紅樓

        望住紅樓超過三十年，真係完全無諗過有朝一日有可能會消失於眼前！！ 

 

幫人交租

        趁假期得閒，寫番啲舊料先！

 

        早前同老表到灣仔一間 café 食嘢傾偈，叫咗個煙三文魚三文治伴沙律菜，個 set 包埋杯 cappuccino，盛惠 $78，如果要牛油果的話就要加多 $10。喺香港地出街食嘢真係好貴，俾出去嘅錢其實好大部份都係幫食店交租，真係用於食材上只係佔好少，所以我一向都甚少出街食。

 

        之後隔個禮拜我就動手再整一次個 set，唔單只多咗牛油果，麵包仲係用老表買俾我嘅 pumpernickel，拎我自己呢個 set 出去賣，肯定過百啦，哈哈！！

 

 

錯體！？

        仲記得早前我收到舊學生喺澳洲寄俾我一大盒甜品嗎？裡面其中一盒係茶包。 

 

 

間接做善事

        食過曲奇同蛋糕，又收到本精美食譜，咁順便幫吓老友忙都好應該呀！

 

        Ernest 媽咪有啲包裝食物想送俾有需要人士，但又唔知捐去咩地方好，我突然想起灣仔一個商場裡面長期放咗一個紙箱喺度，有心人可以將食物放低，等有需要嘅人取用。反正我轉車返屋企時必定要經過呢個商場，咁都係順手啫，施受雙方都有得著，我呢個 "中間人" 都間接幫手做善事，哈哈！

 

 

WeWah Concert 2016

        時間真係過得好快，眨吓眼喺 WeWah 已經做咗義務導師一年！上年嘅呢個時候我都有參加畢業禮音樂會，當時係以準導師身份出席，今日嘅我唔單只係正式導師，自己教嘅兩個學生都要上台演奏。

 

        唔知點解，覺得教 WeWah 嘅學生會比較開心，即使係義務性質，甚至連車馬費都無，就連學生嘅資質都未必係好好，但心裡面就相對特別用心去教佢哋，可能係因為學生同家長都會較為懂得珍惜，對導師亦會比較尊重同感激。

 

 

實走唔甩！！

        屋企實在太開陽，無遮無擋，名符其實嘅好天曬落雨淋，所以次次大風雨都一定走唔甩，無次例外！！

鬱金香

        有花收哦，收花人當然唔係我啦，係媽咪呢！！

 

        Winnie 前兩日行經旺角花墟，見到啲鬱金香超靚、超吸引，因為佢知我媽咪鍾意鬱金香，所以就買咗一紮送俾我媽咪。

 

 

新街市

        歷時超過一年，「領展」喺蝴蝶灣嘅 "皇宮" 卒之都重建完成，以後買餸就好似以前咁方便同多番好多選擇，起碼檔位大番好多，檔主都可以入番多啲貨品俾居民選購。

 

        翻新後嘅街市當然靚好多啦，但都係嗰句，羊毛出自羊身上，貨品價格明顯比之前貴咗。見麵檔哥哥唔單只照舊賣粉麵，依家仲賣埋豆腐芽菜㖭，佢話無辦法，要買多啲嘢先可以賺多啲去 cover 租金，我問佢加咗幾多租金，佢話同舊街市比較貴咗差唔多一陪哦！！

 

 

 

時間都去哪兒了

        呢一、兩個禮拜都好忙，忙到今日係母親節都唔記得，所以連花都唔記得買！

        早前同老表傾開偈，佢驚覺原來咁快已經九年，係呀，時間真係過得好快，眨吓眼就已經九年！！

警署

        仲以為呢世人都唔會有可能踏足警署㖭！又唔係俾差佬盤，又唔係領好市民獎，仲要唔見錢，真係越窮就越見鬼，帶埋錢打工！！

 

 

物盡其用

        整雪芳蛋糕因為要用多額外一隻蛋白，但我又唔想開多隻蛋，所以我習慣係解凍冷宮嘅蛋白加落去，但因為無整得耐，完全無咗呢回事，所以唯有迫住開多隻蛋！

 

        夾硬開多隻蛋，自然就多咗個蛋黃出嚟，所以就連埋班蘭汁撇出嚟嘅水整咗 pancake；用剩嘅椰漿同整烤雞沙律剩低落嚟嘅金不換就用嚟燜南瓜，一啲都唔浪費㗎！

 

 

猴年新春

恭喜發財，新年快樂！！

 祝  各位 blog 友

 

