冷泡咖啡 Cold Brew Coffee

        另一樣近排都興起嘅就係冷泡咖啡，顧名思義，就係用凍水沖咖啡。初時都唔係好信凍水都可以沖到咖啡，原來係起碼要泡足 12 個鐘，將咖啡粉裡面嘅物質慢慢浸泡出嚟，好處係唔會因為水溫、咖啡粉粗幼度、甚至係沖泡咖啡手法而影響味道，所以泡好後嘅咖啡味道會比較醇，比較少酸味同苦味。

 

        由於咖啡粉經長時間浸泡，咖啡因濃度都會相對高好多，所以冷泡咖啡唔可以長期飲用，間中一杯好喇！

 

 

羅漢果茶

        平時習慣咗逢星期三就會煲湯，一次煲埋兩餐飲，慳功夫、慳柴火之餘，仲易啲買料 o添！若果只係煲一餐飲，買兩個人嘅材料份量，真係可能只需好少就夠，分分鐘人哋嫌你買得少，唔賣俾你之餘，仲可能會俾啲街市佬 "問候"！

        不過今日就無煲到湯，事關平時我會將飲剩嘅湯原個真空煲內鍋放入雪櫃，都幾嘥位 o架，不過方便第二餐煲番熱嚟飲嘛！但係因為之前接咗 order，要今個禮拜六交個蛋糕俾人，未交貨之前，雪櫃一定要騰出空位嚟放蛋糕，所以今日唔煲湯喇。

        之前睇過《蘇 Good》同《為食總司令》，阿蘇同熾哥都有喺節目度介紹過羅漢果茶，話呢個羅漢果茶對身體非常之有益，而且可以平時當水飲都得，煲完之後唔駛一定要好似湯咁煲番熱嚟飲。咁就啱喇，咁飲剩果啲搵個壺裝起佢就攪掂，唔駛霸雪櫃位置，就算要放入雪櫃，放喺雪櫃門邊個架就攪掂，fit 哂！

材料：
羅漢果      1 個
甘草          5 片
南北杏      40 克
水              2 公升

以上材料份量可煲 7 - 8 杯。

食譜嚟自鄭慧芳、胡玉玲嘅《香港人氣甜品》。

- 羅漢果洗乾淨後，連殼切碎；南北杏同甘草浸水、洗淨備用。

- 將所有材料凍水落煲，煲滾之後轉中慢火繼續煲多 20 分鐘。

- 熄火後原封不動，焗多 40 分鐘就可以飲用。

Notes：
- 揀羅漢果時，最好揀啲拋落枱面上有回彈力，同埋搖動果身時要無響聲。

- 細嘅羅漢果可一次用兩個。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

蛋白杏仁茶

        上次餐開年飯整 Crème brûlée 時，因為只用蛋黃，所以留起咗啲蛋白放喺冰格，為咗佢，我今晚專登整呢個蛋白杏仁茶 o架，咁就可以一次過用哂啲隻白，唔駛煩。

材料：
南杏      150 克
北杏      60 克
水          1000 毫升
奶          60 毫升
糖          80 克
蛋白      3 隻

以上材料份量可做杏仁茶約 5 碗。

食譜參考自鄭慧芳、胡玉玲編著嘅《香港人氣甜品》。

- 杏仁略沖洗後用清水浸 1 個鐘；蛋白輕輕拂勻，備用。

- 杏仁瀝乾水份後，放入攪拌機內，加入一半水，攪打成幼滑杏仁漿。

- 之後再加埋剩低果一半水再打，然後將杏仁漿隔渣。

- 杏仁漿倒入煲內，用中慢火煲滾，其間要不時攪拌。

- 加入糖同奶，再次煮番滾之後就可以熄火，將煲離火。

- 隨即將蛋白加入，慢慢拌至稠身即可。

 

Notes：
- 當杏仁茶煲滾時，會有大量泡沫湧出，要小心滾瀉。

- 蛋白加入杏仁茶後要立即拌勻，以防蛋白受熱而凝固成塊狀，失去滑溜口感。

- 唔鍾意太甜的話，可以將糖份略減，跟足食譜份量做比較甜。

芝麻黑豆漿

        今朝落街買餸時，天氣變得清涼好多，秋意漸濃。一年四季中，我就最鍾意秋天，因為唔會太熱、又唔會太凍；唔會太乾、又唔會太濕，個人會好舒服。

        不過今年唔知點解天氣咁快變得好乾，我啲手指依家已經乾到爆哂喇！ 天氣變得清涼乾燥，最好就係整番啲甜甜哋嘅熱飲嚟潤一潤先！今日反正整咗黑芝麻粉，咁整芝麻黑豆漿就最好不過喇！

凍麥茶

        天氣咁熱，一向都唔係好飲凍嘢嘅我，間中都會飲吓嚟解渴、消暑，但就好少飲汽水。每年夏天，我都會預備定一壺冰水放喺雪櫃，方便沖凍飲，有興致的話就會煲定豆漿雪凍嚟飲，但係唔係成日都咁有興致 o架嘛！所以就會改煲麥茶，貪方便嘛，淨係將佢倒落煲度，加水煮滾就攪掂，懶起上嚟真係乜都唔願做 o架！

