泰味粟米蒸肉餅

材料：
免治豬肉
急凍粟米粒

醃料：
魚露
青咖喱醬
栗粉
糖

        粟米粒解凍後洗乾淨，汆水約 2-3分鐘，瀝乾水備用；豬肉先用醃料醃約半個鐘，之後撈入粟粉，加適量水，最後加埋粟米粒拌勻，隔水蒸約 8-10分鐘就完成。

        一食就覺得好得意，因為未試過食中式蒸肉餅會有東南亞 feel，睇嚟我都幾有冒險精神呀！大膽創新，勇於嘗試！

海帶栗子冬瓜湯

        本來無諗住煲呢個湯嘅，不過星期一果日，晏晝浸啲海帶嚟煮烏冬時，浸多咗少少，諗住唔緊要啦，咪食多啲囉，點知當浸透後發漲得驚人，我諗發大咗最少 5、6倍，實在太多啦，所以咪迫住要留番起 2/3 囉！

        噚晚睇食譜時，咁啱見到有教用海帶煮餸，其中一款就係海帶薏米煲冬瓜，咁就啱哂啦！不過呢幾日天氣又涼番好多，我身子又唔係好好，啲薏米又咁 "削" 腎，我驚飲完個湯後今晚瞓覺時係咁 "瀨尿"，瀨到一床都係就唔好啦。 所以就唔落薏米，改用栗子，仲勁落薑 o添！慌死唔夠燥咁。

材料：
冬瓜
海帶
栗子
蜜棗
薑片

        冬瓜洗乾淨後連皮切件備用；海帶浸水至發大，之後徹底洗淨表面啲鹽同沙泥，然後撕成粗條狀；栗子放入焗爐內，加熱焗到殼同衣裂開，去殼後洗乾淨；蜜棗洗淨備用。

        煲滾水後將所有材料一齊放落煲，飲之前加鹽調味即可。估唔到啖湯會咁清甜，可能係因為我落多咗粒蜜棗，加埋栗子又好甜。有海帶喺度就鮮味啲，唔怪得之經常攞嚟做上湯或日本醬油嘅材料。

台北自遊行 (第二天) III

        去完天元宮，本來會去漁人碼頭 o架，不過喺山上面時啲雨已經越落越大，到返到地面時就仲犀利，所以就取消咗呢個景點喇，就直接去咗一條手信街度食嘢同買嘢。(Winnie 妳睇完就留個 message 喺度，話番條街名俾我知啦！ Thanks！)

        去到淡水，原來一定要食 "阿給" o架 ( "給" 字讀音係 "基" 第 4聲，你睇吓個英文就估到點讀 o架啦 ) ！ 

        我哋 4 款都叫齊哂嚟試呀，都幾好食喎！

        返到嚟香港，同 Gordon 講番個行程，佢知道我哋去過淡水，都即刻問有無食 阿給"，咁你話 "阿給" 係咪淡水嘅 "代言人 / 旅遊大使" 呢！食完 "阿給"，啲雨細咗好多 lu，我哋就沿住條手信街慢慢行番出淡水車站，一路都買咗唔少手信。

        買完嘢我哋就搭番地鐵去士林夜市度 "掃街" 喇，當然係要匯合埋阿聰啦，因為掃街先至係遊台北嘅重頭戲嘛！

        你睇，個個都有 "斬穫" 喎！

 

        夜市內各式食肆。

        呢檔就係最多人排隊買炸雞排嘅。你話 Winnie 喺度做乜呢？佢話佢自己好似揸住個袋喺度乞雞排食咁喎！點解無影度舊雞排嘅？因為塊大大舊、熱辣辣嘅雞排非常吸引，大家都淨係掛住食都唔記得咗影相 lu。

 

        啱啱又去乞完食兼 show 戰利品！？

 

        見到個白苦瓜就知道我哋食乜啦！咪就係飲蜂蜜白苦瓜汁囉，我覺得甜甜哋、甘甘哋，幾好飲喎！

 

        行完露天夜市，就過對面行埋室內夜市。

 

        室內夜市同樣咁熱鬧。

 

        我哋就喺呢間「忠誠號」度食蚵仔煎。

        食完蚵仔煎，佢哋話見周圍都有賣牛排，諗住梗係好出名 o架喇，所以就叫咗呢個套餐嚟試。半夜三更都食得咁豐富！？

 

