Kestrel's Blog

2009年1月1日星期四

椰香粟米飯

今晚食蒸水蛋同埋啲隔夜餸，見無新鮮蔬菜，所以就用咗之前煮芋頭用唔哂嘅椰漿同噚日買嘅超甜粟米，煲咗啲椰香粟米飯。

材料：
三色米 (白米、紅米、糙米)
新鮮粟米
椰漿

米洗乾淨後用水浸一個鐘，之後放入電飯煲內，加水及椰漿，再喺米面鋪上粟米，就可以照正常程序煲飯，話咁快十零分鐘後就可以食到一碗熱辣辣、充滿椰香嘅粟米飯啦！

最衰睇相只係得視覺享受而無臭覺享受啦，如果唔係，你哋一定聞到好香嘅椰漿味，引死你哋啊！嘻嘻！

蒸水蛋

材料：
雞蛋
凍滾水
雞粉
蔥花

調味：
甜豉油

雞蛋拂打成蛋液，加入一倍半份量嘅凍滾水及雞粉拌勻 ( 睇書學番嚟，如果無清雞湯就用雞粉開水代替 )，之後用錫紙包好，然後拎去蒸，到差唔多熟時就可以熄火，灑上蔥花，用煲內嘅溫度將佢焗熟，咁樣整會滑啲，唔會熟過頭，幾分鐘後就可以拎出嚟，加少少甜豉油喺面，就可以上枱 lu。

今次碟蒸水蛋整得好好，好滿意，因為非常之滑，而且學阿蘇話齋，拎出嚟果陣係 "震吓震吓" o架！

媽咪以前教落，蒸水蛋一定要用凍滾水，唔可以用生水，如果唔係就蒸唔成。至於水嘅份量就係 1:1 或 1:1.5，視乎自己鍾意碟水蛋嘅結實程度。

粟米紅蘿蔔猴頭菇煲豬腱

材料：
超甜粟米
紅蘿蔔
猴頭菇
豬腱
陳皮
蜜棗

粟米去衣去鬚後洗淨、切件；紅蘿蔔刨皮後用滾刀切件；猴頭菇剪去底部，然後洗淨、汆水備用；豬腱洗乾淨，汆水後沖凍水，去除多餘血水；陳皮用熱水浸軟後刮瓤、洗淨；蜜棗洗淨備用。

煲滾水後，將所有材料放入煲裡面，煲約十零廿分鐘度就可以放落真空煲度，晚飯飲湯之前再煲多十零分鐘，加鹽調味即可。

今日煲啖湯非常之甜，可能係因為啲粟米真係超甜，加埋紅蘿蔔同蜜棗，就甜上加甜啦！媽咪以前話過俾我聽，啲粟米衣同粟米鬚都有食療效用，所以記得唔好掉咗佢，洗乾淨後一齊放埋落去煲。

講開 "舊史"，媽咪好多時煲嚫粟米湯都會留起一支唔切開，放埋喺啲湯度一齊煲，不過就喺放入真空煲之前，將果支完整無斬開嘅粟米撈番起俾我即刻食，因為咁樣支粟米嘅甜味仲可以保留喺裡面，唔會煲哂出嚟落啲湯度，所以特別滋味。今朝煲湯時都好懷念果刻嘅情景，所以我都同以前一樣，喺放入真空煲之前偷食咗一舊粟米，好甜、好開心，好似媽咪喺我身邊陪我一齊食咁開心！

P.S. 因為我打中文打得好慢，所以呢篇嘢打咗 "兩年" 啊！

2008年12月30日星期二

椰香芋頭煮臘味

材料：
芋頭
臘腸
膶腸
蔥花

芡汁：
椰漿
粟粉

臘腸、膶腸沖水洗淨，蒸熟後切片備用；芋頭批皮，用滾刀切件。燒熱油，放芋頭落鑊兜炒至微焦黃色。

加入少少水，用最慢火將佢煮腍，到差唔多腍嘅時候就放埋啲臘腸、膶腸落去一齊煮，之後就加粟粉落椰漿度，攪拌成芡汁，倒落芋頭度煮番滾就 OK，最後灑上蔥花，掂哂！

我今次煮呢個餸時一啲鹽都無落到，但都已經夠哂味，因為啲臘味帶有鹹味，所以如果好似我食得比較清淡的話，就唔駛額外再加鹽喇！另外，因為我無將啲芋頭預先炸過，所以煮起上嚟比較容易爛，下次試吓先炸後煮先！不過，我始終有炸嘢恐懼症，一來唔係咁好煎炸食物，二來炸完嘢之後，都唔知點處置啲於油好！

