Kestrel's Blog

2011年6月19日星期日

芥末薯蓉雞肉包 Mustard Mashed Potato & Chicken Bread

我間中都會買「Panash」嘅薯仔脆法包，因為香口之餘，又有法包嘅煙韌口感。早前搵麵包食譜時，發覺原來自己都有一個類似嘅食譜，今日我就參考咗嗰個食譜，改一改材料兼加以變化，就整咗呢個芥末薯蓉雞肉包喇！

2011年6月15日星期三

六月阿茂聚會

幾個阿茂噚日又試約埋一齊整餅喇！

上個禮拜二家姐整過一次四川担担麵俾我哋食，真係食過番尋味，
Winnie 聽見都流哂口水，所以噚日 lunch 就整多次俾佢試吓！

煮好麵，加入担担麵醬同其他材料，一撈就食得。

明仔 request 要整嘅 doughnut，炸好之後就即刻蘸上肉桂糖，
熱辣辣即食，勁好味，又唔會好似街賣果啲咁油，正！

Louisa 負責炸，對佢嚟講簡直係手板眼見功夫啦！

呢串貌似炸魚蛋嘅物體，其實係將 doughnut 麵糰中間 "吸"
出嚟嘅小麵糰炸埋，之後串埋一串。

晚飯時間到喇，呢煲係 Louisa 整嘅香濃南瓜湯，非常清甜。

爽脆沙律菜。

估唔到 Louisa 勁鍾意食無錫排骨，噚晚都有整，不過就交哂俾
工人 Jovy 負責，咁就弊喇，唔單只煮燶咗，仲鹹到唔食得！！
學 Winnie 話齋，真係唔可以假手於人呀，唉！

呢煲係海鮮 risotto，原本都係 Louisa 負責煮，但係佢噚日實在太攰，
加上非常腳痛，唔可以再企落去，所以就由我接手去煮，
好彩味道都唔差啫！

煙肉薯蓉。

呢個就係我無份整嘅 rapsberry mousse cake，顏色真係好靚，
不過食味太酸，只有酸精 Winnie 鍾意食！

切件後更加吸引人呢！

2011年6月14日星期二

鄭慧鋼琴藝術中心新張誌慶

上星期五係 Miss Cheng 間音樂中心正式開張，依家就同大家分享一吓當日嘅盛況。

一出 (車立) 就見到中心嘅 logo。

放喺中心門外多個嘉賓送嚟嘅花籃。

Reception 位置。

小型演奏廳。

小組課程教室。

多功能琴房。

斥資做好隔音設備嘅考試琴房。

考試琴房內專用的 Steinway & Sons 三角琴，無論音色或 touching
都相當理想，令考生能夠發揮最佳表現。

音樂總監的 poster。

以及過往音樂會的 poster。

剪綵用較剪、花球，以及嘉賓襟花。

身為音樂總監嘅 Dr. Cheng，當然要影番張相啦！

我就梗要同主人家影相留念啦！

Miss Cheng 當日開心到心花怒放！

嘉賓陸續到場，有著名二胡演奏家辛小玲老師及
著名古箏演奏家許菱子教授。

其他嘉賓仲包括作曲家許翔威先生、女高音嚴偉小姐及男高音黃華豐先生。

Miss Cheng 同高生兩位主人家剪綵。

剪完綵就切燒豬喇！

睇吓 Miss Cheng 幾開心！

大家互相祝酒。

喺呢個咁重要嘅日子，我同 Winnie 當然要親自整番個蛋糕送俾
Miss 做賀禮啦，佢負責整咖啡雪芳蛋糕同抹 cream，
我就負責整脆焦糖同朱古力牌。

我當然唔會淨係整咁少嘢啦，我仲整多個 brownie o添！好彩師弟
Tony 有幫我個蛋糕影相，嗰日我都忙到唔記得咗呢！

切蛋糕喇！

Miss 專登叫我同 Winnie 一齊影張切蛋糕照。

同埋成班師弟妹一齊大合照，大家都非常開心呀！

2011年6月11日星期六

雜莓鬆餅 Mixed Berries Muffin

冰格原來儲咗幾盒唔同款式嘅莓類水果，係時候要將佢哋清一清先得喇！有咁多唔同種類嘅莓，最好就係用嚟整仙姐個雜莓鬆餅啦！

材料：
牛油             100 克
糖                  70克
蜜糖              60 克
雞蛋              2 隻
乳酪              80 克
低筋麵粉      220 克
泡打粉          3 克
梳打粉          2 克
鹽                  1 克
雜莓              適量

