德國黑麥汁

        其實都已經知道有呢樣嘢好耐，但就一直都未飲過，直到早前行超市時無意中發現有得賣，問過好多素友又話個價都算平，即管買枝試試。

 

 

發芽菜

        前兩、三個禮拜又搵綠豆發芽菜，唔知係因為天氣太凍呀，定係包綠豆放咗入雪櫃，今次啲芽菜發得好慢，發成個禮拜先有番咁上下高。

 

 

橄欖油消化餅

        前排世衛公佈，加工肉類食品屬於致癌物質，其毒性相當於石棉、香煙同酒精，初時聽到報導都唔覺得好意外，但跟住聽埋落去，話牛肉、豬肉等紅肉都屬於致癌食品，呢樣就真係有啲 shock，話因為多攝取紅肉脂肪就會致癌。雖然我自己一向都少食，但真係估都估唔到有咁大殺傷力！查實間唔中先食一次加工醃製食品都唔會食壞人嘅，又唔係叫你日日食，都唔使話驚到要謝絕所有加工食品，我成日都話，食煙嘅人未必係肺癌死，飲酒嘅人亦唔一定會死於肝癌，正所謂該死就唔使病，食幾多著幾多都真係整定嘅！！

 

        識整西點的話就肯定知道一定會用到大量牛油，不單只口感鬆脆，仲會增加成品香味，但對我嚟講嗰種唔係香而係臊，所以我已經無用好耐，真係頂唔順佢嘅味道，而且都係屬於動物性脂肪，多食都無益。本來用 margarine 代替就最啱，臊味奶味都無，不過有反式脂肪就仲死得人多，都係盡量少用，所以我整西點盡可能都係用液體油，唔單只係麵包同 muffin，就連餅乾、批底同 scone 我都試過用液體油整，效果有時比起用牛油更加鬆脆，真係好奇怪！

 

 

德國酸椰菜

        成日都聽到人講話跟德國鹹豬手一齊食嘅醃酸椰菜好好食，但喺香港好少見到有，上網搵過資料，原來係要攪一大輪步驟去發酵，而且材料都未必買到，所以之後就不了了之！

 

        有次去糧倉入貨時居然俾我見到佢嘅蹤影喎！！

 

 

屯門都有沙律菜賣

        呢個禮拜比較忙，無乜時間靜靜坐低寫 blog，嚟緊有空檔先慢慢出番啦！先講番上個禮拜六嘅事。

 

        做我哋呢行，星期六應該係最忙嘅一日，因為啲學生唔使返學，所以理應全日都會有學生，唔會好似平日咁成四、五點先開工。教咗足足廿年，居然呢段時間禮拜六可以全日專心量地同拍烏蠅，真係夠哂折墮！！不過折墮還折墮，我都唔會浪費咗啲時間，喺屋企做清潔、整包餅、買餸煮飯等，總之次次放嚫假都一定攰過返工，除非當日狀態唔好啦，咁就會用嚟休息攤抖囉！上個禮拜六就去咗 Winnie 屋企交收，之後順道去補充物資。去得到新墟，當然要去幫嚫吓 Facebook 網友早前介紹過嘅沙律菜檔啦！

 

 

華記果菜有限公司

        噚日突然間改到 5:00 pm 先開工，所以開工前變成有好大段時間得閒無嘢做，而且反正都過開去港島嗰邊，又去多轉蘇豪區，睇吓搵唔搵到「華記」先！

超值沙律菜

之前喺電視度睇到肥媽介紹中環嘉咸街街市有檔專賣外國沙律菜嘅菜檔，價錢合理相宜，當時我已經好想即刻飛去睇睇，之後上網又成日見到啲人話去買沙律菜好抵，比起超市平好多，我越睇就越心思思想去，可惜自己住得遠，打埋東費都差唔多！

 

