2014年3月9日星期日

麵包機

        卒之都係死死氣買咗部 P 仔呀!
 
        其實一直都掙扎緊買唔買麵包機好耐,因為其實依家用部 food processor 做前期搓麵糰功夫都 OK,只不過係有時麵糰太濕的話就會呢咁 hea,甚至捲入機內,所以如果能夠整唔係太濕嘅麵糰的話,可以唔使買住。但係好多時候都無時間整包,你知啦,整嚫一次包起碼都要預成 34 粒鐘,天氣凍的話仲唔只㖭!加上最近頭痛發作頻密咗,有時明明無事,但出氣出力搓完包之後就即刻嚟料,所以都唔敢 輕舉妄動
 
       近排都比較黑仔,好多學生都因為準備中六文憑試、移民外國、大學畢業後出嚟做嘢無時間練琴等原因而停學,所以近呢幾個月都入不敷支,所以即使係要買麵包機的話,都應該係買部本地貨玩住先。但點解突然又會買部咁貴嘅呢!
 

 
 
       話說有日收到我張 credit card 發卡銀行嘅推廣電郵,關於獎賞積分,睇完之後,突然間諗起踏入 2014 年之後都未睇過新一年嘅換領禮品,於是即刻走入去睇吓。我嘅目標當然都係電器啦!一 click 入去就見到部「Panasonic」麵包機喇!

 
        銀行都係跟「信興」個官方價 $2380 定價,因為我持卡年期差唔多有廿年,所以可以得到最高 discount 76 折,折後變成 $1808,再用埋我僅有嘅 $620 積分,所以我最終俾 $1188 就攪掂,即係半價囉!本來我諗住儲多啲積分先至換㗎,拎少啲真金白銀出嘛,但係諗深一層,我儲幾年先得嗰幾百分,就算過多幾個月都唔幫得幾多,加上佢又寫住換完即止,呢部機我估都應該會幾 hit、幾多人換。再者,以前媽咪喺度時,買嘢都好少買名牌,唯獨是買電器就好捨得,尤其係貴價電器,佢話買平價貨可能用一段短時間就可能已經壞,又要買過部新,買得幾次,條數都喺番度,反而買部貴啲、好嘅仲可以用好一段日子都唔會壞,計落仲化算。諗到呢到,咁咪即刻 redeem 咗佢囉!
 
 
 
 
 
        平時拎禮品時係去啲銀行禮品換領中心度取貨,但呢部麵包機係要直接去「Panasonic」個 showroom 度拎。因為如果部機有事的話,要七日內拎返去 showroom 度換,所以趁今日無乜嘢做就即刻試試部機,呢個就係個試機包喇!


18 則留言:

  1. 我都儲緊分想換呢部機呀﹗

    回覆刪除
    回覆
    1. 加油呀,希望等妳儲夠分時仲有啦!

      刪除
  2. 呢部機正呀,我好中意呀,不過我覺得太貴,唔舍得買……我見人地ge p仔麵包機整出黎d包包真系好靚!

    回覆刪除
    回覆
    1. 咁妳都用信用卡積分換啦,慳好多呀!

      刪除
  3. 有左部機你咪可以偷懶唔搓包囉^^"

    回覆刪除
    回覆
    1. 都唔係嘅,其實主要都係跟之前一樣,唔想做前期功夫啫,只不過有咗佢之後,即使真係無時間整包而第二朝又要一早出門時就真係大派用場!我主要都係當佢係搓麵糰機,之後工序都會繼續人手及入焗爐焗,唔想俾佢硬性規定咗個食譜。

      刪除
  4. 咁個OFFER都幾抵喎,而且你以後整包就方便啲^^

    回覆刪除
    回覆
    1. 如果我有多啲分的話就更加抵呀!最正就係夠哂積分免費換啦!

      刪除
  5. 回覆
    1. 點解咁講?我由初級到文憑級都教,男女老幼通殺㗎喎!

      刪除
  6. 好羨慕您有呢架机呀>=<。

    回覆刪除
    回覆
    1. 點解呢?妳有興趣都可以買番部哦!

      刪除
    2. 興趣我一定有,但你都話貴喇,更何況我係“無業遊民”,點買得起呀:-P

      刪除
    3. 咁妳可以考慮一下好似我咁用信用卡積分換啦!或者遲少少睇睇有無朋友二手機啦!

      刪除
  7. 係咪P5呀,心想事成,有部機一定係好幫到手.

    回覆刪除
    回覆
    1. 咩係 P5 呀?總之係最新型號的一部,即係妳想換嗰部囉,可以整果醬、朱古力、mousse、焗蛋糕、整 scone …………

      刪除
  8. 得我一條友食,所以遅遅也不買P仔!

    回覆刪除
    回覆
    1. 點解?我都係一個人啦,有咩要考慮呢?

      刪除