2008年12月29日星期一

吉之島特價日

真係激鬼死人啊！！上兩個禮拜先至喺吉之島超市買完嘢，J 咭會員有九折優惠，但係我無 J 咭，所以要照原價買。點知佢呢個禮拜連續四日又再做特價，減價貨品仲照價再九折 o添，仲係人都有得折，唔駛一定要有 J 咭，@$&^@$^)@………

我係一個典型嘅香港人，一於唔執輸，逛多轉睇吓有無嘢啱先，呢啲就係我今日買嘅嘢：

朱古力同 Wasabi 係喺超市買嘅，朱古力 $12.5 兩件再 9 折，都幾抵喎，本來我想買埋金莎 o架，點知一件都無，俾人掃清哂；Wasabi 就 $9.9 再 9 折，同佢隻自家品牌 Top Value 一樣價錢，咁就梗係買 S&W 喇！另外仲買咗我嘅至愛蔥油餅做 lunch。隻碟同個小型焗盤就喺 $10 店買，仲買咗盒白檀線香，用嚟裝香俾觀音菩薩用嘅，$9 / 300支都抵用呀，媽咪以前買落嘅檀香都要 $18盒，仲無咁多支 o添，可能個質素同香味好啲啩。

我其實最想就係買支碌麵棍，但係樂富間 $10 店無得賣，咁就無辦法啦！到真係要用時再睇吓撞唔撞啱特價日啦，都係差 $1啫！

今日都總算有少少得著，如果上次個兩盒味噌留番今日先買就仲抵！

焗豬排飯

早排因為用繳費靈交咗張新帳單，所以收到張美心MX 免費焗豬排飯套餐 coupon 一張，前幾日卒之去咗美心MX 食喇。

睇個樣都唔差喎，仲好吸引 o添！就好似 Lily 咁講，美心個焗豬排飯啲茄汁最正、夠多，唔似 "大快樂" 果啲咁乾身。

雖然唔係金玉其外，敗絮其中，但係啲豬排就真係有啲失望喇！剩係睇佢個款已經 feel 到好乾、好嚡，成舊豬排都 "白璽璽、乾爭爭" 咁，食落口就固然係意料之中啦，for me 最難頂嘅係佢夾住層肥膏，食落口啖啖油…………

至於個汁，對於一般人嚟講應該係幾好食嘅，但我自己因為不嬲都食得比較淡，所以略嫌個汁過酸同過鹹，如果淡番少少就啱啱好喇！

2008年12月27日星期六

豆酥四季豆炒雪貝

材料：
四季豆
雪貝
薑茸

醃料：
素鮑汁
辣椒汁

調味料：
糖
鮮醬油
豆酥醬

呢包就係雪貝喇！

包裝袋上面寫住最好用凍水浸 60 分鐘，食果陣時口感會更滑。

講番個餸點煮先，雪貝預先用凍水浸 1 個鐘，之後盛起、瀝乾水，用醃料醃至少一個鐘；四季豆撕去兩側嘅 "筋"，然後洗淨、切段。燒熱油，爆香薑茸，將四季豆落鑊炒一炒，之後加入少少水，冚蓋煮至腍身後，加埋雪貝同調味料落鑊，炒多幾炒至雪貝熱透，再灑上麻油就可以上碟。

P.S. 雪貝係蒟蒻製品，所以唔駛刻意炒熟，炒番熱就得 o架喇。另外，蒟蒻製品最好預先用醃料醃過，因為單靠煮熱時落調味料係好難入味，食落口會 "淡茂茂"，乜味都無，醃過之後就好食好多。

蝦子薑蔥撈麵

材料：
粗蛋麵
薑
蔥
蝦子

調味料：
鹽
糖
生抽
蠔油

芡汁：
粟粉
水

蝦子先用白鑊炒香備用；薑同蔥洗淨、切絲；煲滾水，落麵餅煮熟，盛起、瀝乾水放碟上，用少少麻油撈一撈，除咗可以增加香味之外，仲可以令到啲麵唔會黏埋一舊，方便撈勻汁料。燒熱油，快手爆香薑蔥絲，盛起備用；跟住用番爆過薑蔥嘅油炒一炒蝦子，之後落調味料，煮滾後埋個薄芡，然後將蝦子蠔油汁淋喺麵上，再放薑蔥絲喺面，食嘅時候將所有材料同麵一齊撈勻。

呢個撈麵非常惹味 o架！

P.S. 上次睇完「蘇Good」阿蘇教用叉將啲蔥絲整鬈，見幾得意，今晚就貪得意試吓，果然真係得 o架！