香橙朱古力蛋糕 Cake chocolat à l'orange

 

之前整嘅糖漬橙皮其實係另有目的嘅，咪就係用嚟整呢個咁正嘅香橙朱古力蛋糕囉！

材料：
牛油   150 克

雞蛋   6 隻
低筋麵粉   65 克
可可粉     120 克
泡打粉     3.5 克
糖漬橙皮   120 克
朱古力     155 克
淡忌廉     120 克
糖     150 克
蜜糖   33 克

- 牛油同雞蛋於室溫放軟及回溫；粉類全部混合過篩 3 次。

- 橙皮切成長形粒狀；朱古力座熱水溶解；淡忌廉放入微波爐內加熱至 40 ℃ 左右。

- 用電動打蛋器將牛油打至鬆軟，之後加入糖，繼續打至發白成牛油霜。

- 拌入蜜糖，攪拌均勻後，將雞蛋逐隻加入攪拌，直至混合物變得柔滑。

- 加入朱古力，混合好後再倒入淡忌廉，攪拌均勻。

- 然後將粉類一次過倒入，快手將混合物攪拌成帶光澤嘅麵糊。

- 拌入橙皮後，將麵糊倒入已搽油及灑粉或已鋪牛油紙嘅蛋糕模內。

- 喺枱面輕敲焗模，排出麵糊內嘅空氣。

- 放入已預熱至 190 ℃ 嘅焗爐內，焗約 25 分鐘，之後打開爐門略為散熱。

- 調低爐溫至 170 ℃ 繼續焗多 25 – 30 分鐘至完全熟透。

- 出爐後立即將蛋糕脫模並移至架上攤凍。

 

以上材料份量可做8厘米X 18厘米 X 6厘米蛋糕 3 個。

 

食譜出自土屋公二嘅《巧克力專業師的巧克力》。

淨係望見蛋糕個顏色同聞到嘅香味，就已經知道朱古力味係幾咁香濃。

蛋糕非常鬆軟，而橙嘅香甜味同朱古力永遠都係咁夾！

Notes：
- 原食譜中糖嘅用量為215 克；蛋液 310 克。

- 糖漬橙皮做法，可參考《糖漬橙皮》或《糖漬橙皮 ( 簡易版 )》，亦可用現成品代替。

- 根據食譜，打發牛油霜時需將攪拌兜直接上火加熱至 28 ℃。

糖漬橙皮 Ecorce d'orange confite

        仲記得我有儲橙皮嘅習慣嗎？儲吓儲吓，不經不覺已經儲咗兩大袋喺冰格，霸咗冰格唔少空間，係時候要清一清佢至得喇！

韓國炒粉絲 Japchae (잡채)

        韓國炒粉絲都係我個 To Do List 內想煮嘅嘢，不過買包粉絲都要成二、三十蚊，所以一直都無起心去煮，咁啱上個月「永安」一年一度嘅 sale，韓國粉絲只賣 $18.9 一包，嘩，咁筍，唔買都對唔住自己啦，吓嘩！！

 

無花果葵花籽全麥包 Fig & Sunflower Seed Whole Wheat Bread

呢個包其實係無花果合桃包嘅變奏，將合桃改成葵花籽之餘，仲將部份麵粉改成全麥粉，做出嚟嘅包包同樣咁好食，葵花籽比合桃更加香口。

材料：
高筋麵粉  200 克
全麥粉     50 克
老麵   50 克
鹽      4.5 克
黃糖   20 克
即用酵母   2 克
水    約 160 毫升
橄欖油     10 克
葵花籽     30 克
無花果乾   50 克 