- 雜莓洗乾淨，用抹手紙索乾水份，放上冰格雪硬。

- 所有粉類加鹽混合好，過篩 3 次；牛油室溫放軟。

- 牛油加糖，用電動打蛋器打至發白，之後加入乳酪、蜜糖同雞蛋以低速拌勻。

- 篩入粉類，快手拌勻成麵糊。

- 將已雪硬嘅雜莓直接加入麵糊內，用膠刮輕手拌勻即可。

- 將麵糊倒入紙模內，放入已預熱至 180 °C 嘅焗爐內焗約 20 分鐘至表面金黃即可。

以上材料份量可做鬆餅 12 個。

食譜出自獨角仙@藍色大門嘅 Mixed Berries Muffin。

我用咗藍莓、紅莓、黑莓同草莓嚟整呢個 muffin，
淨係顏色同賣相都已經夠哂吸引啦！

味道酸酸哋，又唔會太甜，加咗乳酪整嘅 muffin 非常軟熟，
不過我都係比較鍾意較乾身，質地較碎嘅口感。

Notes：
- 雪硬嘅莓類可以防止於麵糊內下沉，入爐焗時亦無咁易因高溫而爆破。

- 較大嘅莓類如士多啤梨，可事先切細。

- 原食譜係用低筋麵粉 130 克及高筋麵粉 90 克。

你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

2011年6月9日星期四

蘋果雪耳花旗參煲瘦肉湯

世事往往就係咁巧合！

初一嗰日換咗啲新鮮生果，諗住將啲換落嚟嘅蘋果用咗嚟煲湯，點知幾日後就收到 she.com 嘅 e-mail，嚟緊新一期嘅 she tastes feature 係「清新夏日水果食譜」，咁就真係啱啱遇著剛剛，唔駛咁傷腦筋啦！

材料：
蘋果
雪耳
瘦肉
蜜棗
花旗參
冬菇蒂

- 蘋果去皮、去芯，之後切件；雪耳剪去底部硬蒂，洗淨後汆水，過冷河備用。

- 瘦肉洗淨，汆水後沖凍水；蜜棗洗淨；冬菇蒂用清水浸軟後切細。

- 除花旗參外，所有材料凍水落煲，煲滾後轉細火繼續煲。

- 花旗參略沖洗，湯煲好前 10 分鐘落煲，滾至出味即可熄火。

- 飲用前下鹽調味。

夏天天氣悶熱，飲呢個比較清潤嘅湯水就最啱不過

Notes：
- 除瘦肉外，亦可用豬腱代替。

- 花旗參毋須煲得太耐，否則會失去其獨特香味。

- 浸發冬菇時，不妨將剪出嚟嘅冬菇蒂留起煲湯，令到湯水更加清香。冬菇蒂係調
製素上湯嘅必要材料。

你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

2011年6月6日星期一

香蕉朱古力蛋糕 Banana Chocolate Cake

心水清嘅朋友都應該會留意到，我用嘅食譜大多數都係喺圖書館借番嚟嘅，因為好多時一本食譜其實只係想要當中嘅某幾個，我係絕對唔會為某幾個食譜而買成本返嚟，最重要係，屋企根本唔會有咁多地方擺書，如果真係本本都買的話，我諗我真係要去租個迷你倉先掂囉！

所以，如果我都買得嘅食譜，一定係有九成我都好鍾意或者好想整，《香港人氣甜品》就係少數我會買嘅食譜之一，因為裡面個個食譜都好正，而且跟佢整過好多個甜品都必定成功兼好食，對佢比較有信心，所以我跟呢本食譜整得最多。噚日我就跟佢整咗個香蕉朱古力蛋糕。

朱古力蛋糕

材料：
低筋麵粉      110 克
梳打粉          1/2 茶匙
可可粉          2 湯匙
牛油              100 克
糖                  90 克
水                  80 毫升
雞蛋              3 隻
朱古力          80 克

