橙醬柑桔鬆餅 Orange Jam Kumquat Muffin

        擺喺雪櫃嘅橙皮果醬同糖漬柑桔食極都食唔完，係時候要清貨喇，反正好耐都無整過 muffin，就用佢哋嚟整 muffin 啦！

材料：
牛油                      100 克
糖                          80 克
糖漬橙蜜              40 克
柑桔橙皮果醬      40 克
雞蛋                      2 隻
低筋麵粉              260 克
泡打粉                  5 克
梳打粉                  2 克
鹽                          2 克
橙乳酪                  100 克
淡忌廉                  100 克
糖漬柑桔              約 5 - 6 粒

以上材料份量可做鬆餅約 8 個。

- 所有粉類過篩 3 次；牛油於室溫放軟，柑桔切粒，備用。

- 牛油加入糖、果醬同橙蜜，用電動打蛋器打至發白。

- 將雞蛋、鹽、乳酪同淡忌廉加入牛油霜中，拌勻。

- 分次篩入粉類，拌勻成麵糊後，再加入柑桔粒，拌勻。

- 將麵糊倒入模內，放入已預熱 180 °C 嘅焗爐內，焗約 25 分鐘至熟。

賣相都唔錯呀！

 

味道唔錯，好香橙味之餘，又有微酸柑桔味，但係蛋糕就濕咗啲，
下次再整時啲濕料要適量減少一下。

 

Notes：
- 可用任何果醬做成不同味道嘅鬆餅。

- 糖漬橙蜜可用一般蜜糖代替；而橙乳酪亦可用原味乳酪代替。

- 乳酪中嘅酸性成份可令成品變得更鬆軟，效果相當好。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

朱古力磚 (香橙味) Pavé au chocolat (Orange Flavor)

        上次整嘅朱古力磚已經食哂，今日又再整多次，不過今次玩吓新口味，加入橙皮同橙酒做成香橙味嘅朱古力磚。

2011 新春飯聚

        噚日約好哂 Winnie、明仔同 Li Kien 一齊上佢 Louisa 屋企團拜，去得 Louisa 屋企，當然就梗係又玩煮飯仔啦！由前菜，主菜，到甜品，全部都係自家製作，你話勁唔勁呀！幾乎由朝企到晚，真係企到腳仔軟呀，Winnie 話佢仲攰過擔泥喎！

先嚟 "飯前" 甜品，Winnie 一口氣整咗三款中式糕點，首先出場嘅係
杞子桂花糕，清香清甜，非常好味，而且個 texture
係我最鍾意個隻，唔太腍又唔太爽，正！ 

 

第二款係椰汁馬豆糕，呢個 texture 就太黏身，皆因佢
整整吓唔夠大菜粉用呀，可惜！

 

第三款係椰汁紅豆糕，呢個又係好食之選。Winnie，掂喇！

 

呢個就係我整嘅合桃無花果裸麥包。

 

不過呢個同上次整果款無花果合桃包唔同，除咗加入裸麥粉之外，
仲係用湯種整 o架！

 

呢碟椰菜仔勁正，唔苦之餘仲好清甜 o添呀！

 

雞肉沙律，配埋 balsamic vinegar 同有機初榨橄欖油一齊食，
清新健康又好味，正！

 

Genevieve 指定要食嘅烚鵪鶉蛋。

 

Louisa 整嘅魚生飯，正到無朋友啦！

 

Al dente 意粉配芝士番茄醬。

 

佢哋個個都讚嘅巴東牛肉。

 

飯後甜品，呢個係明仔同 Winnie 一齊整嘅 Tranche au chocolat。

 

好濃郁朱古力味，不過對我而言，呢款蛋糕個 texture 好 heavy。

 

Louisa 整嘅 Charlotte aux poires，賣相勁得呀！

 