- 葵花籽放入已預熱至 140 °C 嘅焗爐內焗 15 分鐘至香味出；無花果乾切碎備用。

- 將粉類、、酵母、鹽同糖倒入食處理器內混合，逐少加水搓至起筋。

- 之後加油，開機繼續搓成麵糰。

- 將麵糰拎出，放上已灑粉嘅枱面，繼續搓揉及摔打成光滑麵糰。

- 將葵花籽及無花果乾包入麵糰內，將麵糰重覆摺疊直至餡料均勻分佈於麵糰。

- 將麵糰滾圓，放入已灑粉嘅兜內，用保鮮紙封好，發酵 60 分鐘。

- 拎出麵糰，壓扁排氣後，將上下左右向中間摺入，放番入兜內發酵 30 分鐘。

- 完成第二次發酵後，將麵糰分割成 4 份，之後將麵糰滾圓，冚上保鮮紙，靜置 20 分鐘。

- 將左右兩邊 1/3 麵糰摺入，捏緊收口，做成欖核形。

- 麵糰放上已墊入爐防黏蓆嘅烤盤上，發酵約 60分鐘直至麵糰發大約 2 倍。

- 發酵完成後，喺麵糰表面灑上少量高粉，之後用利刀割紋

- 放入已預熱至 220 °C 嘅焗爐內焗約 20 分鐘。

- 其間每隔 7 - 8 分鐘就要喺爐內噴水 1 次，共噴水 2 次。

- 出爐後放上架上攤凍。

以上材料份量可做麵包 4 個。

一大一細，兩個都發得好好，脹卜卜，割紋亦爆得好靚。

加咗全麥粉，包質相對比較結實，但仍然相當鬆軟。

Notes：
- 老麵做法，請參考《燕麥包》。

- 天氣涼嘅時候，可將麵糰放入電飯煲內，用煲溫功能幫助加快發酵，唯需留意各款電飯煲的保
  溫溫度，必需控制喺 40 °C 以下，否則酵母會因高溫而死亡。

再用 muesli 整 granloa bar

試過用 Louisa 送俾我嗰盒 muesli 當普通麥皮咁沖嚟食，諗住有乾果又有果仁，應該會幾好食，誰不知一啲都唔好食，寧願自己用普通燕麥片沖嚟食好過，唔怪得之Louisa 話最啱就係用嚟整燕麥條啦！

今次就加咗橙皮茸同椰絲落去整，焗出嚟勁香！

 

跟住再加重麥芽糖同蜜糖，果然實淨好多，切開時無咁易散。

今次主要係整俾 Miss Cheng 同其他老師及職員食，因為 Miss 係好鍾意
食 granola bar，佢話佢喺美國留學時成日都會買嚟食，
好過成日食朱古力喎！

 

冰糖燉蛋

有 blog 友問我，點解成日食甜嘢都仲可以咁瘦？唉，呢啲咪就係我媽咪成日講嘅嘥米飯囉！

我以前其實唔太多食甜嘢㗎，不過自從媽咪病發之後，我要勞心勞力咁邊工作、邊照顧佢時，就開始成日想食甜嘢，仲越食越甜㖭，有朋友話我壓力太大喎！

無錯，依家真係日日都要食過甜嘢先安樂，尤其係夜晚食完飯之後，如果無甜品食的話，硬係覺得好似周身唔自在。噚晚難得提早九點就收工，返到屋企整番熱哂啲隔夜飯餸後都仲有時間，咁就快快手整咗個中式燉蛋做飯後甜品。

材料：
冰糖   20 克
水    150 毫升
雞蛋  2 隻

- 冰糖加水煲滾，煲至糖完全溶解就可以熄火，攤凍備用。

- 雞蛋拂打成蛋液，倒入糖水，拌勻後倒入碗內。

- 用錫紙將碗口封好，隔水蒸 8 分鐘。

- 熄火後原封不動，再焗多 5 分鐘即成。

 

以上材料份量可做燉蛋 1 碗。

燉蛋質地非常嫩滑，完全唔會死死實，好滑溜。至於甜度呢，
我自己就覺得，如果可以再甜多小小就更好喇。

 

Notes：
- 如果想燉蛋入口更加順滑的話，可以將糖水蛋液過篩到碗內。

- 用錫紙封好碗口，可避免倒汗水滴落燉蛋表面。

- 熄火後用水溫焗熟蛋液，可以做出嫩滑燉蛋，唔會因蒸過火而令燉蛋變得過老。

自家製沙嗲醬

        之前買袋乾蔥頭返嚟整印尼咖喱雜菜，前日用嚟煮完辣椒油之後都仲有剩，反正石栗都仲有幾粒未用，今晚就用埋佢嚟煮沙嗲醬啦！

自家製辣椒油

        之前買落一大包辣椒粉，主要用嚟醃製泡菜，間中會用嚟煮餸同調味，但係每次用量都唔算多，用極都用唔哂。而且同用韓國辣椒粉整嘅泡菜味道唔係好同，所以嚟緊都打算 “斥資” 買過包正宗韓國辣椒粉嚟醃泡菜。 

