重慶天梯背後的感人愛情故事

        最近喺電台節目度聽到介紹一首由 C AllStar 唱嘅《天梯》，先至知道原來有重慶天梯呢個地方，呢首歌嘅歌詞就係根據重慶天梯嘅真人真事而寫成：

        睇完段片，真係覺得好感動，好想同大家分享。

        兩人的幸福，在當時社會看似好難得到，但他們不理世俗眼光，喺深山隱居，卒之得到他們心目中嘅幸福。而最感人的，就係丈夫劉國江為咗愛妻，花咗足足半個世紀時間徒手去開鑿有六千幾級嘅 "天梯"，方便妻子上落山。雖然丈夫已經離世，但妻子仍留守山上，陪伴著老伴為佢而建嘅天梯。

        幸福，並非人人都有，但其實亦可以好易找到，在乎你是否懂得珍惜！

        我一向都唔太鍾意聽流行曲，因為絕大部份歌詞內容都係同愛情有關，歌詞內容取材狹窄，音樂創作亦大多數都係 "意料之內"，無甚驚喜及深度，所以無乜興趣去聽。我只係聽古典音樂及聲樂作品，有好多出色嘅作品我都會聽到好感動、聽到喊。至於流行曲，相信暫時只有呢首《天梯》係唯一一首我會聽一次喊一次嘅歌 ( 記得睇到個 MV 結尾，因為寫有向劉國江致敬嘅字句 )：

 

        而呢個 MV 就有現實生活中嘅重慶天梯及劉國江同徐朝清嘅相片及倆人簡介：

《天梯》 by 鍾晴

如可　找個荒島
向未來避開生活中那些苦惱
如冬天欠電爐　雙手擁抱　可跟天對賭

無論有幾高　就如絕路
隔絕塵俗只想要跟你可終老
來跨出那地圖　不需好報　都只想你好

能共你　沿途來爬天梯　不用又忌諱
中傷流言全悍衛
留住你　旁人如何　話過不可一世
問我亦無愧　有你  可失去我一切

幾多對　持續愛到幾多歲
當生命　仍能為你豁出去   ( 不轟烈  如何做世界之最 )
千夫所指裡　誰理登不登對　
仍挽手歷盡在世間興衰
幾多對　能悟到幾多精髓
能撐下去　竭力也要為愛盡瘁
抱緊一生未覺累

前方　仍然大霧
到懸崖或海邊也許永不知道
能相擁到白頭　一起偕老　不跟天鬥高

前面有幾高　一片荒土
每步隨著攀登叫雙手都粗糙
從崎嶇這路途　開墾給你　可走得更好

能共你　沿途來爬天梯　黑夜亦亮麗
於山頭同盟洪海中發誓
留住你　旁人如何　話過不可一世
問我亦無愧　有你  可以拆破這天際

握著手　而幸福包圍泥牆簡陋
牽著走　懷著勇氣至愛得永久

越南鹵肉

        追尋兒時味道，對於今時今日嘅我嚟講，都算係幾重要，因為可以俾我回憶番以往媽咪為我哋煮過嘅餸，更重要嘅係，可以重溫番昔日嘅生活片段。

        唔知點解，一直以嚟我對越南鹵肉呢味餸有好深刻印象，真係好想再次食到。記得媽咪以前好似話過，呢個餸係跟方太學嘅，所以早排每次去到書局，我都會拎起方太唔同嘅食譜睇睇，希望真係搵到呢個食譜，當然，梗係搵唔到啦，因為媽咪煮呢個餸時，我仲係細路仔，根本唔係呢幾年嘅事，點會喺今時今日嘅食譜度搵到呢！！

        不過，果然黃天不負有心人，真係俾我喺方太一本新近出版嘅《粗茶淡飯    自煮同樂》度搵到呢個食譜，簡直仲開心過中六合彩呀！！而且，原來煮呢個餸一啲都唔難，對於我嚟講，可以話係無乜難度。既然真係咁好彩俾我搵到個食譜，我當然會煮啦，還心願嘛！所以我就叫老豆返農場度攞啲香茅返嚟俾我整呢個越南鹵肉。

