2014年3月20日星期四

花旗參雪梨煲瘦肉湯

        自從唔食得涼嘢之後,自己都會好小心飲食,費事食完就即刻痾,喺屋企都好啲,喺街的話就真係煩,如果搭緊車嚮屯門公路塞緊車的話,咁就慘囉,嗰程車就好似搭咗十年咁耐,搭極都未到!
 
        所以呢六、七年嚟都謝絕涼茶呢樣嘢,洛神花就更加唔敢再掂㖭呀!之但係我又好鬼鍾意食辣嘢,又唔飲得涼茶,呢排仲成日生飛滋,脷面、脷底、嘴唇接住咁嚟,都係要攪一攪佢。用個溫和少少嘅方法,雪梨加花旗參煲湯吧!雪梨清潤、花旗參清熱,應該會有啲效啩!
 
 

 原本係諗住用雪耳嚟煲嘅,點知搵極都搵唔到包雪耳,
應該係用哂又唔記得買番啦!咁見到
猴頭菇咪順手嚟煲囉!
 
 
 
 
 
 
花旗參記得後下,大滾 5 分鐘就 OK,煲得
太耐的話,清熱效果就無咁好。
 
 
 
 
        講開煲雪梨,中醫成日都話連皮煲,因為雪梨皮都好有益,如果有睇蘇施黃個節目的話,大家應該會記得佢講過一句,唔連皮煲雪梨的話,不如索性唔好煲!之但係我就好忌連皮煲,皆因蘋果同雪梨果皮表面都唔知有啲乜喺度,擺耐咗之後就會變成一層油喺面,摸完隻手都勁油,即使用洗潔精洗完隻手都仲係有少少 ,唔知係咪就係一般人所講,用嚟煲護水果嗰層蠟呢!!我已經專登買隻聲稱用椰油製造嘅洗潔精,話可以入口,用嚟清洗水果同 BB 食具都無問題,但係洗過之後都一樣又油又,所以我一直都唔敢連皮煲囉!
 
 

10 則留言:

  1. 依家乜都有防腐劑,我朋友教我用Baking Soda 來浸洗蔬果,話可以洗去有害物質喎。

    回覆刪除
    回覆
    1. 嗯,係咪真呀?妳有無試過?

      我怕水果會有 "朕" 鹼味,同埋會唔會將果肉變腍呢?原理好似鬆肉粉。

      刪除
    2. 我依家係用緊呢個方法呀,用水冲一次D蔬果,用二茶匙Baking Soda 開二公升水,浸10分鐘,之後用清水徹底洗淨就得了,ok喎,感覺幾好呀。

      刪除
    3. 咁等我都試試先!

      多謝分享呀!

      刪除
  2. 回覆
    1. 即係將生果放水內浸一段時間嘛?

      刪除
  3. 呢篇文章應該幫到你 ;)

    http://www.mingpaofun.com/healthnet/tor/showArt.cfm?aid=248

    回覆刪除
    回覆
    1. 嘩,好多謝班太妳呀,呢篇文章超正,疑團已經解開!之但係,大陸的處理方法唔知又可唔可靠呢!?

      刪除
    2. 如果唔係天然蠟, 係用工業蠟, 用紙巾抹個蘋果, 張紙巾會有淡淡嘅顏色.

      刪除
    3. 係,咁驚!?下次抹一抹個蘋果睇睇先!

      多謝哂班太指點迷津!^^

      刪除