與 blog 友交流煮食心得，分享生活點滴。
懶蟲又上身喇！今晚淨係煎雞扒，煮番個照燒汁淋上面就算數，又係懶人菜一道！
材料：
急凍雞扒
即食紫菜
炒香芝麻
七味粉
醃料：
日本醬油
老抽
鹽
糖
清酒
胡椒粉
照燒汁
材料：
日本醬油
味醂
清酒
糖
- 雞扒解凍，切去多餘脂肪，洗淨後用抹手紙索乾水份。
- 用醃料醃好雞扒；紫菜剪成幼絲，備用。
- 燒熱油，將雞扒兩面煎香至金黃色，盛起。
- 照燒汁料倒入煲內煮至濃稠即可。
- 將照燒汁淋上雞扒上，灑上七味粉、芝麻及紫菜絲即成。
Notes：
- 煎雞扒時最好先煎雞皮果一面，將多餘油份迫出之餘，亦可減少用油。
- 照燒汁材料比例 — 醬油：味醂：糖 = 2：1：1，清酒則隨個人喜好增減。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
噚晚睇電視時，無意中睇到中央電視台重播一個中俄跨國尋親節目《等著我》，真係好感人，可惜我只係中段先開始睇，不過唔緊要，因為有有心人已經將整個節目掟咗上 Youtube，有時間可以慢慢睇番。
節目主要係幫中國人同俄羅斯人尋找失去聯絡嘅親朋戚友，我噚晚所睇到嘅片段，有子女尋父母、有未拍過拖嘅 "情侶" 尋找失去聯絡嘅另一半、有交流生尋找當年一齊讀書嘅校友、亦有當年曾經短暫時間係 "孤兒" 嘅去尋找奶媽。當中每個故事都的確係好感人，尤其係當雙方同台見面時，真係好激動，更會喜極而泣。
呢個 case 係一位中年男仕尋找媽咪，當年佢要同家姐跟媽咪一齊去蘇聯，點知中途爸爸趕到，將佢帶走，從此就跟媽咪、家姐分開，過往媽咪喺屋企坐開嘅椅一直留空，事主一直等媽咪返嚟坐，點知一等就等咗五十五年，當年六歲嘅小男孩如今已是一名白髮中年人，幸好，俄羅斯方面真係幫佢搵得番媽咪，當佢媽咪上台同佢相認時十分激動，就連中央電視台嘅主持人董卿都話，雖然佢已經係一個白髮中年男子，但當見番媽咪之後，都亦然係一個小孩咁立即跪下，攬住媽咪雙腳不斷咁喊，可想而知，當事人對母親嘅思念係幾咁深！
而呢個 case 就係一位中年女仕，父親係中國人，母親係蘇聯人。事主當年一歲大時，外婆帶佢返烏克蘭探親，點知因為一啲事故返唔到中國，從此就與父母相隔兩地，外婆臨終時交低一些文件，係證明佢同父母嘅關係及當年嘅出生地，事主就係拎住呢啲文件搵俄羅斯電台人員幫手尋親，亦都係好好彩，幫佢搵得番媽咪，但原來爸爸就等唔到呢一刻，早些日子已經離開咗，當媽咪知道咗女兒嘅下落之後，同樣十分激動，泣不成聲，大家上台相認時，當然亦非常激動，完全唔識講嘢，當事人就連企喺隔離果兩個人係邊個都唔知，直到媽咪向她介紹，先知道原來係自己嘅親生細佬妹！
跟住呢個 case 就仲經典，當年嘅一個中國青年相識了一位熱愛中國文化嘅蘇聯少女筆友，不斷書信來往，慢慢由筆友發展成情侶，但由始至終都未見過面，後來，少女嘅爸爸發現到書信字裡行間有著愛情字句，於是就將中國青年寄俾佢個女嘅信通通收起，從此兩人失去聯絡。事主一直以來都喺度等緊呢位少女，直到五十多歲時先成家立室。現年已經七十六歲嘅 "青年" 覺得不明不白，為解開心中嘅謎，所以就請電視台幫手搵果位少女，當然，又係一個成功嘅 case 啦！不過，當事主喺台上見到對方之後，覺得唔似係事實，仲話果位老婦個樣真係生得好似當年果位少女，主持人董卿就即刻話：「咩叫做生得好似呀，佢根本就係果位少女，唔通你唔相信嗎？」於是 "青年" 就問咗對方幾個問題，果位老婦全部答中哂，佢先至真係相信眼前就係當年嘅筆友。
