做冬 2009

        因為星期一係我嘅 dayoff ，比較得閒，所以我就叫咗阿馳同阿瑩噚晚返嚟食飯做冬，咁我就可以有多啲時間準備嘛！

        噚日我準備咗四餸一湯，仲以為會由朝做到晚，完全無得抖，點知原來中間都有兩、三個鐘頭食 lunch 同休息，都唔算太辛苦。

        好喇，攪掂哂，埋位食飯喇！

首先飲碗湯先，係蓮藕綠豆蠔豉煲豬骨，可能落得料多，
所以勁鮮甜囉！

 

呢碟係栗子炆雞，係我第一次用冰鮮雞煮餸，都唔差喎！雞件
除咗醃過夜之外，煮果陣仲落埋豉油雞汁，老豆話炆得好
入味。

 

跟住呢個就係個個食過都讚嘅白酒忌廉汁藍青口，今次跟咗 Louisa
教我嘅方法，爆香哂啲煙肉嚟煮，真係超正喎！阿瑩好捧場呢！

 

嚟喇嚟喇，用 Le creuset grill pan 煎嘅三文魚扒呀！可能今次係
第一次用個 pan 嘅關係，比較黐鑊，所以煎得唔係太靚，
不過都 OK 啦！食果陣蘸埋西式芥末，正！   

 

之前果幾碟都係比較濃味，所以就清清哋灼碟唐生菜。當然，
梗係用老豆喺農場拎返嚟嘅有機生菜啦！灼菜時唔記得咗
落鹽，反而食得出生菜嘅清甜。

 

食完飯，就梗係要食甜品啦！嗱，Mononako.A 同 T&P，我之前
整嘅桂花糖就係要嚟煮呢個桂花丸子喇！好清香、好好味
呀！甜度調得啱啱好，我老豆都讚好食，真係無白費
我搓丸子嘅心機。

        往年就算自己無親手搓湯丸，我都一定會去超市買包湯丸返嚟煮，因為過時過節要 "團圓" 嘛！但最重要都係要嚟供佛，同埋整埋俾媽咪同我哋一家人一齊做節嘛！

西檸煎軟雞

        其實呢個西檸煎軟雞已經係第二次整 o架喇，不過上次掛住食，唔記得咗影相，所以無 post 到上嚟。

        今次整好之後趁記得就即刻影相喇！

 

材料：
急凍雞扒
粟粉
雞蛋
檸檬

醃料：
鹽
糖
雞粉
生抽
紹酒
麻油

芡汁料：
檸檬汁
白醋
糖
鹽
吉士粉

- 雞扒解凍後洗乾淨，用抹手紙索乾水，之後用醃料醃一個鐘以上。

- 雞蛋拂打成蛋液，將醃好嘅雞扒蘸上蛋液，再撲上粟粉。

- 燒熱油，先將雞皮果一面煎至金黃香脆，之後翻轉將另一面煎熟，盛起。

- 檸檬刨皮後，榨出檸檬汁，連同檸檬皮茸、白醋、糖同鹽一切煮滾。

- 吉士粉用小量水開勻後，倒入煮滾嘅汁料內埋薄芡。

- 將芡汁淋上已切件雞扒即成。

Notes：
- 雞扒唔駛撲上太多粉，否則就會食到一層厚厚嘅硬粉。

- 煮芡汁時可酌量加水以調校合適嘅稠度。

朱古力鬆餅 Chocolate Chips Muffin

        記得上次去台灣旅行時，我專登參考仙姐個食譜整咗雙重朱古力腰果鬆餅俾班老友食，剩低果啲就俾咗我老豆同阿馳食。

        早前問番阿馳同老豆，佢哋不約而同都話整咁多次嘅 muffin，最好食都係呢個朱古力 muffin，見星期一阿馳會返嚟做節，而開咗果盒 cream 又好耐都無用喇，所以今日得閒就再整多次，等阿馳返嚟時就可以順便帶走返屋企食。

自家製桂花糖

    一直都好想買樽桂花糖返嚟整甜品，但係一大樽桂花糖買返嚟真係有排用，所以一路都無行動。直到見到 blog 友阿 Yen 佢自己整桂花糖，原來材料同做法都好簡單、好易整，所以就決定出手自己整，咁就可以整少少都得，唔駛買咁大樽！

