咖啡香蕉雪糕

        呢個所謂雪糕，但其實係完全無奶類製品，材料好簡單，只係得香蕉同咖啡粉。個食譜係老表 share 俾我，係來自一個營養師嘅食譜。

 

 

材料：

熟香蕉             2 隻
即溶咖啡粉      2 湯匙

- 香蕉切片，用膠盒裝住放入冰格雪至結冰硬身。

- 將已冰硬嘅香蕉片放入攪拌機內攪打成香蕉蓉。

- 加入咖啡粉，再次攪打至所有材料完全混合。

- 將混合物倒入膠盒內，放入冰格雪一個鐘。

- 用叉將混合物翻鬆，再雪一個鐘。

 

- 重覆上述步驟 3 – 4 次，然後雪至完全硬身即可。

香蕉片一定要雪至冰硬，我自己就雪過夜。

混合物剛攪打好時比較淡色同軟身，如果想食

軟雪糕質地的話，已經可以即食喇！

由於我用嘅係炭燒咖啡，所以味道偏苦，連超甜

香蕉味都食唔道，再整的話要減少份量

或改用較淡味嘅咖啡粉。

        我屋企附近間超市賣嘅香蕉其實都係完整一疏咁賣，但都唔明啲人點解硬係鍾意摵開嚟買，攪到長期都一大堆單隻香蕉！好彩我自己唔太介意，撞啱有呢類單隻香蕉裝成一盒咁賣的話，我就一定會揀呢款嚟買，因為平好多㗎，反正又唔係爛，而且返到屋企我都係會逐隻剪開，費事到熟透嘅時候，摘其中一隻嚟食時就會殃及池魚，連其他都跟住甩埋。

 

 

 

 

 

 

Notes：

- 雪硬嘅香蕉都幾難攪打得到，所以要邊打邊略攪拌，亦都要留意香蕉片盡量唔好切得

  太厚，否則仲難打成蓉。