 

材料：
五花腩
雞蛋
香茅
紅辣椒
乾蔥頭
薑片

調味料：
鹽
魚露
紹酒
冰糖

- 五花腩洗乾淨，汆水後沖凍水，切件；雞蛋烚熟後剝殼備用。

- 香茅拍扁切段；乾蔥頭去衣後切片；紅辣椒洗淨後切粗粒。

- 燒熱真空煲內鍋，爆香薑片同乾蔥片，之後加埋腩肉一齊爆，灒酒。

- 其餘材料全部落鍋，加入調味料及適量水煮滾，之後轉慢火煮 20 分鐘。

- 將內鍋放回真空煲內，個半鐘頭後拎出再次上火煮。

- 用中火煮至調味料濃稠收汁即可上碟。

唔係自己讚自己呀，老豆食第一啖都即刻話好好味，梗係啦，用咗成
幾湯匙魚露落去煮，仲有香茅 o添，想唔好味都幾難啦！
我記得細個食果陣時，媽咪係有落埋竹荀 o架！
 

Notes：
- 原食譜係用蔗糖或椰糖，相信用片糖亦可，不過因為我怕煮完之後顏色會較深，
  所以改用冰糖，而用冰糖煮完之後個汁就會比較有光澤。

- 若果唔係用真空煲煮的話，根據食譜，水要加至蓋過所有材料，然後用慢火煮至
  收汁即可。

- 香茅用前一定要拍扁，否則就唔會出味。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

鮮橙煎軟雞

        西檸煎軟雞都已經整過兩次喇，今晚就攪攪新意思，用橙代替檸檬，做出呢款鮮橙煎軟雞。

材料：
急凍雞扒
粟粉
雞蛋

醃料：
鹽
糖
雞粉
生抽
玫瑰露

芡汁料：
橙
橙皮果醬
白醋
糖
鹽
吉士粉

- 雞扒解凍後洗乾淨，用抹手紙索乾水，之後用醃料醃好。

- 雞蛋拂打成蛋液，將醃好嘅雞扒蘸上蛋液，再撲上粟粉。

- 燒熱油，先將雞皮果一面煎至金黃香脆，之後翻轉將另一面煎熟，盛起。

- 橙刨皮後，榨出橙汁，連同橙皮茸、橙皮果醬、白醋、糖同鹽一切煮滾。

- 吉士粉用小量水調勻後，倒入煮滾嘅汁料內埋薄芡。

- 將芡汁淋上已切件雞扒即成。

用橙汁埋芡無用檸檬汁咁酸，但就多咗一份橙皮果醬嘅甘味。

 

煎雞扒係我唯一會連埋雞皮一齊整嘅，因為雞皮煎到香脆之餘，
皮下脂肪亦被煎到溶哂，所以食落唔會覺得肥膩。

Notes：
- 橙皮果醬可依個人口味而用。

- 雞扒最好用醃料醃一個鐘以上，令雞肉更入味。

- 煮芡汁時，可預先留起小量橙汁代替水去開吉士粉。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

布朗尼 Brownie

        好耐無整布朗尼喇，對上一次已經係年幾前嘅事。上一次嘅布朗尼個 texture 比較實淨、鬆化，今次就用咗另一個食譜，特別之處係烤盤內加水焗，所以成品完全係另一種口感，相對比較濕潤之餘，仲有種入口即溶嘅感覺，真係好特別！

        大家有興趣試試呢個食譜嗎？

麻婆豆腐

一個無人不識嘅經典四川菜，亦係一個家常餸菜 — 麻婆豆腐，好辣嘅你相信對呢個餸菜一定唔會陌生。至於我呢，當然都好鍾意食啦，以前媽咪煮嚫呢個餸時，我幾乎淨係食呢一味餸都已經夠食哂一碗飯喇！

