森永抹茶糖

        早前喺 Facebook 度見到明仔買咗隻綠茶糖，睇見都好吸引，於是就搭佢幫我買一盒。點知佢又唔收我錢，好彩咁啱我又整咗曲奇俾佢，咁就當係交換禮物啦！

睇個盒個包裝就好似藥油，裡面獨立包裝嘅一粒粒糖就成粒雞精咁款。

 

粒糖好重抹茶味，勁香濃，啱哂我口味！睇真啲個盒，原來係用
100% 宇治抹茶嚟整，唔怪得之咁正啦！

        多謝哂你呀，明仔！

鳥羽名古屋料理@銅鑼灣

        晏晝同 Miss 食完 lunch 之後，明仔就 join 埋我同 Winnie 一齊行街睇嘢，不過今次真係辛苦哂明仔喇，因為佢原來唔慣行咁多路，到臨走時仲頭痛 o添，見到佢 "紅都面哂"，真係幾驚佢爆血管呀，果陣我都唔知點算好喇！！ 明仔，你應該一早同我單聲你習慣四、五點後先出動嘛，不過下次我會醒水 o架喇！

        果晚我哋就去咗銅鑼灣嘅「鳥羽」度食日本嘢。呢間日本料理係明仔嘅心水之選，佢專登帶我同 Winnie 一齊去試吓 o架！ 

        一出 lift 見到呢個 feature wall，我就好肯定喺電視節目《大廚出馬》度見過呢間舖，我仲記得個節目度馬浚偉跟個大廚學整味噌關東煮，係呢度大廚嘅首本之作。原本我都想叫嚟試吓，不過因為明仔同 Winnie 負責點菜，況且我點咗佢哋又未必鍾意食，所以我就無出聲，留番俾明仔做推介啦！反正喺個節目度都有詳細教點整，一於下次自己試吓整嚟食。

舖內環境都好舒服。

 

呢碟味噌蘿蔔唔知係咪每枱都有嘅前菜呢？我同 Winnie 去到時已經
見到有一碟，到我哋兩個坐低時又再拎多碟過嚟。原本每碟都有
兩件 o架，不過因為明仔同 Winnie 各食咗一嚿我先至影相。

 

明仔推介嘅白桃乳酸特飲同巨峰乳酸特飲。

 

呢碟係「手羽先唐揚」，明仔話係鎮店之寶，果然真係好好食呀，唔會好肥，
香辣味又啱啱好，節目度都有介紹，係大廚首創 o架！

 

呢個炸蛋黃天婦羅真係一絕，好食到震！！ 外面果層腐皮炸到脆卜卜，
裡面個蛋黃就仲係流動 o架！節目度都有介紹製作過程。我見 Winnie
唔係太鍾意食蛋，所以我就食多一件，咁就可以讓佢兩個
食多隻雞翼啦，皆大歡喜。

 

呢個係雜菜天婦羅，又係勁好食，番薯同南瓜都好香甜，
仲有一件唔知係咩菇，香到呢 ……

 

        叫咗四款燒物，分別係露荀豕肉卷、雞肉丸、牛脷同廣島蠔。露荀豕肉卷好正，露荀 "好荀"，又爽又甜，外面豬肉唔覺得 "漏"；雞肉丸非常彈牙，因為節目度介紹係用山薯溝雞肉嚟整，唔會好似中式肉丸咁用生粉整而變得太過實。至於牛脷同廣島蠔我就無食到，不過 Winnie 食緊串蠔時都聞到好濃蠔味，難怪佢都話 "好蠔"！

 

呢碗係鯖魚茶漬飯，又係另一驚喜，咪睇見啲湯咁清，以為無乜
味道，查實好鮮味 o架，件鯖魚亦都好鮮甜、"好魚" o架！
屋企冰箱都雪咗條鯖魚，搵日試吓自己整先！

        明仔真係無介紹錯呀，非常好食，埋單每人差不多 $200。雖然呢一餐對我嚟講都係一餐 "出血" 餐，但就真係物有所值囉。我自己少出街食飯，唔係好知行情，佢哋就話算係平 o架喇，有興趣嘅朋友不妨一試，值得推介！你哋可以 click 番上面各條 link，睇吓各款食物介紹。

