無蛋朱古力粒香蕉鬆餅 No Egg Chocolate Chips Banana Muffin

早前喺網上睇到個網頁叫做 Eggless Cooking，換言之，即係裡面所有食譜全部都無用到雞蛋，咁當然唔係純粹唔加蛋就算啦，其實係同大家分享一些 egg substitution，即雞蛋代替品。

 

網頁裡面介紹咗好多唔同嘅替代食材，有啲聽都未聽過；有啲就估都估唔到可以咁用！其中一樣我最有興趣嘅就係亞麻籽粉，趁住聽日因為某些原因要食齋，今日就整定啲無蛋 muffin，順便可以做吓實驗，睇吓用亞麻籽粉代替雞蛋效果好唔好。

材料：
亞麻籽粉 1/2 湯匙
水 1 1/2 湯匙
低筋麵粉 125 克
梳打粉 1/2 茶匙
泡打粉 1/2 茶匙
鹽 1/4 茶匙

糖 50 克
橄欖油 40 克
乳酪 30 克
香蕉 2 隻
入爐朱古力粒 適量

- 亞麻籽粉與水混合；粉類過篩 3 次，備用。

- 將鹽、糖加入粉類內攪拌混合。

- 油及乳酪與亞麻籽粉混合、拌勻。

- 香蕉用叉壓爛成香蕉蓉，拌入濕料內。

- 將濕料倒入乾料內，快手攪拌均勻後再加入朱古力粒。

- 麵糊勺入紙模內，放入已預熱至 200 ℃ 嘅焗爐內，焗約 20 分鐘即成。

 

以上材料份量可做鬆餅 6 個。

亞麻籽粉之所以能夠代替雞蛋，係因為加水後會變得濃稠
且黏性增加，與雞蛋本身質地類似。

比起以往試過嘅無蛋鬆餅食譜，今次呢個用亞麻籽粉代替雞蛋嘅效果好得多，
同樣做到鬆軟 texture，質地唔會死死實，但當然，乳化效果始終唔及
雞蛋好，所以都會有少少濕黏口感，但已經好滿意喇！

Notes：
- 其他雞蛋替代食材，可到 Eggless Cooking 網頁睇睇。

-  1湯匙亞麻籽粉 + 3 湯匙水，攪拌後就可以代替 1 隻雞蛋份量。

- 食譜中嘅乳酪可用牛奶或豆漿代替，不過因為乳酪係酸性食材，有助於麵糊膨脹。

黑麥合桃包 Pain de Seigle aux Noix

近期少咗試新麵包食譜，就連整麵包都少咗，因為生活比較忙之餘，精神又唔係太好，個人好攰、好懶，一有時間就走去瞓覺，瞓得一粒鐘，甚至半個鐘都好，個人都真係會醒神番少少，你知啦，整包都真係長期作戰嘅，中途點可以走去瞓覺至得㗎！所以咪索性唔整囉，反正冷宮都儲落唔少麵包 “宮女”！！

 

噚日跟食譜整咗個類似鄉村包物體，材料簡單易做，而且又唔使落油，啱哂我！但係你哋唔好以為個包實唔好食喎，反而算係我做包咁耐以嚟最滿意的一個，無論 texture、味道、外形、以至製作過程都相當理想，平時我整多士麵包，發酵時間非常之長，根本無可能好似食譜咁講約一粒鐘就發酵至多士模 8 分滿，但今次每段發酵時間都跟食譜差唔多，真係好開心，唔知係因為天氣勁熱，酵母特別活躍呀，定係「藍帶」個譜靠得住喇！

