與 blog 友交流煮食心得，分享生活點滴。
前幾日喺 Facebook 度見到 Miss Cheng upload 咗段片，原來 TVB 高清台個新節目《創業打天下》搵咗佢打頭陣，做第一集嘉賓，節目係介紹一啲事業成功嘅女性。真係估都估唔到，一個財經台嘅節目，居然第一集就同大家講藝術，妙！
啱啱睇完段片，好有感覺，有好多 idea 都真係無諗過，從中都得到一啲啟發。片段中仲錄影到 Miss Cheng 返中大教學嘅片段，當然更加有感覺啦，因為自己都係中大音樂系畢業 o架嘛，所以對拍攝到周圍嘅環境，以及音樂系嘅教學地方，都感覺到好親切。但最意想不到嘅係，竟然仲去埋 Miss 屋企錄影 o添，連 Aaron 兩兄弟都有上鏡講幾句嘢呢！
一直以嚟，我都唔係一個 "好運" 人，"衰嘢" 就實有我份！！但係喺我學習音樂嘅過程中，往往都會遇到個好老師，所以媽咪以前都講過，話我喺學音樂呢條路上面都算係好好彩，個個老師都不但有經驗、有一定資歷，而且仲好好人，對我好好。所以其實我一直都好想學番聲樂同鋼琴，不過，呢樣 "玩意" 都真係幾講求時間同金錢囉！暫時嚟講，呢一刻我兩方面都負擔唔起，希望遲啲可以 "還心願" 啦！
噚日喺何文田教完學生之後，出番旺角時途經毛豆個 "後備糧倉"，見到全店所有貨品做緊九折，所以就入去兜個圈，睇吓有咩啱，最後買咗幾樣嘢。
土耳其杏甫就不嬲都有買開，試過喺其他地方買過，質量無咁好，
有啲會好乾兼有渣，所以都係嚟番呢度買好啲。
西班牙出產嘅鹽水黑橄欖，買定嚟放喺屋企，隨時可以
用嚟整意粉、foccacia、焗飯 ………
黑松露醬其實折咗都過百，不過已經算係平，見過其他地方賣好貴，
不過可能一分錢一分貨，貴果啲可能黑松露含量比較高。
就豪一次咁多啦，哈哈！
其實仲想買埋 salami 同 balsamic vinegar o架，不過見條 salami 個樣好似唔係咁討好，兼且係丹麥製，硬係覺得買意大利貨好似正宗啲。至於 balsamic vinegar，有樽百幾蚊，仲係好細樽咋，當然唔捨得買啦！之但係見到有樽只係賣 $26 嘅，又覺得好平唔敢買，雖然寫明係意大利 Modena 出產，但係見到 ingredient 有用到焦糖色素，都係唔買住喇！
今日經過元朗站間分店都唔見有做到九折優惠，可能淨係旺角鋪有做，有興趣嘅朋友就快啲去喇，店員話做到今個月 18 號咋！毛豆，妳快啲入倉攞貨啦！！
探完江老師之後，我同 Li Kien、Danny 一齊去咗九龍城嘅「同心泰國菜館」食晚飯。平時去「同心」度買東南亞食材就去得多，但係嚟呢間姊妹鋪食嘢都係第一次咋！
Li Kien、Danny 同達達一家三口。
呢隻泰式燒雞係 Li Kien 必點嘅，因為就係呢隻燒雞嘅香味
引咗佢 "落踏"！ 不過又真係幾好食，好惹味呀！
呢碟係脆肉炒芥蘭，脆肉其實係腩肉，不過食落口唔覺肥 o架！
呢個泰式濕炒河係隔離枱個先生推介嘅，不過我自己就唔係咁
buy 呢碟喇！一來味道無乜特別，二來個芡汁 "杰"
得好犀利，好糊口！
埋單找數，每人盛惠 $52，價錢 OK 啦！
星期一同 Li Kien 一齊去咗探江樺老師，因為 Li Kien 今個月碩士畢業，所以佢約埋我一齊去老師屋企，著住畢業袍同老師影相留念。
江老師係我同 Li Kien 讀演藝學院時嘅聲樂老師，
呢度就係平時我哋上堂嘅音樂室。
Li Kien 仲帶埋達達一齊去 o添呀！達達見到 uncle 之後，
不停咁同 uncle 傾偈，完全未喊過呀！
