羅漢果煲金銀菜

        呢輪啲天氣好乾燥，最啱就係煲番啲滋潤湯水潤番吓，加上前幾日聽到我老豆猛咁喺度咳，所以又再煲呢個羅漢果煲金銀菜湯囉。

        今次啲湯非常之甜，簡直好似飲緊糖水咁，連我老豆試完味都話唔好落鹽，就咁飲仲好味。唔知係咪因為個羅漢果又大又靚呢？

        不過唔知大家近排有冇遇到好似我嘅情況呢，呢兩次煲湯啲紅蘿蔔煲極都唔腍，我老豆話今日個蘿蔔仲硬過上次 o添！真係唔係好明，已經兩次都喺唔同嘅菜檔買 o架喇！

試做布朗尼

        今日又開爐啦！我今日整嘅係美式朱古力蛋糕，即係布朗尼。呢隻蛋糕我一食就愛不惜 "口"，好鍾意佢果種比餅乾鬆軟，但又較蛋糕實淨嘅口感，第一次食呢個蛋糕就係 Louisa 喺煤氣中心學整完之後，將個製成品拎返嚟請我食，第一啖咬落去我就即刻諗起我成日喺美心西餅買嚟食果隻朱古力撻，因為果質感好似，真係勁鍾意呀！所以我都即係叫 Louisa 俾個 recipe 我，等我得閒試吓整。

        其實個 recipe 我都收到手好耐，但係就無乜時間整，見今日得閒啲，於是就 "的" 起心肝，攞個 recipe 出嚟整。由於係第一次整，我同樣怕失敗而浪費材料，所以我今次試做只係用咗原食譜 2/3 份量，同埋一啲額外材料都無落到，只係得主材料，即牛油、雞蛋、麵粉、朱古力粉同糖，我最想知道嘅都係睇吓自己整唔整到同樣嘅 texture。

        我攪緊粉果陣都已經流緊口水啦，因為朱古力粉個味道好濃，好吸引，可能係 Valrhona 朱古力始終比較優質，香味都濃啲！如果係嘅話，我都覺得物有所值。

        好緊張呀，焗緊已經聞到好濃嘅朱古力味喇，唔知成唔成功呢…………

        出爐啦，真係好香，好吸引！睇果樣都 OK 噃 (我意思係指焗得成，唔係話過賣相 )。

 

        唔…… 始終差噉啲，外面就好鬆脆喇，裡面就唔係咁樣，仲係軟軟哋 (幅相都睇到蛋糕中心係比較深色 )，失敗咗 lu！不過唔理喇，反正味道都一樣咁正，食完一嚿又一嚿。  我老豆一食，都唔駛等我開口問，佢已經話好食過美心果啲，但我就鍾意美心果隻多啲喇，因為我始終鍾意粗嚡啲、鬆散啲嘅口感。

試食後檢討失敗原因，估計有 3大可能：

1. 焗模太細，以致麵糊整體厚度增加，較難將蛋糕中心焗乾。

2. 可能無加額外材料，例如果仁之類，如果加咗的話就可以令蛋糕麵糊厚度相對薄啲，易啲焗至乾身。

3. 可能煤氣中心用嘅焗爐果火力同我個焗爐唔同，跟佢個食譜用 200°C 焗 20分鐘，可能火力太猛，蛋糕中心都未焗乾，表面已經焗脆咗，邊位仲有少少燶 o添！

        星期五拎俾食譜原主人試吓，睇吓佢知唔知點解先，起碼佢有上堂學到，可能知道我中間有咩地方出錯。

香蕉蛋糕 Banana Bread

       Louisa 呢幾日去咗日本玩，所以今日唔駛去教佢，改咗禮拜五，難得今日比較得閒，就郁手整香蕉蛋糕。

        其實之前喺 Louisa 屋企食過呢個香蕉蛋糕，係佢妹妹整俾佢食嘅，咁我一食就已經覺得好正，因為完全係我一直想要做到果種 feel，係果種好似 muffin 咁鬆散嘅 texture，於是我就問 Louisa 攞個食譜，原來佢妹妹就係跟網友為食貓個食譜整嘅。Louisa 自己都己經整咗 5 次，佢都話成功，好好食，於是我先有信心去整，事關我之前無論整嚫咩蛋糕都比較實，所以都有少少驚，怕成日都浪費材料。
 
