2016年12月28日星期三

幫人交租

        趁假期得閒,寫番啲舊料先!
 
        早前同老表到灣仔一間 café 食嘢傾偈,叫咗個煙三文魚三文治伴沙律菜,個 set 包埋杯 cappuccino,盛惠 $78,如果要牛油果的話就要加多 $10。喺香港地出街食嘢真係好貴,俾出去嘅錢其實好大部份都係幫食店交租,真係用於食材上只係佔好少,所以我一向都甚少出街食。
 
        之後隔個禮拜我就動手再整一次個 set,唔單只多咗牛油果,麵包仲係用老表買俾我嘅 pumpernickel,拎我自己呢個 set 出去賣,肯定過百啦,哈哈!!
 
 

2016年12月26日星期一

2016 阿茂聚會

        噚日又係同 "兩老" 嘅阿茂聚會,上一次聚會已經係一年多前,大家都各有各忙,好難就到時間呢!
 
        今次多得 Winnie 帶部 V 仔過嚟整窩夫,老表就整咗 ciabatta。因為知道有好多甜嘢食,所以我就一直喺廚房努力咁準備 gado gado
 
        除此之外,仲要多謝表姐為我哋整咗雜菜薯仔沙律,又要多謝老友送俾我哋嘅雜錦曲奇同 panettone
 
 

2016年12月14日星期三

2016年12月6日星期二

整定泡菜過冬

        趁呢幾日天氣略為回暖,發酵唔需要等咁耐,醃定啲泡菜過冬先!
 
 

2016年12月5日星期一

純素香蕉蛋糕 Vegan Banana Cake

        一直都有不斷去試唔同嘅無蛋食譜去整蛋糕及 muffin,因為希望食齋日都可以有 "蛋" 糕食嘛!但始終都係覺得口感比較黏口,唔係我杯茶。今日終於整到一個口感相對清爽嘅無蛋蛋糕,我估最重要就係當中嘅橙汁。
 
        呢個香蕉蛋糕其實早兩個禮拜都已經整過,但因為當時手上無橙,於是就隨手用豆漿代替,效果當然唔理想啦,入口真係好黏,黏到連老表都話唔好食。
 
        啱今個禮拜有香蕉又有橙喺手,唔死心嘅我又再專登買件豆腐整多一次,果然今次好得多,酸性食材對於泡打粉嘅作用原來係咁重要!!
 
 

2016年12月1日星期四

士多啤梨果醬

        早幾個禮拜同 "兩老" 講話想整士多啤梨 jam,叫佢哋如果見到超市有特價就通知聲。
 

2016年11月27日星期日

冷泡咖啡 Cold Brew Coffee

        另一樣近排都興起嘅就係冷泡咖啡,顧名思義,就係用凍水沖咖啡。初時都唔係好信凍水都可以沖到咖啡,原來係起碼要泡足 12 個鐘,將咖啡粉裡面嘅物質慢慢浸泡出嚟,好處係唔會因為水溫、咖啡粉粗幼度、甚至係沖泡咖啡手法而影響味道,所以泡好後嘅咖啡味道會比較醇,比較少酸味同苦味。
 
        由於咖啡粉經長時間浸泡,咖啡因濃度都會相對高好多,所以冷泡咖啡唔可以長期飲用,間中一杯好喇!
 
 

2016年11月26日星期六

椰菜花飯

        近排好流行椰菜花飯,無論係飲食網頁、電視節目、以至係營養餐單都有提及,因為相比起米飯,碳水化合物少好多,食咗都無咁易增磅,而且簡單易煮,無技巧可言。
 
        早前買咗個巨型椰菜花,一半用嚟煮,另一半就試整咗椰菜花飯。
 
 

2016年11月6日星期日

執平貨!

        依家用緊隻平底鑊個易潔塗層開始唔多掂,連煎 pancake 都有啲黐,所以一早已向素友打聽一下行情,睇吓佢有咩好介紹。素友因為知我要買鑊,所以有次佢行百貨公司時,見到平底鑊大特價即刻通知我兼影埋相俾我睇㖭,真係要多謝素友咁有我心呢!
 
        隻鑊唔單只平,而且仲係我依家用開嘅牌子,更重要嘅係同我一向用開個 size 一樣,咁我就可以繼續用番個舊玻璃蓋,唔使嘥錢再買喇!
 
