草莓果醬 Strawberry Jam

        上次整完士多啤梨朱古力蛋糕送俾 Ada 後，仲有好多士多啤梨剩咗喺度，所以今日我就用咗佢嚟整果醬。

材料：
士多啤梨        約 500 克
糖                  150克
檸檬              1/2個

- 將士多啤梨乾洗淨，用抹手紙抹乾，切去葉及蒂。

 

 

 

- 之後將士多啤梨切粒，加入糖拌勻，放入雪櫃醃過夜。醃過夜之後，士多啤梨會
  滲出好多果汁。

 

- 將半個檸檬搾汁，連同士多啤梨果肉及果汁一齊放入煲內。

- 用慢火加熱，將果汁煲滾，一邊煮、一邊攪拌。

- 煲滾後會慢慢起泡，繼續邊煮邊攪拌直至所有泡沫消失。

- 當果肉同果汁煮到濃稠，而且變得通透、有光澤時，就代表差唔多煮好。

 

 

 

- 用手指喺匙羹上面嘅果醬劃一直線，如果見到果醬被分開之後並無立即黐番埋
  一齊，咁就代表果醬已經煮好。

- 熄火後就可以將果醬入樽。

食譜及做法係跟 blog 友天拿‧公嘅士多啤梨果醬嚟做。

依家啲士多啤梨好平，呢兩盒夾埋都只係賣 $15 咋，不過

之後我喺街市度都見到有得賣，仲只係賣 $10

兩盒㖭咋！蝕喇、蝕喇，唔制呀！！

 

 

300 克多啲嘅士多啤梨，可以煮到兩樽細裝果醬。

Notes：
- 除咗檸檬汁之外，我自己仲刨埋啲檸檬皮茸落去一齊煮，所以果醬多咗一種好清
  新嘅味道。

- 因為士多啤梨比較酸，所以最好都係用砂糖，今次我用咗黃糖整，所以果醬味道
  唔夠甜。

- 玻璃樽喺用之前，要預先消毒，因為糖份好高，容易滋生細菌。

- 果醬攤凍後要放入雪櫃內儲存。

- 關於果醬嘅煮法及形成，可參考天拿‧公嘅橙皮果醬內嘅《廚房生物學》。