2014年10月28日星期二

超鬆軟的紅麴甘酒麵包

        近排老友 Louisa 跟仙姐一齊出國學整麵包,當然學到好多嘢啦,佢同我哋講,原來用直接法整嘅麵包都可以好好食,就算放到第二、三日都依然軟熟,秘技就係翻面!翻面係歐洲人整包時會用到嘅一種手法,喺麵糰第一次發酵完成兼排氣後,通常都會將個麵糰滾圓,之後鬆弛十至廿分鐘或作第二次發酵,Louisa 就教我哋用翻麵代替滾圓,排氣之後將麵糰上下左右向內摺入,然後收口向下鬆弛 15 – 20 分鐘,時間許可的話,可重覆多一次,之後先至最後發酵,藉此將空氣摺入麵糰內,令麵糰內含有更多空氣幫助膨脹。
       

        前日又整紅麴甘酒包,今次有少少特別,額外落多少少水落去搓麵糰,放入雪櫃低溫發酵過夜,第二日拎番出嚟回室溫後就排氣,之後翻麵一次,最後發酵 45 分鐘就入爐焗。
 

泡菜雜菜鍋

        知道有韓國部隊鍋呢樣嘢好耐,但就唔太清楚其實係乜,睇相咪又係一貫韓國泡菜鍋咁一鍋紅湯,加多個即食麵落去。咁啱 Maangchi 姨上個禮拜教整呢個韓國部隊鍋,佢話自己都未試過呢個菜式,只不過不斷有讀者叫佢教整,佢先至飛返韓國去唔同食肆試菜,之後再教網友整。
 
        睇番佢個網頁,原來呢個菜嘅來歷係源自於韓戰之後,美軍將午餐肉、香腸、火腿、茄汁焗豆等罐頭醃製食物帶入韓國,呢類罐頭食品對於當時嘅韓國人嚟講相當新鮮,於是韓國人就開始將佢哋加入傳統泡菜鍋內。
 
       清楚知道之後,我更加唔會試囉,就算係 Maangchi 姨都坦言佢唔覺得咁樣嘅煮法會好味,吸引唔到佢!喺我眼中韓國飲食都比較著重天然食材,又有自己一套嘅養生食療,甚至會用到中藥材入饌,就連一般煮餸或醃泡菜都會用梨去代替砂糖提供甜味。呢個部隊鍋無啦啦走去加啲罐頭食物及即食麵落去,最頂癮嘅仲係茄汁焗豆,真係想像唔到個味道有幾好食囉!
 
        雖然我自己就唔會整呢款部隊鍋喇,但睇完Maangchi 姨點整個湯底,又覺得幾吸引喎,就用自己鍾意嘅食材,再參考個湯底部份用料整個泡菜鍋啦!
 

2014年10月27日星期一

純素芝麻豆腐雪糕 Vegan Sesame Tofu Ice-cream

        喺型仔廚師個 Youtube 頻道度見到個 vegan ice-cream 好耐都無的起心肝整,咁啱早前整芋頭紫米露時用剩咗啲椰漿,要盡快清埋佢,因為椰漿好易變壞。突然諗起可以用嚟整雪糕,咁就趁天氣仲未係好凍,快啲試整 vegan ice-cream 食譜。
 
        今次係 base on 型仔廚師個 tofu ice-cream,自己再加啲減啲,就變成黑芝麻雪糕喇!由於整呢款雪糕係唔需要煮過或加熱,原本想買盒裝即食豆腐嚟整,感覺上比較衛生,但始終都係嫌盒裝豆腐豆香味唔夠,最後都係買番街市豆腐檔豆腐嚟整,反正腰果我都會先汆水,跟手放埋件豆腐落去囉!( 但其實型仔廚師係無將腰果汆水㗎,原粒就咁用)
 

2014年10月16日星期四

秋葵芽菜米紙卷

一袋秋葵返嚟,無可能一次過食得哂,今日就用剩低嘅秋葵整咗米紙卷。

 
 

辣炒秋葵鮮淮山

        呢碟餸都真係 黏鬥黏,潺鬥潺,切完秋葵之後再切鮮淮山,攪到成隻手都係潺,黐黐立立,好似有啲唔知咩喺手咁,哈哈哈哈!!!