    今朝教完老人中心之後，買完餸返到屋企用咗小小時間就已經整好咗喇！

材料：
乾桂花   4克
片糖   1片
水   2/3 杯

食譜參考自 yen 之幸福廚房。

- 先將水煲滾，之後放片糖落水煮溶。

- 當所有糖都完全溶哂之後，就加入桂花。

- 用匙羹間中將糖水攪拌，避免黐底。

- 當糖水煮到濃稠，並且開始出現氣泡就可以熄火，盛起。

一路煮已經聞到好香桂花味，用匙羹 "畢" 咗少少嚟試味，
Hm ~ ~ ~ ~ 好正呀！

Notes：
- 用嚟裝桂花糖嘅玻璃樽需預先放滾水內烚過，以作消毒。

- 片糖嘅份量可依個人口味增減。

Le creuset grill pan

        噚日居然會收到份大禮，無錯，真係一份大禮嚟 o架，無論係 size、重量、價值，抑或係心意，都非常之大，所以我好開心，好鍾意呢！ 講緊嘅咪就係「Le creuset」個 grill pan 囉！係好友 Louisa 送俾我 o架！

        真係諗都無諗過自己都會擁有一個 Le creuset 嘅煲或者 pan，因為價錢唔平嘛！但最重要都仲係佢嘅 "重量級"！我成日都同 Louisa、Rachel 講笑，如果我用個 LC 煲嚟煮嘢，煮完之後，根本都無力將煲餸拎出去飯廳，哈哈！！  

        其實好早之前都已經見過呢隻牌子嘅 product，不過果陣孤陋寡聞，唔識貨。

        記得以前仲係喺黃埔教琴時，我間中就會叫媽咪同老豆出嚟等我放工，之後就喺黃埔啲商場行街同食 dinner。當時我哋好多時都會去果間超大型嘅「百佳」睇嘢，因為果間分店其實即係相等於依家嘅「Taste」( 果陣時仲未有呢個品牌 o架 )，有好多特別貨品賣。好記得有次媽咪專登叫我行過去個 counter 度睇吓啲煲，我話有咩特別，顏色鮮豔？佢就叫我試吓拎起個煲，我心諗，唔通個煲係超輕！？點知，當我準備一拎起時 ……… 哈哈，唔駛講都知我個反應係點啦！！當時我就同媽咪講，都唔知做乜鬼整到個煲咁重，邊有人買 o架！點知，到近呢兩年因為開始寫 blog 同睇其他 blogger 嘅 blog，先發覺佢嘅好處，先知到自己當年有眼不識泰山！

        之前 Louisa 去法國旅行時，其實我都已經搭佢幫我買呢隻迷你版 grill pan，但係當時搵唔到，連之前「Le creuset」開倉都無，我就諗住反正唔係趕用，慢慢等到有啦！點知 Louisa 之前喺「Citysuper」見到佢又做 promotion，仲要係有呢隻迷你版，見到個 promotor 用佢嚟煎緊 4 隻雞翼，佢心諗個 pan 可以煎到 4 隻雞翼，咪啱啱好夠我同我老豆一餐飯！所以就決定買嚟送俾我。Louisa，真係多謝妳呀！！

呢隻漸變酒紅色好靚，好陶醉！

 

        我嘅第一件 "製成品" 幾時面世？快喇、快喇，下星期一就會亮相喇！因為我叫咗阿馳同阿瑩果日返嚟做冬，Louisa 知道我果日就可以將呢隻 pan 大派用場，所以就專登提早送呢份聖誕禮物俾我囉！到時希望我嘅 "製成品" 唔會失禮個 pan 同浪費咗 Louisa 番心意啦，嘻嘻！

失敗咗嘅白麵包多士！

        買咗個方形麵包箱咁耐都未用過，咁啱今朝第一個學生要返工唔得閒嚟上堂，於是我就趁呢個空檔試吓整包包啦！不過，可惜失敗咗！

 

        到咗最後發酵時，跟住食譜所講果個時間嚟發酵，但係時間到咗之後，個麵糰都仲係咁嘅樣，好似唔係好夠大！

        因為今次係第一次整，所以唔係好知真正要發到幾大，再擺耐啲又驚會變咗酸種，所以唔等喇，就咁入爐啦！

 

最終就發唔起喇！

 