老師好欣賞我帶去俾佢果個紅茶雪芳蛋糕，因為佢覺得我整呢個蛋糕背後好有心思，而且咁啱老師原來又唔鍾意食有 cream 嘅蛋糕，呢個真係啱哂佢！但最重要嘅係，老師原來係呢個月生日喎，咁我就同老師講，呢個就當係生日蛋糕，預星同佢 say happy birthday 啦，哈哈！
臨走前再嚟多張大合照。
其實當年喺 APA 讀書時，第一年我並唔係跟江老師 o架，不過覺得原本果位老師教嘅方法唔係好適合我，而我又趁暑假時自資拜師江老師，發覺跟佢上堂舒服好多，用嘅方法都比較適合我，所以之後到第二年時就向 department head 申請轉老師，之後歌藝都有一定進步，不過可惜因為自己身體情況嘅問題，未能好好發揮，所以讀完兩年 diploma 之後就無再讀落去。
雖然離開咗學校之後少咗同老師見面，但好多時都會喺一啲演出場合碰面，所以其實斷斷續續都有 keep contact，而且老師間中都會介紹工作俾我呢！我一向都好尊敬江老師，因為佢不單有學識，歌藝了得之餘，而且仲有好好嘅修養，同我呢啲 "粗人" 比較起上嚟，簡直係一個 "聖人"。
雖然老師依家已經年過八十，但係把聲仲係 keep 得好好，經常都仲有演出。係咁多本地歌唱家之中，老師都可以話係寶刀未老，一出聲已經聽得出功力深厚，其他人完全無得比！無論係古典聲樂抑或係流行音樂嘅歌手，幾多人到咗呢個年紀，都已經失哂聲，唱唔到歌，又或者即使唱到，但把聲都唔再好似後生果陣時咁好聽。唔係誇張 o架，你哋睇吓下面呢兩段演出片段就知我無誇張 o架喇：
呢首係《康定情歌》。
跟住呢首係《聰明姑娘愛繡花》。
雖然當年江老師同費明儀老師聯同香港中樂團嘅演出已經係 9 年前嘅事，但坦白講，以老師當時嘅年紀，仲可以有咁好嘅聲音同唱功，真係唔係人人做得到，況且依家都仲有演出呢！所以我一直都覺得自己好幸運，可以跟到江老師學藝。記得媽咪以前曾經講過，佢後生時，經常都喺收音機度聽到江老師唱歌，但就真係估都估唔到，多年之後自己個仔都可以跟到呢位名師學唱歌，所以自從我跟咗老師學唱歌之後，幾乎每次老師有演出，佢都一定會去捧場！
諗番起上嚟，我依家都好想媽咪繼續陪我去聽唔同嘅 concert 呢！
上演《七月大荳芽》當日，綵排完之後食飯時，Li Kien 問我會唔會去探江老師，因為佢想趁件畢業袍未還之前同老師影相，咁我當然應承去啦，因為好耐都無見老師喇！星期日 Li Kien 打電話俾我，話星期一老師得閒，喺咁臨急臨忙嘅情況下，都唔知買咩俾老師好，又唔可以買啲 cheap 嘢喎，咁所以星期一朝早一起身就即刻焗個蛋糕送俾老師。
其實我都諗咗好耐焗咩蛋糕俾江老師，因為老師係非常注重健康，每日必定會抽時間做運動，步行一萬步，Li Kien 仲話老師唔會出街食飯嘅 o添！所以老師雖然已經過咗八十大壽，依然健步如飛，條腰真係攣都唔攣吓呢，佩服！
因為呢個原因，我決定咗整雪芳蛋糕，因為唔係用牛油整，係用橄欖油，夠哂健康啦。之於味道方面，其實我都唔知老師喜好，不過諗番之前有幾次喺老師屋企 tea 嘅時候，老師都會叫工人沖幾杯奶茶，咁我就諗到整紅茶雪芳，起碼老師一定唔會唔鍾意，同埋蛋糕味道清清哋，啱哂注重健康嘅老師。
材料：
紅茶茶葉 3 克
熱水 100 毫升
伯爵茶葉 3 克
低筋麵粉 90 克
泡打粉 2/3 茶匙
鹽 少許
蛋白 4 個
他他粉 1/4 茶匙
糖 70 克
蛋黃 3 個
君度橙酒 10 毫升
橄欖油 40 毫升
以上材料份量可做直徑 20 厘米嘅蛋糕一個。
食譜參考自《糕點教科書》。
