2014年3月20日星期四

泡菜青瓜炒肉筋

        講開用瘦肉煲湯,都想順便同大家分享少少嘢。
       
        平時我係去超市買豬肉嘅,唔會去街市肉檔度買,因為媽咪以前都係咁做,佢話比較衛生啲喎!天氣凍時都無乜所謂,但係天熱時就比較危險,街市又濕又熱,啲豬肉就咁掛哂喺度,好易變壞,佢話好多時買嚿豬肉返屋企,會聞到一 怪味,應該係變壞,所以媽咪之後都改咗去超市買,包裝好嘅豬肉會放雪櫃,即使掛喺架上嘅豬肉都唔使驚,超市有冷氣嘛!
 
        每次同阿姐講要瘦肉煲湯,佢都會俾嚿豬扒我,話煲湯甜好多,但係煲完就會好嚡囉!嚿豬扒面係有一層白色嘅嘢,其實我係唔知乜嚟,又有好多脂肪,所以我必定切走先用嚟煲湯。有次我多口試吓叫阿姐跟手幫我切走埋嗰層,點知阿姐話呢塊係筋嚟㗎喎,就算佢切走咗,之後又連嚿肉包埋一齊俾我,心諗,唔通呢塊係正嘢!?為咗做實驗,自此之後我都會連少量肉切起,之後放入冰格保存,久而久之,已經儲咗一大袋,我就可以做實驗,試吓用嚟炒,點知好有驚喜喎,肉質又爽又腍,好有食豬頸肉 feel,但價錢就差得遠囉,呢個肉筋只係下欄嘢!
 

材料:
青瓜
豬肉筋
泡菜
洋蔥

醃料:


紹酒
生抽
粟粉

調味料:


魚露
韓國辣椒醬
麻油

- 青瓜去頭尾、去瓤,切成粗片後加小量粗鹽醃一陣間,之後洗去多餘鹽份,榨乾水份待
  用。

- 肉筋洗淨後切粗條,用醃料醃好;泡菜切件;洋蔥去衣後切粗條。

- 燒熱油,洋蔥落鑊爆香,炒至微微軟身後加入肉筋兜炒,灒酒。

- 當肉筋半熟時,加入青瓜兜炒,之後加入調味料兜勻。

- 冚上鑊蓋煮一陣,之後加埋泡菜兜炒均勻。
 
- 熄火後灑上麻油即可上碟。
 
 
 
講完之後大家知唔知我講嘅肉筋係咩呢?
唔知唔緊要,睇相就知㗎喇!
 





 呢個餸真係好特別口,無論係肉、瓜定係泡菜都超爽口哦!
 
 
 
 
Notes
- 醃肉時可參考《醃肉基本法》步驟。
 
- 泡菜做法,請參考《自家醃製韓式泡菜》及《偷懶版泡菜》。


9 則留言:

  1. 呢舊係肉眼筋,好好食咖,以前D肉枱佬留番比自己食咖,依家都會賣錢了。

    回覆刪除
    回覆
    1. 係呀,我真係唔識呀!因為我一向都唔係食肉獸,而且自己又唔多鍾意處理生肉,所以對肉無乜認識,不過依家知道喇!

      刪除
  2. 我都喜歡選擇在超市買肉,特別是夏天,衛生緊要呀。

    回覆刪除
  3. 你唔講都唔知呢~~咁樣又幾喎,物盡其用^^

    回覆刪除
  4. 回覆
    1. 哈哈,妳成世都唔上吓嚟,一上嚟就見到個咁正嘅餸! ^^

      刪除