P.S.  食完飯之後，我哋三個繼續行街，行到以前「大丸」對出果條路時，明仔見到周麗淇喺條街度一邊唱歌，一邊拍 MV，佢話好少見到明星，於是就拎部電話出嚟影相，我同 Winnie 就無乜興趣。不過我同 Winnie 就見到啲勁攪笑嘅嘢囉，有條 "佬" 好似成世未見過 "靚女" 咁，一路揸住杯嘢一路行，個頭係咁擰歪望住周麗淇，突然間 "嘭" 一聲，佢撞咗落個路牌度，之後就一邊傻笑，一邊捽個額頭，街上有幾個人見到都喺度勁笑，當然，我同 Winnie 都勁笑爆嘴啦！！唉，真係一個行路唔戴眼嘅 "鹹濕佬"！好彩周麗淇見唔到咋，如果唔係，肯定笑到拍唔到落去呀！！！！

朝陽飯莊@ i SQUARE

        星期一果日由朝到晚都唔係屋企食，我諗呢次係近十年嚟因為食而最勁嘅一次 "大出血" 呀！之前同嚟緊都仲有錢要駛，而且數目唔細，睇嚟都預咗 "血崩" o架喇！！ 各位，邊個做個好心幫我 "輸定血" 先啦！！！！！

        差唔多一個月前，Miss Cheng 一早已經約咗我同 Winnie 呢日食 lunch 共商大計，因為 Miss 之後要趕住去佐敦做嘢，所以佢就揀咗去尖沙咀食，夠近嘛！Miss 話想去 i SQUARE 間「朝陽飯莊」試吓，於是 Winnie 就預早 book 定枱，費事到時仲要慢慢等。

Winnie 好醒目，專登 book 張有海景嘅枱，而且個景仲好靚 o添！

 

雖然我哋只係得三個人，但係因為個四人餐好抵食，所以就決定叫個
四人餐。除前菜外，仲包四杯豆漿。

 

首先嚟嘅係酸辣湯。個人就覺得麻麻哋，又唔夠酸、又唔夠辣。

 

Miss 點嘅蝦仁炒蛋，呢碟幾得呀，蝦仁夠爽，有鮮味，蛋亦炒得好滑。

 

呢碟係醬爆雞丁，味道一般，雞肉亦較嚡！

 

雪菜毛豆百頁正呀！毛豆腍度啱啱好，唔會太硬；百頁又吸收到
雪菜嘅鮮味。

 

我好鍾意食嘅上海炒年糕，味道不過不失，無乜驚喜。

        不過食年糕真係好襟飽，原本兩位女仕都預咗我一個人食兩份，所以先叫個四人餐，但係因為有呢碟年糕，依家變得細食嘅我都真係唔可以清得哂所有嘢呀！其實個餐仲有包埋飯後甜品，係紅豆沙，不過連 Winnie 都話味道淡，我當然就嫌佢唔夠甜啦！而且我食到個 texture 好似用咗馬蹄粉嚟埋芡，呢層我就唔多 buy 喇，我寧願好似水咁稀好過！

        個餐原本 $2XX，計埋茶錢、前菜同加一，埋單計數 $300，我同 Winnie 每人 $150。( 呢次我哋醒喇，"吼" Miss 去 toilet 時即刻叫埋單，所以今餐唔駛同佢爭俾錢喇！ )

燕麥紅莓杏仁曲奇 Oatmeal Dried Cranberry & Almond Cookie

        上次整果個燕麥朱古力曲奇大獲好評，我同番 Winnie 講，佢話我仲好講，都唔拎啲過去俾佢試吓喎。唓，又係佢話我整啲曲奇無牛油香嘅，依家又話我唔拎啲俾佢食，作死咩！！  好啦，見係妳咋，今日就整多一次俾妳試吓啦！不過今次我唔用朱古力粒，改用紅莓乾同杏仁條嚟整，轉一轉口味嘛！

