韓國石鍋飯 Dolsot Bibimbap (돌솥 비빔밥)

        老竇買咗個石鍋返嚟幾年，都完全無咗件事，年年到咗天氣回暖時先記得又無整到韓國石鍋飯！趁呢個禮拜又凍番，快啲試整一次先！

 

 

健脾番茄小米粥

        如果頭腦清晰兼無老人癡呆的話，咁你都應該會知道我家有個習慣，就係人日唔知點解會煲粥煎糕食！？雖然唔多明白點解會咁做，但我依舊年年照做，因為想將媽咪所做嘅嘢一路 keep 落去。

 

        呢個粥係之前睇電視嚴浩導演其中一條方，係一個健脾開胃養生粥，當時我只係抄低咗材料，無記低點整，所以我都係純粹用自己個方法去煲咋！導演條方原本係有落到瘦肉，但我就無喇，只係用香菇粉提味，我仲加埋原片燕麥一齊煲㖭。

 

 

日式醬油燒飯糰

        依家天氣熱，我好多時第二餐都會整壽司食，但係整壽司都幾麻煩，要預備好幾種材料，之後又要捲到唔散，都有一定功夫，如果時間唔夠的話都真係唔好攪喇！

 

        呢次又試吓跟型仔廚師 Ryoya 整個功夫少得多嘅醬油燒飯糰，不過第一次整毫無經驗，真係有超大進步空間呢！ :P

 

 

韓式炸醬麵 Jjajangmyeon (짜장면)

        睇得韓劇同 Maangchi 姨嘅 video 多，真係覺得韓文發音好多都跟普通話好似，有啲甚至係完全跟廣東話一模一樣，大長今個 “今” 字就係其中例子。雖然大家未必識睇韓文，但睇吓個拼音，再讀一讀，就完全知道呢個係 “炸醬麵”。拼音都唔識睇嗎？聽吓 Maangchi 姨點讀啦！

 

        早排睇電視個韓國旅遊特輯，主持人試食咗韓國炸醬麵，話跟中式完全係兩回事，而且味道偏甜。其實睇個樣都知道跟中式炸醬麵應該係完全唔同味道，但味道偏甜就真係估佢唔到，可能係因為所有蔬菜料都係帶甜啦！

 

 

檸汁蜆肉扁意粉

       最近睇緊姚元浩嘅《元味好生活》，每集節目元浩都會邀請唔同嘉賓一齊體驗各種戶外活動，露營過夜及野外煮食。唔睇都唔知，原來台灣依家好興揸露營車到郊外露營，而且仲癲到每個家庭都為自己架露營車做出各樣主題，倒如民族風、all handmade decoration、法式風情等，真係大開眼界，最正就係架露營車可以變出一層角樓出嚟俾小朋友上去瞓。

 

        剛剛睇完男神王陽明同元浩玩越野飛車，超刺激，連周身肌肉、紋哂身，man 到爆嘅王陽明都全程乸埋塊面，用雙手掩護住個頭，皆因上落山坡嘅角度真係差唔多接近九十度咁滯，又無特別安全措施，仲恐怖過玩過山車，俾著我係座上客的話，我肯定暴斃車上，嚇都嚇死咗！！

 

        幾乎每一集元浩都會用到荷蘭鍋去煮食，佢勁讚好用，其實荷蘭鍋就係一隻戶外版嘅「Le creuset」或「Staub」，都係一種鑄鐵鍋，不過就係用支架吊起，直接喺柴火上面煮食，最特別係鍋蓋經特別設計，可以放上燒著嘅柴同炭，實行上下夾攻！前幾集男神高以翔露營時就煮咗個海鮮蛤蜊意大利麵，最特別係佢用咗檸檬汁去煮，真係從未試過食酸味嘅意粉，但元浩試過之後又話估唔到咁好味，攪到我都想試吓！反正屋企都有檸檬，又可以順便清埋上次整韓式海帶蜆肉湯時用剩嘅蜆肉，不過我就用自己個方法去煮，因為用料唔同，起碼高以翔係用新鮮帶殼嘅蛤蜊去煮哦！

 

 