材料：
合桃 50 克
法國麵包粉 150 克
裸麥粉 25 克
全麥粉 60 克
即用酵母 3 克
鹽 5 克
水 約 170 克
老麵 25 克

- 合桃洗淨後用抹手紙索乾水份，之後放人焗爐，用 140 ℃ 焗約 15 分鐘之香味出，之後切粒。

- 除合桃外，將所有材料放入食處理器內混合，逐少加水搓成麵糰。

- 將麵糰拎出，放上已灑粉嘅枱面，繼續搓揉及摔打成光滑麵糰，之後包入合桃粒。

- 將麵糰滾圓，放入已灑粉嘅兜內，用保鮮紙封好，發酵 45 – 60 分鐘。

- 麵糰排氣後分割成 2 份，其中一份重 320 克，分別滾圓，靜置鬆弛 15 分鐘。

- 將麵糰按扁、排氣，左右 1/3 份麵糰向內摺入，然後再對摺，將收口捏緊。

- 輕輕搓長麵糰，大的一個麵糰將兩端部份摺入，捏緊後再搓長到模嘅長度，然後放入模內。

- 細麵糰搓長後直接放於入爐防黏蓆上，發酵約 45 – 60 分鐘至兩倍大。

- 放入已預熱至 220 ℃ 嘅焗爐內，爐內放一杯水，焗約 35 – 40 分鐘即成。

- 出爐後立即移至架上攤凍。

以上材料份量可做 18厘米長多士 1 條及麵包 1個。

 

食譜出自法國藍帶廚藝學院嘅《法國麵包基礎篇》。

食譜原本份量係做到 3 條多士，但我就將份量減半，所以就多咗半份
麵糰出嚟，我就咁放盤上焗就算，反正都唔夠做一條多士。

因為加咗老麵去整，所以麵包質地比直接法軟熟，而且裸麥粉
又會令到麵糰增濕，所以成品個 texture 好理想，
加埋香脆合桃，味道鹹香，超正呀！

Notes：
- 老麵製作方法，請參考《燕麥包》及《不同種類酵母用量之調整》。

辣白菜 kimchi

既然都整開青瓜泡菜喇，咁無理由唔整經典辣白菜 kimchi 㗎，反正醃料都差唔多做法，跟手整多樣都唔太煩。

老表試過味後，話真係同平時食開嘅泡菜差唔多味，
證明真係要用韓國辣椒粉至得！

成日都話間屋西斜勁熱，但原來都有好處，發酵時間快好多，
幾粒鐘後已經醃好，出好多水呀！

Motonako A. 又預妳一份呀，不過妳唔好流口水流到屋企水浸喎！！

 

做法請參考《自家醃製韓式泡菜》。

洋蔥青瓜泡菜

 

唔單只日式芝麻醬已經用哂好耐，連 kimchi 都已經食完好耐，但一直都買唔到韓國辣椒粉，所以一路都無醃到。

 

平時喺荃灣「千色店」買開韓國食品嗰個 counter 長期都話未有貨返，都真係唔係路嘅，有乜理由成半年都未有貨㗎！Kimchi 係韓國人嘅 “命根” 咁滯，真係一日唔食過都唔安樂，又點會無辣椒粉出產至得㗎！！

 

一次同老表傾開偈，原來佢話佢間唔中就會去尖沙咀，咁我聽到之後就當然即刻食住上啦，搭佢去開尖沙咀就同我去 “韓國街” 度入貨，如果唔係咁，都唔知幾時先有得整囉！

材料：
溫室青瓜 約 5 條
粗鹽 1/4 杯
糯米粉 1/4 湯匙
水 1/4 杯
紫洋蔥 1 個
韓國辣椒粉 1/2 杯
魚露 約 1/4 杯
蒜頭 1/2 個
薑 1 小塊 (約 1 厘米厚)
梨 1/4 個
糖 1/2 湯匙
鹽 少許

 

- 青瓜洗淨後切去頭尾，之後開邊、去瓤，再切成粗條。

- 粗鹽同青瓜條一齊放入兜內，拌勻後醃約 30 分鐘至軟身。

- 小煲內加水及糯米粉，用中慢火煮至略稠身成糯米糊，攤凍備用。

- 青瓜醃好之後就過水數次，然後輕手略榨乾水份，再放架上瀝乾。

- 蒜頭去衣；薑刮皮，連同梨一齊放入攪拌機內，攪打成蓉，之後倒入糯米糊內。

- 辣椒粉、魚露、糖同鹽一齊加入糯米糊內，攪拌均勻成泡菜醃料。

- 洋蔥去衣，洗淨後切幼條。

- 青瓜與洋蔥一齊加入醃料內，拌勻所有材料，倒入容器內。

- 用保鮮紙將容器封口，冚好蓋，放喺陰涼地方，於室溫發酵 1 日。

- 發酵後放入雪櫃保存，2 – 3 日後即可食用。

 