        咁呢包辣椒粉可以點樣快啲清哂去呢？唔 ………… 整辣椒油啦！

清補涼糖水

        喺一本食譜度睇到介紹，一間越南餐廳提供清補涼冰，我覺得都幾得意，清補涼煲湯就飲得多，但係用嚟整甜嘅冷飲都係第一次聽到。

 

        我本身都唔係太鍾意飲凍嘢，加上依家天氣已經開始轉涼，煲成熱辣辣糖水會更加啱我！

洛神花英式烤餅 Roselle Scone

呢排好多 blogger 都整洛神花乜、洛神花物，提醒咗我原來老竇上年拎返嚟嘅洛神花乾完全未郁過，都要諗諗點用咗佢。

 

幾個月前，Ernest 媽咪 share 咗個 scone 食譜俾我，話個食譜好得，但一直都未試過，今日我就將個食譜稍作修改之餘，仲用洛神花乾代替提子乾嚟試整呢個 scone。

材料：
洛神花乾      適量

雞蛋  2 隻
糖      40 克
乳酪   120 克
高筋麵粉   150 克
低筋麵粉   150 克
泡打粉     16 克
牛油   80 克

- 洛神花乾用清水浸至軟身，洗乾淨後瀝乾水份，略剪碎。

- 雞蛋拂打成蛋液，加入糖同乳酪拌勻。

- 所有粉類混合好，加入牛油，用手指將牛油捽入麵粉內，做成麵包糠狀。

- 將液體材料倒入粉油混合物內，用膠刮輕手攪拌均勻。

- 加入洛神花乾，輕輕攪拌，然後將粉糰移到已灑粉嘅枱面。

- 灑上小量手粉，輕手將粉糰 “堆” 成球狀，用保鮮紙包好，放入雪櫃雪1個鐘。

- 拎出麵糰，用擀麵棍擀薄至約 2 厘米厚，用圓模 cut 出小粉糰，放上已鋪牛油紙嘅烤盤上。

- 剩低嘅粉糰再次輕手堆成球狀，重複以上步驟cut 出小粉糰，直至所有粉糰用完為止。

- 粉糰表面掃上蛋液，之後放入已預熱至 180 ℃ 嘅焗爐內，焗約 15 分鐘即成。

 

以上材料份量可做直徑 5 厘米烤餅約 16 個。

用咗兩種方法去焗 scone，前面嗰啲就將粉糰之間留空，
焗出嚟嘅成品會比較乾身；而後排嗰啲就貼住烤盤
邊並互相緊貼排列，成品會比較濕潤。

其實我自己就唔係好食得洛神花，因為實在太寒涼，所以呢個下午茶點
係專為老竇而設：洛神花 scone 搽上洛神花果醬，再加一杯
蜂蜜洛神花茶，wow，好洛神花呀！！

 

Notes：
- 可直接用 300 克中筋麵粉代替高、低筋麵粉。

- 可預先留起小量蛋液作掃面用。

- 所有材料拌勻之後，一定要輕手將粉糰堆起成形，否則粉糰容易起筋之外，仲會越搓越濕。詳
  細步驟可參閱  T&P 嘅 lemonade scone 製作 video。

南瓜籽芝麻薄切餅 Pepita & Sesame Slice

想整呢個薄切餅好耐，不過因為要用到檸檬皮茸，而我自己又好少用到檸檬，刨完皮之後個檸檬肯定會有排擺，所以一直等到有食譜要用到檸檬汁時先一次過整哂兩樣嘢。

材料：

牛油   45 克

白芝麻    約 3 – 4 茶匙

南瓜籽        40 克

低筋麵粉     50 克

全麥麵粉    40 克

檸檬皮茸    1 個檸檬份量

糖   1 湯匙

蛋液    25 克

杏桃果醬    40 克



- 牛油於室溫放軟；粉類過篩
3 次。

- 白芝麻及南瓜籽放入焗爐用 140 ℃ 焗約 15 分鐘至香味出，攤凍備用。

- 牛油加檸檬皮茸、糖打至鬆軟發白，然後將蛋液逐少拌入。

- 篩入麵粉及南瓜籽仁，用膠刮將材料切拌混合成糰。

- 將麵糰壓入已墊牛油紙嘅烤模內，喺表面搽上杏桃果醬，再灑上芝麻。

- 放入已預熱至 180 ℃
嘅焗爐內，焗約 20 分鐘。

- 出爐後於模內攤凍，之後切件享用。

 