 

鹵水拼盤

        早前 Winnie 俾雞蛋我嘅時候，佢話佢媽咪整咗鹵水蛋，於是我就諗起我之前都買咗包鹵水料都重未用，好，就試吓整鹵水啦。

        我一直都以為整鹵水要逐樣材料執藥咁執，但原來有現成鹵水料賣，一包有齊哂所有香料，好方便。

 

材料：
急凍雞下脾
急凍火雞腎
雞蛋

調味料：
鹵水料
生抽
老抽
鹽
冰糖

        先將雞脾同雞腎解凍、洗淨，之後將雞脾部份皮剪去，一來可以健康啲，唔會太肥膩，二來可以令雞肉露出於鹵水中，方便上色同入味；之後就將雞脾同火雞腎汆水，並用凍水沖洗，因為去除咗多餘嘅油份就更加容易上色。雞蛋預先烚熟、去殼；喺火雞腎同雞蛋表面界幾刀，同樣方便入味；鹵水料用篩盛起略洗，跟住用煲湯魚袋裝起備用。

   
    煲滾水，先將鹵水料放入滾幾滾，之後加入調味料，當冰糖完全溶哂，拌勻後就可以放埋所有材料落煲，大火煲番滾後就轉用慢火慢慢滾，其間可以略為轉動材料，等佢可以均勻上色，再煲多約 10分鐘後就熄火，等佢自己慢慢鹵入味，所以我都隔咗 3 日後先食，當然，攤凍咗之後就要放番入雪櫃啦，以免變壞。到食之前再滾番熱幾分鐘就得。

        味道都 OK，不過始終呢煲鹵水好新，所以唔會太好味，我睇過網友話煲鹵水係越煲越好味，到做成鹵水膽之後就最正！不過今次包鹵水料可能太多甘草，所以有少少甘草嘅苦澀味。

Note:
食之前我每日都喺雪櫃度拎出嚟翻一翻啲材料，可以更加均勻入味同上色。

有驚喜！

        早前吉之島會員九折購物日時喺 $10店度買嘅香熏座，前幾日卒之開咗嚟用，估唔到個味道都唔差喎，淡淡哋，唔會太濃。

        擺喺洗手間度不但可以用嚟辟味，仲可以作為小小嘅裝飾擺設，真係幾好，$9 就真係抵玩啦！

平安包

        我咁大個仔都係第一次見同食平安包。

        呢個平安包係 Gordon 個 friend 喺長洲度買俾佢嘅，咁 Gordon 就話分一半俾我，希望我都可以攞個意頭，去除霉氣咁話，唔通佢都知我近排好黑仔？點都好啦，真係好多謝佢咁有心。

花生眉豆排骨粥

材料：
排骨
眉豆
花生
麥皮
百搭米

醃料：
鹽
糖
生抽
粟粉

        排骨洗淨，用醃料醃半個鐘後，加粟粉撈勻，備用；花生去衣，與眉豆一齊洗乾淨，用水蓋過面浸過夜；米洗淨備用。

        煲滾水後，將米先放入煲內滾一陣間，之後就將其餘材料一齊放埋入去，煲滾後轉中火再煲多 10 -15分鐘，就可以放番落個真空煲度，食之前再煲多十零分鐘，加鹽調味就食得。

        本來我就無用麥皮嘅，但因為當我將個內鍋由真空煲度拎番出嚟煲番熱啲粥時，發現粥面有一層薄薄嘅豬油，怕肥嘅我就即刻落啲即食麥皮落去幫手吸走啲油，除此之外，亦令到啲粥可以變得綿啲，真係一舉兩得。