食譜參考自《韓式泡菜》。

Lily 幫我買到辣椒粉之後，當然即刻開工醃泡菜啦！依家唔單只啲豉油標榜“頭抽”， 喺超市見到連泰國魚露都話 “頭抽”，見佢同另一隻常見牌子一樣價錢，咪買枝試吓囉！唔係講笑，真係鮮味好多，同平時食開嗰啲魚露完全唔同味，唔會好鹹之餘，亦無咗媽咪成日話嗰種 “悶” 嘅感覺。(唔好問我咩叫做 “悶” 呀，我唔識得講俾你哋聽，但我意會到媽咪所講嗰種味道。) 睇番個成份都只係得 anchovy、糖同鹽，無其他增味劑或添加劑，所以都應該真係因為取用第一浸最精華部份而製成先會咁好味。

用番韓國辣椒粉嚟醃泡菜，味道真係正宗好多，顏色靚好多呀！不過跟住個
食譜份量去落魚露就有啲鹹過頭，可能因為呢隻 “頭抽” 味道
太濃喇！Motonako A.，係咪見到都流哂口水呢！

Notes：
- 最好先試一試鹽醃青瓜及泡菜醃料嘅味道，再酌量增減魚露及鹽嘅用量。

- 用溫室青瓜做泡菜會比較理想，因為不單只瓤比較細，亦相對較少水份。

- 天氣熱時，於室溫發酵 1 日即可，但天氣凍就要 3 日。

簡簡單單又一餐

 

原本呢個係星期四 post 出嚟同大家分享我嘅 lunch，點知隻虎又唔知乜病，upload 完張相，發表時就硬係睇唔到，攪咗好耐都唔得，嘥哂啲時間，攪到連 lunch 都食到趕趕切，隻虎都唔知係咪食 X 大㗎，激死人呀！！

諗住噚晚 post 番啦，點知又上唔到網，個 Windows 話 check 到個 modem、router 或線路有問題，連唔到線，攪到成晚都上唔到網，依家開電腦又得喎，真係吹到 “啤” 一聲！

之前咪話棵羅馬生菜大到要分兩餐食嘅，星期四嗰日就用佢嚟做三文治。

 

喺冰格度解凍個燕麥包，焗番熱之後再夾入生菜同煙肉炒蛋，
一份簡單三文治加杯咖啡，食飽後就出門教琴喇！

超值沙律菜

之前喺電視度睇到肥媽介紹中環嘉咸街街市有檔專賣外國沙律菜嘅菜檔，價錢合理相宜，當時我已經好想即刻飛去睇睇，之後上網又成日見到啲人話去買沙律菜好抵，比起超市平好多，我越睇就越心思思想去，可惜自己住得遠，打埋東費都差唔多！

 

今日七‧一紅假，晨咁早七點鐘起身過銅鑼灣同跑馬地教琴，所以教完哂都仲係好早，卒之都有機會去嘉咸街 “朝聖” 喇！其實大部份人都係介紹「華記菜檔」，但我去到沿住嘉咸街一路向上行，其實都有好多檔買沙律菜，反而就見唔到「華記」，可能係因為依家「市建局」進行重建工程，地盤位正正就係之前「華記」，所以搵唔到，但我見到地盤對面有檔買嘅種類相對其他菜檔比較多，而且又見到網友相片中英文嘅價錢牌，我估應該係搬咗過去對面啩，就入去呢間買吧！

