永遠懷念你，Edward！

        依家情緒好低落，因為啱啱收到好友阿聰嘅消息，已經無見幾年嘅 Edward 噚晚凌晨時份離開咗，我知道之後真係晴天霹靂，好 shocking，真係諗都諗唔到！！不過，呢次亦都話到俾我聽，當年醫生叮囑我同阿馳要多加留意自己身體，原來遲啲真係會發生喺我哋兩個身上。

        雖然跟 Edward 都無聯絡幾年，但係，收到呢個消息，始終個心都好唔舒服，畢竟大家都一齊玩過，而且佢年紀仲細過我。對朋友嚟講，佢嘅離去始終唔係一件開心嘅事，但對 Edward 而言，就係一個大解脫，永遠都唔駛再受苦！

        Edward，希望你往生淨土，早登極樂，與媽咪重聚，阿彌陀佛！！

 

 

P.S.  細個嗰陣，成日都會有紅事喜宴，但自從十幾年前開始，就經常遇到白事，當事人包括家人、親戚、老師及朋友，而且年紀仲一個比一個年輕！究竟幾時先至輪到我 o架，我成日都好自私咁講，我寧願我自己走先，好過要我見住你哋逐個逐個咁離開我！當年媽咪離開我無幾耐嘅時候，啱啱電視做緊《家好月圓》呢套劇，我好記得大結局時，夏雨對李司棋講：「我身體比妳好，妳死得俾我早！」我聽完之後就大讚兼拍爛手掌！！我諗好多人都會好似劇中其他角色咁，覺得夏雨好口臭，但係身同感受嘅我，就覺得劇中嘅李司棋真係無比幸福，亦好清楚知道，度呢句對白嘅人兄亦都一定有同樣經歷。

莎樂美番茄粟米鬆餅 Salami & Tomata Corn Muffin

    上次成功利用粟米粉嚟整翠玉瓜粟米鬆餅，今日又再整多次，不過今次唔整甜喇，試吓整鹹 muffin。

材料：
莎樂美腸                       25 克
油浸番茄乾                  20 克
新鮮粟米粒                  30 克
低筋麵粉                      80 克
粟米粉                          55 克
泡打粉                          1 1/2 茶匙
黑椒粉                          1/4 茶匙
奧勒崗 ( Oregano )      1/2 茶匙
浸番茄乾油                   3 湯匙
雞蛋                              1 隻
乳酪                              120 克
蒜蓉                              1/2 茶匙
糖                                 1 茶匙
鹽                                 少許

- 麵粉過篩 3 次；番茄乾瀝乾油份，連同肉腸一齊切碎。

- 將粉類、番茄乾、肉腸、粟米粒、黑椒粉同香草混合好。

- 油、糖、鹽、雞蛋、乳酪同蒜蓉拌勻，倒入麵粉混合物內拌勻成麵糊。

- 將麵糊倒入模內至 8 分滿，放入已預熱至 190 °C 嘅焗爐內焗約 25 分鐘即成。

 

第一次整鹹 muffin，味道都唔錯，賣相又唔差，
仲有種好獨特嘅香味㖭！
 
 
 
 
 

Notes：

- 參考過好多整鹹鬆餅嘅食譜，低筋麵粉與粟米粉比較為 3：2。

- 莎樂美腸可用火腿或煙肉代替；新鮮粟米亦可用罐頭粟米代替，但必須瀝乾水份。

- 將材料拌成麵糊時，要輕手及快手，所有材料混合好就要立刻停手，避免過度攪
  拌產生筋性而令鬆餅唔夠鬆軟。

 

蒸蘿蔔糕

        今年過年無整到蘿蔔糕，只係整咗五香臘味芋頭糕，但其實都係覺得蘿蔔糕好食啲，因為芋頭糕相對比較乾身。但係蘿蔔糕我又鍾意食蒸多過煎喎，一來我不嬲都唔太好煎炸嘢啦，二來蒸蘿蔔糕比較濕潤軟滑，好似食緊布甸咁，一羹羹 "畢" 嚟食，好滋味呢！

