馬年新春

恭喜發財！

恭祝各位：

新春快樂，身體健康，

萬事如意，心想事成！

Muffin & Scone

        之前無時間整 scone，趁前兩日比較得閒，快啲郁手整番幾件嚟伴南瓜橙醬一齊食。反正都開爐，唔好嘥資源，一次過焗埋 muffin，今次又再整番好耐之前嘅番茄火腿粟米 muffin，不過呢次用咗大半辣椒油代替橄欖油去整，超正呀！！

 

 

 

久未露面的 mushroom risotto

        好耐無煮呢個 risotto 喇，因為之前用哂啲牛肝菌，但又一直約唔到 Louisa 做交收，所以無得煮囉！直到上個月，卒之到手喇，噚晚就煮嚟做晚餐。

 

今次呢隻牛肝菌勁香，即使浸透後再煮一段時間，

食落都仲好有菌香味哦，而且價錢又唔太貴，抵！

做法請參考《雜菌意大利飯》。

南瓜橙醬 Pumpkin & Orange Jam

        卒之都清哂所有果醬，又係時候要再整過啲新喇。

 

        其實最鍾意就係 marmalade，但係又唔想次次都係整佢咁悶，所以今次就試整南瓜橙醬，效果都唔錯，有橙皮醬嘅風味，亦多了一份南瓜蓉嘅質感！

 

 

 

冬天必食 — 西洋菜

        一踏入冬天，我一定會買西洋菜嚟食，因為係我嘅 "賣飛佛"！仲記得初初開始 incharge 個廚房時，以為一年四季都有得食，夏天時搵極都唔見有得賣，後尾先知原來淨係冬天先有呢！雖然對於入廚都唔係完全得個零，但當時真係好多嘢要慢慢學哦！

 

紅莓肉桂卷

        三年前整過一次肉桂卷之後就無再掂呢樣嘢喇，因為當年係跟足食譜用牛油做餡，嘩，難頂到呢，真係一路食一路反哂胃！但係我又一向好少浪費食物，無理由整左咁多個包全部掉哂佢㗎，唯有硬啃，所以一路都無再整，有陰影呀！！
 
        直到最近，又睇番《不使用砂糖的自然派 sweet 甜點》呢本食譜，發現原來都有肉桂卷，個餡係用紅花油嚟整，咁所以我今次就試吓改用橄欖油嚟整，果然好好多，起碼個人食得開心先啦！

        一般肉桂卷都會落提子乾，不過咁啱食哂，就隨手用紅莓乾代替啦，整嘢食就係咁靈活多變哦！

橙皮朱古力咖啡包 Orange Peel & Chocolate Coffee Bread

        橙同朱古力不嬲都係咁夾，用嚟整麵包，令到個麵包又香又甜。

  

雜果仁香料 biscotti

         上個禮拜老表話佢好鬼死忙，想整 biscotti 都無時間。諗番吓，自己都真係好耐無整喇喎！

 

沙蔘玉竹雪梨糖水

        上次就因為要清蘋果而整咗肉桂蘋果蛋糕，今次就到清雪梨。

 

        雪梨、雪耳、沙蔘、海玉竹同南北杏，見到呢幾樣材料，你會諗住點整呢？正常就梗係加嚿瘦肉或豬腱落去煲湯喇！之但係，呢排成日都好易頭痛，加上大懶蟲又成日喺我耳邊做魔鬼，最終意志都係敵不過大懶蟲，少嚿豬肉就自然少啲功夫啦！

 

        加幾粒冰糖，咁就即刻變成滋潤糖水，都唔錯呀！

 

喺又凍又乾嘅天氣，食完碗糖水即刻又暖又潤哦！

2014 第一爐

        噚日卒之都開咗 2014 第一爐喇！

 

        其實都唔應該咁遲先開，原本諗住上個禮拜四 dayoff 就開爐焗麵包，點鬼知起身一睜開眼，個人都未清醒就已經頭痛，見反正都無嘢做，咪迫自己繼續瞓，休息多啲囉！點知一瞓就瞓到差唔多六點鐘先醒，見到個天咁暗，仲以為自己做乜咁早淩晨就起身，再諗清楚，記番起自己曾經醒過一醒時，係見到好猛陽光喎，只不過頭痛再瞓過，所以先知道原來自己已經瞓到傍晚六點。瞓之前見唔到太陽，起身時都係見唔到太陽，你話癲唔癲呀，瞓咗差唔多十四粒鐘！！就係咁浪費咗成日時間，無整到包囉！