- 麵粉與梳打粉、可可粉分別過篩；牛油室溫放軟；朱古力座熱水溶化。

- 牛油加糖用電動打蛋器打至發白，之後加入朱古力粉拌勻。

- 雞蛋逐隻加入攪拌，加一半粉料入內拌勻，再拌入一半水。

- 將剩低嘅粉料同水分別拌入，最後加入朱古力拌勻。

- 將麵糊倒入已墊入爐紙嘅模內，放入已預熱至 170 °C 嘅焗爐內焗約 40 分鐘。

- 出爐後放上架上放涼，待用。

香蕉餡

材料：
香蕉              4 隻 ( 約 600 克 )
檸檬汁          30 毫升
檸檬皮茸      少許
牛油              100 克
糖                  90 克
魚膠片          3 克
冧酒             10 毫升

- 香蕉切片後加檸檬汁及檸檬皮茸拌勻；魚膠片用凍水浸軟。

- 牛油放煲內煮溶，之後加入香蕉片，用中慢火煮約 8 分鐘。

- 加糖，攪拌均勻並呈半透明狀態時倒入冧酒，離火後放入魚膠片拌勻。

- 原煲放涼備用。

朱古力忌廉

材料：
淡忌廉          220 克
朱古力          60 克
水                15 毫升

- 水加熱，放朱古力入內攪拌至完全溶化。

- 淡忌廉用電動打蛋器打至企身，再拌入朱古力溶液，攪拌均勻。

- 將朱古力忌廉放入雪櫃內保存待用。

朱古力淋漿

材料：
淡忌廉          150 克
朱古力          125 克
牛油              15 克
蜜糖              2 茶匙

- 淡忌廉加熱，加入朱古力及牛油拌勻。

- 拌入蜜糖後攤凍備用。

組合

- 將蛋糕平均切成三片，將其中一片抹上朱古力忌廉，再放上半份香蕉餡。

- 放上第二片蛋糕，同樣抹上朱古力忌廉及剩餘香蕉餡，再放上最後一片蛋糕。

- 將剩餘嘅朱古力忌廉抹勻整個蛋糕，之後放入雪櫃內雪 30 分鐘。

- 蛋糕雪凍定形後，將朱古力淋漿淋上蛋糕面，之後放番入雪櫃內雪至凝固即成。

以上材料份量可做直徑 8 吋蛋糕一個。

食譜出自鄭慧芳、胡玉玲編著嘅《香港人氣甜品》。

之前整蛋糕同香蕉餡時已經用清哂啲牛油，到最後整朱古力淋漿時
就無得用，諗住用橄欖油代替都得啩，因為用量
只係好少，點知原來真係唔得 o架，攪到啲油
同朱古力溝唔埋，真係功虧一簣！！

呢個 A 貨 Awfully Banana Chocolate Cake 個賣相雖然樣衰咗啲，
但係味道就好接近，唯一唔同嘅，應該係
用咗唔同牌子嘅朱古力。

Notes：
- 食譜中嘅水，於原食譜為牛奶；檸檬皮茸只係我自己加入。

- 我今次用咗半份材料做出一個直徑 5 吋半嘅蛋糕。

- 如果想煮熱嘅材料快啲攤凍，可以座凍水加快冷卻。

- 由於熱氣比較熱，淡忌廉最好座冰水打發，會比較容易打至企身。

你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

2011年6月2日星期四

素薑醋

早幾個月，翻睇番香港電台電視節目《味之天下》，其中一集叫做《「素」造新生活》，係講關於素食，裡面提及到有齋薑醋呢樣嘢，我即時雙眼發光，因為我其實都鍾意食薑醋，特別係雞蛋，覺得好好味，但係一諗到要處理豬手或者豬腳，就真係無乜興趣去整，但 Louisa 話過唔落豬手或者豬腳，會唔好味，所以一直都無諗住整，依家知道有齋薑醋呢樣嘢，咁就唔同講法喇！節目裡頭講嘅齋薑醋係用番薯、麵筋、薑同花生一齊整嘅。

而咁啱係一個多月前，正當我上網想搵多啲煮齋薑醋嘅資料時，又俾我發現多一樣嘢，原來有好多人都會用鹹蛋嚟煲薑醋，話好食過用雞蛋整，就連已故食家梁玳寧對鹹蛋薑醋都讚不絕口。喺好奇心驅使下，我即刻郁手浸鹹蛋，咁一個月後嘅今日就可以試到鹹蛋薑醋喇！