每年佛誕都必定會去浴佛，但係見噚日咁鬼大雨，諗住今日都唔出街喇，喺屋企自己做早課算數，所以就 plan 咗今日整包。點知無落雨不特只，搓搓吓麵糰時仲勁猛太陽 o添，咁整得包就行唔開 o架啦，激死！見咁好太陽，之前又落咗咁多日雨，唔好嘥咗啲陽光，即刻開機洗床單，咁都無嘥咗我匿喺屋企唔出街。
整完豆漿就自然有大量黃豆渣剩低 o架啦！今日就用佢嚟整麵包，即刻清咗唔少豆渣呀！ 
材料：
高筋麵粉 238 克
豆渣 80 克
糖 20 克
鹽 4 克
即用酵母 5 克
湯種 78 克
水 約 100 毫升
橄欖油 10 克
- 除橄欖油外，所有材料放入食物處理器內攪拌成麵糰，之後加入橄欖油搓勻。
- 拎出麵糰，放上已灑粉嘅枱上，繼續搓揉及摔打成光滑麵糰。
- 將麵糰滾圓，放入已灑粉嘅兜內，用保鮮紙包好，發酵 45 分鐘。
- 將麵糰排氣，平均分割成 3 份後再次滾圓，鬆弛 15 分鐘。
- 再次排氣，之後將麵糰分別捲起，放入多士模內，發酵至多士模嘅九成滿。
- 放入已預熱至 170 °C 嘅焗爐內焗 40 分鐘。
- 出爐後立即脫模並移到架上放涼。
以上材料份量可做 450 克多士一條。
都唔知點解，每次發酵到一個鐘後，個麵糰就好似點咗穴咁，郁都唔郁，
再發多半個鐘個 size 都無乜點變，所以要整到頂角方包都真係幾難！
個包矮就矮咗啲，不過都焗得幾靚 o架！
包質非常好，老竇話個包煙煙韌韌，有少少彈牙 feel，
呢個正正就係湯種嘅特色。
Notes：
- 豆渣可用現成品，亦可用自製豆漿後剩低嘅豆渣，但必須要預先煮熟，詳細資料請參考
《豆渣處理及保存方法》。
- 請參照湯種白麵包多士製作湯種。
- 由於加入豆渣之後麵糰會變得較濕，所以要視乎實際情況調節水及油用量，而且搓麵糰時要
不時加入適量手粉，以免過於黏手。
- 麵糰捲起做形方法與白麵包多士做法大緻相同。
