與 blog 友交流煮食心得，分享生活點滴。
早前老豆拎咗啲潮州麵線返嚟，我第一時間就諗番起媽咪整嘅炒麵線，好好食 o架。
真係好耐好耐無食潮州麵線喇！以前媽咪間中都會買返嚟炒吓，我覺得好食係因為麵條比較有煙韌質感，唔會太腍，加埋爽口嘅西芹絲一齊炒，勁好食！
好啦，今晚就由我炒俾老豆食啦！
材料：
茄子
珍珠荀
杏鮑菇
潮州麵線
蒜茸
蔥段
調味料：
鹽
糖
生抽
紹酒
沙茶醬
柱侯醬
- 洗乾淨茄子同雞脾菇，切條；珍珠荀洗淨開邊，備用。
- 煲滾水，落鹽，放麵線落煲內烚腍後，過冷河、瀝乾水，待用。
- 燒熱油鑊，爆香蒜茸，加入茄子炒兩炒，灒酒，之後加少少水，冚上鑊蓋將茄子
稍為煮到軟身。
- 茄子軟身後，加埋杏鮑菇同珍珠荀落鑊，一齊炒熟。
- 之後將麵線回鑊，加入調味料，兜炒至麵線夠熱，最後落埋蔥段，炒兩炒就上碟。
今晚就係食炒麵線加椰香芋蓉西米露喇！
Notes：
- 杏鮑菇即雞脾菇。
- 烚麵線時，記得唔好煮得太耐，否則回鑊再炒時就會過腍，炒到碎哂。
逢星期六晚都會整啲比較簡單嘅餸，因為第二朝要 5:30am 起身，所以唔想攪太多，食完飯要早啲瞓喇！
今晚就蒸肉餅，最簡單不過，連鑊都唔駛洗！不過今次就試吓加入蝦醬、魚露調味，面頭再鋪上魚乾仔，睇吓掂唔掂。
材料：
免治豬肉
魚乾仔
醃料：
魚露
蝦醬
糖
粟粉
油
- 豬肉用醃料醃好。
- 魚乾仔略為洗一洗，瀝乾水後鋪喺豬肉上面。
- 之後隔水蒸 15 - 20 分鐘就得喇。
真係超簡單，仲簡單過煮懶人菜，不過就幾好味喎！有少少蝦醬同魚露吊味已經好香，加埋魚乾仔，不但惹味，仲令肉餅多一種口感層次 o添！
一個字：掂！
P.S. 同場加影：清炒西洋菜
都係老豆喺農場拎返嚟嘅，因為夠嫩，所以炒嚟食都好正，非常爽甜。佢話呢次啲西洋菜係美國種喎，所以啲葉大塊好多，果然夠哂 "西洋" 呀！！
早前去烘焙店買嘢時，見到有一隻叫做香橙黑麥鬆餅嘅預拌粉，心諗，黑麥 ( 或稱裸麥) 多數都係用嚟整麵包，好少要嚟做 muffin 喎！於是就好奇咁拎嚟睇吓，但係個英文寫法係 「dark wheat」，而唔係「rye」，其實都唔知 Dark Wheat 即係乜。但一向對預拌粉無乜好感嘅我，反而有興趣試吓自己用真正嘅裸麥粉嚟整 muffin，加上我係一個 "橙癡"，所以真係好想試吓整呀！
咁我噚晚就係網上參考咗好多 orange muffin 嘅食譜，發現原來好多時都會搭配鮮紅莓或雪藏紅莓嚟整，但因為呢兩種紅莓我都無買到，所以就只好就地取材，用紅莓乾嚟做咗呢個實驗啦！
材料：
低筋麵粉 200 克
裸麥粉 50 克
泡打粉 1 茶匙
梳打粉 1/4 茶匙
鹽 1/8 茶匙
雞蛋 1 隻
糖 60 克
鮮搾橙汁 140 毫升
橙皮茸 2 - 3 茶匙
君度橙酒 1 湯匙
橄欖油 60 毫升
紅莓乾 適量
杏仁片 適量
- 將所有粉類及鹽過篩 3 次，之後混合均勻。
- 雞蛋、糖、橙汁、橙皮茸、橙酒同油放攪拌兜內，用電動打蛋器以低速拌勻。
