與 blog 友交流煮食心得，分享生活點滴。
上次整雲呢嗱雪糕用咗 4 隻蛋黃，咁自然就有 4 隻蛋白多咗出嚟啦！今晚就用佢嚟炒飯，一次過清哂佢！
材料：
白飯
小棠菜
蛋白
蒜茸
薑茸
調味料：
紹酒
XO 醬
雞粉
生抽
糖
- 小棠菜洗乾淨後瀝乾水，切碎備用；蛋白略拂打。
- 燒熱油，爆香蒜茸同薑茸，之後加入 XO 醬一齊爆香。
- 加菜落鑊，兜勻後灒酒，盛起。
- 再加適量油，燒熱後加入蛋白。
- 蛋白炒至半熟時就加入白飯，快手炒勻。
- 落雞粉、生抽同糖調味，兜炒均兜即可上碟。
Notes： - 小棠菜可用白菜代替。 - 炒蛋白同飯時一定要夠快手，否則蛋白會受熱凝固，黐唔上飯粒。
- 炒飯用嘅白飯毋需一定要係隔夜飯，只要喺煲飯時落少啲水就可以。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
有睇開我個 blog 嘅朋友，如果你哋記性好的話，應該記得我之前曾經整過糖漬柑桔同芝麻醬，其實當時整嚟都係為咗整今日呢個批，但整好之後，因各種原因，如突發事情而無足夠時間去整；臨時有需要整伴手禮；某種食材存放期短而要盡快整先………，呢一切一切都攪到我呢個批一拖再拖，拖到今日，卒之都可以整到喇！
批底
材料：
低筋麵粉 100 克
鹽 少許
芝麻醬 50 克
糖 40 克
水 50 毫升
- 麵粉同鹽混合後過篩 3 次。
- 將芝麻醬同糖混合，逐少加入水拌勻。
- 篩入麵粉同鹽，拌勻後用手搓成麵糰，之後用擀麵棍擀成約 3 毫米厚圓批皮。
- 將批皮鋪入批模內，用手均勻推開至覆蓋整個模。
- 用叉喺批皮表面拮窿，之後放入雪櫃雪半個鐘。
- 將批模拎出，放入已預熱至 180 °C 嘅焗爐內焗 15 分鐘即成。
杏仁奶油餡
材料：
低筋麵粉 15 克
杏仁粉 50 克
牛油 50 克
糖 20 克
雞蛋 1 隻
君度橙酒 1 湯匙
- 牛油室溫放軟；麵粉過篩 3 次；雞蛋拂打成蛋液，備用。
- 牛油加糖混合好，用電動打蛋器打至發白。
- 蛋液逐少加入，用電動打蛋器慢速拌勻。
- 篩入麵粉及杏仁粉，拌勻後再加入橙酒混合即成。
組合
- 將杏仁奶油餡倒入焗好批底內，均勻放上糖漬柑桔。
- 放入已預熱至 180 °C 嘅焗爐內焗 30 分鐘。
- 出爐後趁熱用抆刀將果醬搽上批面，再沿邊灑上開心果碎，完成。
以上材料份量可做直徑 18 厘米圓批一個。
食譜出自福田淳子嘅《我愛和風洋菓子》。
blog 友毛豆教我先墊入爐紙喺批模上就可以容易脫模，
呢個方法果然有效，用抆刀插入批底一撬，
即刻成個批起咗出嚟。
之前一早趁 JUSCO 超市會員日做 promotion 時買定呢隻法國製
杏桃果醬嚟整呢個批。我發覺杏桃果醬無可能自己整，
因為香港好少見有新鮮杏桃賣。
今日為媽咪預備咗一個中日 crossover afternoon tea，
和風洋菓子批加一杯鐵觀音茶！
Notes：
- 原食譜批底材料係用牛奶而唔係水。
- 搓麵糰時唔好一次過落哂所有水份，因麵糰可能會過濕，最好逐少加入。
- 剛焗好批底之後，可將開心果放入爐內焗香，攤凍後切碎。
- 原食譜係用金萬利橙酒。
噚日係媽咪生日，所以星期四果日出開去中心教琴時，順便過去花墟買花，噚日一齊帶埋去探媽咪。
查實喺花墟都無乜花好揀，靚嘅就貴到買唔落手，普通嘅周圍都有得賣，又駛乜喺度買呢！原本想買洋桔梗，點知扎扎都開到 "撻" 之餘，仲已經開始 "dup"，就算又平又靚，見到都唔想買啦！後尾我就睇中咗呢扎。
呢類花原本應該係要嚟做襯花嘅，不過我咁耐都未見過，
又覺得好特別，咁咪買囉！
睇見個名仲攪笑，叫做「咖喱」！真係完全聯想唔到有咩關係囉，
就算拎起扎花聞都無咖喱味，個名真係奇怪！
咁大扎花，我留起咗 2/3 用花樽插起，放喺媽咪旁邊，
另外 1/3 就噚日帶過去探媽咪。