呢個蛋糕好好味，啤梨與 mousse 好夾，唔會好甜好 "漏"，
Winnie 讚不絕口！

紅豆抹茶糯米蛋糕 Azuki Matcha Mochi Cake

        我一直都好鍾意食「Panash」嘅糯米蛋糕，當中嘅紅豆綠茶口味就更加念念不忘，所以有機會經過「Panash」兼又遇到心儀嘅口味的話，我就會買番個嚟食。不過，始終「Panash」都唔係度度都有分店，唔易買到，而且細細個蛋糕買成 $8、9 個，其實唔係平，所以今日我就試吓自己動手製作。

        因為聽日 Miss Cheng 約咗我同 Winnie 一齊 tea，話哂都係新正頭第一次見面，咁就順便將呢個蛋糕送俾佢做新年禮物啦！

材料：
牛油                 100 克
糖                     100 克
雞蛋                  2 隻
鹽                      少許
低筋麵粉          50 克
糯米粉              50 克
抹茶粉              1 湯匙
泡打粉              1/2 茶匙
日式紅豆餡      適量

以上材料份量可做 18 cm X 9 cm X 7 cm 長方形蛋糕一個。

- 預先將牛油室溫放軟；粉類過篩 3 次，混合好；蛋糕模鋪上牛油紙。

- 牛油加 50 克糖用電動打蛋器打至鬆軟發白。

- 蛋黃逐個加入牛油霜內混合，加鹽拌勻。

- 蛋白用電動打蛋器打至起泡，之後分 3 次加入剩低嘅糖打至 9 成企身。

- 先將 1/3 份蛋白霜加入蛋油混合物內拌勻，之後篩入1/2 份粉類混合拌好。

- 繼續加入 1/3 份蛋白霜混合，跟住就加埋剩低果啲粉類，拌好之後就落埋剩低嘅
  蛋白霜拌勻。

- 將混合好嘅麵糊倒入模內約四成滿，放上紅豆餡，再倒入麵糊至八分滿。

- 放入已預熱至 170 °C 嘅焗爐內焗約 35 - 40 分鐘至熟。

- 出爐後放涼即可享用。

剩咗嘅麵糊做咗四個小蛋糕。

 

其實今次呢個蛋糕係參考咗上次個宇治抹茶合桃磅蛋糕
嘅材料及份量而調校出嚟嘅。

 

原來紅豆餡落得唔夠多，麵糊漲起之後更加將佢壓扁咗 o添！！

 

Notes：
- 麵粉與糯米粉嘅比例可因應個人喜好而作出調整，做出自己鍾意嘅軟硬度。

- 若糯米粉的含量比較多，麵糊會變得較黏而不易勺入焗模，可用唧袋將麵糊唧入
  模內。

- 可用現成罐裝紅豆餡，但水份比較多，需預先放入微波爐內將水份 "叮" 乾少
  少。

 

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

無花果合桃包 Fig & Walnut Bread

        今日又跟 Rachel 本《知廚之樂》整包包，今次揀咗整無花果合桃包，因為早幾日執嘢先發覺原來仲有包無花果乾無乜點食過，咁就用佢嚟整麵包啦！

材料：
法國麵包粉      250 克
老麵                  50 克
鹽                      5 克
黃糖                  20 克
即用酵母          2 克
水                      約 160 毫升
橄欖油              10 克
合桃                  80 克
無花果乾          100 克

以上材料份量可做麵包 4 個。

食譜出自 Rachel Yau 嘅《知廚之樂》。

- 合桃洗乾淨，用抹手紙索乾水份，放入已預熱至 140 °C 嘅焗爐內焗 15 分鐘至
  香味出，之後切粒；無花果乾切碎備用。

- 將粉類、酵母、糖、老麵、鹽、橄欖油同水混合，搓成光滑麵糰。

- 加入合桃及無花果乾，搓到完全混合好為止。

- 將麵糰滾圓，放喺已灑粉嘅兜內，冚好保鮮紙，進行第一次發酵，時間約為 1
  個鐘，麵糰大約發大兩倍。

- 將麵糰拎出，翻轉放上工作枱上向四面拉開，先上下向中間摺入，再左右摺入，
  之後放番入兜內作第二次發酵，發酵時間約 30 分鐘。

- 發酵後將麵糰拎出分割成 4 份，之後將麵糰以上下左右次序向內摺入，收口向下
  ，冚上保鮮紙，靜置 20 分鐘。

 