- 將所有粉類及紅莓乾加入混合物內，繼續用電動打蛋器以低速攪拌，當所有材料
都混合好之後就停止攪拌。
- 將麵糊倒入紙模內，再喺麵糊上灑上少少預先焗香嘅杏仁片。
- 放入已預熱至 180 °C 嘅焗爐內，焗約 20 分鐘便可出爐。
以上材料份量可做 8 個中 size muffin 。
都幾成功喎，好香濃橙味，焗緊果時仲香濃呢！鬆餅都做得好鬆軟，唔會死死實咁。不過唔知係因為橙味太濃呀，定係裸麥粉用得唔夠，唔係好覺有裸麥味道，或者下次試吓將裸麥粉嘅份量加多少少，睇吓會唔會好啲。但今次就食到裸麥粉嘅濕潤感覺。
Notes：
- 杏仁片必須預先焗香，可用 180 °C 焗約 6 - 8 分鐘。
- 攪拌麵糊時，當所有材料一混合好就要立即停止攪拌，以免過度攪拌致起筋，令
鬆餅唔夠鬆軟。
- 如果無裸麥粉的話，可直接用 250 克低筋麵粉。
- 可用任何植物油代替橄欖油。
自從老豆去咗個 friend 個農場度幫手之後，成日都會拎啲自家種嘅蔬菜同水果返嚟，不單只係有機、無農藥，而且仲好食過喺街市買果啲 o添，因為夠哂新鮮嘛！
呢啲係西洋菜同青蘿蔔。
我都係第一次見到圓形嘅責蘿蔔。
西洋菜好嫩、好靚呀，食落仲好爽、好甜 o添！
老豆話呢個係台灣種嘅青蘿蔔，你哋話似唔似隻老鼠呀！！
仲有佛手瓜，今晚煲嘅粟米栗子無花果煲佛手瓜湯就係用佢嚟煲 o架喇！
你睇，個佛手瓜有刺 o架，唔知係咪好似冬瓜咁，新鮮時係有刺呢！？
連橙都有種喎！啲顏色真係咁鮮色 o架，無做到手腳！
用個蘋果做對比，咁就知道個橙有幾大喇。真係又大又甜又多汁。
呢碟芥蘭炒鴛鴦臘腸，都係用老豆拎返嚟嘅芥蘭炒，好似食菜心咁嫩。
依家攪到我好似 Motonako.A 同 T&P 屋企有個花園咁，隨時隨地去摘新鮮蔬菜煮餸，呵呵！( 發夢 -ing ) 
如果識得運用材料的話，齋湯都可以煲得好好飲，一啲都唔會淡而無味。今晚我就煲咗粟米栗子無花果煲佛手瓜，有咗粟米同栗子呢兩樣材料，就連蜜棗都唔駛落，都一樣咁清甜，如果加埋紅蘿蔔的話，咁就真係甜到漏 lu！
材料：
栗子
粟米
佛手瓜
無花果
南北杏
- 栗子去殼、去衣；粟米剝去綠色外皮及粟米鬚，洗淨備用。
- 佛手瓜先刨皮、洗淨，之後開邊去核，切件待用。
- 南北杏略沖洗；無花果用清水浸軟後洗淨、開邊。
- 將所有材料凍水落煲，之後開火將水煲滾。
- 跟住就依真空煲用法將湯煲好，落鹽調味，完成。
Notes：
- 粟米外皮同粟米鬚其實都有食療效用，可以洗乾淨之後一齊放入煲湯。
- 想湯煲出嚟更加甜，就要記得凍水落料，因為大部份食材嘅甜味都係溶喺凍水度
，尤其係煲齋湯，呢個方法好好 o架！
呢排見到宜家傢俬大減價，仲話貨品最低減至四折，咁啱前日又去九龍灣教琴，咁就梗係順便走去打個 round 啦，話唔定會有意外收穫呢！
入到去已經迫滿好多人，好墟冚，比平時多好多人呀！咁我就一於唔理咁多，衝過哂啲人群，直向目的地前進，費事喺度慢慢同人迫！！