今日七‧一紅假，晨咁早七點鐘起身過銅鑼灣同跑馬地教琴，所以教完哂都仲係好早，卒之都有機會去嘉咸街 “朝聖” 喇！其實大部份人都係介紹「華記菜檔」，但我去到沿住嘉咸街一路向上行，其實都有好多檔買沙律菜，反而就見唔到「華記」，可能係因為依家「市建局」進行重建工程，地盤位正正就係之前「華記」，所以搵唔到，但我見到地盤對面有檔買嘅種類相對其他菜檔比較多，而且又見到網友相片中英文嘅價錢牌，我估應該係搬咗過去對面啩，就入去呢間買吧！

嘩嘩嘩，真係好平，平過超市好多，如果無老人癡呆的話，羅馬生菜
賣 $ 16 磅，而沙律菜就賣 $ 26 磅，我呢度買咗一大棵羅馬生菜
同 3 棵沙律菜，你哋估吓呢籃菜要幾錢？全部夾埋都係
$24 咋，係咪勁吸引呢？棵生菜仲大到
要分兩餐食呀！

我自己就整咗個 Italian dressing 嚟撈沙律，啲菜真係好正，又新鮮、又清甜呀！

今晚晚餐有雜菜沙律、香草煙三文魚伴牛油果、忌廉海鮮蘑菇湯加黑麥包，
甜品係麵包布甸，美中不足嘅係無親自煮湯，開罐罐頭湯算數，
因為個人好攰，唔想再攪咁多喇！雖然好求其又一餐，
但食得開心又滿足哦！

朱古力脆脆包

        自從「美心」出咗個朱古力雪山包之後，其他西餅麵包店都跟住推出類似物體，之前我都試過「聖安娜」果個朱古力菠蘿包，除咗賣相唔吸引之外，連個古古力餡都唔係好得囉，好彩係有 coupon 先買嚟試，感覺上好似無咁 "蝕"，所以我都費事影相寫 blog 喇！

        今朝去買餸時，順便走過去「山崎」睇吓有冇包包啱，有就慳番唔洗整 lunch，食包包算數！ 今個月嘅特價麵包，除咗有我鍾意嘅煙火腿蘑菇包之外，仲有新出嘅朱古力脆脆包，個款都幾吸引呀，所以就買嚟吓。

包包上面有我鍾意嘅腰果。

        我習慣將包包焗熱先食，不過坦白講，買果陣時，睇個包面都唔覺會脆囉，正話我已經用 grill 嚟焗 o架喇，個面一樣無料到，如我所想，有少少韌，粒腰果就真係好脆！ 個餡都 OK 夠香濃朱古力味，不過同「美心」個雪山包比就仲差一截，但肯定好過「聖安娜」囉！

天色唔好，個人又攰，真係煮碗麵都懶，求求其其，兩個包加杯即沖咖啡
就算數，咖啡機都懶開兼懶洗呀！食飽就出發去 Louisa 度喇！

德國合桃提子稞麥包

        早前 blog 友 Keith 問我有冇試過 A1 Bakery 果個德國合桃提子稞麥包，睇個名，初時仲以為即係佢嘅至愛麵包，因為果隻叫做裸麥合桃提子包，後尾親身去過 A1 一趟，見到個德國合桃提子稞麥包嘅真身，原來同裸麥合桃提子包完全唔同，一睇個款我就知道呢隻應該比果隻更加吸引我。不過個價錢就一啲都唔吸引我囉！賣成 $36 一個，我覺得都幾貴呀，所以我都係等佢夜晚買唔哂時做優惠先再考慮。

        點知，過多一個禮拜，我再去 A1 時，發覺喺「麵包優惠」果個 shelf 真係有呢隻包包做特價，半個買 $14 咋！咁就真係啱哂，唔單只有平包買，仲可以只係買半個嚟試食，真係正！

睇個樣就已經知道，呢個德國合桃提子稞麥包比裸麥合桃提子包
扎實好多。

 

