 Ryoya Peaceful Cuisine 頻道之後,真係知多好多素食主意及製法,就算係食齋嘅日子都多咗好多選擇。

        最近睇番佢之前教過整日式有味飯,完全唔難整,趁今晚係初一要食齋,即刻試整。煮緊飯嘅時候已經聞到好香牛肝菌同牛蒡嘅香味,味道亦啱啱好,唔會太淡或過鹹,唯一美中不足嘅係,用瓦煲煮飯會黐底兼有飯焦,同埋又有醬油同糖一齊煮,就變得燶上加燶!依家個煲用水浸過夜,希望聽日洗得到喇!

 



2014年5月28日星期三

椰香焦糖醬 Coconut Caramel Sauce

        好耐之前都已經整過一次焦糖醬,但係覺得味道好難食,奶味好重,食到反哂胃!我本身其實係幾鍾意焦糖味道,有焦糖香之餘又唔會太甜,所以今日又再試過整多次個焦糖醬,不過今次就改用椰漿代替淡忌廉,印象即刻改觀呀!
 
 

乜咁重禮呀!!

        人與人相處有時候真係好奇妙,估唔到喺個虛擬世界度都可以識到好朋友!
 
       自從開始寫 blog 之後就識咗好多 blog 友,當中當然有啲係比較熟落又傾得埋啦!大部份識 blog 友都係喺香港,但都好少會約出嚟見面,試過有個仲見都未見過就已經嗌交收場,仲無朋友做㖭!反而我同妳隔咗個太平洋,仲一直保持聯絡,就算妳近排出番嚟做嘢,又要返工、又要打理頭家而無時間寫 blog,我哋私底下都有電郵通訊,保持到呢份友情真係好難得!
 
        妳實在太客氣喇,我都唔係幫到妳啲乜,只係舉手之勞,自己攪掂完就順手幫埋妳啫,都唔算得上話係幫到妳一個大忙!妳趁大少返港就叫佢帶咁多手信俾我,真係超感動哦!真係講都唔信,其實大家都未曾見過面,妳真係好有心呢!!
 

拍黃瓜

        天氣一下子就熱到天文台要發出酷熱警告,涼拌菜式係時候要出籠喇!咁多種涼拌菜中,拍黃瓜算係簡單易做又好味!
 
 

2014年5月20日星期二

沙茶茄子燜麵筋

        唔知大家有無聽過,沙茶醬其實係沙爹醬,只不過潮州話中 呢個音係解作茶,潮州人飲茶叫做 蓆爹嘛,所以將沙爹醬寫成沙茶醬。但係我覺得兩者個味道都幾唔同,一食落口已經分得出。
 
        今晚用咗沙茶醬嚟燜茄子同炸麵筋,兩樣食材都燜到入哂味,超正呀!!
 
 

2014年5月14日星期三

焦糖咖啡布甸

        真係慘,人家飲咖啡係一種享受,係 歎杯咖啡,而我就好多時為止頭痛而飲,仲攪到依家中埋咖啡毒,唔飲唔得,做成依賴,如果嗰日無咖啡因喺體內的話,成日都會頭痛不止,直到飲杯咖啡落肚先可以解決問題,所以好多時候根本唔想飲咖啡都要夾硬整杯落肚,以免頭痛加劇,影響工作!不過好彩,近排好似好少少,間唔中都可以全日一杯都唔飲,但都真係一日咁多,第二日瞓醒未落床,睜開眼都已經 feel 到個頭又試怪怪哋,試過有次好叻,連續兩日都唔使飲,點知到第三日就慘囉,個頭痛到爆!!!

       無飲咖啡嘅日子,未必真係頂得到全日,有時到夜晚十一、二點就開始嚟料,第三餐都未食就已經發作,但係無理由咁夜仲走去沖杯咖啡嚟飲㗎!其他人係點我就唔知喇,但對我嚟講,因為缺乏咖啡因而頭痛的話,食止痛藥都完全無用,一定要有咖啡因落肚,咁點算好呢!?


 
 

健康飲食

        其實我自己都唔算係食得好健康,只係少肉多菜,奉行三低一高嘅飲食,但唔知點解,身邊個個人都覺得我食得好健康,幾乎係不食人間煙火咁滯,可能因為見我都唔多鍾意食零食 ( 基本上次次入嚫「759」都係得個睇字,無嘢好買,空手出番嚟! )、唔飲汽水、唔飲凍嘢,又好少出街食啦!有時細細個嘅學生貪得意話請我食啲小食或零食,佢哋媽咪就會話:「關 sir 食得好健康,唔食呢啲嘢㗎!」有次老表 Lily Winnie 分別見到我煮即食麵都即刻覺得好出奇、好驚訝,點解我會唔食即食麵!?講真,自己都有整包餅西點食,又因為止頭痛會飲咖啡,健康得去邊呀!!不過咁,總好過買街外食物嘅!

        最近上網睇番香港電台個電視節目《緣來好食得》,其中一集叫做《我與西瓜和火龍果的三角戀》,裡面有介紹到周兆祥博士主張嘅 食生,即係大部份食物都唔會經過高溫處理,盡可能生食蔬果以保留裡面嘅酵素,其中最得意嘅係將個翠玉瓜用一個特製機器刨成長絲當麵條食。呢種食法聽落都好健康,但生食瓜菜都應該幾寒涼,長期咁食,我估我身體應該未必接受得到囉!講開周兆祥博士,佢成日都推崇健康飲食、食素、以至依家嘅食生,本來係件好事,但我個人就覺得,以佢個咁嘅 outlook,真係有啲唔係好夠說服力囉,俾人以為食素、食齋嘅人就會好似佢咁又瘦、又黃、又黑!!可能會嚇怕好多有心人!
 