以上材料份量可做 6 吋 X 6 吋薄切餅 1 份。

食譜出自 Simple Slices from Women’s Weekly。

 

因為想清埋樽陳年自家製柑桔果醬，所以我用佢嚟代替杏桃果醬。

其實呢個餅幾好食，夠哂香口之餘又唔會太過甜，不過因為今次
用足哂全部份量嘅牛油去整，無溝到固體菜油落去，
所以我自己就覺得好難聞、好難食哦！！

法式玉米麵包 Pain Au Maïs

今日整一個比較簡單嘅麵包，用直接法製作，特色在於加入玉米粉及芝麻。

材料：

高筋麵粉  
230 克

玉米粉    
100 克

即用酵母   3.5 克

鹽     7
克

水     200 毫升

橄欖油    
10 克

蛋液   適量

芝麻   適量



- 將麵粉、玉米粉、酵母同鹽倒入食處理器內混合，逐少加水搓至起筋。

- 之後加油，開機繼續搓成麵糰。

- 將麵糰拎出，放上已灑粉嘅枱面，繼續搓揉及摔打成光滑麵糰。

- 將麵糰滾圓，放入已灑粉嘅兜內，用保鮮紙封好，發酵 45 分鐘。

- 麵糰排氣後平均分割成 2 份，分別滾圓，靜置鬆弛 15 分鐘。

- 壓扁麵糰，左右兩邊分別向內摺入 1/3，之後再對摺，捏緊收口。

- 輕輕將麵糰搓幼、搓長，放上已墊入爐防黏蓆嘅烤盤上，發酵 75 分鐘至兩倍大。

- 喺麵糰表面掃上蛋液，然後再灑上芝麻，用已蘸少量蛋液嘅較剪喺麵糰表面剪出花紋。

- 放入已預熱至
220 ℃ 嘅焗爐內，焗約 30 分鐘即成。

- 出爐後立即移至架上攤凍。

以上材料份量可做約 9 吋長麵包 2 個。

食譜出自法國藍帶《法國麵包基礎篇》。

呢個剪紋方法都唔錯，賣相好得！

玉米粉係無味道嘅，整個麵包主要係靠鹽嚟帶出味道，而芝麻
就焗到非常香口，鹹香味係呢個包嘅特色。

 

Notes：

- 原食譜係用 T55 法國麵粉、20 克牛油及 8
克鮮酵母。

- 喺最後發酵時，食譜係教用蛋液搽喺麵糰表面，之後再蓋上布巾發酵，盡量避免布巾接觸到
  麵糰。

綠茶杏仁豆渣曲奇 Green Tea Almond Soy bean Dreg Cookie

Ernest 媽咪又再整多一次個朱古力豆渣曲奇，佢睇到我話預先將啲豆渣焗至乾身後，成品會較鬆脆，所以佢今次都試吓咁做。不過佢就仲犀利，將豆渣焗到完全乾身鬆散，一啲濕氣都無先至加入粉料內，佢俾我食過，果然真係好得，隔咗幾日都仲係超鬆脆。

 

我自己都仲有豆渣剩，咁就跟佢方法再整多次，不過今次就試吓整綠茶味啦！

 

