2016年8月30日星期二

黑糖黃豆粉芋圓

        上次整芋圓個份量可以整到好多,而且都幾飽肚,無可能一次過食得哂,所以留起咗一半打入冷宮。要拎番出嚟煮都好方便,唔使解凍,直接放滾水內煮至浮起就攪掂。
 
 

2016年8月26日星期五

回禮

        好耐之前表姐送咗兩樽榛子朱古力醬俾我,我應承佢用個醬整番個西米布甸俾佢做回禮,不過因為早前不在狀態,乜都唔想做,所以一直都無行動。
 
        上個禮拜大表哥見到我因為藥物副作用關係,攪到依家又熱又濕嘅天氣手指都乾到爆拆,所以佢就送咗枝 "隱形手套" 俾我,等我成日濕水做嘢都唔使咁傷!
 
        趁依家狀態唔錯,整個西米布甸一次過做回禮算喇,懶得就懶嘛,哈哈!!
 
 
 

2016年8月23日星期二

涼伴青瓜雞髀菇

        雖然我一向都唔係太喜歡食同飲凍嘢,但天氣咁熱,我都會整冷盤食嘅!呢次就將涼伴雞絲粉皮變成素食,用雞髀菇代替雞肉。
 
 

香蕉放雪櫃保鮮

        一直都知道香蕉係唔可以放雪櫃保存,因為會凍壞蕉肉,所以每次都唔敢買得太多,因為當香蕉熟時就會一下子全部熟哂,食唔切就會熟到爛!其實都已經學識咗用香蕉整蛋糕或放冰格雪硬做雪糕,但始終都係要有時間得閒先可以整,冰硬咗嘅香蕉解凍後又唔可以再食,所以始終都唔係最理想嘅保存方法。
 
        早前老友 Winnie whatsapp 咗我一個方法,可以將香蕉放入雪櫃又唔怕會凍壞,試過又真係 OK 喎,見到 blog 友小月都同樣成功,所以真係要同大家分享一吓呢個方法。
 
 

2016年8月21日星期日

WeWah Concert 2016

        時間真係過得好快,眨吓眼喺 WeWah 已經做咗義務導師一年!上年嘅呢個時候我都有參加畢業禮音樂會,當時係以準導師身份出席,今日嘅我唔單只係正式導師,自己教嘅兩個學生都要上台演奏。
 
        唔知點解,覺得教 WeWah 嘅學生會比較開心,即使係義務性質,甚至連車馬費都無,就連學生嘅資質都未必係好好,但心裡面就相對特別用心去教佢哋,可能係因為學生同家長都會較為懂得珍惜,對導師亦會比較尊重同感激。
 
 

2016年8月18日星期四

多謝素友

      早前素友 Alice 去開大埔,順道去埋「樹記」入貨,仲專登打個電話俾我問我有咩要買,順便幫我買埋返嚟。
 
      真係好多謝佢咁有我心,唔使我搭車由西到東去買!
 
 

2016年8月14日星期日

素肉粽

        又玩包粽喇,今次學識咗包三角粽!
 
        包咗幾次之後,發覺真係要買啲靚嘅粽葉同水草先得,唔使包包吓塊葉又裂,漏哂啲料出嚟;到紮粽時條水草又好易斷!!之前因為第一次買無經驗,唔知道唔同價錢有咩分別,用哂手頭上嘅葉同草之後再買時就識喇。水草應該都唔會再買喇,學網友用繩紮好過,實唔會斷!!
 
 

2016年8月9日星期二

山合桃無花果鄉村包 Pecan & Fig Country Bread

        近排多數都係食麵包機整嘅麵包,但其實我就唔係太鍾意,因為個 texture 實在太軟熟,唔係我杯茶呢!不過就真係方便兼慳時間,夜晚準備好哂材料放入麵包機內,預校好時間,第二朝起身就有出爐麵包,唔使自己做功夫之餘又食得相對健康,總好過出街買 "化學包" 食啦!
 
        趁連續三日 dayoff 喺屋企,好好休息之餘,又整番個半人手製作嘅山合桃無花果鄉村包先!
 

2016年8月8日星期一

同一材料攪掂兩餐

        依家天氣咁熱,喺廚房做完嘢之後,真係成身濕透,好似俾桶水由頭淋到落腳咁!!所以盡可能都簡單為主,做得少啲得啲,盡量縮短喺廚房嘅時間。
 
        今日一份材料就攪掂哂兩餐喇!第三餐整韓式炒粉絲,喺啲材料度每樣留起少少,再開個麵糊,咁就整好第二餐韓式雜菜煎餅,真係名符其實懶到爆!!
 
 

2016年8月2日星期二

又整 panini 喇!

        冷宮如果有麵包存貨的話,我多數都會要嚟整西多或麵包布甸,但自從學識用 grill pan panini 之後,咁就又多個選擇喇!
 
 

實走唔甩!!

        屋企實在太開陽,無遮無擋,名符其實嘅好天曬落雨淋,所以次次大風雨都一定走唔甩,無次例外!!


2016年8月1日星期一

夜香花

        今朝去到街市時,見到勁多人,比平時特別旺,好多檔口都做到唔停手,又有一、兩檔菜檔直情無哂嘢賣,提早收檔。我幫襯開嘅菜檔都好似賣完賣剩咁款,後尾先知原來天文台講咗今晚會改掛 8 號風球,唔怪得之街市咁墟冚啦!
 
        其實都唔係好明點解次次打襯風啲人都咁鬼緊張,好似就快飢荒無得食咁係咁搶,攪到啲檔主同職員做到黑哂面、發哂脾氣,查實依家情況都唔會好似以前細個嗰陣時咁 "物資短缺" 啦!