- 將 1/3 麵糰覆入、壓緊，另外 1/3 麵糰同樣覆入，封好收口作最後發酵，約 45
  分鐘直至麵糰發大約 3 倍。

       

- 發酵完成後，喺麵糰表面灑上少量麵粉，之後用利刀 "界" 出 3 條斜紋。

 

- 麵糰放上已鋪入爐防黏紙嘅烤盤上，放入已預熱至 220 °C 嘅焗爐內焗約 20 分
  鐘。

 

- 其間每隔 7 - 8 分鐘就要喺爐內噴水 1 次，共噴水 2 次。

 

- 焗好之後放上架上攤凍。

 

 

整過咁多次麵包，呢次個賣相我最滿意，而且味道都唔錯，
老豆食完即刻讚好味！

 

 

 

唔知係因為太凍嘅關係，定係因為麵糰未發酵得夠時間，
好似唔係好夠大咁，有時間要再試整多次至得！

 

 

 

果然好似大師 Grégoire Michaud 咁講，用無花果整麵包會加深顏色，
無花果亦會因高溫而溶入麵糰內，唔知係咪就係因為咁，
包肉有少少濕，好似未熟透咁款。

 

Notes：
- 原食譜係用牛油 20 克，鮮酵母 5 克。

- 法國麵包粉可用一般高筋麵粉代替。

- 合桃同無花果乾亦可用其他果仁及乾果代替。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

朱古力磚 Pavé au chocolat

        聽日就係情人節喇，一提起情人節，你哋會諗起咩呢？情人？呢層就當然啦，但我就即刻諗起朱古力囉！所以星期四果日去油麻地「二記」買嘢時，真係人山人海，俾錢都要排長龍，因為個個 DIY 友都買料整朱古力嘛！唔係講笑，驟眼望落，真係幾乎個個人手上都有包朱古力㗎，包括我自己都係呢，哈哈！不過我唔係專登走去買嚟整朱古力嘅，只係咁啱去入貨補倉啫！

        屋企啲現成朱古力都通通俾我食哂喇，咁我又唔想去買，咁就自己郁手整啦！所以，今次整呢啲朱古力係純粹整俾自己食㗎咋，只係咁啱得咁橋撞正情人節前夕啫，絕對唔係整嚟送俾情人㗎，哈哈！況且，我根本就無情人，我疊埋心水做王老五、老姑公㗎喇！！

新春年花

        又係時候同大家分享一吓屋企啲年花喇！之所以咁遲先 post 出嚟，係因為要等佢哋開花囉！

雖然呢幾個月老豆因為身體問題，無去到農場幫手，
但佢嘅農場 friend 都有叫同事車咗兩盆花俾我哋。

 

呢盆蘭花好靚，有紫、白、黃三隻品種。

 

紫色品種紋理最靚。

 

黃色花瓣加紫色紋，色彩鮮豔。

 

白色花瓣中，點綴了紫色花紋，有種清雅高貴嘅氣質。

 

除咗蘭花，仲有呢束桃紅色嘅百合。

 

老豆話農場種嘅百合係荷蘭入口，所以特別貴，
盛惠每枝 $100，呢度值 $400 o架喇！

 

呢隻桃紅色嘅百合好夾過年插，好有氣氛呀！

 

呢朵白瓣紅紋嘅百合反而較為突出。

 

趁花蕊未剪影番張相先！

 

Winnie 送嘅水仙卒之都開花喇！ 我都送番兩枝百合俾佢做回禮。

 

每朵花都好可愛。

 

行近盆水仙就即刻聞到淡淡清香，好舒服。

 

聞到水仙花香就即刻諗起水仙茶！

 

最鍾意呢張大特寫，好清晰、好靚！