呢幾年 Winnie 都有喺正日果日同我一齊去探媽咪，不過今年我見個時間唔係好夾到佢，費事阻佢上堂教琴，所以我無打電話俾佢。後尾佢都主動打俾我，問我今年係咪都係正日去，我話係，不過我同佢講，我去果個時間應該佢唔得，但佢話試吓調頭兩個學生，OK 的話就照舊陪我一齊去探媽咪。
今個禮拜一佢打電話俾我，話原本準備打電話俾學生調堂，點知第一個學生自動獻身同佢請假，因為原本放開禮拜五例假，被老細調咗去禮拜一，咁 Winnie 當然非常樂意啦，學生自己調堂總好過佢出手調學生嘛！咁就變咗淨係調第二個學生就攪掂。正當佢準備打電話俾第二個學生時，點知個家長又 "先下手為強"，話學校出咗時間表，星期五要去做 body check，所以上唔到堂！哈，你話呀，又會 "轎" 到咁嘅，卒之 Winnie 唔駛主動同學生調堂都可以同我一齊去探媽咪，佢仲話：「睇吓你媽咪幾想我去探佢呀，哈哈哈哈！！」
人生就係咁 o架啦，「命裡有時終須有，命裡無時莫強求！」有時越係想得到或做到嘅嘢，卻偏偏得唔到；有時無諗住要嘅嘢，反而就迫都迫到你要為止，從來都唔可以自己話事做決定！所以做人都係一切隨緣，無謂強求啦，"棧" 自己失望。
今個月係媽咪嘅生日月份，同前幾年一樣，我都係再唔可以為佢做啲咩嘢，亦再唔能夠送禮物俾佢，唯一可以做嘅，就係將呢個送俾佢嘅 blog 重新粉色一番，希望佢會鍾意！
今次個主題顏色，我揀咗紫色同綠色，因為想配合番個 blog 嘅新 wallpaper，呢幅相係好友明仔之前喺濕地公園影嘅，我當初一睇到呢張相已經好鍾意。一來，當然係明仔影得好靚啦；二來，朵睡蓮嘅顏色又紫得非常之靚，加上蓮花同荷花都係佛教嘅象徵，所以我覺得好適合用嚟做呢個 blog 嘅 wallpaper，相信媽咪見到都會好鍾意。
之前我一早已經問明仔可唔可以將張相 send 俾我用嚟做 wallpaper，佢都即時一口答應，所以，我都要喺度再次同佢講聲多謝！
以前去酒樓飲茶時，老豆同媽咪間中都會叫肉絲炒麵食，但係唔知點解，我對呢個麵都無乜太大興趣，可能因為我一向都唔係好鍾意食香口煎炸嘢，個麵煎脆咗反而唔鍾意，而且覺得面頭啲餸味道又唔係太出啩，覺得平平無奇。
但係自從見到 P 姐整過呢個肉絲炒麵之後，一來覺得唔係想像中咁難整，二來佢又真係整得好靚、好吸引，攪到我都心郁郁想試吓整，所以今晚就參考佢嘅做法，試吓自己整一次，睇吓掂唔掂先！
材料：
炒麵麵餅
脢頭瘦肉
冬菇
韭黃
銀芽
醃料：
鹽
糖
生抽
粟粉
油
調味料：
清雞湯
紹酒
糖
粟粉
食譜參考自 T&P 嘅肉絲炒麵。
- 瘦肉洗乾淨、切絲，用醃料醃好；冬菇洗乾淨、浸軟身後切片，用生抽、糖醃
好。
- 銀芽略沖洗；韭黃洗淨後切段；麵餅用凍水浸軟鬆開，之後瀝乾水份。
- 燒熱平底鑊，落油，將炒麵放入，用慢火前至金黃同脆身，翻轉後同樣做法，盛
起。
- 將韭黃同銀芽落鑊，快手炒幾吓，灒酒，盛起備用。
- 跟住爆香冬菇，加入肉絲炒熟，灒酒，盛起。
- 倒入調味料，煮滾後用粟粉水埋芡，之後將銀芽、韭黃、冬菇同肉絲回鑊。
- 兜勻後就可以舀上麵上，完成。
是日晚餐：肉絲炒麵 & 綠豆甜粥。
Notes：
- 去麵檔買麵時，個阿姐教我要先大火燒熱個鑊，之後啲油要 "廊" 勻成隻鑊，用
慢火俾心機慢慢煎香。
- 煎好麵之後，若怕麵會放涼或變腍的話，可將麵放入已預熱焗爐內保溫，或者先
炒好其餘材料先煎麵，但咁做就要先洗乾淨隻鑊先再煎麵。
- 唔想用清雞湯的話，可用清水加雞粉代替，味道差唔多。
- 炒銀芽同韭黃時一定要用猛火，否則會不斷化水。
- 食嘅時候加少少浙醋或鎮江醋提味，會更加好食。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
今日整呢個稞麥小餐包，係參考咗上次喺「煤氣烹飪中心」度跟 Margaret 學嘅芝麻裸麥包，不過今次就無加到黑芝麻落麵糰度，同埋包面就灑上燕麥片做裝飾。
材料：