材料：
豆渣 100 克
杏仁  40 克
牛油 50 克
低筋麵粉 130 克
綠茶粉 10 克
固體菜油 50 克
糖   70 克
鹽 少許
雞蛋 1 隻

- 先將豆渣放入焗爐內，用 140 ℃ 焗約 40 分鐘至完全乾爽鬆散，攤凍備用。

- 其後用相同爐溫將杏仁焗約 15 分鐘至香味出，之後略切碎備用。 

- 牛油於室溫放軟；麵粉及綠茶粉過篩 3 次。

- 將牛油、固體菜油、糖同鹽拌勻，繼續攪拌至鬆軟發白。

- 加入豆渣拌勻後再加入雞蛋攪拌。

- 將粉類篩入，攪拌均勻，最後拌入杏仁粒。

- 勺起少量麵糊，搓成糰後放上已鋪牛油紙嘅烤盤上，輕輕壓平。

- 放入已預熱至 170 ℃嘅焗爐內，焗約 30 分鐘。

- 出爐後放上架上攤凍。

以上材料份量可做直徑 4 厘米曲奇約 25 塊。

咁啱 Ernest 媽咪又俾咗啲原粒杏仁我，咁就順手加埋落去整，
焗緊嘅時候已經聞到好濃嘅綠茶同杏仁香味。

焗乾哂啲豆渣嚟整，效果真係好好多，拍得住燕麥曲奇咁鬆脆哦！

Notes：

- 綠茶粉及糖嘅用量可依個人口味增減。

馬拉盞燜雜菜 Sayur Lodeh

        早前 Ernest 媽咪教咗我煮一個印尼式燜雜菜，佢話呢個幾好食，個食譜係新加坡前總理李光耀嘅媽咪所撰寫，我都好有興趣試吓呢個食譜，因為我都係第一次見到煮咖喱會落枝竹、黃芽白同豆角，可能呢個煮法都係好似娘惹菜。

        因為有啲材料我屋企附近個街市同商場都買唔到，所以要等到有機會買齊哂所有材料先可以開工，卒之禮拜日煮咗喇！

 

       Base on 個原食譜煮好個汁料，Ernest 媽咪話加佛手瓜一齊煮都好食，好，就照做吧！

 

"清" 蔥歲月……

一把年紀嘅我，想回復青蔥歲月就再無可能喇，不過 “清” 蔥歲月就大把機會！

好鍾意蔥油餅嗰種香蔥味，真係食極都唔厭，
煎緊嘅時刻真係恨不得想即刻咬一啖！

今次嘗試將個麵糰好似整一般麵包咁發酵 45 分鐘，效果真係有唔同，
你睇，煎好嘅成品比起之前厚好多，仲鬆軟好多呀！

 

要食譜嗎？睇番《蔥油薄餅》啦！

朱古力豆渣曲奇 Chocolate Soy bean Dreg Cookie

整嚫西點都多數係甜食，雖然我都鍾意食甜品，但都知道食得甜嘢多對身體唔係咁好，所以最近就喺圖書館度借咗幾本鹹味西點食譜返嚟，遲啲同大家慢慢逐一分享食譜。

 

因為上個禮拜整咗豆漿，隨之而來嘅指定動作就係清豆渣，所以就揀咗呢個朱古力曲奇喇！其實之前已經同 Ernest 媽咪一齊整過呢個曲奇㗎喇，因為味道唔錯，所以試吓自己整。有過上次嘅經驗，今次我就將個食譜改良一下，出到嚟嘅效果果然好好多。

 

材料：

豆渣    100 克

牛油    50 克

低筋麵粉    130 克

可可粉 2 湯匙

固體菜油    50 克

黃糖    50 克

鹽 1/2 茶匙

雞蛋   1 隻

入爐朱古力粒    40 克

- 豆渣放入焗爐，用 140 ℃ 焗 15 分鐘，攤凍備用。

- 牛油於室溫放軟；麵粉及可可粉過篩 3 次。

- 將牛油、固體菜油、糖同鹽拌勻，繼續攪拌至鬆軟發白。

- 加入豆渣拌勻後再加入雞蛋攪拌。

- 將粉類篩入，攪拌均勻，最後拌入朱古力粒。

- 勺起少量麵糊，搓成糰後放上已鋪牛油紙嘅烤盤上，輕輕壓平。

- 放入已預熱至 170 ℃
嘅焗爐內，焗約 30 分鐘。

- 出爐後放上架上攤凍。

 

以上材料份量可做直徑 4 厘米曲奇約 25 塊。

 

食譜參考自熊谷真由美嘅《鹹味點心》。

上次同 Ernest 媽咪整呢個曲奇時係用無鹽牛油，今次加番多少少鹽嚟整，
味道出奇地好食好多，而且我仲預先將豆渣焗過，成品更加酥脆。

雖然用豆渣整曲奇始終會比普通餅乾容易變腍，但今次改良咗
做法之後，成品仍可保持一定鬆脆度哦。

Notes：

- 食譜原用黍砂糖而唔係黃糖。

- 原食譜係用 100 克有鹽牛油再加一小撮鹽，並無加固體菜油。

- 如果唔想另外買有鹽牛油的話，可以每 100 克無鹽牛油加
1/2 茶匙鹽代替。

- 豆渣預先入爐焗乾身之後，所做出嚟嘅曲奇就無咁易受潮變腍。

- 豆渣處理方法，請參閱《豆渣處理及保存方法》。