估唔估到係咩嘢嚟呢？

        真係好靚呀，而且仲係粉色系列，唔會太俗，估唔估到係咩嘢嚟呢？

        有去過台灣嘅朋友應該認得出，就係八達通卡貼喇。我之前去台灣都有買到兩張，不過今次呢張係阿瑩送俾我嘅，佢同阿馳行街果陣見到呢款，又知我鍾意音樂，所以就專登買呢張音符卡貼送俾我。

        聽番阿瑩講，應該仲平過喺台灣買，因為如果無記錯的話，好似係台幣 $100 / 5張，即約港幣 $5 張，但佢喺葵涌買就 $10 / 3張，佢話見過荃灣南豐中心仲平，叫我自己得閒行開可以睇吓，後尾我經過南豐時見到果然仲平啲，賣 $10 / 6張，但質數係點就唔知喇，因為我都係行過見到，無停低仔細望清楚。

乜呢輪咁黑仔 o架！

        今朝用完樽柚子蜜之後，打開雪櫃準備放番入去時就跣手跌落地打爛咗，之後就梗係即刻做善後工作啦，攪掂哂去洗手時，點知原來隻手黐滿哂啲好微細嘅玻璃碎，雙手一摔，咁就界損埋隻手，仲不停流血 o添！好彩都只係流咗一陣間咋！

        其實我不嬲都好怕拎樽柚子蜜，個樽又大又重，我隻手就又乾又唔夠大，好難將佢揸穩，卒之今日真係打爛咗，樽新開嘅柚子蜜只係用咗兩次咁就報銷喇！

        呢輪都唔知做乜咁黑，無論私人學生同中心嘅學生都有唔學；部 Hi-Fi 又 read 唔到 CD；部手提個喇叭又壞埋，有電話入都唔響；仲接二連三有血光之災 o添，唉！

冬菇栗子炆冰豆腐

        今日係佛誕大日子，喺呢度同大家講聲「阿彌陀佛」！願眾師兄都好似顧家煇同林夕最近嘅新作咁 "佛誕吉祥"！

        講開呢首佛教歌曲，喺電視片段睇到覺光法師同各歌手握手道謝時非常開心，梗係啦，難得娛樂圈啲人都咁有心，為佛誕呢個大日子作首新歌噃。

        今日既然係佛誕，我當然要介紹個齋菜啦，就係栗子冬菇炆冰豆腐喇。

        今次試吓用潮州豆腐乾嚟整冰豆腐。

 

材料：
冬菇
栗子
潮州豆腐乾
薑片

調味料：
素鮑汁
鹽
糖

        豆腐乾洗淨後預先一日放上冰格，雪成冰豆腐。第二日解凍後將佢切細件；栗子去衣去殼、洗乾淨，然後用真空煲煲滾水，放栗子落去煲腍，之後瀝乾水備用；冬菇用凍水加糖浸軟，洗淨、去蒂備用。

        燒熱油，先爆香薑片，跟住放栗子落鑊炒，加入少少水，用慢火慢慢煮，過 5分鐘後加入冬菇及調味料繼續用慢火炆，當栗子炆到有8 成腍身時，就加埋冰豆腐落去一齊煮。當冰豆腐顏色變深，且醬汁煮成稠身後，就代表 OK 喇！

        平時我係用硬豆腐嚟整冰豆腐嘅，不果今次就用潮州豆腐乾，事緣每年大年初一果日，我哋所有親戚都會去伯伯屋企拜年、食飯，但係因為近排伯娘身體唔係咁好，老表 Tony 都唔想佢煮咁多人飯煮得咁辛苦，所以今年專登 order 咗個盆菜，等佢可以唔駛煮飯，輕鬆啲。而表嫂 Polly 就另外準備咗啲冰豆腐，用嚟加落去盆菜度索吓汁，話好好食喎，當然，我唔會知味道如何啦，因為初一食齋嗎。不過我就見佢唔係用腍豆腐或硬豆腐去做冰豆腐，而係用呢隻潮州豆腐乾，佢話見出面食肆都係用呢隻，所以跟住咁買喎。於是今次我都有樣學樣，果然好好多，因為呢隻豆腐乾比較硬身，煮嘅時候兜來兜去都唔會咁易爛，仲有好香嘅五香味 o添！