- 麵粉、泡打粉、鹽及伯爵茶葉混合好，過篩 3 次，備用。
- 蛋白加他他粉，用電動打蛋器打至起泡，之後分 3 次加入 50 克糖，打至 8 成
企身。
- 將橙酒倒入蛋黃內，加入剩低嘅 20 克糖，混合好後打散。
- 橄欖油與 70 毫升紅茶混合，之後倒入蛋黃液內拌勻。
- 將已過篩嘅粉類混合物加入，拌勻成麵糊。
- 蛋白霜分 3 次加入麵糊內，用膠刮輕手拌勻。
- 將麵糊倒入模內，放入已預熱至 170 °C 嘅焗爐內焗約 40 分鐘至熟。
- 出爐後立即倒扣放涼。
今次個蛋糕焗得好靚，完全無缺陷，唔知係咪因為有用到泡打粉呢？
整嚫紅茶味嘅西點糕餅，多數味道都唔係咁出，但係今次呢個蛋糕個茶味非常之濃，而且仲有淡淡伯爵茶加橙酒嘅香味 o添，而最重要嘅係唔會食到粒粒茶葉嘅粗嚡口感，呢個食譜好得呀！
如果有 blogger 試過整紅茶蛋糕或伯爵蛋糕，而個茶味又唔係好出的話，不妨試吓呢個食譜呀！
Notes：
- 蛋白霜打好之後，立即放入雪櫃內儲存，咁就可以保持其穩定性。
- 麵糊倒入模之後，喺枱面上輕敲幾下，可將較大嘅氣泡排出。
- 原食譜所用嘅酒係白蘭地，一來我無呢隻酒，二來加入伯爵茶內嘅香料佛手柑都
係柑橘類植物，香氣與橙味非常配合，所以我就改用橙酒代替。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
呢個烤柚子排骨嘅食譜係嚟自「Amway」月刊，其實想試整好耐 o架啦，但一直都未有機會，當中用到嘅日本柚子醋仲一早已經喺 JUSCO 超市買定 o添喇。對於鍾情橘類水果嘅我，真係好期待呢個餸呢！
「Amway」搵人寫得呢個食譜，當然係教人用佢出品嘅煎鍋嚟煮啦！但我就無用佢嘅廚具，所以就試試用焗爐嚟整喇，其實最主要都係參考佢個醃料同份量比例。
材料：
急凍一字排骨 ( 金沙骨 )
南瓜
京蔥
七味粉
炒香芝麻
醃料：
日本醬油 1/2 湯匙
柚子醋 4 湯匙
味醂 4 湯匙
清酒 3 湯匙
糖 1 茶匙
柚子汁 2 茶匙
日本醬油 清酒 柚子醋 味醂
- 醃料材料拌勻；排骨解凍後洗乾淨，用抹手紙索乾水份，放入醃料內醃好。
- 南瓜去皮、去籽，沖洗後切件；京蔥洗乾淨，白色部份切段。
- 南瓜同京蔥先用少量油同鹽撈勻，之後連同排骨一齊放上已鋪錫紙嘅烤盤上。
- 放入已預熱至 180 °C 嘅焗爐內，烤焗 ( grill ) 5 分鐘。
- 拎出烤盤，用排骨醃料掃喺南瓜、京蔥同排骨上，之後再焗多 5 分鐘。
- 翻轉所有材料，掃上醃料，焗 5 分鐘後，再掃多次醃料，再焗多 5 分鐘。
- 出爐後盛上碟，灑上七味粉及芝麻即成。
用柚子醋同柚子汁醃過嘅肉排，食落無咁油膩。
加埋有少少辛辣嘅京蔥，令到成個餸都變得清爽。
Notes：
- 可選用新鮮一字排，只需醃 2 個鐘就可以。
- 柚子汁可用檸檬汁代替。
- 原食譜係用日本大蔥。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
今朝一早起身，見到天色非常之好，陽光充沛，風和日麗，天朗氣清，即刻諗到有樣嘢想做。
喺咁好嘅天氣低下，你哋會做啲咩呢？去海灘游水、曬太陽？行山、遠足？郊遊、撲蝶？我自己就即刻諗到去 ………… 洗床單被鋪，因為肯定勁快乾嘛，哈哈哈哈 ！！
我屋企一到咗夏天真係好大風，上次都掟咗幅 "四格漫畫" 俾大家睇，今次我就錄埋 video 俾大家睇，等大家可以睇吓大風到有幾誇張！
咁你哋話我係咪可以喺屋企放孔明燈呢！！