自製米粉及年糕

         之前都已經跟過兩個食譜去整韓國年糕，但始終都係唔夠滿意，質感硬係差啲，原來整嚫韓國食品最好都係跟番 Maangchi 姨嘅方法比較穩陣，包無失手，今次即管又試吓跟佢嘅做法，果然一擊即中，完全就係跟賣返嚟嘅年糕一模一樣咁煙韌！

        睇番 Maangchi 姨個網頁，有更加詳細解說資料，原來整年糕一定要用短身米至整得到，唔可以用長身米，短身米即係珍珠米、上海米之類；而長身米就係粘米、絲苗、泰國香米之類，難怪上兩次用粘米粉整唔到啦！！呢次醒咗喇，跟 Maangchi 姨用珍珠米打成米粉，之後再整成年糕，真係估都估唔到原來自己都可以做得到咁幼細嘅粉。至於之後整年糕，佢就係教用樁嘅方法去做，我當然無佢咁好精力慢慢樁啦，用麵包機代勞咪得囉，快靚正呀！！

 

眉豆南瓜粟米粥

        曾經有 blog 友話發覺我好鍾意食雜糧，係呀，我絕對唔係一個飯桶，唔多鍾意食飯，就連粥都好少煲，就算以前媽咪喺度時，晏晝嗰餐都幾乎完全唔會煮飯食，可能媽咪都一樣唔係飯桶！

 

       突然呢個禮拜想食粥，就趁今日月圓之夜煲咗個齋粥。

 

泡菜炒飯 Kimchi Bokkeumbap 김치볶음밥

        啱啱又醃好咗泡菜，今晚用咗嚟炒飯。呢個炒飯又係出自 Maangchi 姨手筆，易煮又好味，我自己就做咗少少變化，更加啱自己胃口。

 

 

海鮮意粉伴南瓜汁

        整好 pasta 之後，更係要趁新鮮即刻煮啦！今次我用咗青口同魚柳，再加個南瓜蓉做醬汁，簡單易整又好味！

 

Gennaro's Pasta

        哈哈，同一日內連整兩個 Gennaro 食譜，咪就係因為睇完 focaccia 條片時，又俾我發現埋整 pasta 條片囉！又係意大利人教整意大利麵，我都一於又跟！！！！

 

 

自製韓式年糕 (純粘米粉) Tteok 떡

        呢個用純粘米粉整嘅年糕，其實好耐之前都已經整過一次，但因為當時仲未買麵包機，只係用部 food processor 嚟整，當然失敗收場啦！既然依家有部麵包機，梗係要再試整過啦！

 

自家製意大利蛋麵 Homemade Egg Pasta

        其實今次唔係第一次整 pasta，之前已經試整過一次，不過嗰次整時仲未買麵包機，所以用人手去搓麵糰。原來整 pasta 個麵糰係要相對整麵包麵糰乾身好多，上次因為無經驗，見個麵糰咁硬，好難搓，所以就一路整一路加水，雖然個麵糰都係整得成功，但到要切條時就即刻知衰喇，因為濕到好黐刀，就算切得到都鬆散唔到，total loss！！

        依家有部麵包機，當然又心郁郁想再試多次啦！將所有材料倒入攪拌桶內，按 “烏冬及意粉麵糰” 模式就攪掂，卒之都成功做到喇！

芝麻雪菜銀魚乾炒飯

        前兩個禮拜去過「誠品」睇書，見到 Masa 有本 brunch 食譜，於是就拎起快手 scan 過全書，當中有兩個食譜都好想試吓整，其中一個係雪菜、白飯魚芝麻炒飯，真係從來都無諗過用呢幾種材料嚟炒飯呀！

       咁啱得咁橋，屋企真係有用剩嘅雪菜喎，咁就可以即刻試做。至於白飯魚哩，我就無買到喇，用現有嘅銀魚乾代替啦，之後再發揮自己嘅小宇宙，加入其他副材料同調味去炒飯吧！

 

日式素雜煮飯 Vegan Takikomi Gohan

        自從喺 Youtube 度搵到日本型仔廚師 Ryoya 嘅 Peaceful Cuisine 頻道之後，真係知多好多素食主意及製法，就算係食齋嘅日子都多咗好多選擇。