嘩嘩嘩，真係好平，平過超市好多，如果無老人癡呆的話，羅馬生菜
賣 $ 16 磅，而沙律菜就賣 $ 26 磅，我呢度買咗一大棵羅馬生菜
同 3 棵沙律菜，你哋估吓呢籃菜要幾錢？全部夾埋都係
$24 咋，係咪勁吸引呢？棵生菜仲大到
要分兩餐食呀！

我自己就整咗個 Italian dressing 嚟撈沙律，啲菜真係好正，又新鮮、又清甜呀！

今晚晚餐有雜菜沙律、香草煙三文魚伴牛油果、忌廉海鮮蘑菇湯加黑麥包，
甜品係麵包布甸，美中不足嘅係無親自煮湯，開罐罐頭湯算數，
因為個人好攰，唔想再攪咁多喇！雖然好求其又一餐，
但食得開心又滿足哦！

涼拌雞絲粉皮

星期五整日式芝麻醬時，留起咗部份焗香芝麻同花生嚟整涼菜。

 

呢個涼拌菜係參照 Jacky Yu 個口水雞食譜，再用自己嘅材料同做法整成。個涼拌醬汁真係唔講得笑，好似 Jacky Yu 咁講，整緊嗰陣時，聞到個味就已經狂口水分秘喇，哈哈！

材料：
雞扒
青瓜
粉皮
炒香花生
炒香芝麻

 

醃料：
鹽
紹酒
胡椒粉

 

涼拌汁料：

生抽 2 湯匙
鎮江醋 2 茶匙
紹酒 1 茶匙
白醋 少許
水 1 湯匙
糖 1/2湯匙
花椒粉 適量
薑蓉 適量
蒜蓉 適量
蔥花 適量

麻油 適量

辣椒油 適量

- 雞扒切去皮及多餘脂肪、洗淨，用醃料醃好，隔水蒸熟後切成粗絲。

- 青瓜洗乾淨，略刨皮及切去頭尾，開邊、去瓤，然後放入食物處理器內切片。

- 煲滾水，放入粉皮煮至透明，之後熄火，冚蓋焗至腍身，之後過冷河，瀝乾備用。

- 依序將粉皮、青瓜片及雞絲放入大碗內。

- 將涼拌汁料內全部材料拌勻，淋上材料上面，再灑上少量花生、芝麻及蔥花。

- 食時拌勻所有材料。

搭 Winnie 幫我買咗包水晶粉皮，望落真係好晶瑩通透，應該係外銷到日本賣。
但係我自己就覺得麻麻哋，因為口感太過煙韌有彈性，
都係鍾意食傳統粉皮多啲。

其實我係整嚟當做一味餸，但原來啲粉皮都幾飽肚，
單獨當成北方涼麵嚟食都得呀！

至愛芝麻醬

樽日式芝麻醬其實已經食哂好耐，但係一直都唔願郁手整，因為覺得洗芝麻同花生去衣好鬼死煩！

 

上次同 Li Kien 去探陳老師時，喺佢屋企食埋 lunch，其中有碟茄子 Li Kien 一食就話非常好食，但原來其實超簡單，工人只係將茄子蒸熟，之後再撈個日式芝麻醬就攪掂，食過之後，覺得又真係幾好味喎！於是就令到我 “的” 起心肝去整芝麻醬喇！

夏天有日式芝麻醬好方便，因為整好多涼拌菜式都可以用到佢。

今次好有心機同耐性咁去打芝麻同花生，你睇，真係完全打到變成糊狀呀！

哈哈，學識咗呢個懶人餸之後，放工返到屋企無乜時間煮餸的話，就靠佢喇！

食譜請閱《自家製日式芝麻醬》。

自家出品杏仁豆腐

鍾意食杏仁同豆腐嘅我，理應會鍾意食杏仁豆腐，呢個係理所當然㗎啦！但係偏偏我又好怕食，點解？因為喺街外食嗰啲真係太難食喇，味道假到呢 ……… 同細個嗰陣時食過又紅又綠嘅糖漬車厘子不相伯仲，一樣咁恐怖！！所以我一直都幾抗拒杏仁豆腐呢樣嘢！