木瓜雙耳果仁湯

        一直以嚟我都多數係煲齋湯多過煲肉湯,因為我唔係食肉獸兼極之唔想處理生肉,二來就係唔知點解煲嚫肉湯都唔多有甜味,反而煲齋湯就次次都超甜!而最重要嘅係煲齋湯的話,無論事前事後嘅清洗工作都簡單好多,因為全無油脂,但煲肉湯就煩好多喇,起碼又要洗多個用嚟汆水嘅煲!

        正因為咁,即使我煲齋湯都好少會落果仁,除咗因為避免有油脂外,無落果仁煲出嚟啖湯會比較清甜,無咁 。前幾日睇肥媽個節目,見佢教用果仁煲齋湯,諗吓自己都真係好耐無落果仁喇,今次就加番腰果同合桃落去啦!
 
 

2014年5月10日星期六

母親節的親子丼飯

        每年嘅母親節,我都一定會諗起親子丼飯,但可惜到我識煮飯時,媽咪都唔能夠親口嘗一啖呢!

時間真係過得好快

        時間真係過得好快,眨眼就已經七年喇,覺得一切都好似剛剛發生無幾耐咁!由最初唔習慣,樣樣事都仲係想返到屋企同媽咪分享,到依家已經習慣咗一個人住,時間就係咁樣過去了!
 
 

2014年5月8日星期四

焦糖蘋果麵包布甸 Caramel Apple Bread Pudding

        麵包布甸都唔係第一次整,之前都已經整過好多次,不過今次就試吓加入焦糖蘋果,同埋參考 blog Allie 嘅做法,唔落 cream 落去整,而我自己就更加健康,連牛奶都用水代替埋。
 
        呢個布甸可以話係一個極之環保嘅甜品,點解咁講?因為可以一次過清咗啲隔夜麵包同供過佛嘅蘋果哦!
 
 
 

初試年糕製作

        一個人食嘢嘅口味真係會隨年齡改變,記得好細個時,有次同家人一齊去上海菜館食飯,媽咪叫咗碟炒年糕,嗰次係我第一次食呢樣嘢,感覺好難食,好難吞得落肚,自此之後都唔肯再食。直到唔知幾時,再試多次之後,突然之間又覺得好好食,特別鍾意佢煙煙韌韌嘅口感,所以自從自己要煮飯開始,都會間中整嚟食,特別鍾意食韓式年糕,因為辣嘛!

       其實年糕都唔平,無論係中式年糕定係韓式年糕都賣得好貴,我成日都覺得,一堆咁嘅粉糰點解賣咁貴,如果自己識整的話就肯定平好多,於是就上網試吓搵唔搵到食譜。喺網上都搵到好幾個年糕製作方法,但其實都係大同小異,今次試整嘅方法係我將幾個食譜綜合而成,成品口感都唔差,不過就覺得個煙韌度差少少,下次試試將糯米粉同粘米粉比例改一改,睇吓會唔會好啲先!

 

2014年5月7日星期三

香草番茄全麥麵包 Tomato & Herbs Whole Wheat Bread

        仙姐本《天然麵包香》買咗咁耐,都只係跟食譜整過一次包,之後一直都無再整喇,皆因嗰陣未有麵包機,只係用部 food processor 搓麵糰,但 17 小時中種原來係濕得好緊要,所以攪攪吓個麵糰就捲咗入部主機裡面,之後要善後好耐,自此之後就驚咗唔敢再整喇!依家買咗部麵包機之後,可以試試再整。         

        食譜裡面個油浸半乾番茄麵包最吸引我,因為記得好耐之前 Rachel studio open day 時,買過仙姐呢個麵包嚟食,超好味,所以一定要試吓自己整!我今次就將個食譜改咗少少嘢,將部份高筋粉改成全麥粉,橄欖油就用浸番茄乾油代替,仲加埋 oregano 落去整㖭!



2014年5月6日星期二

又執到筍嘢

        話說上次AEON」會員特價日,去到屯門店想賣嗰樣無嗰樣,買乜無乜,激到爆,但原來又係塞翁失馬哦!禮拜六嗰日早咗到銅鑼灣,又有排都未到時間教琴,於是又走咗去超市打個 round 打發時間。

        味噌係我雪櫃裡面嘅長期住客,最鍾意用去嚟做湯底,無時間煲湯時就大派用場,買些少蔬菜料滾湯,最後加入少量味噌,即刻有啖湯飲。煮麵時又可以用佢嚟做湯底,好過用味精啦!中間第二餐我自己好多時都會煮麵食,而且食得好簡單、好求其,通常都係淨麵一碗,唔會有其他材料,煮好麵後就加入味噌同味醂調味做湯底,又快又方便!

 

2014 佛誕

佛誕快樂,阿彌陀佛!
 

2014年5月4日星期日

原味鬆餅食譜 Basic Muffin Recipe

        如果你係由 Yahoo Blog 睇到依家 Google Blog 的話,可能你都會留意到我都會經常整 muffin,而且都曾經整過好多款式,但其實都係萬變不離其中,我一直大部份時間都係 base on 同一個 muffin recipe,然後再加加減減,又或者更改部份材料而做出不同口味。
 
        上次 Winnie 試過個焦糖蘋果鬆餅之後,佢都話味道唔錯,連一直都唔多鍾意食 muffin嘅佢都專登打電話問我點解個 blog 搵唔到個食譜,咁之唔係因為我懶無寫囉,哈哈!!
 
        所以我就諗,不如將我一直用開 basic muffin recipe 同大家分享啦,之後大家就可以 base on 呢個 recipe 嚟做出自己喜愛嘅口味哦!