雖然我講嘅呢三個 case 都係成功幫到事主，但唔係每一個 case 都成功，好似果位搵奶媽嘅女仕就暫未有回音，希望佢可以早日達成心願！
感性嘅我，當然係一路睇就一路喊啦，就連主持人及兩國嘅現場觀眾，男女老幼都不停流淚，因為大部份嘅個案都已經係事隔五十幾年，咁樣都能夠搵得番自己想搵嘅人，真係絕對係奇蹟！難怪多位事主都不約而同咁話，自己係世界上最幸福嘅人！
老實講，如果香港都有呢個媒體平台，我都一定會申請，希望可以幫我搵得番媽咪，但係，我都好清楚知道，我可以跪低攬住媽咪雙腳做個 "世界上最幸福嘅人"，根本係無可能 ……… 
一直都以為仙姐本《天然麵包香》會 "打落冷宮"，永遠都 "不見天日"，皆因差唔多一年之前已經試做過一次，不過勁失敗囉！因為個麵糰實在太濕，而我一向都係用 food processor 嚟搓麵糰，有經驗人仕睇到呢度，相信都知道發生咩事啦，咪就係啲麵糰捲哂入部機度囉！嘩，果鑊真係好甘，攪咗幾耐先可以清得哂啲麵糰出嚟呀，查實到依家都仲有啲乾哂嘅麵糰喺部機度 o架，不過無法啦，唔通走去拆開部機嚟清理咩，整壞點算呀！
直到幾日前，無意中喺 blog 友何瑪姬度見到佢嘅分享，原來佢係用手搓 17 小時包包，我當然要請教一吓佢，問吓佢有咩心得，佢話其實無乜心得可言，主要都係跟仙姐嘅提示去整，之後佢就俾咗條 link 我，原來仙姐好耐之前曾經 post 過一篇叫做《17小時包包用料一覽》，裡面有提及到一樣好重要嘅訊息，就係如果用手搓包的話，記得要將水嘅份量減至 55 - 60%，咁即係話，我都可以做到啦！知道呢個消息真係勁開心，因為我一直都好想整 17 小時包包 o架！於是噚日就預備定個中種，今日就開工整個最簡單、最基礎嘅白麵包多士，不過當中有幾樣材料我都更改咗。
坦白講，整 17 小時麵包的高手大有人在，根本唔輪我呢個生手喺度分享心得，不過我希望同大家分享一下點樣用 food processor 嚟整呢種麵包，希望同我一樣無 KA 或 KM 嘅朋友都可以同我一樣做到 17 小時麵包，因為呢隻包包實在值得學習，無論包質定係保存期都係勝人一籌。
中種麵糰
材料：
高筋麵粉 240 克
即用酵母 3 克
水 142 克
海鹽 3.5 克
- 將所有材料混合，然後搓成麵糰。
- 將麵糰放入大碗內，用保鮮紙包好，放入雪櫃內作 17 小時低溫發酵。
- 將發酵好嘅麵糰剪成細塊備用。
主麵糰
材料：
高筋麵粉 103 克
即用酵母 0.5 克
海鹽 3.5 克
糖 34 克
水 32 克
橄欖油 20 克
- 除水及橄欖油外，將主麵糰其餘材料放入食物處理器內攪拌，邊攪拌邊放入中種
麵糰細塊，攪打成麵包糠狀。
- 當所有中種麵糰細塊都加入後，就可以加水搓成麵糰。
- 將麵糰攤開，倒入橄欖油。
- 開機繼續搓至有彈性麵糰。
- 拎出麵糰，放喺已灑粉嘅枱面上繼續搓揉、摔打成光滑麵糰。
- 將麵糰放入已灑粉嘅兜內，冚好保鮮紙，發酵 30 分鐘。