身體健康

生活愉快

事事順利

心想事成

社會少啲爭拗

世界少啲紛爭

 

 

老友的新年禮物

        聽日就係農曆大年初一，我諗家家戶戶都會好忙，忙住攪呢樣攪嗰樣，又要忙煮餐團年飯。我自己今年就相對無咁多嘢迫埋一、兩日內做，因為今年多時間量地同拍烏蠅，所以可以將啲嘢分開好幾日去預備，而且又唔使團年，又唔使 "年廿八"，噚晚收工返到屋企攪掂哂就浸定少少初一煮齋要準備嘅材料，今日全部洗乾淨哂，聽朝就變相無咁多嘢要做，應該趕得切午時前上供。除此之外，今日仲整定個蛋糕聽日帶過去老表家團拜。

 

        今年收到兩位老友 Louisa 同 Ernest 媽咪送嘅新年禮物，全部都係 Louisa 間烘焙學校嘅出品。

 

 

 

天文數字

        見雪櫃仲有啲秋葵同 1/4 個洋蔥喺度，諗住買包四季豆返嚟炒埋一碟，點知貴到唔捨得買，差唔多貴一倍咁滯！其他蔬菜都要起碼二、三十蚊斤，問勻哂成個菜檔所有蔬菜嘅價錢咁滯，都真係幾得人驚，簡直係天文數字，無樣買得落手，好彩同個菜檔阿姐熟，如果唔係問完哂都唔買的話肯定俾佢 bing2 鑊甘兼粗口問候！！

 

 

味道‧懷念

        唔想講咁多喇，睇咗我個 blog 耐嘅 blog 友就自然明白我點解想同大家分享呢個港台節目！

又做義工

        老表話我呢排多咗出街 (其實佢意思係話我多咗出外活動)，梗係啦，依家大把時間量地同拍烏蠅，吃喝玩樂同 shopping 又唔多啱我，咁做義工就最好不過啦，有意義之餘又可以打發時間，幫到人又幫埋自己，何樂而不為呢！俾著以前，請得郁我呢個宅男都真係唔易㗎！！ :D

        上次幫 Pinkdot 做義工時，周圍都係英文人，估唔到今次就全場都有好多 "煲冬瓜" 人，因為其實好多台灣同內地嘅 LGBT 團體飛過嚟參加遊行，加上本地好多專上學院都有收內地學生，所以國語人多都唔出奇嘅！反而值得欣賞嘅係見到都有啲父母帶埋自己仔女一齊嚟參加遊行，從小就教識佢哋社會上嘅多元性，對自己人多啲理解同明白，就可以減少誤解同恐懼，繼而減少歧視！

老友烘焙學校新張之喜

        今日係老友 Louisa 嘅烘焙學校「360 烘焙大師之家」新張大喜日子，我同 Winnie 及 Ernest 媽咪梗係要去恭賀一下老友榮升老闆啦！

 

 

超級月光

        噚晚睇《晚間新聞》時知道，原來噚晚個月光係超級月光，即係月球位置最接近地球，所以望到個月光嘅 size 係最大，報導話可惜噚晚多雲，要睇的話就要喺雲層罅隙先睇到。

 

 

義工禮品

        Pinkdot 當日，有贊助商贈送禮品俾每一位義工。

 

        其實整個活動能夠做到免費入場，免費任飲任食，又提供所有音響器材作音樂會用，都係多得各大商業機構支持及贊助，當然，大部份都係外資大行、投行、銀行等，華人企業就只係佔少數啦！

 

 

繼續做義工

        既然都已經提早開始咗做義工嘅計劃，咁就唔好俾佢停。

 

        由於自己喺工作同生活上，某程度上有好幾方面都屬於少眾，所以好清楚當中被人誤解，甚至係歧視的感受，所以我一直以嚟都希望做義工嘅服務對象係一啲易被忽略及誤解嘅少眾。加入「WeWah 音樂家」係幫基層家庭嘅小朋友圓夢，打破只有相當經濟能力家庭嘅小朋友先至可以學鋼琴，而今次呢份義工嘅對象就係 LGBT community，所以噚日由朝企到晚，攰到爆之餘仲曬到變咗隻燒豬。

 

        Pinkdot 原本係由新加坡發起嘅一個活動，提倡建構「平等互愛、多元共融」嘅社會，活動係一個大型戶外露天嘉年華會，LGBT community 邀請自己家人及朋友一齊出席，與一家大細及朋友一齊野餐，大家開開心心一齊玩。2014 年就引入到香港，所以今年已經係第二屆。