 

依家自己稍為識整吓嘢食，不如又試吓自家製作杏仁豆腐呀！自家製作，真材實料，唔用香油，應該可以挽回我對佢嘅信心！

材料：
黃豆 80 克
南杏 80 克
北杏 10 克
水 500 毫升
糖   適量
魚膠粉 8 克

 

- 黃豆同南北杏洗淨，用清水浸過夜，第二日再過一次水。

- 將黃豆、南北杏放入攪拌機內，加水攪打成杏仁豆漿。

- 豆漿隔渣倒入煲內煮滾熟透。

- 加糖攪拌至完全溶解，熄火攤凍。

- 魚膠粉逐少加入 80 毫升豆漿內，攪拌均勻後座熱水至完全溶解。

- 將混合有魚膠溶液嘅豆漿倒回煲內，拌勻後即可倒入模內。

- 放入雪櫃雪凍至凝固即可。

 

以上材料份量可做 9 厘米 X 13 厘米 X 3 厘米杏仁豆腐 1 件。

雖然成功做到 “真” 嘅杏仁豆腐，但都係有點美中不足，因為我一向都會用番
啲豆渣，所以我唔敢落北杏一齊打，啲人成日話北杏有輕微毒素，
唔可以多食，所以我咪唔敢加埋一齊打囉！最終個杏仁豆腐
食落都有濃郁杏仁味，但杏仁嘅香味就差咁啲囉！

加埋西瓜、奇異果同熱帶雜果，就成為一款美味消暑甜品喇！

Notes：
- 如果想做到豆腐花嘅質感，魚膠粉用量可減至 5 – 6 克。

- 豆漿一定要徹底煮至熟透先可以飲用，詳見《自製豆漿煮法》。

- 魚膠粉必須逐少灑入液體內，不可將步驟倒轉，否則容易結粒。

碗碟瀝水架

做我呢行，成日都會穿房入舍，除咗會見到大廳同放鋼琴嘅地方之外，可以的話，好多時我都會𥄫吓人家個廚房。

發覺原來好多家庭都會用到碗碟瀝水架，因為我屋企一向都無用呢樣嘢，所以我亦唔知道點解要用，因為我哋習慣洗乾淨哂啲碗碟之後就即刻抹乾，放番入櫃，覺得如果洗淨哂又就咁放番喺個架度就鋪番哂塵，即係一樣唔乾淨！但最近發覺，原來佢對我嚟講都好有用！

依家啲毛巾都唔知做乜鬼，抹得一、兩隻碗碟就已經索滿哂水，一定要扭乾先可以再抹下一隻，以前都成日聽到媽咪投訴呢個情況，但因為當時只係間中幫吓手，唔覺情況咁惡劣，到依家自己一個人落手落腳去做就知道煩，煮一餐會用到幾多廚具碗碟至得㗎，真係扭毛巾都扭到暈，而且我又係要求塊布要好乾好乾先用，所以呢幾年間，不經不覺已經扭到兩隻手起哂繭，所以我就打算買個瀝水架返嚟，等啲碗碟廚具都 "擎" 水 "擎" 到七七八八先抹，睇吓會唔會好少少。

因為係第一次用，求其買個平平哋試吓用住先，睇吓效果好唔好，點知俾我
發現「AEON Living Plaza」有得買喎，我仲等到做九折先買，
只係 $10.8，真係抵玩！

初初見到左手咁樣，仲以為係起水泡，摸落去超硬，先知道原來係繭。

右手都唔好得去邊，依家仲厚到硬皮開始脫落呀！

俾著以前，要抹乾哂呢堆嘢，閒閒哋要扭十幾廿次毛巾先抹得乾哂，淨係抹隻鑊
都要扭幾次啦！依家好好多喇，扭幾次都已經攪掂，如果相對濕度低的話，
好多時擺一陣間都已經乾哂，根本唔使再抹就已經可以放入櫃喇！
希望可以緩和一下對手啦，再係咁扭落去，
份份鐘風濕關節炎㖭呀！