 

2016年10月31日星期一

蜂蜜抹茶曲奇 Honey Matcha Cookie

        剛喺圖書館借咗本健康烘焙食譜,唔用蛋、奶類製品及精製糖,裡面有個黃豆粉唧花曲奇,無論材料同做法都相當簡單,可以好快手就整到,今日即管一試。食譜原本係用黃豆粉同楓糖漿,因為手上都無呢兩樣食材,所以我就改用咗蜂蜜同抹茶粉。
 
        其實 N 年前都已經試過幾次整唧花曲奇,但次次都唔成功,今次反而一擊即中,所以即使個唧花整得唔太靚,但都已經好滿意喇!!估唔到唔用牛油同蛋整成嘅曲奇都一樣咁鬆脆,唔會又硬又實。
 
 
 

罌粟籽 bagel

        自從買咗麵包機之後,真係好少自己親手整麵包,一來無太多時間容許我慢慢等發酵同焗,二來就係一個字,懶!!臨瞓前倒哂啲材料落部機度,預校好時間,第二朝起身就已經整好,雖然我其實唔多鍾意麵包機整嘅麵包,因為實在太軟熟,唔係我杯茶,但總好過要自己整或出街買 "化學" 包食囉!
 
        早幾日終於的起心肝整番一次 handmade bread,皆因目標人物唔係自己,係 Ernest 婆婆,佢好鍾意食 bagel 㗎!只要係為身邊入而做的話,動力就會大好多,如果只係整俾自己食的話,真係懶得就懶囉!!
 
 

2016年10月23日星期日

咖啡香蕉雪糕

        呢個所謂雪糕,但其實係完全無奶類製品,材料好簡單,只係得香蕉同咖啡粉。個食譜係老表 share 俾我,係來自一個營養師嘅食譜。
 
 

錯體!?

        仲記得早前我收到舊學生澳洲寄俾我一大盒甜品嗎?裡面其中一盒係茶包。 
 
 

2016年10月18日星期二

芝麻麵包布甸

        今日整咗麵包布甸做第二餐,呢次用咗黑芝麻鈣思寶做布甸蛋液,所以食落有淡淡芝麻味,面層焗到脆卜卜,裡面就又濕潤又香甜。
 
 

2016年10月14日星期五

間接做善事

        食過曲奇同蛋糕,又收到本精美食譜,咁順便幫吓老友忙都好應該呀!
 
        Ernest 媽咪有啲包裝食物想送俾有需要人士,但又唔知捐去咩地方好,我突然想起灣仔一個商場裡面長期放咗一個紙箱喺度,有心人可以將食物放低,等有需要嘅人取用。反正我轉車返屋企時必定要經過呢個商場,咁都係順手啫,施受雙方都有得著,我呢個 "中間人" 都間接幫手做善事,哈哈!
 
 

多謝!!

        Ernest 媽咪今日送咗本食譜俾我,係仙姐嘅《點點我心》。
 
        一向都好鍾意仙姐嘅食譜,尤其係中式點心,做出嚟成品特別合心水,各方面都恰到好處,因為仙姐通常都習慣將個食譜整 N 次咁多,邊做邊調整食材份量,直到自己完全滿意為止先將食譜公諸於世,所以佢嘅食譜一定信得過,而且一定可以成功整到,唔似得有食譜咁整幾次都唔成功,根本就係個食譜有問題,又或者係刻意將所謂嘅 "秘方"、"秘訣"、"秘技" 收埋,唔係完完整整咁跟大家分享,用咁嘅心態去出食譜,不如唔好出好過啦,我自己就覺得同扼錢都無乜大分別!!
 
 

2016年9月26日星期一

韓式涼拌菜

        印象中好似咁耐都未試過成餐都只係食涼拌菜做餸,韓國菜中涼拌菜就最多款式揀,今次試咗菠菜同大豆芽整嘅涼拌菜。
 
 

2016年9月21日星期三

抹茶雙色麵包多士 Duo Colour Maccha Toast

        每年中秋都已經叫老表同表舅母唔好買嘢俾我,一來費事玩交換禮物,大家都可以慳番唔使破費兼嘥時間去買嘢,二來邊有長輩買嘢俾後輩,都唔合禮節,不過年年最終都係有禮物收!
 
        今年整條麵包俾佢做回禮,一來知佢哋一定會食,二來夠哂輕身,唔使老表拎餐死咁辛苦!
 
 

一念素食

        呢兩個禮拜超級忙碌,幾乎每日都要出街,都無乜時間可以坐低寫 blog,依家個 schedule 開始回復正常,可以慢慢寫番之前想同大家分享嘅嘢。
 
        每年中秋我都會食齋,因為係十五嘛,Ernest 媽咪知我中秋要食齋,所以特別請我去 HKU 嘅「一念素食」食 lunch。其實自從媽咪走咗之後,咁多年嚟都好似只係試過一次中秋做節食飯,所以我已經對 "團圓" 呢個字變得好陌生,今年中秋有老友一家同我一齊食飯,我當係做節㗎喇!
  
 

2016年9月14日星期三

海藻糖

        早前 Ernest 媽咪送咗包海藻糖俾我,佢話用佢嚟整 muffin,個 texture 會相對鬆軟濕潤,我自己都試過好幾次,發覺效果都真係唔錯,所以都想同大家分享一下呢隻糕餅嘅 moisturizer!!
 