高筋麵粉 90 克
中筋麵粉 100 克
稞麥粉 60 克
即用酵母 3 克
鹽 1 / 2 茶匙
糖 1 / 2 茶匙
水 約 150 毫升
燕麥片 適量
以上材料份量可做小型麵包 8 個。
- 所有粉類同鹽、糖及酵母混合好，中間挖空，逐少加入水，按成麵糰。
- 之後搓揉及摔打成光滑麵糰，滾圓後放入已灑粉嘅兜內，包好保鮮紙，發酵 1
個鐘。
- 拎出麵糰，壓平排氣，之後分割成 8 等份。
- 將小麵糰再次滾圓，排喺已鋪入爐防黏紙嘅烤盤上，包上保鮮紙，發酵多 45
分鐘。
- 用水噴濕麵糰表面，之後滾上燕麥片，用利刀割上十字紋。
- 焗爐預熱至 200 °C，噴蒸氣，將麵糰放入焗 20 分鐘，焗到 10 分鐘之後，再噴
多次蒸氣。
- 焗好出爐後放上架上攤凍。
Notes：
- 中筋麵粉可用高筋麵粉混合低筋麵粉而成，其比例為 1：1。
- 用刀割紋時切勿割得太深，以免影響麵糰組織。
- 若果焗爐無蒸氣功能的話，可直接打開爐門，用噴水壺向爐壁噴水。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
唔經唔覺，原來自己寫 blog 都已經有兩年多，一直以嚟，寫 blog 最主要都係想記錄低自己嘅烹飪學習過程及成品相片，同埋想喺度同一啲志同道合嘅 blog 友交流心得。另一方面，就係想藉著呢個 blog 嘅文字去答謝已經離開咗我嘅媽咪。
坦白講，其實每次寫一篇 blog，我都要嘥好多時間，因為我一向打中文字都好慢，而且每張 post 上嚟嘅相我都必定會執到靚，所以對於我嚟講都幾費時同費神，曾經都有諗過放棄。
但係，原來我嘅心機都並唔係白費，睇到訂閱我個 blog 嘅 blogger 人數不斷增加，而且喺度仲識到好多朋友，大家除咗會分享煮食心得之外，當對方唔開心時，仲會互相關懷、鼓勵，呢種感情就係驅使我繼續寫落去嘅動力。
最近，小弟更得到人氣女性網站 she.com 嘅邀請，成為佢哋嘅 "飲食 blogger"，同網友們分享我嘅入廚心得。起初我都真係受寵若驚 o架，講真，大把高手喺度，我呢個新丁又真係何得何能呢！不過負責人 Javy 就同我講，佢哋都想搵啲業餘烹飪愛好者同網友分享當中經驗同心得，喺佢誠意嘅邀請下，最後我都答應成為佢哋嘅 blogger。
左上角用橙色 highlight 果個方格就係小弟喺 she.com 嘅 blog 喇！
如果大家有興趣的話，可以 click 入 she.com 度睇睇我個 "新地盤"，或者直接輸入網址 http://prochats.she.com/kestrel-kwan/ 亦可。
星期四果日，小弟有幸得到 Miss Cheng 嘅邀請，出席咗中央音樂學院香港基金所攪嘅記者招待會，呢次嘅記招主要係介紹嚟緊將會喺 10月3日晚嘅慈善音樂會《歌劇經典巨獻》。身為學生嘅我，當然會主動提出幫手啦！所以當日我就同埋基金會負責人 Michelle，以及 Miss 另外兩位學生一齊提早到達佈置及打點。
記者招待會喺 IFC 嘅「THE BOX」舉行。
身為基金會主席嘅 Miss Cheng 當然要影番張相留念啦！
我哋各人都同 Miss 影相留念。
當晚音樂會嘅其中兩位演出嘉賓：
男中音歌唱家馮國棟及女高音歌唱家柯綠娃。
三位音樂家當然要簽名留念啦！
餐廳內亦有放置 banner 同 poster。
Miss 喺嘉賓名冊度簽完名後，我哋幾個都唔執輸，一樣照簽，哈哈！
餐廳內嘅環境。
每個座位上都放有演出嘉賓嘅簡介同 Miss 之前嘅演出 DVD。
兩位歌唱家再次合照。
作曲家兼樂評人許翔威先生及香港電台 Radio 4 嘅林家琦都有出席。
記招開始，主席介紹基金會及當晚音樂會事宜。
記招後，大家一齊 afternoon tea。
食品與飲品。
個三層架款式好特別，食物都唔錯呀，無論鹹點或甜品
味道都做得啱啱好，值得推介！