到咗目標 "景點" 後，即刻周圍搜索，睇吓有冇心目中想要嘅嘢。哈，真係俾我搵到喎，當然勁開心啦！！
就係呢樣喇！你哋估唔估到係乜嘢嚟呢？
之唔係一隻大方形碟囉！
我想買呢隻碟好耐 o架喇！之前睇中咗都唔捨得買，雖然唔係好貴，原價都只係 $29.9 啫，但係見又未用住，真係唔想無無謂謂又嘥錢買嚟擺喺屋企。我份人有一樣好，就係孤寒，所以好忍得手 o架，每次見到想買嘅嘢時，都會同自己講唔好咁快買住，等減價先買，如果到時無哂貨或斷貨都唔緊要，反正又唔係必須品。但居然十次有九次又真係俾我等到喎，呵呵！！
呢次 IKEA 都喺呢件貨品個架上貼上「勁減貨品」，只係 $19.9 咋，即係 67 折囉，咁我梗係買都買唔切啦！之前 Winnie 都陪我去 JUSCO 搵過呢類方形碟，一來好少有，二來勁貴囉，成四、五十蚊隻，我覺得無必要囉，又唔係無咗呢隻碟就食唔到嘢，而且仲無 IKEA 呢隻咁合心水 o添！
點解我會咁想買呢隻碟？睇吓下面幅相 ………
唔駛講都明啦！咁你話係咪好啱用喇！
至於呢隻碟就只係搭單買嘅啫，並唔係我之前一早睇中。因為真係好平，咁大隻都只係賣 $7.9，喺 JUSCO $10 店有九折都唔得啦！我一向都唔係好好綠色，不過呢隻碟嘅綠色真係綠得好靚 ( 不過真實顏色同相片有少少出入 )，係好 soft 嘅 wasabi 色。其實同一款式仲有另一隻顏色都係減價，但係就唔係咁討好，所以全場人都係揀買呢隻色喇。
其實仲有好多靚靚餐具都有減價，自己都好想買，不過一來買咁多的話，屋企無位放，二來啱啱由今個月開始，每個月會少咗 $3000 收入，都係唔好亂洗錢啦，要開源節流先得喇！
P.S. 遲啲去九龍灣呢間 IKEA 就無咁方便啦，因為會由德福呢度搬落去 Mega Box，要行多段路喇，Motonako.A 妳下次返嚟香港，要去 IKEA 買嘢就要行多啲路啦，無依家行落樓下咁方便 lu，不過唔緊要啦，反正妳返嚫嚟香港都會勁食，行多啲路會幫到妳唔駛帶返咁多磅返美國囉！
好耐都無整西菜喇，前晚就整咗個超簡單，但係又上得大枱嘅焗什蔬，我叫佢做焗忌廉三色蔬菜。
整呢個焗雜蔬嘅材料非常簡單，就只係得南瓜、西蘭花同椰菜花，淋上忌廉汁後，放入爐焗就攪掂。而忌廉汁亦唔駛自己慢慢煮，開罐罐頭忌廉湯就得喇！
材料：
南瓜
西蘭花
椰菜花
罐頭忌廉湯
調味料：
糖
黑椒粉
豆蔻粉
百里香 ( Thyme )
迷迭香 ( Rosemary )
- 南瓜去皮、去瓤，切件；西蘭花同椰菜花洗乾淨，切細件，備用。
- 煲滾水，分別將三種材料放入滾水內烚至半熟，之後盛起，瀝乾水份。
- 將三種蔬菜排放於碟上，待用。
- 忌廉湯逐少加水煮開，之後加入調味料，煮滾後就將忌廉湯淋上蔬菜上，放入已
預熱至 160 °C 嘅焗爐內焗約 15 分鐘至表面金黃便可。
Notes： - 煮忌廉湯時如果水落得太多，可用少量粟粉水埋芡，令到個忌廉汁可以比較濃稠 - 香草可根據個人喜好而選擇。
- 可選擇不同口味嘅忌廉湯，如忌廉磨菇湯、火腿磨菇湯、忌廉雞湯等等。
，方便淋上蔬菜上。