包包裡面同樣有合桃及提子乾，不過個麵包扎實之餘，而且仲係用
酸種整，我諗 Keith 應該唔啱食，因為佢食慣軟包。

 

一向我都好鍾意喺 A1 買歐陸麵包食，因為佢係完全無蛋、
無牛油 o架，非常健康。

        Keith，我諗你都唔駛再考慮呢個包啦，因為完全唔係你果杯茶囉！

丹麥麵包

        早前喺中環開咗間麵包店，以賣丹麥麵包味司作招來，印象中，好似未食過丹麥麵包吐司，都好想試吓。不過，對於一個屯門人嚟講，真係鞭長莫及，唔通為咗果包老遠搭長途車去買咩！！ 而且，聽講個價錢都唔平呀！

        近排先發現，原來「山崎」都有得賣，不過就唔係間間都有，亦唔係時時都有得賣，噚日去 Louisa 屋企時，經過商場間「山崎」見到有得賣，於是就買嚟試吓。

原來唔似食丹麥酥個口感喎！麵包比較鬆軟。

 

好鍾意佢上邊啲鬢辮做形。

        買返屋企食嘅麵包，我習慣會焗番熱先食。今次我開埋個 grill，所以麵包外皮好脆，好好食，而且又無乜牛油味，其他人可能會覺得唔夠香，但我呢個唔好乳製品嘅人，就合哂胃口啦！

         我諗呢個丹麥麵包應該係「山崎」咁多吐司方包之中最貴嘅一款，盛惠 $15。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

加州桃駁李

        之前食過加州水蜜桃印象都唔錯，所以今次見到同樣嚟自加州嘅桃駁李，都即刻買返嚟試吓。除咗因為同出一系之外，最重要嘅仲係價錢相當吸引！

        上次喺「百佳」度見到 $12 / 3個已經覺得平，早前喺街市生果檔見到呢個桃駁李仲抵，$11/ 5個，平均只係 $2.2 一個咋！所以其實好多時候去超市買嘢真係要格過價，因為同樣款式嘅產品，比起街市、藥房及雜貨鋪，最誇張可以貴成七、八成！皆因供應商擺啲貨喺超市賣，係要俾上架費，而且呢個上架費都唔細數目 o架！供應商當然唔會做蝕本生意啦，啲上架費自然就轉嫁俾消費者囉！但喺其他地方賣就無上架費呢樣嘢，所以可以平好多。

        講番呢個桃駁李，我覺得同食水蜜桃分別唔係咁大，差唔多食法，比起水蜜桃更爽口，但就反而無水蜜桃咁香，聽個名仲以為個 texture 會係介乎喺水蜜桃同李之間嘅質感 o添！

桂格小甜圈蘋果榖類早餐

        其實喺超市留意咗呢隻穀物早餐好耐，因為有我鍾意嘅蘋果同肉桂嘛，不過一日唔減價，一日都唔會買嚟試，因為我覺得唔值呢個價，我寧願買番燕麥方脆好過。點知早幾個星期卒之俾我等到佢減價喎，咪買返嚟試味囉！

        打開個盒，剪開包裝袋，已經聞到好濃嘅蘋果味同肉桂味，即刻攞粒嚟試吓，嘩，好鬼甜呀，真係甜到阿媽都唔認得！！

        本來呢類穀物早餐係屬於健康食品，但係整到咁甜，就一啲都唔健康啦！而且摸完之後隻手會有啲油 o添，係我食過咁多隻穀物早餐之中唯一一隻咁甜、咁油。所以我都唔推介俾各位喇！

        都係燕麥方脆好食啲！

水蜜桃食後感

        報告、報告，小弟已經食咗兩個加州水蜜桃喇！哈哈，果然俾 Frankie 估中，真係打咗針喎！！

        點解咁講，事緣上次食過 Louisa 個日本水蜜桃無乜味道，我就同佢哋講，咁我對我果幾個水蜜桃都無乜期望喇，Louisa 話未必，可能甜呢，跟住 Frankie 就話，係呀，可能打咗針，咁咪甜囉！所以我咪咁講囉，死未！