咖喱三文魚頭

        打開個櫃搵材料時，發覺原來有包用嚟煮魚嘅咖喱醬仲未用，咁就啱哂喇，順便可以清埋冰格個三文魚頭。

材料：
急凍三文魚頭
茄子
秋葵
豆卜
檸檬葉
金不換

醃料：
鹽
胡椒粉
紹酒

調味料：
咖喱魚即煮醬
糖
椰漿

- 三文魚頭解凍，打鱗、去鰓，洗乾淨後開邊，用醃料醃好。

- 茄子洗淨、切件；秋葵洗淨、去蒂，之後切半。

- 豆卜沖洗後開邊；檸檬葉同金不換洗淨備用。

- 燒熱油，魚頭撲上粟粉，落鑊煎至兩面金黃，盛起。

- 爆香咖喱醬同檸檬葉，之後加入茄子兜炒，加適量水及糖，冚上鑊蓋煮數分鐘。

- 魚頭回鑊並加入豆卜煮至入味，最後加埋秋葵，兜勻所有材料後再煮多一陣。

- 加椰漿及金不換，兜勻後即可熄火上碟。

呢包就係咖喱魚即煮醬，而後面嗰包就係秋葵，$15 差唔多有
500 克，唔知叫做貴定平，但條條都又大又新鮮。

 

噚晚第一次洗全雞同剪雞，今晚就第一次洗魚頭同斬魚頭，
辛苦好多呀，一來屋企無中式菜刀，
二來魚骨比雞骨硬好多！

 

雖然主角係個三文魚頭，但我就覺得配菜好食好多，
因為索哂咖喱汁，勁好味呀！

Notes：
- 唔用魚頭可用魚肉煮；配菜亦可隨意選擇。

- 咖喱醬同檸檬葉必須爆過，香味先可以散發出。

- 椰漿同金不換不可煮太耐，否則會令香氣消失，椰漿亦會煮出椰油。

 

         你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

椰子香蕉雪芳蛋糕 Coconut Banana Chiffon Cake

    好耐無整雪芳蛋糕喇，因為我唔係太好雪芳嘅 texture，覺得比較濕，唔夠乾爽，但係成日食 muffin 或 pound cake 又好似好有罪惡感，咁間唔中都要整吓雪芳嘅。屋企啲香蕉一次過齊齊熟，前幾日已經整過香蕉蛋糕，無理由又整 o架，咁今次就整香蕉雪芳啦！

    真係好耐無整雪芳，耐到連自己用咩工具脫模都唔記得咗，搵咗把抹刀嚟脫模，攪到一個靚靚雪芳無端端慘遭 "毀容"，真係可惜！好彩一口氣整咗 4 個迷你版，整爛一個都唔緊要！

材料：
低筋麵粉   80 克
蛋白   4 個
香蕉   80 克
水   1 湯匙
蛋黃   3 個
糖   60 克
橄欖油   25 毫升
椰絲   10 克

- 麵粉先過篩 3 次；將 40 克糖分次加入蛋白內打成蛋白霜，之後放入雪櫃保存。

- 香蕉用叉壓爛成香蕉蓉，之後加水拌勻。

- 將香蕉蓉加入蛋黃度，再加入油同剩低嘅糖，用打蛋器拌勻。

- 篩入麵粉，加入椰絲，繼續用打蛋器拌勻成麵糊。

- 先將 1/3 份蛋白霜加入麵糊內徹底混合，再將其餘蛋白霜拌入。

- 將麵糊倒入模內，喺枱面輕敲幾下以釋出較大氣泡。

- 之後放入已預熱至 180 °C 嘅焗爐內焗約 30 分鐘。

- 出爐後立即倒扣放涼，待完全攤凍後即可脫模。

以上材料份量可做直徑 17 厘米蛋糕 1 個。

食譜參考自福田淳子嘅《好吃戚風蛋糕輕鬆上手》。

啱啱出爐，個個都脹卜卜！

 