    其實我自己間中都會整麻婆豆腐，不過都係好求其，總之有豆腐、肉碎同辣醬就算數。今晚用料就講究少少，不過肯定都唔係正宗做法囉！

材料：
腍豆腐
免治豬肉
乾蔥頭
蒜蓉
蔥花

醃料：
鹽
糖
紹酒
生抽
粟粉
油

調味料：
花椒粉
紹酒
豆瓣醬
辣油
生抽
麻油
鹽
糖

- 豬肉用醃料醃好；豆腐切粒、汆水，瀝乾備用；乾蔥頭去衣後切成乾蔥蓉。

- 燒熱油，爆香花椒粉、乾蔥蓉同蒜蓉，加入豬肉兜炒，灒酒，炒至八成熟。

- 加入調味料及適量水拌勻，之後落豆腐，輕手兜炒，最後灑上蔥花及麻油，兜
  勻即成。

今次係第一次加花椒落去煮，果然風味截然不同。

 

辣醬、辣油同花椒落得重手咗，食完個胃有少少
唔舒服 o添！
 

Notes：
- 花椒粉可用花椒粒磨碎而成。

- 豆腐汆水後可減少 "化水"，而且亦變得較實淨，兜炒時不易爛。

- 若汁太多的話，可用粟粉埋薄芡。

    你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

人試人愛的合桃香蕉蛋糕

        一直都好鍾意食自家製嘅香蕉蛋糕，唔落香油都香味四溢，而且食味同蛋糕質地都好合心意，為食貓呢個食譜真係超正，呢兩個禮拜已經整咗兩次喇！

        因為上星期係伯伯嘅生日，所以做個合桃香蕉蛋糕俾佢做生日蛋糕。因為老人家佢有糖尿病，唔食得太甜，所以將部份黃糖用黑糖代替，因而蛋糕色澤比較深。伯伯好似唔係好 buy 呢啲鬼佬蛋糕，食咗一細嚿就無再食喇，但伯娘就一味讚好食，食完一嚿又一嚿。唔知點解，整嚫香蕉蛋糕都好似硬係要長方形咁嘅，由於呢次係當做生日蛋糕，所以我就刻意用圓模嚟整，"打破傳統" 呀！

 

老豆早前講過，如果整開香蕉蛋糕的話就整一條俾佢個農場 friend，
咁所以應佢要求，另一半麵糊就整咗嚟送俾佢個 friend 喇！
咁呢次自己就無份 lu！

 

        上次咪同大家分享過，老豆一個跟我素未謀面嘅舊同事去旅行時買咗個陶笛送俾我做手信嘅，佢實在好有我心，所以今個禮拜我又專登整番條合桃香蕉蛋糕送俾佢做回禮，因為呢次係要嚟送禮，所以面頭灑番少少糖霜，望落好睇啲。我成日都覺得，呢個香蕉蛋糕最啱就係要嚟送俾一啲唔係太清楚對方口味嘅人做拌手禮，相信應該無人會唔鍾意，除非對方根本唔鍾意食西式嘢，又或者係佢唔鍾意食香蕉，咁就真係無得好講啦！所以送香蕉蛋糕俾人應該算係最穩陣 o架喇！剩低果一條蛋糕，今次卒之自己都有份享用喇。

        其實唔單只我鍾意食呢個香蕉蛋糕，曾經食過嘅朋友、學生、甚至同事，都無一不讚，唔係講笑，整呢個蛋糕送俾人，真係可以扮哂專業 o架 ！！但實情係，喺烘焙世界裡面，其實算係最低級，最無難度可言 o架喇，只係果啲對烘焙完全無認識嘅人就會覺得你好掂囉！！！ 

