紅莓朱古力雪球 Cranberry Chocolate Snow Ball

除咗 Winnie 之外，身邊人大都鍾意食朱古力，尤其係細路，所以整嚫糕餅請人食都多數係整朱古力味。

Snow ball 算係易整嘅曲奇之一，無乜太大難度。今次整嘅朱古力味雪球同上次有少少分別：上次係整好原味雪球之後再滾上朱古力粉；今次就直接將朱古力粉加入粉料內一齊搓成糰，仲額外加埋酒漬紅莓乾㖭。

 

材料：

紅莓乾     15 克

君度橙酒   適量

低筋麵粉  120 克

朱古力粉   30 克

杏仁粉     30 克

糖霜   40 克

鹽    少許

牛油   60 克

固體菜油   30 克

- 紅莓乾剪碎，之後加入適量橙酒醃過夜。

- 除牛油及固體菜油之外，將其餘材料全部混合好。

- 將凍牛油及固體菜油加入粉料內，用手指將油捽入粉料內，然後輕手揉成麵糰。

- 用保鮮紙將麵糰包好，放入雪櫃雪 2 個鐘。

- 拎出麵糰，分成每個重 10 克嘅小麵糰，分別搓圓後放上已鋪牛油紙嘅烤盤上。

- 放入已預熱至 180 °C 嘅焗爐內焗約 18 - 20 分鐘。

- 出爐後趁熱灑上糖霜（份量外），攤凍後再灑多少量糖霜即成。

以上材料份量可做雪球約 30 粒。

 

咁樣整法嘅 snow ball，朱古力味當然濃好多，再加埋紅莓乾，
口感多一種層次。

 

細細粒，容易食，一啖一粒，啱哂小朋友！

Notes：

- 加入少量固體菜油可令成品更鬆脆，亦可全用牛油製作。


- 大多數食譜都會建議將凍牛油先切粒，然後再捽入粉料內，但我自己就習慣將整嚿牛油
  加入，相比起牛油粒，保冷能力更加高，麵糰無咁易軟化。


- 若紅莓乾並無完全吸收哂所有橙酒的話，必須將紅莓乾徹底瀝乾後才放入麵糰內。


- 如果因天氣太熱而導致搓好嘅小麵糰軟化的話，可以先將整盤麵糰放入雪櫃度雪約 15 - 30
  分鐘，等到麵糰再次變得硬身後才入爐焗。


- 想方便快捷的話，可將所有材料直接放入食物處理器內打成麵包糠狀，然後再用手揉成
  麵糰。


- 大家亦可參考番三色雪球食譜，用一份麵糰做出多種口味嘅方法。