除咗甜之外，黃桃就比較香同腍身。

 

而白桃就無咁香甜，但係就勁爽脆，唔知係咪其實未夠熟，要再
熟啲先食得呢！

        我懷疑水蜜桃係含好豐富嘅鐵質，呢頭批緊皮，果頭就即刻變啡色，仲快過蘋果、雪梨同香蕉呀！

        有機會見到減價就再 encore！報告完畢。

 

加州水蜜桃

        噚日晏晝上 Louisa 屋企前，去咗佢屋企對面果間 "疑似"「 Taste」嘅「百佳超級廣場」度兜咗個圈，見到有水蜜桃買，個樣都唔差，$12 / 3個，都唔貴喎 (「惠康」賣 @$5. X )，仲聞到好香桃味，於是就求求其其咁揀咗兩個黃桃同一個白桃 ( 因為我唔識得揀，所以咪求其揀囉 )。

       

        印象中，我好似咁大個仔都未食過新鮮水蜜桃，桃駁李就食過。之前睇「咁至識食」第一集時，睇到果醬專家 Bonnie 教整蜜桃果醬，佢話依家呢個時候水蜜桃係最當造，所以咪買嚟試吓囉！

P.S.  咁啱上到去 Louisa 屋企時，佢又請我食日本出產嘅超巨型黃桃，不過唔係真係咁香甜。我同 Louisa 講，之前睇到李純恩喺自己個專欄度講，去日本最好就係食白桃，試過之後都唔駛再試其他品種，Louisa 都係咁話，佢仲誇張到話要對住個洗面盆嚟食至得，因為真係勁多汁，一路食一路流到周圍都係汁咁話。所以對於我買果幾個加州蜜桃都唔會抱太大期望，食完再同大家報告啦！

A1 裸麥合桃提子包 & 朱古力 doughnut

        呢輪同 blog 友 ティーカッププードルーランド 傾偈，成日都講緊 A1 Bakery 個裸麥合桃提子包，因為係佢嘅至愛，佢話暫時都未有一隻麵包及得上佢咁好食！鬼咩，佢淨係鍾意食軟包，查實真係好少有歐陸軟包 o架！所以我介紹佢食 Pumpernickel 個黑麥包佢都話 "超級難食" ，死未！！

        因為近排成日都提起呢個裸麥合桃提子包，而我又真係好耐都無買呢個 "正" 包嚟食，真係講到我都心郁郁，咁啱今日經過海翠坊見到 A1 呢個包又啱啱做特價，照樣只係 $16，咁咪買番個嚟食吓先！

但係今日個主角唔係裸麥包，而係朱古力 doughnut。

        雖然裸麥包都好好食，但係已經唔係第一次食喇，反而 doughnut 係第一次買嚟試呀！因為之前睇過報紙講，喺香港好食嘅 doughnut 唔多，A1嘅 doughnut 算係數一數二好食 ( 之前執咗果間 Kripsy Kream 啲 doughnut 雖然好出名，但係個個都話好鬼死甜，唔係咁啱香港人口味 )，咁我咪試吓囉！雖然係貴就貴咗啲，不過人一世，物一世，乜都試吓嘛，最多豪一次俾佢咁大把！

        個冬甩真係唔同啲 o架，發得特別厚身，咬落好實在，唔會太腍。由於 doughnut 係油炸，加上佢嘅實在質感，真係有少少似油炸鬼 feel，唔怪得之 blog 友 T&P 介紹炸兩俾鬼佬認識時，佢形容為 "Chinese doughnut with rice roll " 啦！而薄薄嘅一層朱古力醬又蘸得好均勻、好靚，唔會好似「山崎麵包」啲朱古力 doughnut 咁，面頭層朱古力一咬就裂哂，跌到一地都係，果然一分錢一分貨。