        好多人都唔多鍾意食秋葵,我估可能係煮得太過耐,煮到太軟身、太過黏,其實秋葵原本係可以生食,不過我自己就未試過,無論係炒定係灼熟,一、兩分鐘就得㗎喇!
 

2014年10月10日星期五

2014年10月8日星期三

眉豆南瓜粟米粥

        曾經有 blog 友話發覺我好鍾意食雜糧,係呀,我絕對唔係一個飯桶,唔多鍾意食飯,就連粥都好少煲,就算以前媽咪喺度時,晏晝嗰餐都幾乎完全唔會煮飯食,可能媽咪都一樣唔係飯桶!
 
       突然呢個禮拜想食粥,就趁今日月圓之夜煲個齋粥。
 

焗爐版 Fish & Chips

        炸魚薯條呢樣嘢真係無諗過自己整,因為我由細到大都唔係太好煎炸食物,但最主要原因都係要開鑊油炸,係我至憎做嘅動作!好耐之前已經知道咗薯條可以用焗爐做成免炸少油版,而最近又喺 Masa 個網站度見到連可樂餅都可以用焗爐做到,真係超吸引,一定要試試!
 
        傳統 Fish & chips嘅炸魚應該係用脆漿包住魚柳嚟炸,但係要入爐焗的話就無可能用脆漿喇,所以唯有用吉列做法啦!
 
 

他他醬 Tartar Sauce

        前排睇 Jamie Oliver 嘅《大城小廚快煮半粒鐘》教整 tartar sauce,簡單又容易,材料都容易買到,即刻試整先!
 

2014年10月4日星期六

抹茶全麥鬆餅

        最近心血來潮,好想食綠茶整嘅嘢,對於我嚟講,整 muffin 就係最快手有得食,已經係熟手技工一名喇!
 

抵!!

        最近去「佳寶」買嘢,可以以 $29.9 換購「Glasslock1100ml 密實玻璃盒,真係超抵,呢個 size原價應該賣開 $5X - $6X,依家即係大約半價就買到喇!
 

泡菜豆腐烏冬

        原本今朝要 11:00am 去到佐敦,點知學生突然改到 2:00pm 先上堂,咁仲好,可以瞓晏啲之餘仲可以喺屋企食埋先出門口,又可以慳番啲! 

        依家出外食嘢真係好貴,上次教完之後同 Li Kien 落樓下間茶餐廳食碗湯粉麵包杯熱飲已經 $44,根本俾大部份嘅錢都係幫商戶交租!!好在我份工返工時間好特別,如果迫住要用街食的話,都可以揀 tea time 先食,真係平好多,再唔係咪幫襯「麥記」囉,全日都有廿蚊餐供應。


2014年10月1日星期三

自家發芽菜

        相信大多數人小時候都試過用綠豆發豆芽,當時最多都只係攞幾粒嚟玩吓,當做實驗,真係完全無諗過可以真係自己發豆芽作食用,而且仲係非常容易、非常簡單,三、四日後就可以食用,都幾過癮!但最重要係可以食到乾淨、新鮮兼無添加嘅芽菜,聽聞街賣嘅芽菜為求短時間內標得夠高就推出去賣,所以會落激素加速生長!
 
       每次去嚫街市買芽菜返嚟都好怕摘芽菜根,逐條逐條咁去摘,雖然係手板眼見功夫,但真係悶到爆!依家自己發芽菜就方便好多,未將芽菜抽出前就已經可以喺個筲箕底預先將芽根剪走,又或者可以一大束芽菜摵出後,用刀一次過切走啲根,真係快手好多,可以慳番唔少時間。