素肉骨茶

        今日用咗肉骨茶湯包嚟煲個素湯，用料有白蘿蔔、粟米、栗子、霸王花同蒜頭。

 

 

雲苓白朮冬瓜袪濕湯

        前兩日去街市買餸時，喺菜檔見到一樣貌似大節瓜嘅物體，問阿姐係乜嘢嚟，原來係冬瓜仔至真！！佢仲教我用雲苓、白朮、赤小豆同扁豆煲豬腱，話好袪濕喎！我同阿姐講我煲湯唔落肉，會唔會無味，佢叫我加紅蘿蔔同栗子，一定夠甜，我都係慌死無味，加多兩條粟米㖭！！ :D

 

 

泡菜蘿蔔海帶湯

        早幾日煮咗個韓式泡菜湯，因為新正頭買餸唔方便，所以最好就係用啲屋企本身已有儲備嘅食材，加上依家買菜貴都阿媽都唔認得，買白蘿蔔就最啱，又平又合時，正所謂冬食蘿蔔夏食薑，中醫角度天冷食白蘿蔔對健康有益㖭！加幾隻韓國生蠔，夠哂美味喇！！

 

        原本一心係買豆腐整嘅，不過初三嗰日街市好多檔口都未開，而且我教完琴都已經夜，有開檔嘅豆腐檔都已經買哂，咁就唯有改用初一煮南乳齋用剩嗰棵津菜代替啦！

 

 

姬松茸豬骨煲節瓜湯

        見到我煲肉湯係咪覺得好出奇呢！？真係 N 世都唔會煲一次，因為怕麻煩嘛，又要洗肉，又要汆水，汆完水之後又要洗多個煲，煲完湯之後個煲又一定要用洗潔精洗先洗得乾淨，比起煲素湯真係多好多功夫，不過因為今日無太多時間留喺屋企預備餸菜，所以就用豬骨煲湯，有瓜又有肉食，可以煮少碟餸！

 

 

老黃瓜羅漢果霸王花湯

        今日係小暑，但反而無上個禮拜咁熱，喺廚房做完一輪嘢都無身水身汗。

 

        原本應該買冬瓜煲湯消暑，但早兩個禮拜已經煲過冬瓜，所以今餐就用老黃瓜煲湯。其實都唔知加霸王花落去夾唔夾，只係純粹多一樣餸，不過都唔緊要啦，反正霸王花又唔係藥材，應該食唔死，唔會中毒，呵呵！！

 

 

黑豆木耳木瓜湯

        今日喺街市買到兩個好靚仔嘅木瓜，菜檔阿姐就話今日木瓜賣得好平，賣 $5 斤，以近排價格以言係咪真係好平就唔知喇，因為好耐無買之餘，自從檔口變到迷你 size 之後就連價錢牌都無位擺，以前就算唔買某樣嘢，但見到個價錢牌都可以大約知道行程，依家就無呢支歌唱喇，而且有啲貨迫住要放喺佢哋檔口入面，要就嗌佢哋拎俾你，無得樣樣都落手落腳自己揀，更加唔好意思叫人家攞好多出嚟俾你揀啦！希望個街市快啲重建完成。

 

        我自己就好怕熟木瓜，唔知點解嗰覺得味道好難聞、好臭，聞到都即刻反胃兼作嘔，但問過好多人又話唔覺得，究竟係我嘅嗅覺有問題呀，定係其他人都同我一樣都聞到同一種味道，但就唔覺得係臭，情況就好似榴槤味咁樣，所以我一般都只會買青木瓜，好彩青木瓜煲湯都一樣咁甜。

雜豆薏米土伏苓老黃瓜湯

        有陣時啲嘢都真係唔到你唔信，呢排幾乎日日都落雨兼烏天黑地，噚日佛誕就居然無雨落仲勁猛太陽，今日又即刻落番雨，睇新聞先知原來朝早仲發出過黑雨㖭！

 