燕麥朱古力曲奇 Oatmeal Chocolate Chips Cookie

        禮拜六果日，Louisa 卒之正正式式搬新屋喇，今日係我喺裝修好之後第一次上去，雖然佢哋仲有好多要執頭執尾，未正式招呼朋友，但係話哂都叫做第一次去佢新屋，親自整少少曲奇送俾佢做 "見面禮" 先，到時約埋明仔同 Winnie 一齊上去時先整番份大禮啦！

焗紅豆西米布甸 Red Bean & Sago Pudding

        早前喺圖書館度借咗本教整甜品嘅書，裡面有個食譜係我鍾意食嘅西米布甸。

        其實要整西米布甸唔難，而且食譜亦好容易搵到，不過呢個食譜特別之處，係同我細個果陣見到嘅西米布甸一樣，面頭有層焗到金黃色嘅蛋白霜。我一睇到呢個食譜就即刻諗番起細個果陣，媽咪都整過俾我同細佬兩個食，雖然無焗到蛋白霜，但當時都已經好滿足。

        好，今晚一於追尋番細個時嘅回憶同味道。

材料：
西米          180 克
水              440 毫升
糖              115 克
吉士粉      30 克
粟粉          30 克
椰醬          160 毫升 ( 細罐裝一罐 )
蛋黃          2 隻份量
蛋白          1 隻份量
橄欖油      20 克
紅豆餡      適量

以上材料份量可做布甸 4 盅。

參考食譜：鄭慧芳嘅《幸福的甜品》。

- 先將西米處理好。

- 水 80 毫升、椰醬、蛋黃、吉士粉同粟粉拌勻成吉士粉漿，備用。

- 將剩餘嘅 360 毫升水煲滾，加入100 克糖、橄欖油、西米及吉士粉漿煮熟成布甸
  料。

- 先倒一半布甸料入焗盅內，加入紅豆餡，再次倒入布甸料，掃平表面。

- 用電動打蛋器將蛋白打至起泡，分次加入剩餘嘅 15 克糖打至企身。

- 將蛋白霜勺上布甸上面，用匙羹以打圈方式將蛋白霜推開至覆蓋整個表面。

- 將焗盅放上烤盤上，放入已預熱至 160 °C 嘅焗爐內，選擇烤焗功能 ( grill )，焗約 8
  分鐘至表面金黃即可。

呢個布甸口感真係豐富，蛋白表面就少少脆口，裡面就 "一陣風" 咁輕盈；
吉士布甸非常香滑，食到紅豆餡時就 feel 到一粒粒嘅紅豆，
仲有起哂沙嘅紅豆沙 o添，超正呀！

Notes：
- 如果想布甸香啲的話，可跟原食譜用牛油煮布甸料。

- 原食譜係用 120 毫升牛奶同 120 毫升水嚟開吉士粉漿。

- 紅豆餡可用蓮蓉、豆沙或栗子蓉代替，亦可以唔加餡做成原味布甸。

- 蛋白霜用作裝飾及增添口感，若厭麻煩的話可以唔整，直接將布甸表面焗至焦黃
  亦可。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

鮮橙西柚雪葩 Orange & Grapefruit Sorbet

        原本都無諗過要整 sorbet 嘅，但係之前喺超市買咗幾個西柚返嚟，食咗一個，發覺苦得好緊要，連一向鍾意食苦瓜嘅我都頂唔順，但係又無理由加糖落去食 o架！突然記起 Rachel 本《知廚之樂》有個柚子酒香雪葩嘅 recipe，所以我就參考咗個食譜，做咗呢個鮮橙西柚雪葩。

