成功喇，卒之都成功喇！！
之前整咗咁多次海綿蛋糕都唔成功，今次參考咗餅后 Vanlily 所提供嘅海綿蛋糕材料比例配方，一整就掂喇！而且佢又好詳細咁 step by step 將製作步驟列出，真係不愧為餅后。
今次個蛋糕係整俾伯伯同伯娘嘅，因為之前伯娘成日都問我整蛋糕有冇落發粉 ( 泡打粉 )，佢聽過人講整蛋糕可以唔駛落發粉覺得好出奇，所以我就專登整一次俾佢哋試吓囉！
本來個蛋糕面都好乾爽、好靚 o架，不過因為我呢個烘焙初哥唔係整慣餅嘅 "阿茂"，所以唔知道原來唔係所有嘅糖霜都防潮，買錯咗普通糖霜。灑咗喺蛋糕面嘅糖霜，拎到去伯伯屋企時，一打開，發覺唔見哂，全部都溶哂！！咪攪到個蛋糕面 "濕立立" 咁囉，唔知仲以為搽咗果膠 o添呀！後尾問番明仔先知原來要買果隻寫明 "防潮糖霜" 先至防潮，不過佢話原來可以自己溝粟粉做防潮糖霜，係佢之前學整蛋糕時個師傅教嘅。
啱啱焗起出爐時就係咁嘅樣，好乾爽、好靚哩！不過因為我影相時手腳慢，未影到張靚相，個蛋糕已經開始收縮，攪到我求其影完張相就 "嗱嗱聲" 將佢倒轉放涼。
嗱，切開裡面就睇到個海綿蛋糕嘅 texture，成功做到啦！比起上次個伯爵紅茶蛋糕，應該好好多，因為 Winnie 話俾我聽唔係真係好軟熟。不過可能早幾日天氣仲係好乾，原本焗果日我同老豆食咗啲 "剩餘物資" (倒完落個蛋糕模度，多咗少少麵糊出嚟，就求其用碟裝起佢，擺埋入爐一齊焗 )，覺得好鬆軟，老豆仲話好似街賣果啲咁軟，點知第二日喺伯伯屋企食就乾好多，伯娘都話：「軟就軟喇，不過嚡咗啲！」其實都唔只 "啲" o架啦，係佢有修養唔直接 "彈" 我啫。
材料：
雞蛋 2隻
中筋麵粉 32克
粟粉 8克
牛油 40克
黃糖 25克
砂糖 15克
檸檬汁 1茶匙
柚子蜜 1茶匙
食譜參考自 Vanlily 嘅海綿蛋糕 (全蛋打法)，可以做到一個 6 吋蛋糕。
麵粉、粟粉要預先過篩 3 次；焗爐用170°C 預熱，可同時放入牛油熱溶成牛油溶液；柚子蜜內嘅柚子皮用較剪剪碎，加入檸檬汁混合成檸檬柚子蜜汁。
跟住落嚟嘅步驟我就唔喺度寫啦，有興趣嘅 blog 友就直接 click Vanlily 條 link 入去睇啦。正如我之前所講，佢真係 step by step 咁寫哂出嚟，仲圖文並茂 o添，所以我跟到足佢啲步驟嚟做就成功做到喇！
Notes:
1. 因為老人家唔可以食太甜，所以我就將部份砂糖用黃糖代替，一來無咁甜，二來味道甘香啲。
2. 如果你有低筋麵粉的話，就可以直接用40克低筋麵粉，唔駛另外溝粟粉。
3. 將檸檬柚子蜜汁與牛油溶液混合後，就可以直接用嚟同蛋糊混合。