  
        其實麥茶即係用大麥嚟沖茶，沖出嚟嘅茶有陣好濃嘅麥香味，雪凍嚟飲仲正！只需 1公升水加 10克麥茶，煲滾 3分鐘，攤凍後就可以飲喇，係咪簡單方便呢？仲健康過飲汽水 o添！

呢啲就係煲完茶剩低嘅大麥，煲到開哂花呀！

鹹豆漿

        今日又做自家製豆漿喇，不過今次唔係整甜豆漿，而係淡豆漿 ( 即無糖豆漿 )，點解？因為想試吓整鹹豆漿囉！印象中，我記得媽咪都好似整過一次 o架！不過印象就真係好模糊喇，唔係好記得咩味道 lu！

 

材料：
淡豆漿
榨菜
蝦米
蔥

調味料：
麻油
老抽
白醋

        榨菜洗淨表面紅色醃料後，切細粒、浸水約 20-30分鐘以減低鹹味；蝦米洗淨後用熱水浸軟備用；蔥洗乾淨後切成蔥花。

        先將榨菜、蝦米同蔥花放入湯碗內豆，加入調味料拌勻，然後將煲滾咗嘅豆漿舀入碗內，拌勻即可享用，就係咁簡單！

        有豆漿嘅清甜、蝦米嘅鹹香、榨菜嘅爽脆，加埋蔥花香味，Hm……好好味呀！飲慣甜豆漿，呢個鹹豆漿就別有風味。

 

Note:

1. 我參考過好多教自製豆漿嘅食譜或者書，黃豆同水嘅比例多數都係每 300克黃豆( 即半斤 ) 就加10杯水。

2. 材料係依照「維他純豆漿」包裝盒上嘅食譜。

3.  自己亦有喺網上搵過資料，原來製作鹹豆漿最重要嘅材料係白醋，因為佢會同豆漿產生化學作用而令豆漿有少少凝固狀態。

參考資料： http://www.kyms.com.tw/recipe-17.htm

豆漿 Mocha

材料：
豆漿
即溶咖啡粉
朱古力粉

        因為我係唔飲奶嘅，所以試下用豆漿代替奶去沖咖啡。

        好特別的一杯豆漿Mocha，味道好得意，唔似飲緊咖啡，似飲緊一杯咖啡味嘅豆漿多啲，可能自製嘅豆漿黃豆味特別濃，最特別嘅係當杯咖啡凍咗時，面頭會形成一層薄薄嘅 Mocha 腐皮，好過癮！

        其實之前媽咪一早已經喺 Openrice 度 search 到一間叫 "豆咖漿啡" 嘅食店，專門沖豆漿咖啡，本來都諗住搵日陪媽咪去試吓嘅，點知無幾耐佢已經發病，無機會 lu！

凍蜜桃麥茶

材料：
罐頭蜜桃(連糖漿)
凍麥茶

        見之前罐蜜桃煮完餸、整完甜品都仲有剩，於是諗吓點樣用埋佢，見到浸住蜜桃嘅糖漿，突然靈機一觸，不如做杯凍飲啦！於是就將蜜桃切粒，連糖漿一齊倒落杯度，但因為就咁飲會好甜，所以喺雪櫃度攞咗樽麥茶出嚟，倒落去溝淡佢，果然味道即刻變得啱啱好，一杯冰凍嘅水果茶就咁樣 "誕生" 啦！

自製鮮豆漿

材料：
黃豆
清水
砂糖

        好簡單o架咋，將啲黃豆浸6個鐘或以上，或者隔晚夜，之後過幾次水直至啲水變清同無泡，跟住放入攪拌機度，加適量清水，將黃豆攪碎至微粒，咁就變成豆漿啦，將啲豆漿隔渣，倒入煲內先用大火煲滾 (記得邊煮邊攪拌，因為好容易黏底)，之後要轉細火繼續煲，因為未熟透的豆漿內有一種物質叫做 "皂素"，對身體有害，所以一定要徹底煲熟先可以飲，唔好以為煲滾就算數。跟住依個人口味加入適量嘅砂糖，再攪拌至所有砂糖完全溶哂，咁就飲得o架啦！

        以前見媽咪用布隔渣，要好用力咁將啲豆漿榨出，非常辛苦，好彩後來佢買咗部攪拌機連埋個隔渣網，我先至敢試吓整，如果叫我用手榨，咁就真係慳啲啦唔該，我寧願唔飲囉！或者俾貴啲錢喺街買嚟飲算數。依家試過成功整到，除咗可以飲到既新鮮又啱自己口味嘅豆漿之外，仲慳番唔少錢，因為原來 $8 就可以買到成斤黃豆，可以做到好多杯豆漿o架啦，喺街買一支最少都 $5 支啦！