不過就外皮好脆，裡面都叫做軟熟，當然，梗係唔會好似一般
方包咁 "柔軟" 啦！之後我仲搽咗花生醬食 o添！

 

        究竟係咪要等到再發大啲先至入爐呢？要發到幾大先至啱呢？關唔關因為跟食譜噴蒸氣而出事呢？因為無任何油脂？搓得唔夠？定係 ………

        啲高人好快啲出手相助啦！！！！！！！！！

韭黃蝦仁炒滑蛋

        星期一晚為咗煮蝦子乾燒伊麵而要買韭黃，但係因為無得段秤賣，所以 "被逼" 買哂成扎，都用剩咗幾多 o架！所以今晚就用佢嚟炒蛋喇。

        其實今次都唔係第一次炒滑蛋，不過之前試過一次就失敗咗，好似煎蛋餅咁嚡，所以晏晝我就特登上網搵資料，學吓點樣先可以炒到嫩滑。 喺網上面搵到好多方法去炒滑蛋，真係五花八門，有好似整雪芳蛋糕咁用分蛋方法；有個就要加淡奶；而有一個好特別嘅方法係酒樓大廚教整嘅，佢係加少量生粉水落蛋液度，藉比令雞蛋嫩滑之餘，又唔會攪到 "水汪汪"。最終我就揀咗分蛋法去炒，都好似幾成功喎！

材料：
雞蛋
蝦仁
韭黃

醃料：
鹽
胡椒粉
麻油

- 蝦仁先去殼、挑蝦腸，用粗鹽洗刷一下，再用粟粉 "省" 吓佢，之後過水洗淨，
  用抹手紙索乾水。

- 用醃料將蝦仁醃好，備用。

- 韭黃洗乾淨後切段。

- 雞蛋分開蛋黃同蛋白，先輕手拌勻蛋白，之後再加少許鹽落蛋黃度，拂打均勻後
 ，就將蛋白同蛋黃再次混合一齊。

- 燒熱油，先將蝦仁炒熟，盛起。

- 再次加多少少油，燒紅鑊後就校番慢火，倒入蛋液後用鑊鏟快手推開。

- 當蛋液開始凝固時就加埋蝦仁同韭黃，快手炒幾炒，趁蛋仲未完全熟透就可以
  上碟，保持嫩滑。

        呢次嘅實驗都算叫做 OK 成功，因為蛋真係炒得幾滑，不過我覺得其實係啲蛋未完全熟透囉！但係我都唔係太滿意，你哋睇張相都見到，雞蛋唔係好包得住哂啲蝦仁同韭黃，唔知係我技術差呀，定係蛋用得唔夠多呢？

Notes：
- 如果你都係好似我咁懶的話，可以去街市買啲已經剝好哂殼嘅蝦仁。

- 拌勻蛋白時記得唔好太大力打到起泡，咁樣先至唔會令到蛋白太 "老身"。

- 韭黃唔需要炒到太熟，否則就會連蛋都炒過火。

全麥朱古力香蕉鬆餅 Whole Wheat Banana Chocolate chips Muffin

        我依家都習慣咗去超市買果啲 pack 起咗嘅熟香蕉，一來平啲，但最重要係唔駛嘥時間等佢 "偶" 熟，方便好多。

        今次買到嘅香蕉雖然都係一樣 pack 好哂，但就唔係真係太熟，而且有幾隻仲好生，仲係青色 o架！所以我諗住都有排擺啦，點知一下子幾隻一次過全部起哂梅花點，大佬，點食得切呀！！所以就諗住要嚟整嘢囉。見次次啲香蕉都係要嚟整蛋糕、鬆餅，所以今次唔想再整蛋糕喇，本來諗住試吓整 banana brownie 嘅，點知個食譜都只係用到一隻蕉多啲咁大把，根本消唔哂 4 隻蕉咁多。突然間俾我諗番起呢世仔第一次開爐整果個香蕉朱古力 muffin，於是睇番食譜，哈，啱啱好用足 4 隻蕉喎，good！！ 

        所以就決定再整呢個 muffin，不過今次就加多咗全麥粉落去整，變一變口味！ 

材料：
香蕉                       4 隻
牛油溶液               2 / 3 杯
雞蛋                       1 隻
低筋麵粉               150克
全麥粉                    50克
泡打粉                    1湯匙
糖                            60克
鹽                            少許
入爐朱古力粒        1 / 2杯

