雪耳雪梨清補涼糖水

        早兩個禮拜睇到 blog 友 cici 用清補涼煲湯，提醒咗我好耐都無煲過，不過今晚我唔係用嚟煲湯，係煲糖水。

 

 

涼食韓國粉絲

        平時煮韓國粉絲我都係熱食，所有材料分別炒熟後就全部回鑊加調味兜炒，但依家天氣咁熱，真係做得少啲得少啲，盡快離開個熱廚房為上策，所以今次反而跟番韓國正宗做法，全部材料都唔回鑊加熱，就咁撈調味料就算，少啲功夫之餘又唔使食到個人咁熱。

 

 

清涼的一餐

        比起其他人，我都算唔係怕熱得好犀利嗰隻，但今年夏天真係好熱，幾乎日日都發出酷熱天氣警告，唔好話落一落街買餸，就連坐喺屋企乜都唔做，甚至飲杯水落肚都會出汗，真係每日都要沖兩、三次涼，難為嗰啲勁怕熱嘅人，都唔知佢哋點算！！

 

        一向都唔多好食凍嘢，今日出完街返到嚟食第二餐都要全部凍食呀！

 

 

素韓式炸醬麵

        真係好少可咁快又翻炒同一個菜式，皆因近排真係腦閉塞，唔係好有煮意，況且包韓國黑豆醬真係有排都用唔哂，咁啱早前要食齋，咪就整番個素食版囉！

 

 

咖啡西多

        早前睇到電視一個飲食節目介紹一間本地新開嘅創意甜品店，其中有樣食品叫做咖啡西多。傳統整西多都會用奶去開蛋漿，我自己因為唔飲奶，當然就會用小量水去開啦！呢間甜品店仲犀利，用咖啡去開蛋漿，等我又試吓先！。

 

 

黑椒醬炒露荀蘑菇鮮白合

        平時我都好少食露荀，一來因為價錢唔平啦，但主要都係食完之後 "交水費" 時會有好濃烈味道，喺番自己屋企都仲好啲，但如果係食完之後要去學生屋企上課的話就有點尷尬喇！

 

        近年街市有啲幼身露荀賣，價錢相對經濟，$12 一紮約有 8 – 10 條，見好耐無食過，又買嚟試吓先！

 

 

匯豐紀念鈔

        睇新聞見到首日喺香港同九龍會展大排長龍拎紀念鈔，真係嚇嚫我，好驚我都要咁輪隊！我被安排今日到大角咀匯豐中心領鈔，因為正正就喺 Charmaine 屋企隔離，所以之前已經約好今朝一早同佢上完堂我先行過去匯豐，但因為早咗成廿分鐘就到達大角咀，又唔敢太早上去佢屋企，於是就決定先行過去視察一下，睇吓條龍長到有幾恐怖！

 

        總站落車後已經見到有匯豐職員企喺中心入口攔途截劫，唔係領鈔嘅應該唔俾入，我問比預約時間早到可唔可以拎，佢哋話可以，再問清楚條龍有幾長，諗住如果真係要排好耐的話都係教完琴先返轉頭再拎，無謂阻住學生時間嘛，點知個職員同我講，查實係唔使排隊！嘩，咁正，即刻拎完走人！！首日啲人就日曬雨淋排幾粒鐘先拎到，我就可以舒舒服服涼住冷氣兼唔使排隊，前後幾分鐘就攪掂。教完琴去搭車時見到多咗好多人，仲有個警察喺度維持秩序㖭，我真係超好彩囉！！ 

 

 

Lunch Meeting

        講番禮拜五個 lunch meeting，我哋一行四人去咗灣仔「Cupping Room」食 lunch，咖啡同食物都唔錯，有賣相、有味道，但環境就唔多舒適，因為地方細人又多，lunch time 時坐滿人之後就非常之嘈，講嘢要好似嗌咁，聽嗰個就好似借咗聾耳陳隻耳咁！！

 

 

五香素粽

        一直都唔係好敢自己包粽，因為怕包得唔好，烚完之後會漏料，浪費一番心機。早前喺 Facebook 「素食青年」群組內見到有素友包素粽，包得好靚，於是就請教佢點樣包粽，呢位素友真係好好，不單只無私地分享製作心得，細心指導，仲不斷送上溫馨提示，人家咁有心，我都唔可以辜負佢嘅好意，所以今日終於的起心肝嘗試包粽。

 

        想學識自己包粽，最重要唔係為咗滿足自己口腹之慾，而係可以包素粽供佛；再者，八年前嘅端午節經歷咗我人生中最黑暗、最低潮的好一段時間，所以我都想藉住一隻素粽表達自己心意。八年前嘅今日，俾我體會到中國人憑傳統經驗累積總結出的一句說話：「過唔到大時大節！！」身邊亦有親友係喺大年初一及冬至前後離開的呢！

 

 

黑豆木耳木瓜湯

        今日喺街市買到兩個好靚仔嘅木瓜，菜檔阿姐就話今日木瓜賣得好平，賣 $5 斤，以近排價格以言係咪真係好平就唔知喇，因為好耐無買之餘，自從檔口變到迷你 size 之後就連價錢牌都無位擺，以前就算唔買某樣嘢，但見到個價錢牌都可以大約知道行程，依家就無呢支歌唱喇，而且有啲貨迫住要放喺佢哋檔口入面，要就嗌佢哋拎俾你，無得樣樣都落手落腳自己揀，更加唔好意思叫人家攞好多出嚟俾你揀啦！希望個街市快啲重建完成。

 

        我自己就好怕熟木瓜，唔知點解嗰覺得味道好難聞、好臭，聞到都即刻反胃兼作嘔，但問過好多人又話唔覺得，究竟係我嘅嗅覺有問題呀，定係其他人都同我一樣都聞到同一種味道，但就唔覺得係臭，情況就好似榴槤味咁樣，所以我一般都只會買青木瓜，好彩青木瓜煲湯都一樣咁甜。