材料：
橙         1 個
西柚     2 個
檸檬    半個
水        50 毫升
糖        100克

- 先將糖同水倒入煲內，之後加熱煮至濃稠，熄火，攤凍備用。

- 將所有水果榨汁，連同留喺榨汁器上嘅果肉一齊倒入糖漿內拌勻。

- 之後放入冰格，雪凍 1 個鐘後，拎番出嚟，用叉將半結冰嘅果汁同果肉翻鬆。

- 放回冰格後，再雪 1 個鐘，重覆以上步驟 4 - 5 次即可。

 

Notes：
- 如果想雪葩食起上嚟質感較幼滑的話，就唔好將果肉加埋一齊整，而果汁份量就
  要加多一倍。

- 想整但又要偷懶，唔想做咁多功夫的話，可以買現成鮮橙汁及西柚汁代替。

- 糖漿毋須煮得太耐，因為攤凍後會自動凝固。若果攤凍後變得太硬而無法拌勻的
  話，可以將果汁倒入煲後，再次放上爐上，用最慢火邊加熱邊攪拌，但一拌勻就
  要立即離火。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

小女友珠胎暗結16歲父山頭埋嬰

        唉，睇完呢單新聞，都真係唔識講嘢，個心都好唔舒服，只有唏噓，希望呢對 "父母" 有 "好" 下場啦！一定要俾佢哋知道咩叫做「因果」！做任何事之前都要諗清楚後果至得 o架！！！

 

【明報專訊】粉嶺揭發中學生企圖埋掉初生女嬰恐怖命案。一對16歲情侶疑珠胎暗結，少女昨午在西貢寓所誕下女嬰後，身穿校服的「爸爸」聞訊到場，情急下用袋載走初生女兒到粉嶺向同齡友人求助。兩名少年昨晚將女嬰帶到欣盛苑對面山坡，企圖挖掘地洞埋掉女嬰，被途人撞破落網，女嬰送院不治，未婚媽媽亦被帶署調查。

有鮑魚食！

        前幾日原來 Louisa 有去到 Rachel 個 Petite Paris party，不過，因為佢係玩即興，突然間帶 Genevieve 一齊去，所以就無應大會要求著上藍、白、紅衣飾。

        Louisa 當日都買咗幾款仙姐親自製作嘅糕點，其中一件，係專登買俾我試吓 o架，係咩嚟？咪係人所共知嘅 "鮑魚" 囉！

因為影相果一刻仲未食，所以無搣開塊膠紙嚟影相。

        鮑魚中間唔係平時果隻焦糖醬，今次係藍莓醬，雖然我未食過焦糖醬嘅鮑魚，但係我諗起都覺得應該好甜，所以我認為呢個藍莓醬應該會更加好食，酸酸甜甜，食落會無咁膩。

        同場加影：玫瑰慕士半圓球蛋糕

呢個 mousse cake 係 Louisa 整 o架！

 

最外面紅色果層係脆朱古力噴醬；中間粉紅色係玫瑰慕斯，
中間頂層黃色係 creme brulee；中層係蛋糕；
而最底層紫色係荔枝。

        個蛋糕都 OK 好味 o架，不過我自己就略嫌酸咗啲，所以 Louisa 一早就話呢個 cake 實啱 "酸精" Winnie 食，不過啱佢食都無用，因為長途跋涉由馬鞍山拎到返屯門，都唔知會變咗舊咩喇！！

朱古力脆脆包

        自從「美心」出咗個朱古力雪山包之後，其他西餅麵包店都跟住推出類似物體，之前我都試過「聖安娜」果個朱古力菠蘿包，除咗賣相唔吸引之外，連個古古力餡都唔係好得囉，好彩係有 coupon 先買嚟試，感覺上好似無咁 "蝕"，所以我都費事影相寫 blog 喇！

        今朝去買餸時，順便走過去「山崎」睇吓有冇包包啱，有就慳番唔洗整 lunch，食包包算數！ 今個月嘅特價麵包，除咗有我鍾意嘅煙火腿蘑菇包之外，仲有新出嘅朱古力脆脆包，個款都幾吸引呀，所以就買嚟吓。