        唔係講笑，真係濕到好得人驚，自己都 feel 到體內濕氣好重，所以就煲呢個袪濕湯喇！

 

 

清補涼栗子節瓜湯

        絕大部份時間我都只會係煲齋湯，對於好多人嚟講，如果煲齋湯的話，可能會勁落蜜棗增加甜味，但我自己就唔會咁做，而且已經無用蜜棗好耐，成日都形住蜜棗唔知係咪有加糖製過。

        想啖湯夠甜的話，我通常都會落紅蘿蔔、粟米、栗子或粉葛，有時就會加紅腰豆同三角豆一齊煲，都可以增加一定甜度，但始終最重要嘅一點係：所有甜味材料必須凍水落煲。因為食材嘅甜味物質只會溶係凍水內，而我自己就習慣再浸多一段時間先煲，確保大部份甜味物質溶於水內，自己都已經做過實驗，材料凍水落煲跟水滾後先落料，甜度真係差好遠。
 
 

雪梨雪耳姬松茸湯

        煲呢個湯完完全全體現到咩係就地取材：

 

供過佛嘅雪梨唔想就咁食，最好就係要嚟煲湯。

 

想啖湯甜啲，加幾粒紅棗就攪掂！

 

再想個湯香濃啲嗎？加姬松茸。

 

要有湯飲之餘又想有多點湯渣做埋餸，落埋雪耳囉！！

 

 

煙肉薯仔粟米湯 Smoky Bacon Sweetcorn & Potato Soup

        如果大家有睇過上次肉桂焦糖蘋果西多士條片的話，應該會覺得呢個湯熟口熟面，因為係同一輯節目內嘅 recipe 嘛！見材料都好簡單，而且屋企又有罐忌廉粟米蓉，一於又試吓啦！

 

韓式海帶蜆肉湯 Jogae Miyeokguk (조개미역국)

        今個禮拜又偷懶唔煲湯，試咗整 Gordon Ramsay 個西湯，效果都唔錯，不過份量只夠兩餐，所以今晚就另外再跟 Maangchi 姨學整海帶湯，遲啲先同大家分享番 Ramsay 個西湯啦！

 

        韓國人好鍾意煮海帶湯，不單只生日會整，就連生完 BB 之後都係飲海帶湯補身。Maangchi 姨係教用新鮮青口去煮海帶湯，但係邊度咁易買到新鮮青口呢！原本街市間「大昌」都有急凍藍青口賣，可惜街市重建又俾「領匯」迫走埋，所以我就改咗用蜆肉喇。當然，味道一定會差好遠，但調味之後都唔差呢！

 

 

木瓜雪耳果仁湯

        呢期成日同 blog 友謙盈媽媽 “撞餸”，早前大家都不約而同整咗芋頭紫米露，真係撞到應一應！今次又同佢撞木瓜雪耳，不過佢係用嚟煲糖水，我就煲湯。

 

       原本想買埋海底椰一齊煲，點知行勻成個街市都唔見有得賣，平時唔用時就成日見到，到要用時就即刻失哂蹤，買嚫嘢都係咁，早知前幾日喺「佳寶」買開嘢時買包急凍海底椰啦！

 

雪耳栗子姬松茸湯

        近排加入咗 Facebook「素食青年」群組，原來有好多後生仔女都係食素嘅，當中自然有啲係因為宗教原因而食齋啦！有啲就係為咗個人健康而食素，有啲就更加無私，係為咗呢個地球環境而成為素食者，真係值得敬佩同加許！

        喺群組裡面，大家都會分享一下自己嘅素食心得同 “傑作”，又會分享自己到過嘅素食餐廳，介紹菜式、環境及水準，真係知多好多嘢。

        今晚又煲齋湯喇，呢次用料好豐富，細食嘅朋友淨係飲湯同食湯渣都已經夠哂飽！！

 

 

老黃瓜粟米豬橫脷湯

        呢排天氣又熱又濕，攪到個人就身都唔自在，仲會成日覺得好攰、好眼瞓，所以要飲多碗袪濕湯先得！

 

