2015年7月28日星期二

辣椒蘿蔔煮年糕

        做嘢真係唔好心急兼貪快,肯定會出事!!
 
        話說今日晏晝整年糕,開粉漿整粉糰時無逐少加水,一下子就加多咗喇,攪到個粉糰比較糊狀,都唔緊要啦,反正都入微波爐加熱 "" 熟,肯定會扯乾水份,但係入爐時又貪方便,一次過校 2 分鐘,咁又衰多鑊喇,成底粉糰熟透兼幾乎硬哂,好彩之後放入麵包機攪拌時慢慢加番水去搓,最終都能夠搓番軟熟,真係一額汗!! ^^"
 
 

2015年7月27日星期一

及時雨

        今晚一心準備偷懶食隔夜餸就算數,所以無落到街買餸,點知原來自己擺烏龍,所有隔夜餸已經食清都唔記得咗!!好彩及時雨到,打救咗我,咁就唔使落街買餸 lu,呵呵!! ^^"
 
 

2015年7月26日星期日

涼拌青瓜雲耳

        雖然我一向都唔多食凍嘢,但天氣炎熱嘅夏天都會食多咗涼拌菜,當中最簡單易做又受歡迎嘅就一定係涼拌青瓜!
 
 

今日的第一餐

        噚晚整落豆漿加乳酪種發酵過夜,今日瞓醒起身就可以用嚟預備第一餐。
 
 

2015年7月16日星期四

赤味噌煮雜菜

        我多數都會用赤味噌嚟煮餸或燜餸,好少用嚟整麵豉湯,因為味道比較濃、比較鹹,唔係咁適合我口味。
 
        呢個煮雜菜其實同西式煮法都差唔多,一樣有落茄膏,只不過加咗少少赤味噌提味。
 
 

2015年7月11日星期六

偷懶

        酷熱天氣警告又嚟過,真係喺屋企乜都唔做都會出汗,加上大懶蟲上身,唔願落街買餸哦!!好彩屋企仲有兩棵小棠菜,再浸啲粉絲、冬菇、木耳同枝竹,咁又攪掂咗兩餐喇,哈哈!
 
 

2015年7月10日星期五

芒果蓉鴛鴦糯米

        以往整椰汁芒果糯米呢款甜品,我都會用新鮮芒果切片伴食,但今次就有啲唔同,用咗芒果蓉代替,一樣咁正!
 
 

窮人刺身,素食魚生!

        好耐好耐之前,印象中好似係媽咪話俾我知,以前日本啲窮人食唔起刺身,會用牛油果代替,望梅止渴吧,皆因剛好熟透嘅牛油果,口感軟滑豐腴,食落口真係有幾分似食三文魚刺身呀!
 

2015年7月9日星期四

食得健康嗎?

        呢兩日天氣跟之前真係完全兩回事,唔單只氣溫低咗唔少,仲好大風、好涼爽㖭!夜晚瞓覺時唔使開風扇之餘,瞓瞓吓仲凍醒要搵被冚!
 
        今朝因為無特別事要做,所以瞓到好晏先起身,頭兩餐合拼埋一餐食,食完之後就出門去教琴。正當一砌準備就緒,諗住影完相就開餐之際,突然收到 Ada 電話,問我係咪好大風好大雨,我話無雨落,只係好大風,咁 Ada 就叫我不如立即過去同妹妹上堂,好過之後大風大雨時要出街,咁我當然係 say yes 啦!所以我就嗱嗱聲換好衫,塞隻蕉落肚就出門口,最終教完返嚟六點鐘先食第一餐呢!
 
 

2015年7月8日星期三

椰汁香茅燜南瓜

        本來打算用椰漿及其他香料煮南瓜,做成一道帶東南亞風味素菜,但細心諗清楚,原來馬拉盞唔係素呢!咁就索性順手清埋雪櫃盒清雞湯啦!
 
 

2015年7月7日星期二

老黃瓜羅漢果霸王花湯

        今日係小暑,但反而無上個禮拜咁熱,喺廚房做完一輪嘢都無身水身汗。
 
        原本應該買冬瓜煲湯消暑,但早兩個禮拜已經煲過冬瓜,所以今餐就用老黃瓜煲湯。其實都唔知加霸王花落去夾唔夾,只係純粹多一樣餸,不過都唔緊要啦,反正霸王花又唔係藥材,應該食唔死,唔會中毒,呵呵!!
 
 

2015年7月6日星期一

買慣買熟

        噚日去菜檔買絲瓜,因為依家地方淺窄嘅關係,好多時啲嘢都係放入檔口內,無得自己揀,只可以叫檔主拎俾我,菜檔姨姨揀好兩條絲瓜,秤好兼計好哂錢話俾我聽後,突然又換過第二條俾我,我問佢做乜事,係咪爛,菜檔姨姨話唔係,只不過好老,話我成日幫襯買慣買熟,唔俾嗰條我喎,之後仲收平我㖭!
 
        其實我都絕少好似啲師奶咁同啲檔主 / 阿姐打牙較,係粉麵檔個哥哥就會講多兩句,不過佢哋真係認得我,所以好多時都會話我知邊樣好邊樣唔好,有時仲會教埋我點揀。
 
 

2015年7月5日星期日

給同事們的班蘭雪芳蛋糕

        Miss 哋成班導師及同事聽朝一齊飲早茶,順便講番今日同學生做評估嘅表現,難得全部人到齊,整個蛋糕俾大家啦!
 
 

2015年7月2日星期四

臨時變卦

        前兩日去菜檔買菜時,個菜檔阿姐搭咗條又靚又粗大嘅蔥俾我,當時我一見到就即刻諗住用嚟整蔥油餅。
 
        但係到咗今日準備開工前,突然之間諗到要企喺個熱廚房之餘,仲要對住個煮食爐慢慢煎餅,就即刻打退堂鼓,改為整呢個香蔥全麥包,麵糰發酵好之後入爐焗,唔使企喺度陪住佢一齊熱嘛!