包包上面有我鍾意嘅腰果。

        我習慣將包包焗熱先食，不過坦白講，買果陣時，睇個包面都唔覺會脆囉，正話我已經用 grill 嚟焗 o架喇，個面一樣無料到，如我所想，有少少韌，粒腰果就真係好脆！ 個餡都 OK 夠香濃朱古力味，不過同「美心」個雪山包比就仲差一截，但肯定好過「聖安娜」囉！

天色唔好，個人又攰，真係煮碗麵都懶，求求其其，兩個包加杯即沖咖啡
就算數，咖啡機都懶開兼懶洗呀！食飽就出發去 Louisa 度喇！

多種籽鄉村包 Mixed Seeds Country Bread

        今日又有 "懶人兵團" 嘅成員整嘢食喇，佢係邊個，之唔係老表 Lily 囉！

        因為今朝得佢一個嚟上堂，所以我就叫佢早啲入到嚟一齊整麵包，等佢可以試吓新鮮出爐麵包嘅滋味。同時，最重要係想試吓用 Louisa 送俾我果個發酵籐籃嚟整包包。

材料：
T55 麵粉      220 克
稞麥粉          30 克
老麵              50 克
鹽                  5 克
糖                  10 克即用酵母      4 克
水                  約 160 毫升
橄欖油          20 毫升
燕麥粒          50 克
葵花籽仁      15 克
南瓜籽仁      15 克

食譜係參考自 Rachel Yau 嘅《知廚之樂》。

- 將葵花籽仁同南瓜籽仁放入已預熱至 180 °C 嘅焗爐內焗 6 - 8 分鐘至香味出。

- 將粉類、酵母、糖、老麵、橄欖油同水混合，搓成麵糰。

- 然後加入鹽，繼續搓成光滑麵糰。

- 加入燕麥及種籽仁，搓到完全混合好為止。

- 將麵糰滾圓，放喺已灑粉嘅兜內，冚好保鮮紙，進行第一次發酵，時間約為 1
  個鐘，麵糰大約發大兩倍。

- 將麵糰拎出，翻轉放上工作枱上，先上下向中間摺入，再左右摺入，之後放番
  入兜內作第二次發酵，發酵時間約 30 分鐘。

- 發酵後將麵糰拎出滾圓，放入已灑上手粉嘅發酵籐籃內作最後發酵，麵糰發大約
   3 倍。

       

- 發酵完成後，用利刀喺麵糰表面 "界" 出花紋，之後放上已鋪入爐防黏紙嘅烤盤
  上，放入已預熱至 200 °C 嘅焗爐內焗 30 分鐘。

 

- 其間每隔 10 分鐘就要喺爐內噴水 1 次，共噴水 2 次。

 

- 焗好之後放上架上攤凍。

 

 

        今日呢個麵包幾乎全由 Lily 一個人包辦哂，我只係擔任 "顧問" 一職。雖然佢口口聲聲話整包好麻煩、好複習兼嘥時間，但係睇佢個款就覺得好似等緊個 BB 出世咁，由個包開始 "成形"、"出世"、"成長"、"死亡" 到 "解剖"，佢都一路影低整個過程，心情既緊張又好興奮。

 

        喺放個麵糰入發酵籐籃之前，我先發現原來我唔記得落老麵喎，哎，真係激死人呀！！ 我真係老人癡呆得緊要！！

 

 

 

包包終於出爐喇！

 

 

 

 

用法包粉整麵包，果然真係皮脆肉軟，好正。

 

 

 

切緊個包嘅時候，Lily 已經開定咪話要拎件走，我叫佢拎返去俾表姐
同表舅母試吓佢嘅手勢，佢就話係向佢哋交功課喎！

 

 

 

新鮮出爐嘅麵包又點可以忍得住唔食呢！所以我就即刻
去沖壺咖啡，叫埋老豆三個人一齊開餐。

Notes：
- 老麵製作方法，可參考燕麥包做法。

- T55 麵粉即係法包麵粉，可以做到皮脆肉軟。如果買唔到的話，可用高筋麵粉
  代替。

- 燕麥粒需預先煮熟。