        有興趣想試整嘅朋友，請參考番之前嘅香蕉蛋糕食譜，又或者直接 click 番上面為食貓條 link 啦！

越南炸春卷

        今晚又再整越南春卷喇，不過今次係整炸春卷，而且材料同上次個鮮春卷都有少少唔同，今次改用咗雞肉同青瓜，食落比較清爽，而炸過嘅米紙亦香口好多。

材料：
越南米紙
雞柳
溫室青瓜
木耳絲
粉絲
金不換
可樂

醃料：
鹽
糖
魚露
胡椒粉

調味料：
豉油雞汁
紹酒
鹽
糖

- 雞柳洗乾淨，將筋起出，之後切成雞絲，用醃料醃好。

- 粉絲用清水浸軟後洗乾淨；木耳絲用清水浸發後洗淨；

- 青瓜洗乾淨後開邊、去瓤，之後切成幼條；金不換洗淨備用。

- 煲滾水，放木耳絲入內汆水，之後盛起瀝乾水份。

- 燒熱油，放雞柳入鑊炒至半熟，灒酒，加入木耳絲及粉絲兜炒。

- 加入調味料，兜炒至所有材料熟透後就可以盛起，攤凍備用。

- 米紙放入可樂內浸透，拎出後用抹手紙或毛巾索乾多餘水份。

- 米紙上放上一片金不換及適量炒熟餡料，再放入青瓜條。

- 先將米紙底部摺起，跟住左右摺入，之後再向上捲起收口黏緊。

- 燒熱油，將包好嘅春卷逐一炸至金黃即成。

好難得我會炸嘢食，所以無乜經驗，今次有呢個效果都算滿意喇！

 

香脆嘅越南春卷，蘸上魚露汁一齊食，別具風味！

Notes：
- 青瓜一定要去瓤，避免水份滲出，令炸脆嘅米紙變腍。

- 用可樂浸米紙，可以令炸後嘅春卷更上色、更脆口。詳情可參考上載到 Youtube
  嘅《開心大發現》片段。

- 魚露汁做法，請 click 越式魚露汁。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

越式魚露汁 Nouc Nam

        唔知大家知唔知有間越南餐廳叫做「碌冧」呢？初時見到個店名覺得好攪笑，完全無乜意思，好似係純粹攞兩個讀音拼湊成餐廳店名，後來發現原來「碌冧」呢個字係有意思 o架！

        「碌冧」係越南文嘅譯音，原文係 nouc nam，即係魚露咁解。如果有去過越南餐廳食嘢的話，一定會試過佢哋嘅魚露汁，nouc nam 呢個字亦可解作為越式魚露汁，係越南菜中經常會用嚟作蘸汁，特別係食越南春卷時，一定會跟呢個魚露汁。

       早前喺圖書館度借咗本食譜，裡面有教整呢個魚露汁，原來好容易整，而且整出嚟嘅味道同街外所食到嘅味道一模一樣，所以我都想喺度同大家分享呢個蘸汁嘅做法。

西式素食

        望出窗外，見到個咁圓嘅月光，就知道今日係舊曆十五。雖然我照舊食齋，但係今日就好唔同，全日兩餐都係西式嘅，印象中今次應該係第一次。

老豆喺農場度拎咗啲好靚嘅沙律菜返嚟俾我整沙律，雖然我唔知道
呢隻菜叫咩名，但係好好食，好清爽、好清甜。

 

除沙律菜外，其他材料包括：番茄仔、牛油果、溫室青瓜同粟米；
而沙律汁就用咗橄欖油、balsamic vinegar、英式芥末、
蜜糖、黑椒同海鹽。

 

午餐就係呢個清新田園沙律，橙香燕麥包加紅茶一杯。

 

至於晚餐，我就煮咗法式燴雜菜配扁意粉。當然，今晚呢個 Ratatouille
同上次嘅做法會有啲唔同，因為今日要食齋，所以煮果陣時
就無落到洋蔥、蒜頭同白酒，不過一樣咁好味！

急凍橙皮

        唔知大家有冇呢個經驗呢，好多時要用橙皮茸嚟整嘢食時，會專登為咗 "浸" 橙皮而走去買幾個橙；有時食橙時，見到個橙皮好靚，無 "花" 無爛，顏色又靚，但係果一刻又唔需要用到橙皮，就咁掉咗去又覺得好嘥！就係因為咁，所以我開始咗 "儲" 橙皮呢個習慣，到有需要用時就唔駛無端端走去買幾個橙。