        最近睇番佢之前教過整日式有味飯，完全唔難整，趁今晚係初一要食齋，即刻試整。煮緊飯嘅時候已經聞到好香牛肝菌同牛蒡嘅香味，味道亦啱啱好，唔會太淡或過鹹，唯一美中不足嘅係，用瓦煲煮飯會黐底兼有飯焦，同埋又有醬油同糖一齊煮，就變得燶上加燶！依家個煲用水浸過夜，希望聽日洗得到喇！

 

照燒南瓜雞肉丼飯

        仲記得之前我喺「SOGO」度 “搶” 到個日本南瓜嗎？諗住天氣咁涼，而且南瓜就咁擺室溫都無問題，見佢都無轉過色，所以一直都無理佢。直到前兩日，發現外皮有多處開始變腍，係時候要整咗佢嚟食喇！

 

 

鹹湯丸

        好耐好耐之前，喺 Yahoo Blog 度睇到 blog 友 Motonako A. 整鹹湯丸已經好想整，但係拖吓拖吓，拖到家吓先整，真係死得！！

        整鹹湯丸絕對唔難，最重要都仲係個湯底，湯底夠鮮甜就自然好食，因為湯丸本身只係一嚿粉，乜味都無嘛！所以呢個鹹湯丸真係點整都得，總之自己想要咩湯底就整咩囉！

 

        淨係同大家分享湯丸整法算喇，至於湯底做法，發揮你哋嘅小宇宙啦！
 
 

番茄海鮮意大利飯 Tomato Seafood Risotto

        仲記得我之前煲咗木瓜猴頭菇魚湯嗎？我習慣一次煲多啲分幾餐飲，飲剩一餐嘅分量，用咗嚟煮海鮮 risotto，超正哦！

芹香雜菌意大利燴飯

最近大家有冇睇到 Jamie Oliver 個電視節目 ”Jamie’s 30 Minutes Meals” 呀？佢話叫人唔好成日出街食垃圾食物，自己煮其實都可以好簡單、好快手，每一集都教大家 30 分鐘內煮到幾個菜式，包括湯、前菜、主菜同甜品。佢自己整就更係無乜難度啦，一來專業兼熟手，二來廚具齊備，應有盡有，各式煎 pan、煲、鑊都會有雙重，要煮另一樣嘢時都唔使洗煲洗鑊，拎另一隻出嚟用就攪掂，就連焗爐都有兩個，可以同時間焗兩樣嘢，又有 food processor 幫手，梗係掂啦！而且好多時啲食材又唔會洗，蒜頭又連衣放入夾內壓爛成蒜蓉，就算要洗的話，都只係放入筲箕沖一沖水就叫做洗咗，咁做法大部份人都得啦！但其實最嘥時間係之前嘅準備功夫同之後嘅清洗工作，呢啲先至係最嚇怕人唔願做囉！

 

坦白講，呢個節目叫得人唔好出街食垃圾食物，對象就自然唔會係一啲經常落廚嘅人啦，咁唔經常落廚嘅人，個廚房又點會有咁齊備嘅廚具呢，無咁齊備嘅廚具又點會慳到時間喎！！

 

不過，佢裡面所教煮嘅食物都係以健康為主，而且賣相都唔差，唔會話因為遷就時間就求求其其上碟算數，所以如果唔係計較一定要喺 30 分鐘內完成的話，其實每個食譜都唔差。上個星期我就參考咗佢其中一個 risotto 嘅煮法，味道都唔錯，不過我就將佢大部份材料都改頭換面囉！

材料：
西芹
洋蔥
新鮮雜菌
青椒
牛肝菌
新鮮迷迭香

蒜蓉
意大利米

 

調味料：
白酒
清雞湯
鹽
黑椒粉

 

