前幾日收到 ex 個 whatsapp，話買咗份 XX 禮物俾我，問我幾時得閒喺屋企，佢拎上嚟俾我。咦，我咪已經同身邊所有人講好咗，呢日唔好再對我有任何動作，亦唔好旨意我會對你哋有咩表示，唔通到佢老人癡呆！？
之後我哋傾咗一輪偈，佢離開時同我講，叫我自己多啲聽吓音樂啦！呢一刻我終於明白點解佢今年又突然重提呢一日，仲送禮物俾我，原來係別有用心，希望我可以聽多啲音樂舒緩情緒，早日康復。
我拎上手睇咗一輪都完全唔知呢件係乜，原來
係個電子音箱，可以用藍芽或 cable 接駁
電子產品播放音樂，又可以做收音機，
我呢個電子白癡完全唔知呢個
世界有一樣咁嘅嘢呢！！
自從媽咪離開之後，我就決定唔再提及呢一日，一來係因為有人話過我知，呢一日其實係母難日，二來係因為當年媽咪離開咗唔夠一個月就已經到咗呢日，當時嘅我根本完全失去知覺，身邊發生咩事都完全無興趣去理。
前幾個月情緒最低落、情況最差嘅時候，真係多得佢，原本我問佢肯唔肯借個膊頭俾我，純粹都係期望佢文字上 say yes，等我自己心情舒服啲，有點安慰，但真係估唔到佢會付諸行動，而且仲係趕返工前專登抽僅有少少時間上嚟睇吓我發生咩事，最重要係佢借咗個膊頭俾我之後一粒聲都無出過，完全無問到我任何事，只係靜靜咁攬住我，俾我好好發洩。我都有同輔導姑娘講番呢件事，姑娘都高度欣賞佢，稱讚佢有情有義，非常難得，叫我好好珍惜呢位朋友！
緣份天注定，唔到我哋去控制，無論係情人、父母、兄弟、朋友，以至師生關係都一樣，當初大家有緣份先會走埋一齊，一旦緣盡的話，無人可以挽留得到！！記得好耐之前睇到電視節目訪問 "魔警" 徐步高嘅媽咪，佢話自己個仔走咗之後，一直都好唔開心，完全接受唔到呢個係事實，自己個仔應該係為市民服務，保護市民生命財產嘅公樸，點會走去殺人！後來徐媽媽皈依佛教，接觸多咗佛學之後就知道，母子緣緣盡時係點都唔可以挽留得到，要學識放手，之後心情就慢慢平伏過來。其實我聽完佢呢番說話之後，我係完全明白當中道理，但原來真係講就天下無敵，要實行起上嚟真係一啲都唔容易！！同 ex 嘅緣份都係一樣，唯一唔同嘅係大家可以轉變身份，由情人變為好友，繼續見面來往，緣份仍在，只係變了性質。我其中一位老友都同我講過，好欣賞我同佢真真正正可以做到再見亦是朋友！
九年前嘅我肥到有個小肚腩，而佢就俾我媽咪話佢好瘦；九年後嘅我就變成皮包骨，而佢就多咗個肚腩！世事無常，珍惜眼前一切！！
沒有留言:
不接受新留言。