        呢個係花枝焿，即係魷魚羹囉。

        因為掃街掃咗好耐，所以到我哋離開士林夜市時已經好晏，我哋搭返酒店果班地鐵應該係尾班車嚟 o架喇，所以趕得好急，見到好多人都跑住去嘟卡入閘。

         所以到咗月台等車時，Li Kien 話要影低個時間做見證 / 紀念喎！

 

        車廂內的一對 "殘花敗柳 "！呀，唔係，係 "貌美如花" 先至真，唔好意思，呵呵！

        第二日嘅行程又完滿結束喇，返酒店瞓覺 lu，zzz…zzz…zzz…zzz……

 

台北自遊行 (第二天) II

        下晝嘅行程就去咗淡水，搭地鐵都搭咗好耐呀！

        呢度係淡水鐵路總站。

 

 

        之後再轉巴士去半山嘅天元宮。

        天元宮正門大牌坊。

 

        Winnie話嚟呢度嘅原因就係睇櫻花喇，不過仲未係盛開嘅時候，所以唔夠壯觀。

        天元宮正殿。

        影完呢張相，佢哋睇番之後就話呢幅相叫做「貌美如花」！笑咗一輪之後，又話啲網友睇完會話係「殘花敗柳」咁話。唉，佢兩個真係自編、自導、自演！

台北自遊行 (第二天) I

        第二朝我同 Winnie 一早起身，見阿聰都未 ready， 於是就約埋 Li Kien 先喺酒店附近睇定有無心水食肆去食早餐。 

        沿途就見到呢座咁歐陸式嘅建築，不過就唔知係咩嚟！影完相，我哋就繼續搵餐廳，Li Kien 就一路行一路睇番啲相。我同 Winnie 傾傾吓謁，突然聽到 Li Kien 慘叫地嗌咗一聲：「啊！」我哋就即刻睇吓發生咩事，原來佢 "中頭獎"，俾個啱啱喺佢隔離行過嘅癲佬用個膠嗽口盅好大力咁 "扑" 咗個頭一吓，好彩冇流血咋！我哋兩個都叫佢快啲買番張彩票！

        Join埋阿聰之後，最終我哋喺「趙記菜肉餛飩大王」度食早餐。

        呢4碗分別係榨菜肉絲麵、酸辣湯、麻醬麵同炸醬麵。酸辣湯比起平時飲慣果種清淡；榨菜肉絲麵無乜特別；麻醬麵就幾有水準，好香芝麻同花生味，不過就太稠太濃，好似直接用花生醬撈麵咁！炸醬麵都 OK。

 

        菜肉餛飩都好正！食完呢5大碗嘢，大家都非常滿足喇！

        食完早餐，第一站就去大陸書店睇書。因為我之前喺深圳書城都入咗唔少貨，加上呢度啲樂譜又唔係真係咁平，所以都無乜買到書，反而就買到本我想買好耐嘅 Prokofiev Sonata 全集。

        Prokofiev Sonata 同 Ravel Pavane，當然係鋼琴版啦！

        Li Kien 次次見到啲樂譜都好似唔駛錢咁，今次都唔例外，所以我哋就留低佢一個人喺度，等佢慢慢睇、慢慢買。我哋 3個就分道揚鑣，各自各精彩。阿聰就繼續搜刮佢嘅心頭嗜，而我呢個又聾又啞嘅 "癈人" 就梗要 "癡" 實 Winnie啦！佢帶我去啲必到景點行吓、影吓相。

        途中我哋就見到呢座大廈外牆好特別，用寫有書法嘅玻璃舖切而成。

 

        去到凱格蘭大道，就梗係要影吓總統府啦！妳睇 Winnie部相機影張相出嚟幾 sharp！

 

        台灣銀行總行。

        行咗一陣，Winnie話又熱又口渴，不如過對面買咖啡飲囉！

        呢間金礦咖啡都幾靚、幾高級咁 o架！

 

        啲 cake 睇落都唔錯呀！

 

        由於我哋無喺 cafe 裡面坐，係 take away，所以仲俾埋個紙袋我哋拎走 o添！

 

        Winnie一路飲，不停咁讚杯凍 Expresso好香濃、好正！

 

        而我杯熱 Mocha 都唔錯呀！如果無記錯，杯咖啡應該係 $65台幣，即刻大約港紙 $16度，幾抵呀！隻杯又靚又硬淨，我仲帶埋返香港 o添！

 

        好喇，大家又集合一齊喇，跟住就去咗呢間買胡椒餅食。

 

        你睇，個餅裡頭有幾多餡！味道辣辣哋，熱辣辣食真係好正，唔怪得之阿蘇話友人要買五、六十個返香港做手信啦！果然名不虛傳。