呢個送俾老竇個 friend，因為佢之前送咗本食譜俾我，
咁我梗係要禮尚往來啦！

 

香蕉味濃，椰子味清淡，真係最佳配搭！

Notes：
- 原食譜並無椰絲，而油嘅用量為 50 毫升。

- 糖嘅用量可因應香蕉嘅甜度而增減。

    你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

白切雞

        今晚第一次整白切雞，以前媽咪同老竇整嚫白切雞都係蒸嘅，今日上網睇先知道原來好多 blogger 都係用浸嘅方法，本來我都諗住用番蒸嘅方法，一來乾手淨腳啲，又唔駛洗煲，二來就係覺得用浸嘅方法會將隻雞啲味浸哂出嚟，應該無咁好食，但係後尾見到有個 blogger 話用浸嘅方法整，隻雞前所未有咁滑，仲滑過豆腐花咁話，真係勁誇張！！

        好，咁就一於試試浸雞啦！

材料：
冰鮮雞
薑蓉
蔥花
雞粉
鹽

醃料：
紹酒
薑汁

- 雞洗乾淨、瀝乾水，用抹手紙索乾水份後用醃料搽勻裡裡外外，醃 10 分鐘。

- 煲滾水，加少少鹽，將雞浸入水內 1 分鐘，拎起，倒去雞腔內嘅水。

- 之後再浸多 1 分鐘，同樣做法。

- 將雞放回煲內，冚蓋滾 5 分鐘後熄火，焗約 20 -25 分鐘。

- 將雞拎出，立即放入冰水內過冷河至雞完全涼透。

- 撈起，瀝乾水份即可切件上碟。

- 將蔥花、薑蓉、鹽同雞粉拌勻，備用。

- 燒熱適量油後倒入薑蓉同蔥花內，拌勻，即成為薑蔥蓉。

平時都係老竇負責洗雞同剪雞，今晚我又豁出去喇，自己一手包辦。
但好神奇，估唔到隻雞一啲都唔肥喎！而且剪雞原來都好輕易，
仲唔怕斬到周圍都係油 o添，真係好方便。

 

我一向都係食雞胸，我夾咗一嚿俾老竇試食，佢都未等我開口問佢，
佢已經即刻話好嫩滑！無錯，真係比起蒸滑好多好多，
但係就無滑過豆腐花咁誇囉，雞皮都真係爽啲 o架！

 

Notes：
- 將雞浸 1 分鐘後拎出倒去雞腔內嘅水，可以將清除雞腔內嘅血水。

- 若果浸雞水未能完全浸過雞面時，焗 10 分鐘後需要反轉身繼續焗。

- 將浸好嘅雞浸冰水過冷河，目的係要雞皮立即收縮，到切件後就唔會再收縮，亦
  可以令雞皮比較爽脆。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

素炒粒粒

        今日係十五，當然要煮齋啦，就連今朝整嘅白麵包多士都無用到蛋 o架，真係夠哂清純！

        炒粒粒真係好送得飯，只要材料同味道調配得好，齋菜都可以食到耳仔郁！

材料：
冬菇
西芹
菜甫
青椒
薑茸
豆腐乾
九層塔
炒香花生

調味料：
素蠔油
糖
麵豉
磨豉將
鎮江醋
麻油

- 冬菇洗乾淨，用清水浸發，之後去蒂；菜甫洗淨，用清水浸 15 分鐘後瀝乾水
  份。

- 西芹同豆腐乾洗乾淨；青椒去蒂後洗；除九層塔同花生外，將所有材料切粒。

- 燒熱油，爆香薑茸，加入冬菇、菜甫、青椒爆炒。

- 之後落豆腐乾同西芹同炒，加入適量調味料，兜勻。

- 加少少水，不斷兜炒至乾身後，加入九層塔炒幾吓。

- 灑上麻油，兜勻後即刻熄火，加埋花生兜勻即可上碟。

每次炒嚫粒粒，每樣材料都只係買少少，到最後都煮出一大碟！

 