裸麥合桃提子包就唔駛講啦，一定好食。加杯咖啡，呢兩個包就係
我今晚嘅 dinner 喇！

楓糖味及肉桂味燕麥方脆

        我不嬲都勁鍾意食桂格嘅燕麥方脆，朝早加豆漿或鈣思寶做早餐，有時有加埋乳酪一齊食，甚至就咁當零食食都一樣好味，試過一路上網一路食，不知不覺就食咗半盒！ 真係好好食 o架！等我遲啲試吓要嚟整西點先。

        最近就出咗兩隻新口味，就係楓糖味同肉桂味，我就梗有買嚟試啦！

        隻楓糖味原本一食落口好正、好香，因為從未食過楓糖，所以感覺好新鮮，但係食食吓就越食越濃，仲好似好 "假" 咁，睇番個成份表，原來有用到 artificial favor ( 人工味道 )，唔怪得之啦！所以唔我會推介俾大家。

        至於另外果隻肉桂味就 mild 得多，對於我呢個 "肉桂精" 就梗係正啦，不過我今次都好醒，食之前已經睇吓有冇 artificial favor，呢盒就無加到 (希望無眼大睇過龍喇)！我依家都係一路寫 blog，一路 "脆卜卜" 緊 o架！ 

         所以我只會買番原味同肉桂味囉！

唂咕包

        真係好，美心西餅不斷有 coupon，我就可以慢慢試各種麵包，今次就睇中新出嘅唂咕包。

        我覺得真係無改錯名，叫做唂咕包而唔叫做朱古力包，係我嘅字典裡面，唂咕係比朱古力濃，而且無咁甜，呢個包就正正係咁樣。

        表面一粒粒焗到金黃色嘅就係所謂嘅牛油曲奇？但我唔覺係曲奇囉！

 

       最開心就係麵包裡面有啲朱古力粒，食落特別有朱古力味！如果包質硬番啲就更加好喇！

 

        今次個實物同廣告張相算係分別唔大 o架喇，值得一試！

椰檳

        早前剪低嘅美心袋裝麵包 coupon 月低到期，本來一心再去買多次個唂咕麵包，點知已經賣哂，見個架上面有好多隻包都試過哂，突然諗起呢隻椰檳未試過喎，好，就買嚟試吓啦！

黑麥@Pumpernickel

       無錯，的確又係「Pumpernickel」嘅黑麥包，真係勁鍾意佢囉，介紹嚫俾朋友試，無一不立即愛上它，Lily 如是、Winnie 如是、就連 Louisa 都如是，你話呢個黑麥包係咪真係魅力沒法擋呢！

南瓜提子麵包

        哈哈，有 coupon 唔好嘥，繼續試吓美心其他款式嘅裝包先！今次就揀咗呢隻南瓜提子麵包，皆因我真係勁鍾意食南瓜 o架。

        嘩，啲顏色好靚，好金黃呀，不過佢係有落到色素 o架！深橙色嘅粒粒就係南瓜粒嚟 o架！

        個包用咗好多提子乾同鮮南瓜粒，第一啖咬落去已經 feel 到南瓜淡淡嘅清甜，咪以為 "淡淡" 即係代表唔夠濃味呀，其實代表個味已經好出 o架喇，我都試過幾次用南瓜嚟整蛋糕，但係無論落幾多，即使顏色已經好金黃 ( 當然自家出品就無用到色素啦 )，都食唔到南瓜味 o架，所以 "淡淡" 都已經係好有味道喇！睇番個成份，南瓜係排第三位 o架，只係僅次於水同麵粉，即代表成份當中南瓜所用嘅份量都幾多，因為所有食品成份表裡嘅材料都係根據用量多寡嚟排次序，份量越高者就排喺最開頭，所以點解南瓜味都幾出呢。