醃肉基本法

        以前細個果陣時唔識嘢，入廚房幫媽咪手，媽咪叫我幫佢醃肉，我就將所有鹽、糖、生抽、酒、粟粉同油一次過加哂落去撈勻，但媽咪教我，唔可以咁樣做，因為粟粉同油會包住啲肉，咁就會阻住啲醃料醃入肉裡面，最終啲肉就會唔入味。依家媽咪唔係度，就要自己學煮餸，咁睇到唔同嘅食譜，睇過唔同嘅烹飪節目，綜合各家各門方法，得出以下醃肉 "基本法"：

- 先落鹽、糖、生抽、酒落去撈勻。

- 之後加適量水攪勻，可以令到啲肉質感鬆啲。

- 先醃半個鐘，等啲肉入味。

- 之後加入粟粉，拌勻，作用係將肉同調味包住。

- 再加入油，不但可以令肉油潤啲，仲避免因之前加咗粟粉而變得較黏，落鑊時就
  唔會黐鑊黐到阿媽都唔認得！！


    如果你哋有咩高見或更好嘅醃肉方法，不妨同大家一齊分享啦！我都係入廚初哥，要咁多位資深嘅廚房 CEO 指教指教！

白酒忌廉汁煮蜆 (已更改)

        前兩日我老豆拎咗啲蜆返嚟，今日我就試吓用西式方法去煮，睇吓似唔似 Louisa 煮得咁好食先！

材料：
蜆
油泡紅椒
蒜茸
新鮮羅勒 ( basil )

汁料：
清雞湯
白酒
淡忌廉

- 先用牙刷將蜆徹底洗刷乾淨。

- 燒熱油，爆香蒜茸及紅椒後，加入白酒，將酒精煮至完全揮發。

- 加入少量清雞湯，煮滾之後就加埋淡忌廉一齊煮。

- 汁料煮滾之後，就可以倒埋啲蜆落鑊，兜炒幾吓後就冚上鑊蓋，將蜆煮熟。

- 當所有蜆都開哂口之後，就代表已經煮好。

- 最後加入羅勒，快手炒幾吓就攪掂！

 

        ( 原來我又老人癡呆發作，做錯咗我個 friend 教我嘅步驟，所以有興趣煮呢個菜嘅 blog 友要留意番我個 friend loulou 嘅回應呀！)

老豆話啲蜆係個 friend 出深海撈返嚟㗎。

 

為咗煮呢個餸，專登走去超市買樽白酒，對於唔飲酒嘅我，
加上我又唔識揀，當然求其買支平平哋算數啦！
呢支白酒賣十零蚊咋！而我盒用剩嘅淡
忌廉又有機會發揮佢嘅功用啦！

 

 
         蜆肉勁鮮甜，好食又唔會韌，但最正反而係啲汁，因為所有蜆肉嘅精華都落哂去，所以啲汁鮮甜無比，夾著輕微酒香加羅勒香味，再加上少少辣味，簡直好味都唔識形容！ 所以剩咗嘅汁我已經留番起佢，諗吓要嚟煮咩好先！

Notes：

- 因為蜆肉本身已帶有天然海水嘅鹹味，再加上清雞湯亦已經夠味，所以完全唔駛
  落鹽。

- 羅勒記得最後先落，而且唔好煮太耐，否則香味好易煮到無哂。


P.S.  有無留意到我盒 cream 用保鮮紙封住盒頂呢？呢個方法係 blog 友幸福蠍教我嘅，咁樣就可以保存得耐啲。我呢盒cream 已經開咗超過兩個禮拜啦，到依家都仲用得，無變壞到。不過我講啲更恐怖嘅嘢俾大家聽，我學生話俾我聽，佢暑假時開嚟用果盒 cream，到依家都仲擺喺雪櫃度，佢話 check 過無變壞喎！( 係咪真㗎，有少少驚喎！ )

南北杏雪梨海底椰煲豬腱

        近呢幾年，每次一轉秋天，氣管就即刻敏感起嚟，長期都會有幾聲咳，一路直至到春天先會好轉。呢排天氣又非常乾燥，所以我今日就用雪梨同海底椰煲湯，潤潤佢先！

材料：
雪梨
海底椰
無花果
南北杏
豬腱
蜜棗

- 無花果、南北杏、蜜棗用暖水浸軟，沖洗乾淨，無花果切半開邊。

- 豬腱洗乾淨、汆水，用凍水沖走多餘血水。

- 海底椰去皮；雪梨去皮、去蒂、去芯備用。

- 將所有材料凍水落煲，然後煲滾。

- 用真空煲煲湯嘅朋友，請參考「利用真空煲煮好餸、煲靚湯！」。

- 飲用前加鹽調味。

        清潤又清甜，飲完之後喉嚨即刻覺得好潤、好舒服呀！

利用真空煲煮好餸、煲靚湯！

我要為真空煲平反呀！！

        好多朋友對真空煲都好抗拒，覺得將啲餸夾硬 Au3 熟，煲湯就因為唔係用明火煲，做唔到一直煲滾對流嘅效果，於是就被形容為 "水" 而唔係湯！

        好多人都會誤解咗真空煲嘅真正用法，以為只需將內鍋裡面嘅材料煲十零廿分鐘，之後放番落個真空煲度，等幾個鐘之後就已經煮好餸或煲好湯。其實真空煲嘅操作原理，同舊式玻璃內膽嘅保溫熱水壺一樣，主要用真空方法去保溫，當然，真空煲嘅保溫效果就遠比熱水壺好得多！所以每次將內鍋拎番出嚟之後，係要放番上明火度煲多十零廿分鐘，咁效果就好好多，同用明火一直由生煮到熟無乜分別，你睇我用真空煲整日式紅豆餡時，啲紅豆都可以煮到完全爛哂，變成紅豆蓉，就知道其實係 work 啦！