味道真係唔錯，坦白講，如果唔話你知都真係無留意呢碟係齋！

 

Notes：
- 唔係食齋的話，可以喺爆炒材料時灒酒，增加香氣，亦可加入肉粒同炒。

- 由於素蠔油、麵豉同磨豉醬都偏鹹，所以試味後適量加糖。

- 九層塔切勿炒得太耐，否則香氣消失。

 

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

湯種白麵包多士 White Toast (Water Roux Method)

        今日又整白麵包多士喇，不過今次唔係用 17 小時中種，而係試吓用湯種整，睇吓成品係咪真係更加濕潤同軟熟。

        其實今次都唔係第一次用湯種整包，上次喺 Louisa 屋企整嗰個合桃無花果裸麥包都係用湯種整，不過嗰次只係喺網上抄底 blogger 個食譜跟住做，所以個湯種做得好馬虎，今次我專登喺圖書館度借咗本《65 °C湯種麵包》返嚟跟住做，效果果然好好多，起碼清楚知道湯種要煮到點樣先叫做 OK！

湯種

材料：
高筋麵粉      20 克
水                  100 毫升

- 先將水倒入小煲內，再加入高麵粉，用打蛋器拌勻。

- 用慢火加熱，邊煮邊用打蛋器攪拌。

- 當加熱到 65 °C 時就可以離火，麵糊變得濃稠兼攪拌時留有紋路。

- 煮好湯種後冚好煲蓋，攤凍備用。

主麵糰

材料：
高筋麵粉      238 克
糖                  20 克
鹽                  4 克
即用酵母      5 克
水                  約 100 毫升
湯種              78 克
橄欖油          10 克

- 除橄欖油外，將所有材料放入食物處理器內，之後逐少加水搓成麵糰。

- 加入橄欖油，繼續開機搓成有彈性嘅麵糰。

- 拎出麵糰，用手搓揉、摔打成光滑麵糰。

- 將麵糰放入已灑粉嘅兜內，冚好保鮮紙，發酵 45 分鐘。

- 拎出麵糰，排氣，平均分割成 4 份後再次滾圓，鬆弛 15 分鐘。

- 麵糰再次排氣，然後先由上方向下摺入1/3，再將下方向上摺入1/3。

- 之後將麵糰反轉，用擀麵棍將麵糰擀薄，其闊度應與吐司模闊度相若。

- 將擀薄麵糰捲起，捏緊收口，放入吐司模內，其餘 3 個麵糰同樣處理。

- 吐司模包好保鮮紙作最後發酵，時間為 45 - 60 分鐘。

- 將吐司模放入已預熱至 200 °C 嘅焗爐內焗約 30 分鐘。

- 出爐後將麵糰放上架上攤凍即成。

食譜出自 Yvonne C. 嘅《65 °C湯種麵包》。

食譜寫住材料份量可做 24 兩吐司 1 條，我自己就只係做咗一半份量，
但就唔係好適合用一般 450 克吐司模做，成品矮好多。

 

包肉真係好軟熟，老竇就讚佢包肉鬆軟但就外皮煙韌，好欣賞呢！

 

Notes：
- 原食譜用料為牛奶 100 毫升及固體菜油 20 克，額外材料：奶粉 8 克。

- 由於煮湯種時會蒸發部份水份，所以湯種材料份量要比主麵糰中湯種實際所需份
  量預多少少，煮好之後再加入適合份量入主麵糰。

- 煮湯種時必須邊煮邊攪拌，以防煮燶黐底。

- 若想煮好湯種快啲冷卻的話，可將小煲座凍水降溫。

 

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！