2012年11月6日星期二

馬拉盞燜雜菜 Sayur Lodeh

        早前 Ernest 媽咪教咗我煮一個印尼式燜雜菜,佢話呢個幾好食,個食譜係新加坡前總理李光耀嘅媽咪所撰寫,我都好有興趣試吓呢個食譜,因為我都係第一次見到煮咖喱會落枝竹、黃芽白同豆角,可能呢個煮法都係好似娘惹菜。

        因為有啲材料我屋企附近個街市同商場都買唔到,所以要等到有機會買齊哂所有材料先可以開工,卒之禮拜日煮咗喇!
 
       Base on 個原食譜煮好個汁料,Ernest 媽咪話加佛手瓜一齊煮都好食,好,就照做吧!

 

主材料:

娃娃菜
四季豆
枝竹
豆卜
發酵黃豆餅
紅蘿蔔
佛手瓜
蝦米
洋蔥
椰漿

 
香料:

石栗          5
乾蔥頭      20
蒜頭          2
辣椒乾      10
馬拉盞      1 湯匙
黃薑粉      1/4 茶匙
南薑          1 小塊
  
- 娃娃菜及四季豆洗乾淨;枝竹用水浸軟後沖洗,之後全部切件。
 
- 豆卜沖洗後開邊;黃豆餅切厚片;紅蘿蔔同佛手瓜刨皮後切塊。
 
- 蝦米洗乾淨,用清水浸軟後略切碎;洋蔥去衣後切件。

- 處理香料,辣椒乾去核,用熱水浸至軟身後切細;石栗略拍碎。
 
- 乾蔥頭同蒜頭去衣後略切碎;南薑刮皮後略樁碎。

- 除黃薑粉同南薑之外,其餘香料全部放入石盅內樁爛,再加埋黃薑粉同南薑撈勻。

- 燒熱油,將黃豆餅兩面煎香至金黃色,盛起。

- 咖喱料落鑊,用慢火爆香,之後加埋蝦米同洋蔥一齊兜炒。

- 先加入 5 湯匙椰漿,兜炒至大部份椰漿被材料吸收。
 
- 放蔬菜及枝竹落鑊,不斷兜抄幾分鐘,然後將其餘椰漿倒入,繼續兜炒至椰漿煮滾。


- 最後落埋黃豆餅同豆卜,用中慢火燜煮約 10 – 15 分鐘至蔬菜熟透入味,加鹽、糖調
  味即可上碟。

 

呢塊就係發酵黃豆餅喇,喺專買東南亞食材嘅店舖有售。
Ernest 媽咪話
可以就咁煎香
嚟食,不過要事先用鹽、薑蓉同黃薑蓉醃好。







呢包係石栗,英文係 Candlenut,上網睇過資料,真係

用佢做蠟㗎!Ernest 媽咪話用原粒杏仁
代替都可以,效果都係差唔多。







係咪覺得我好犀利呢,連石盅都有一個,咪係因為我老竇囉!之前佢話北上時
見到有石盅賣,好鬼死平,佢話下次再上去時買過落
嚟,我話買乜鬼呀,
未得嚟重過咩,用攪拌機就得啦!點只有次佢真係買
咗返
嚟,記得佢好似話 $10 都唔使,咁又真係幾抵玩喎,呵呵!

 

 


 


材料豐富,香濃又唔油膩,可選擇不同蔬菜一齊煮,
跟原食譜加入鮮蝦都得!

 

 


 

Notes
- 原食譜係用 500 椰子肉加 1 公升清水製作椰漿,我自己就用咗一罐細椰漿加適
  量清雞湯及水代替。- 如果無石盅的話,可以將咖喱料放入攪拌機內攪至細碎。
 
- 食譜上寫住,辣椒乾可用 1 湯匙辣椒粉代替。
 
- 馬拉盞即蝦膏。
 

 

5 則留言:

  1. 哈哈 ! 我都有一個石盅,盅少少嘢咪可以攞出黎用囉 ! 洗機麻煩D嘛 ! 而且盅和攪的效果唔同架 !
    [版主回覆11/08/2012 02:38:57]係呀,整少少嘢時我都會用石盅,多就一定用攪拌機喇!不過自己樁就攰好多。

    回覆刪除
  2. 咁多材料煮一個餸好煩喎...同埋好多材料都係第一次見
    我都想買個石盅玩下
    [版主回覆11/08/2012 02:40:37]唔煩,全部手板眼見功夫,係嘥好多時間去準備啫!
    買啦!

    回覆刪除
  3. 緊張大師-小女人2012年11月8日 上午8:51

    呢個菜應唔會好辣,因為印尼咖喱椰香味重辣味唔多,幾好喎,材料除了蝦米都可做素菜喎
    [版主回覆11/11/2012 02:12:30]係呀,不過食全齋就唔得喇,因為有蝦醬、蔥同蒜。

    回覆刪除
  4. 咖喱用枝竹, 黃芽白豆角好多都有啦...
    石栗花園街檔口都有.連埋殼既...偏偏地咁一粒粒.
    [版主回覆11/11/2012 02:11:10]咁我無豆姐妳咁高造詣兼見識廣博嘛!
    我喺街市買返嚟已經剝咗殼。

    回覆刪除
  5. 發酵黃豆餅????呢边–定冇...唔駛試都得喇!
    [版主回覆11/11/2012 02:08:53]妳即管試試睇吓有冇東南亞鋪頭喇,又或者大型超市可能有呢!

    回覆刪除