正確使用真空煲方法：

- 先將材料煲滾，之後轉中慢火煲 15 - 20 分鐘。

- 準備將內鍋放番入個真空煲之前，用大火煲多半分鐘度。

- 熄火後盡快放入個真空煲度，咁就可以將鍋內嘅熱力盡可能煲持。

- 幾個鐘後 ( 最好能存放 2 個鐘度)，將內鍋再次放上明火，同樣煲番 15 - 20 分鐘
  度，咁就 OK 啦！

 

 

        真空煲最主要係唔駛睇火，啱哂啲上班一族人仕，返工前煲小小時間，放工後返到屋企只需再煲多小小時間，就有靚湯飲喇！再者，因為唔駛一直喺明火煮餸或煲湯，前後真正用明火最多都唔夠一個鐘，所以極之慳燃料，節省能源，我依家平均每個月石油氣用量都只係一、兩度咋！


 

黑芝麻麻糬波波 Black Sesame Pontikege

        自從上次第一次整麻糬波波失敗咗之後，一直都再無 "挑戰" 過。好，今次捲土重來，再次接受挑戰！

豆渣處理及保存方法

        每次整完豆漿，我都會將啲豆渣留番起。雖然喺好多人眼中都會將豆渣視為癈物、垃圾，最好嘅處理方法就係倒哂落垃圾桶，乾手淨腳！

        但係豆渣其實係好有用 o架，可以用嚟整麵包、餅乾、蛋糕、煮湯 ……，甚至可以加番落啲豆漿度一齊飲用，若果再加啲燕麥片一齊煮，就成為咗一份營養豐富嘅早餐 o添！

        大型超級市場其實都會有豆渣賣，不過價錢肯定唔平，與其用錢去買呢啲 "垃圾"，倒不如自己花少少功夫，不但經濟實惠，仲唔會浪費食物呢！

 

花生去衣方法

        想將花生容易啲去衣？最重要就係將花生衣整到乾脆。

- 將花生放白鑊內略炒，見到花生衣炒到脆身後就可以熄火，稍為攤凍少少後趁暖
  用手指捽去花生衣。

- 有焗爐的話就更加方便，用 180 °C 火將花生烘焗約 8 -10分鐘，花生衣即刻變
  到又乾又脆。 - 如果你屋企個焗爐有烤焗 (grill) 功能的話，就更加快，同樣用180 °C
  火力，只需烤焗約 5 – 6 分鐘就已經可以烤脆花生衣。

翠玉瓜炒粒粒

         好耐都煮過炒粒粒菜式喇，星期一果日我就用咗翠肉瓜做主材料嚟炒粒粒，加入咗少量柱侯醬，味道唔會太濃，但就為呢個菜式生色不少。

材料：
翠玉瓜
急凍粟米
甜菜甫
花生
蒜茸

調味料：
柱侯醬
紹酒
糖
鹽
麻油

- 花生去衣，放白鑊內炒香及炒至金黃色，備用。

- 粟米解凍後略沖水，然後汆水、瀝乾待用。

- 菜甫略為沖洗；翠玉瓜洗乾淨，將兩樣材料切粒。

- 燒熱油，爆香蒜茸後，加入菜甫同柱侯醬一齊爆炒。

- 加入翠玉瓜，與醬料兜炒均勻後，灒酒。

- 加少量水，冚上鑊蓋將翠玉瓜略為煮至軟身。

- 加埋粟米後炒多一陣就落埋鹽同糖，抄勻。

- 最後落埋已炒香花生，立即熄火，灑上麻油，兜勻即可上碟。

Notes：
- 想知道點樣可以易啲將花生去衣，請參考「花生去衣方法」。

- 相方便的話，可用罐頭粟粒米代替急凍粟米。

- 柱侯醬只為吊味，唔好落太多，否則就會失去翠玉瓜清新味道。

- 花生不要炒太耐，否則會變腍身而唔鬆脆。

恭喜 Miss Cheng 榮獲「十大傑出青年」

        今朝買完餸返屋企，一邊食早餐，一邊睇報紙，睇到衡仔攞到今年嘅「十大傑出青年」，一路睇落去，點知見到鋼琴老師鄭慧博士都榜上有名喎！真係戥佢開心喇！我自己都係第一次身邊有熟人咁 "巴閉" 攞「傑青」咋，我諗應該係我近幾年嚟最值得開心嘅一件事。

        Miss Cheng，congratulation！！恭喜妳榮升做香港傑青！

        酒我就唔飲 o架喇，依家就以一杯自製豆漿代酒，暫時喺網上慶祝先啦，到11月約妳同 Winnie 出嚟食飯時再同妳補番慶祝。

        Cheers！Brava！！

自製豆漿煮法

        豆漿好飲又有益，所以我間中都會自己整嚟飲 o架！不過，豆漿一定要徹底煮熟煮滾先可以飲用，因為未煮熟透的豆漿會有一 "朕" 草青味，而且生豆漿內係有一種叫做「黃豆皂素」嘅物質，對人體有害，所以一定要徹底煲熟、煲滾先可以飲。

        唔好以為見到豆漿煮滾就算數，因為啱啱煮滾嘅豆漿，裡面嘅皂素其實係未徹底消去，所以最好就係當豆漿煮滾之後，轉慢火繼續煲多 5 分鐘，咁就穩陣好多喇！