- 拎出麵糰，排氣，平均分割成 3 份後捲成條狀，鬆弛 20 分鐘。
- 麵糰再次排氣，用已灑粉嘅擀麵棍擀薄成長條形，之後兩邊向內摺入。
- 再次擀薄麵糰，其闊度應與吐司模闊度相若，然後捲起，捏緊收口。
- 將捲起麵糰放入吐司模內，包好保鮮紙作最後發酵，時間為 45 - 60 分鐘。
- 當麵糰發酵至八成滿後，將吐司模放入已預熱至 180 °C 嘅焗爐內焗約 30 分
鐘。
- 出爐後將麵糰放上架上攤凍即可。
以上材料份量可做 450 克多士模嘅多士一條。
食譜參考自獨角仙@藍色大門嘅《天然麵包香》。
第一次整到包質咁鬆軟嘅麵包，好開心呀！
即刻整番塊花生醬多士歎吓先！
今次成功整到 17 小時包包，真係要多謝 blog 友何瑪姬至得呀！ Notes： - 總用水量為原食譜嘅 73.5%。 - 新鮮酵母與即用酵母用量之間的轉換方法，請參考《不同種類酵母用量之調整》。 - 天氣涼嘅時候，可將麵糰放入電飯煲內發酵，只需按下保溫掣直至適合暖度即可 - 至於麵糰入模後發酵，可先將一碟熱水放入焗爐內，再喺碟上放上放涼架，再將 你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
- 原食譜材料係用牛油、新鮮酵母及奶粉。
，我用開個電飯煲只需保溫半分鐘即可達至適合溫度，而且因為電飯煲係密封，
所以即使唔包保鮮紙，麵糰都唔會風乾，好方便。
焗模放喺架上，閂好爐門就可以發酵；如果個焗爐有發酵功能的話，就將焗爐校
至 40 °C，維持 10 分鐘即可。但記得如果水變凍後要換過一碟熱水至得。
唔知點解，細個果陣時，試過一次喺上海舖食過炒年糕，當時印象唔係咁好，仲有少少抗拒，話過以後都唔食。但係人大咗之後，又勁鍾意食喎，口味果真會隨著年紀改變。
韓式炒年糕都煮過幾次喇，今晚係首次煮上海炒年糕。其實我都唔係太知道點樣整，又無上網、巡 blog 做 research，純粹自己鍾意乜料就擺落去煮，買年糕果陣時已經請教咗檔主靚仔哥哥點樣煮，所以出到嚟效果絕對唔差 o架！
材料：
脢頭瘦肉
上海年糕
冬菇
雪菜
津菜
蒜茸
紅辣椒
清雞湯
醃料：
鹽
糖
紹酒
生抽
粟粉
油
調味料：
鹽
糖
紹酒
蠔油
麻油
- 豬肉洗淨、切片，用醃料醃好；雪菜用清水浸 15 分鐘，洗淨後切碎。
- 冬菇洗乾淨，用清水浸至軟身，去蒂後切絲，浸菇水留用。
- 津菜洗乾淨，切件；紅辣椒洗淨，切粒備用。
- 燒熱油，豬肉落鑊炒至半熟盛起。
- 爆香蒜茸、辣椒及雪菜，加入冬菇兜炒，灒酒。
- 之後加入津菜及浸菇水略煮一陣。
- 豬肉回鑊，放入年糕、調味料及清雞湯，冚上鑊蓋煮至年糕軟腍。
- 當汁料煮到收乾就灒麻油，兜勻後熄火上碟。
煮上海年糕比起韓國年糕易煮，好快已經煮腍。
又雪菜、又蠔油、又雞湯，想唔好食都幾難囉！
Notes：
- 雪菜浸過清水後可降低鹹度。
- 靚仔哥哥話如果年糕唔係即日煮的話，可以用水浸住放入雪櫃保存。
- 煮年糕時記得間中兜炒一下，以免黐底。
- 年糕煮至軟身即可，否則會太腍，亦會變得非常黏。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