- 西芹洗淨後切細件，部份切粒；洋蔥去衣後切細，部份切粒； 青椒、雜菌洗乾淨後切粒。

- 牛肝菌洗淨後用水浸軟，瀝乾備用，浸菌水留用。

- 將已切細嘅西芹、洋蔥、牛肝菌、迷迭香及蒜蓉放入攪拌機內打爛。

- 燒熱油，將西芹粒、洋蔥粒、青椒同雜菌爆香，盛起備用。

- 再燒熱油，將已打爛嘅材料落鑊爆炒，之後加入米兜炒，然後倒入白酒。

- 兜炒均勻後就將浸菌水及清雞湯加入，轉中慢火煮至水份略收乾，其間不斷攪拌。

- 當水份大至收乾時就逐少加水，攪拌，並加入已爆炒過嘅材料。

- 當飯煮至適當軟硬度時就可以加鹽及黑椒粉調味。

- 最後加少量初榨橄欖油，拌勻後熄火，冚蓋焗 2 分鐘即成。

之前煮泰式酸辣雜菜湯時買嗰包乾蔥頭都未用哂，所以無買到洋蔥；
牛乾菌用哂又唔記得買，用咗同樣咁香嘅姬松茸代替；屋企又
只係得乾嘅迷迭香，所以淨係得西芹係跟足佢咋！！

我自己煮嘢慢手慢腳，半粒鐘淨係夠煮呢個飯囉！
不過味道真係唔錯，好香西芹味呢！

自家製銀針粉

識得整銀針粉，真係要多謝 blog 友緊張大師 – 小女人，個食譜係佢 share 俾我㗎！整銀針粉原來一啲都唔難，材料簡單，做法容易，只要有心機就一定得！而且整銀針粉有個好處，就係可以好快手咁清咗包澄麵哦！

材料：
澄麵 112 克
粘米粉 1 湯匙
木薯粉  1 湯匙
鹽 1/4 茶匙
滾水 170 毫升

 

- 粉類加鹽混合均勻，之後將滾水撞入，用膠刮快手攪拌成糰。

- 將粉糰拎出搓至光滑，然後將粉糰搓成長條狀。

- 逐少搣出約指甲大小嘅粉糰，先將其中一端搓長、搓尖，另一端同樣做法。

- 煲滾水，將粉糰放入烚至浮起，盛起後過冷河，瀝乾水後即可煮食。

 

以上材料份量約為 1 人份量。

銀針粉烚好之後都仲係白色，當沖水過冷河時即刻變得晶瑩通透。

 

細個時，媽咪每次煮銀針粉都係會用叉燒、冬菇同雞蛋嚟炒，依家自己
第一次整，當然都係跟番呢個方法啦，尋找回憶嘛！但我自己
就再加埋雞髀菇同沙茶醬一齊炒，仲惹味呀！

因為一直都係食炒銀針粉，所以完全無諗過會用嚟放湯煮，我之所以會
咁整，係因為去到調音師傅屋企同佢個仔上堂時，佢媽咪
好多時都會煮多一碗湯粉俾我做晚餐，咪就係咁
所以知道可以整將銀針粉放湯煮囉！

Notes：
- 我自己整時跟足食譜用 170 毫升滾水，但完全不能成糰，最後要加多一倍粉類先至成功，所以
  若果粉類用量不變的話，滾水就要減一半。但之後再請教番緊張大師 – 小女人，佢話佢跟足食
  譜做完全無問題，我諗可能係因為唔同牌子嘅澄麵受水性唔同，所以大家整時最好都係先用一
  半水，然後再視乎實際情況酌量加水。

- 有興趣的話，可以去到緊張大師 – 小女人個 blog 度睇睇，佢有圖文並茂教點整哦！

煙肉牛油果意大利燴飯 Becan & Avocado Risotto

隔咗好一段時間無煮 risotto，上星期就試咗用牛油果加煙肉嚟煮，味道都唔錯㗎，入口仲好 creamy㖭！

 

材料：

煙肉

洋蔥

牛油果

蒜蓉

意大利米

羅勒

百里香

調味料：

白酒

清雞湯

鹽

辣椒粉

 

- 煙肉剪碎；洋蔥去衣後切成細粒、牛油果去殼、去核後切粒。

- 燒熱油，放入煙肉碎慢火煎香，之後加入洋蔥同蒜蓉一齊爆香。

- 將米加入，兜炒片刻，倒入適量白酒炒至乾。

- 之後加入清雞湯，邊煮邊攪拌。

- 當水份煮乾後就再加入湯及牛油果，繼續邊煮邊攪拌。

- 重覆加入清雞湯煮至米熟為止，最後加入鹽、香草同辣椒粉調味即成。

今次試吓煮得無咁乾身，但個人口味都係鍾意比較乾爽少少。

今次個牛油果唔係好靚，味道唔夠香濃，可惜！