 

2016年9月11日星期日

花素蒸餃

        媽咪係食全素之前,一向都唔會揀食,但印象中有兩樣食物佢係特別鍾意嘅,就係豌豆黃同花素餃。
 
        Facebook 個相片回顧,就提醒我原來五年前嘅今日,我就用開邊綠豆代替豌豆整豌豆黃,今年我就咗親手包嘅花素餃送俾媽咪!
 
 

2016年9月10日星期六

手語

        一個唔識英文又唔識普通話嘅語言白痴,居然一生中比一般人學多幾種語言,真係攪笑!!讀書時 "被迫" 學習意、法、德三種語文,成績就當然唔好啦,依家就仲犀利,連手語都學埋,真係人都癲!!!!
 
        一直努力搵工,搵足年幾兩年都無著落,心都開始慌,因為穀種都睇住一直減少落去,所以都決定唔再淨係搵番老本行工作。上年一次搭巴士時,喺電視度睇到一個福利機構短片,話香港依家仍然好缺乏手語翻譯,好多聽障人士都好需要翻譯服務,鼓勵多啲人入行為聽障人士提供翻譯服務。當時即刻諗到呢樣工作都唔錯,一來可以幫到人,為聽障人士跟健聽人士互相溝通作橋樑,二來自己又可以多條出路選擇。正當我搵工搵到灰爆嘅時候,突然諗到早前幫過手做義工嘅組織,會唔會有工作機會或轉介,於是就 click 入網站睇睇,點知一入到網站,第一樣見到嘅嘢就係手語課程開班招生,而且學費都唔貴,負擔得起有餘,真係唔即刻報名都對唔住自己!!
 
 


2016年9月5日星期一

和風沙律 & 迷迭香焗薯

        喺製作呢個沙律同焗薯時有好幾個第一次:加迷迭香一齊焗薯仔、用蒟蒻做沙律、翠玉瓜刨片做沙律、製作日式沙律汁。
 
 

2016年8月30日星期二

黑糖黃豆粉芋圓

        上次整芋圓個份量可以整到好多,而且都幾飽肚,無可能一次過食得哂,所以留起咗一半打入冷宮。要拎番出嚟煮都好方便,唔使解凍,直接放滾水內煮至浮起就攪掂。
 
 

2016年8月26日星期五

回禮

        好耐之前表姐送咗兩樽榛子朱古力醬俾我,我應承佢用個醬整番個西米布甸俾佢做回禮,不過因為早前不在狀態,乜都唔想做,所以一直都無行動。
 
        上個禮拜大表哥見到我因為藥物副作用關係,攪到依家又熱又濕嘅天氣手指都乾到爆拆,所以佢就送咗枝 "隱形手套" 俾我,等我成日濕水做嘢都唔使咁傷!
 
        趁依家狀態唔錯,整個西米布甸一次過做回禮算喇,懶得就懶嘛,哈哈!!
 
 
 

2016年8月23日星期二

涼伴青瓜雞髀菇

        雖然我一向都唔係太喜歡食同飲凍嘢,但天氣咁熱,我都會整冷盤食嘅!呢次就將涼伴雞絲粉皮變成素食,用雞髀菇代替雞肉。
 
 

香蕉放雪櫃保鮮

        一直都知道香蕉係唔可以放雪櫃保存,因為會凍壞蕉肉,所以每次都唔敢買得太多,因為當香蕉熟時就會一下子全部熟哂,食唔切就會熟到爛!其實都已經學識咗用香蕉整蛋糕或放冰格雪硬做雪糕,但始終都係要有時間得閒先可以整,冰硬咗嘅香蕉解凍後又唔可以再食,所以始終都唔係最理想嘅保存方法。
 
        早前老友 Winnie whatsapp 咗我一個方法,可以將香蕉放入雪櫃又唔怕會凍壞,試過又真係 OK 喎,見到 blog 友小月都同樣成功,所以真係要同大家分享一吓呢個方法。
 
 

2016年8月21日星期日

WeWah Concert 2016

        時間真係過得好快,眨吓眼喺 WeWah 已經做咗義務導師一年!上年嘅呢個時候我都有參加畢業禮音樂會,當時係以準導師身份出席,今日嘅我唔單只係正式導師,自己教嘅兩個學生都要上台演奏。
 
        唔知點解,覺得教 WeWah 嘅學生會比較開心,即使係義務性質,甚至連車馬費都無,就連學生嘅資質都未必係好好,但心裡面就相對特別用心去教佢哋,可能係因為學生同家長都會較為懂得珍惜,對導師亦會比較尊重同感激。
 
 

2016年8月18日星期四

多謝素友

      早前素友 Alice 去開大埔,順道去埋「樹記」入貨,仲專登打個電話俾我問我有咩要買,順便幫我買埋返嚟。
 
      真係好多謝佢咁有我心,唔使我搭車由西到東去買!