        炒扁豆、赤小豆煲老黃瓜最啱，不單只可以袪濕，仲可以清熱解暑，加粟米一齊煲的話，記得連埋粟米衣同粟米鬚一齊煲，利水利尿，好過特登走去藥材舖買啦！

 

木瓜雙耳果仁湯

        一直以嚟我都多數係煲齋湯多過煲肉湯，因為我唔係食肉獸兼極之唔想處理生肉，二來就係唔知點解煲嚫肉湯都唔多有甜味，反而煲齋湯就次次都超甜！而最重要嘅係煲齋湯的話，無論事前事後嘅清洗工作都簡單好多，因為全無油脂，但煲肉湯就煩好多喇，起碼又要洗多個用嚟汆水嘅煲！

        正因為咁，即使我煲齋湯都好少會落果仁，除咗因為避免有油脂外，無落果仁煲出嚟啖湯會比較清甜，無咁 “濁”。前幾日睇肥媽個節目，見佢教用果仁煲齋湯，諗吓自己都真係好耐無落果仁喇，今次就加番腰果同合桃落去啦！
 
 

花旗參雪梨煲瘦肉湯

        自從唔食得涼嘢之後，自己都會好小心飲食，費事食完就即刻痾，喺屋企都好啲，喺街的話就真係煩，如果搭緊車嚮屯門公路塞緊車的話，咁就慘囉，嗰程車就好似搭咗十年咁耐，搭極都未到！

 

        所以呢六、七年嚟都謝絕涼茶呢樣嘢，洛神花就更加唔敢再掂㖭呀！之但係我又好鬼鍾意食辣嘢，又唔飲得涼茶，呢排仲成日生飛滋，脷面、脷底、嘴唇接住咁嚟，都係要攪一攪佢。用個溫和少少嘅方法，雪梨加花旗參煲湯吧！雪梨清潤、花旗參清熱，應該會有啲效啩！

 

 

胡椒鹹菜蘿蔔湯

        嘩，今日又試回南天，濕到阿媽都唔認得！真係無誇張呀，咁鬼死大霧，真係阿媽企遠少少都睇唔清個樣呀，哇哈哈哈哈 ~ ~ ~ ~ ~

 

        咁嘅天氣，我當然即刻遭殃啦！不過好彩都未算係好嚴重，快啲整番個胡椒湯袪吓濕至得！

 

冬天必食 — 西洋菜

        一踏入冬天，我一定會買西洋菜嚟食，因為係我嘅 "賣飛佛"！仲記得初初開始 incharge 個廚房時，以為一年四季都有得食，夏天時搵極都唔見有得賣，後尾先知原來淨係冬天先有呢！雖然對於入廚都唔係完全得個零，但當時真係好多嘢要慢慢學哦！

 

北芪黨蔘螺頭煲豬腱

           年年入冬之後都會即刻大規模減產，因為天氣凍個人都懶好多，唔多願郁，更加唔想成日洗凍水，雙手又僵又爆拆，所以除咗會煮正常飯餐之外，額外嘢一律少整！

 

       近呢一個月頭痛加劇，幾乎日日都痛過咁滯，就連咖啡都未必止到痛，唯有要食藥，所以一有時間都係要嚟休息，唔會再攪咁多 “花臣” 嘢喇！

 

        趁今日唔需要煲齋湯，買咗嚿豬腱又煲藥材湯呀！

 

 



 

秋風起 ……

          秋風起做乜好？食蛇羹？好多年無食過喇；食臘味糯米飯？又好似早咗啲喎，依家都仲算係熱喎！

 

        從中醫學角度去睇，秋天應該開始調理好身體，裝備好自己，準備入冬。夏天嘅時候真係好少煲藥材湯飲，多數都係煲瓜果湯、袪濕湯之類，依家天氣涼咗好多，喺時候 “進補” 一下喇！