三絲拌麵

        呢排整嘅嘢多數都係為咗清倉而整，因為雪櫃放咗好多好多嘢，勁爆棚！剩係冰皮月餅都霸咗冰格同下格呀！

        今晚就清埋樽擔擔麵醬，用佢嚟整三絲拌麵。

三絲包括青瓜絲、火腿絲同雞蛋絲。

 

麵條今次用咗新鮮上海麵。

 

仲有我嘅至愛 — 番薯湯水。

 

        拌麵醬做法，請參考《四川擔擔麵》。

清貨版西米布甸

        呢個飯後甜品真係超快手做起，皆因只係用之前整冰皮月餅時用剩嘅奶皇餡嚟做，只需加少適量水落奶皇餡度，攪拌均勻後，用慢火煮開，再拌入已預先煮好嘅西米，兜勻後即可勺入焗盅內，放入焗爐焗到表面金黃就攪掂喇！

味道同一般西米布甸無異。之可以咁快手就有布甸食，真係要多謝
Winnie 幫我煮呢個無牛油、無奶嘅奶皇餡呀！

 

唔知點解焗極都唔係好上色呢？已經係用 200 °C grill 焗成廿幾分鐘 o架喇！
原本諗住放棄，用火槍燒吓佢算數，點知醒起枝火槍借咗俾
Winnie，所以都係無得用！

        如果無用剩嘅奶皇餡，咁咪整唔到呢個西米布甸？唔駛驚，快啲 click 入《焗紅豆西米布甸》，睇吓個原裝食譜材料同做法啦！

香蔥豆渣煎魚柳

        呢排真係忙到飛起，個人攰到呢 ……… 今朝一早九點半已經要同 Lily 上堂，之後原本要去 Miss Cheng 到教阿 Bill 樂理，後尾 Miss 打電話俾我，話阿 Bill 同阿爸一齊去行山，樂理功課又未做哂，叫我唔駛過去喇，咁教完 Lily 之後，諗住瞓番半粒鐘至九個字先再繼續做嘢，校定好鬧鐘起身，點知瞓到都唔願起身，一瞓就由 12:00 pm 瞓到下晝 4:00 pm 先起身，連晏都唔駛食，可想而知，你話我攰到點呢！！

        講番今晚個餸先，呢次又係清貨之作，前兩個星期整完豆漿之後，盒豆渣都幾乎未郁過，咁今晚就試新嘢，用佢嚟當做豆酥咁用，炒好之後灑上魚柳上面，賣相同食味都幾好。

材料：
急凍魚柳
豆渣
蔥花

醃料：
鹽
胡椒粉
雞粉

調味料：
蠔油

- 魚柳解凍後洗乾淨，用抹手紙索乾水份，之後用醃料醃好。

- 燒熱油，放魚柳落鑊，將兩面煎香，盛起備用。

- 原鑊加入豆渣，炒熱後加蠔油及小量水，用慢火炒至乾身。

- 當豆渣炒至乾身鬆散之後，加入蔥花，兜炒幾下就可以勺起放上魚柳面。

你哋話個賣相似乜呢？我覺得呢個係健康版嘅 "避風塘"
煎魚柳。老竇話將豆渣咁樣整又幾香口喎！

 

因為懶洗多隻鑊，所以無用易潔鑊煎魚，咁啲魚當然就煎到甩皮甩骨啦！
原本都無諗住掟上嚟 o架喇，點知放上豆渣之後，遮醜功力奇高，
咁就即刻回心轉意又再寫番 blog 喇！

Notes：
- 豆渣可以喺大型日式超市搵到。

- 如果有自製豆漿的話，可以將豆渣留起，處理方法請參考《豆渣處理及保存方法》。

- 炒乾豆渣時一定要用慢火炒，否則好易黐底。

 

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

素薑醋第二擊

        又整素薑醋喇，今次真係有加埋番薯一齊整，味道果然唔錯喎！

橙香杏仁磅蛋糕 Orange & Almond Pound Cake

        呢幾日真係好鬼死忙，又要教琴，又要準備材料同 Winnie 一齊整冰皮月餅，幾乎日日都由朝到晚做到無停手，一早起身就係咁做係咁做，連上網都無時間！

        今日都唔例外，起身後就已經洗梳化套、琴套，食咗幾個字早餐就即刻郁手做清潔，一做就做咗兩粒幾鐘。之後都無得停，繼續煲湯，整好哂之後嗱嗱聲食個包，跟住就即刻出門口去教琴，教完返嚟坐都無得坐，又要即刻洗米煮飯，趁浸緊米、煲番熱啲湯時就快快手整咗呢個磅蛋糕喇！