以上材料份量可做大 size muffin 6個。

- 先將所有粉類過篩 3 次備用。

- 香蕉放入攪拌兜內，用叉壓爛成香蕉蓉。

- 加入雞蛋及牛油溶液，用打蛋器攪拌均勻。

- 之後分次加入鹽同糖拌勻。

- 將粉類分多次篩入，用打蛋器拌至無粉粒為止。

- 最後拌入朱古力粒。

- 將麵糊倒入模內，放入已預熱至 200°C 嘅焗爐內焗約 25 - 30 分鐘至熟。

 

啲 muffin 焗好喇！好濃香蕉味呀！

 

        今日第一次用個矽膠模嚟焗，係喺 JUSCO $10 店買 o架，幾抵玩！只需輕輕力一 "頂"，個鬆餅已經自動脫模，好方便，都幾好用喎，仲意想不到咁靚 o添！好，呢個就送俾 Gordon 啦，因為搭佢喺台灣買嘢又唔肯收番錢，話係手信喎！

 

一杯 Ceylon Orange Pekoe Tea、一個 muffin 加粟米麵包，就成
為咗我今日嘅 tea-lunch 喇！

 

媽咪都同我一樣呢！ 

Notes：
- 糖嘅份量要因應香蕉嘅甜度而增減，所以最好之前先試一試味。

- 朱古力粒可根據個人口味而添加，亦可用各種果仁代替。

- 唔鍾意用全麥粉嘅朋友，可以改用全低筋麵粉 200克。

- 記得一見到所有材料完全混合好就要停手，避免麵糊因起筋而唔夠鬆軟。

P.S.  個人好鍾意加咗全麥粉整嘅糕餅，因為比較鍾意食粗嚡嘅質感。但香蕉份量可以減少 1 隻，因為個鬆餅比較濕，有少少似雪芳蛋糕。

蝦子乾燒伊麵

        早前 Louisa 去煤氣烹飪中心度跟 Annie 學整乾燒伊麵，我都食過兩次，真係好得，好食過啲酒樓多多聲，因為依家大部份都將啲伊麵煮得太腍，唔好食，就連噚日去飲 Li Kien 果餐，Winnie 試咗碗伊麵都係唔好食，佢都話煮得太腍。所以，要食好嘢，就要自己煮喇。

        今日碟蝦子乾燒伊麵，我係跟 Louisa 上堂果個食譜煮㗎！自己煮嘅乾燒伊麵真係好食好多，唔單只麵質清爽唔過腍，而且又可以自己控制用油量，唔似出邊食肆果啲咁肥，但最重要仲係落重蝦子，勁香口呀！

蓮子百合紅豆沙 ( 日本、新會 crossover 版)

        早前喺雪櫃度搵嘢時，摷吓摷吓，原來發覺之前 Louisa 喺日本買俾我果包金時紅豆都唔記得食，所以今日就用佢嚟煲紅豆沙。

        我習慣每次整任何豆類之前，都會前一晚先洗乾淨，然後用水浸過夜，噚晚我就將碗紅豆放咗入個微波爐入面，今朝打開個爐時，嘩，真係香都不得了！日本金時紅豆真係非同凡響，淨係浸水都已經咁香，整出嚟嘅紅豆沙實好正呀！所以我都無虧待佢 o架，加咗塊正新會陳皮落去一齊煲 ( 係媽咪擺喺灶底，收埋嚟用 o架，不過我屋企都仲有唔少，因為媽咪係新會人，所以佢果邊所有親戚都係新會人，以前好易攞到，所以儲落好多呢！ ) ，真係唔得掂，香到呢 ……

        如果我呢煲紅豆沙拎出去酒樓賣，睇吓佢哋收你幾錢碗呀！！

材料：
金時紅豆
蓮子
百合
新會陳皮
片糖

- 紅豆洗乾淨，用水浸過夜。

- 蓮子用暖水浸軟、去芯，洗乾淨；陳皮用水浸軟後刮瓤、洗淨，備用。

- 煲滾水後，將紅豆、蓮子同陳皮落煲，之後跟真空煲用法處理。

- 百合用水浸至軟身，洗淨備用。

- 將真空煲再次上火煲滾，之後用湯勺將紅豆稍為壓出豆沙。

- 加入片糖煮溶後，再加埋百合，煮多陣就食得！