材料：
牛油              100 克
糖                  80 克
雞蛋              2 隻
橙皮茸          1 個橙份量
低筋麵粉      100 克
泡打粉          1 茶匙
杏仁粉          25 克
杏仁片          適量

- 牛油預先室溫放軟；雞蛋拂打成蛋液；粉類過篩 3 次；蛋糕模內墊牛油紙。

- 牛油、糖同橙皮茸放入兜內，用打蛋器打至鬆軟發白。

- 蛋液分 4 - 5 次加入牛油霜內，用打蛋器均勻混合。

- 粉類分 3 次篩入，用打蛋器拌勻至無粉粒為止。

- 將麵糊倒入模內，喺麵糊表面灑上杏仁片。

- 放入已預熱至 170 °C 嘅焗爐內，先焗 10 分鐘。

- 拎出蛋糕模，用刀喺麵糊表面割開一條約半吋深直紋。

- 之後放番入爐內焗多 25 分鐘至熟。

以上材料份量可做 18 cm X 9 cm X 7 cm 長方形蛋糕一個。

明明中段有時間休息，點解都仲要咁辛苦整蛋糕呢？皆因學生 Michelle
即將要去英國讀書，咁咪趁聽日同佢上堂時就拎去送俾佢，
當係中秋節拌手禮之餘，亦為佢出國讀書打打氣！

 

咁啱上一堂同佢傾開偈，知佢鍾意食牛油蛋糕，咁我咪迎合佢口味，
整磅蛋糕送俾佢囉！喺度祝佢學有所成啦！

 

Notes：
- 蛋液必須分多次拌入牛油霜內，否則容易油水分離，完全無法混合。

- 做杏仁蛋糕時，杏仁粉份量最理想就係相等於 1/4 份麵粉嘅份量。

- 想橙味更加香濃的話，可於麵糊內加入適量橙酒。

 

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

巴東雞球

        原來媽咪以前影印咗一份食譜，成份食譜都係教煮東南亞菜式，睇見個個餸都想試吓煮，真係唔知揀邊款好！突然見到有巴東牛肉個食譜，第一時間即刻諗起上次農曆年喺 Louisa 屋企團拜時，佢哋個個都讚個巴東牛肉好食，我自己當然就無食到啦，唔知有幾好味，咁不如就自己用雞肉煮一次試吓味道啦！

材料：
急凍雞扒      2 塊
椰漿              1 杯

醃料：
鹽
糖
生抽
胡椒粉
紹酒

醬料：
紅辣椒          約 10 隻
乾蔥頭           55 克  
蒜頭               38 克
南薑              1 湯匙
蝦膏              3/4 茶匙

調味料：
芫荽粉          1 茶匙
小茴粉          3/4 茶匙
胡椒粉          少許
糖                  3/4 茶匙
鹽                  1 茶匙

- 雞扒解凍、洗淨，然後切件，用醃料醃好。

- 紅辣椒洗淨去蒂；乾蔥頭同蒜頭去衣；南薑洗淨刮皮。

- 將所有醬料材料一齊切碎，之後用石樁樁幼，拌至糊狀。

- 燒熱油，將雞肉放鑊內略煎，盛起備用。

- 加 3 湯匙油，用慢火爆香醬料，將雞肉回鑊兜炒。

- 加入調味料兜勻後，倒 1/2 杯椰漿入鑊，煮至汁將近乾。

- 再倒入椰漿及水各 1/2 杯，用慢火煮至收汁即成。

呢個石樁係老竇喺大陸買返嚟嘅，本來都叫咗佢唔好買，咁鬼死重，都好少
機會用到，用攪拌機快手好多。點知有一日佢同我講話實在好平，
所以都係買咗返嚟！ 呢個小型石樁盛惠 $8 人仔，抵玩嗎？

 

呢個巴東汁味道其實有啲似紅咖喱，材料都差唔多，
不過就要煮到收乾汁為止，同煮咖喱唔同。

 

煮呢個巴東菜式有樣好，就係煮到收乾汁後，啲油完全留番哂喺個煲度，
咁就唔駛怕食哂啲油落肚啦！

 

Notes：
- 紅辣椒用量可依個人口味增減。

- 小茴粉即孜然粉。

- 無石樁的話，可用攪拌機攪打至幼細。

- 食譜內提到一個秘技，當煮巴東牛肉或咖喱菜式時，萬一汁料過多，味道偏淡時，
  不宜用大火將汁煮乾，因為容易煮燶及黐底，此時，最好加入適量椰子粉煮一陣，
  汁料就可以收乾，保持原味嘅同時又唔會煮燶。

- 椰子粉可買現成無糖椰子粉，又或者可以自製，方法係將椰絲用白鑊慢火炒至香脆
  ，之後放入攪拌機內磨成粉即成。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

香橙雪芳蛋糕 Orange Chiffon Cake

        又係清蛋白、整雪芳嘅時間喇！今次專登為 Bill 整咗個香橙雪芳蛋糕，因為之前我問過佢有咩鍾意食，佢就話鍾意食橙囉，咁所以我就試吓整呢個雪芳蛋糕，星期五同佢上堂時就帶埋過去俾佢。

海鮮柚子沙律

        原來入夏咁耐，今次先第一次同大家分享冷盤涼菜食譜！

        今晚呢個沙律又係清存貨嘅製作，用埋放喺冰格啲蜆肉；清埋之前整四川擔擔麵時買落嘅乾蔥頭同磨碎花生；仲有放咗喺雪櫃 N 年嘅青檸！

材料：
魷魚
急凍帶子
急凍蜆肉
泰國金柚
乾蔥頭
紅辣椒
金不換
炒香花生碎

醃料：
鹽
紹酒
胡椒粉

沙律汁：
青檸
魚露
糖

- 魷魚清除內臟及軟骨，撕去表面紫色薄膜，洗乾淨後切圈。

- 帶子、蜆肉解凍後洗乾淨，略為搾乾水份。

- 用醃料將魷魚、帶子同蜆肉醃 15 分鐘，之後分別放滾水內灼熟，盛起瀝乾水份。

- 金柚去皮後拆肉，撕碎成細粒；乾蔥頭去頭尾、去衣，切圈後用凍滾水浸 10 分
  鐘。

- 紅辣椒洗淨後切粒；金不換洗淨後取葉部份。

- 青檸搾汁，加入糖同魚露拌成沙律汁。

- 將所有材料放入大碗內混合，拌入沙律汁即成。

- 食嘅時候再灑上花生碎。

柚子非常清甜又多汁，味道層次豐富，酸、甜、苦、辣、鹹共冶一爐。

 

 

難得 "無牙" 嘅老竇都讚魷魚好腍，夠鮮味，好好食，梗係啦，放落滾水，
一見佢鬈起就立即撈起，前後都唔知有冇一分鐘！
 

Notes：
- 醃海鮮料時只需輕輕落少少鹽，因為海產本身已經有一定鹹味。

- 灼熟海鮮料時無需太長時間，約 1 - 2 分鐘即可，太耐會變得韌之餘，味道亦會全部
  溶於水內。

- 乾蔥頭用凍滾水浸過後可減低辛辣味道。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

鍋貼

        繼續清冰格行動，用埋之前包餃子時剩低嘅水餃皮，今次試吓整鍋貼，睇吓效果如何先！

材料：
免治豬肉
娃娃菜
薑蓉
蔥花
水餃皮

醃料：
鹽
糖
生抽
紹酒
麻油

- 豬肉先用醃料醃好；菜洗乾淨，切碎，之後加少少鹽拌勻，靜置 20 分鐘。

- 將菜粒過水，洗去多餘鹽份後，用手搾乾水份。

- 菜粒、薑蓉同蔥花加入豬肉內，拌勻成餡料。

- 將餡料放上水餃皮，包好後放喺已灑粉嘅碟上，備用。

- 燒熱油，將餃子逐隻放入平底鑊內煎 2 分鐘。

- 之後加入水及少量白醋至餃子 1/3 高度，冚好蓋，用中慢火煮 5 分鐘。

- 打開鑊蓋，繼續煮至水乾為至。

- 當所有水份都蒸發後，乾煎至底部金黃即可。

估唔到第一次煎鍋貼都唔錯喎！

 

你睇，鍋貼個底煎到幾金黃，好香脆 o架！

 

今晚做北方人，除咗煎鍋貼，仲整咗粢飯同豆漿，全部都係自家出品哦！

Notes：
- 菜粒加入鹽可將水份逼出，以免因滲水而令水餃皮濕透。

- 煮餃時加少量白醋，可以令煎好嘅鍋貼皮更加香脆。

- 乾煎鍋貼時切勿用大火，避免煎燶。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

杏仁豆漿雪芳蛋糕 Almond & Soya Milk Chiffon Cake

        嚟緊個冰格會放好多嘢，迫爆咁滯，所以呢幾日已經開始清存貨，今日就清蛋白。

        如果有蛋白剩的話，我自己就鍾意要嚟整雪芳蛋糕，因為蛋白嘅用量係比蛋黃多，用剩出嚟嘅蛋白整的話，咁就唔駛有蛋黃多出嚟，超方便哦！