2015年5月13日星期三

清補涼栗子節瓜湯

        絕大部份時間我都只會係煲齋湯,對於好多人嚟講,如果煲齋湯的話,可能會勁落蜜棗增加甜味,但我自己就唔會咁做,而且已經無用蜜棗好耐,成日都形住蜜棗唔知係咪有加糖製過。

        想啖湯夠甜的話,我通常都會落紅蘿蔔、粟米、栗子或粉葛,有時就會加紅腰豆同三角豆一齊煲,都可以增加一定甜度,但始終最重要嘅一點係:所有甜味材料必須凍水落煲。因為食材嘅甜味物質只會溶係凍水內,而我自己就習慣再浸多一段時間先煲,確保大部份甜味物質溶於水內,自己都已經做過實驗,材料凍水落煲跟水滾後先落料,甜度真係差好遠。
 
 

今晚就煲清補涼栗子節瓜湯,可惜啲栗子唔靚,
有好幾粒都係爛嘅,仲要唔係好甜。
 
 
 
 
 
        依家個 "雞肋" 街市買唔到栗子,所以噚日去大角嘴教琴時就順便喺旺角街市買埋返嚟。諗住今日都已經會用嚟煲湯,所以就無理到佢,由佢原袋掛喺廚房通風處就算,今朝入廚房時,隔住個膠袋都見到有條肥蟲喺粒栗子度爬出嚟,咁我就梗係立即處理佢啦,點知打開個袋一睇,立即毛管戙,大部份栗子都爬哂啲白色肥美蟲蟲出嚟呀!!!!
 
 
但仔細睇清楚,發覺全部肥蟲都唔郁,於是就用手指輕輕摸吓佢,
發覺非常之硬,原來唔係蟲嚟㗎,係啲栗子發哂芽,真係
第一次見咋!唔知係咪因為天氣熱,加上我又無
解開袋口,所以變得又濕又暖,製造
個好環境俾啲栗子發芽呢!?
 





入爐焗完之後,外殼同衣都變得乾脆,
裂開哂口,好容易就可以剝殼喇!
 





煲呢個湯超快手,浸好洗淨哂啲藥材,節瓜
刮皮洗淨就攪掂,無得幾多功夫做。
 





懶開有條路,連餸都超簡單,整咗個泡菜青瓜炒素雞。
 
 
 
 

10 則留言:

  1. 我依家都會有時煲素湯,因為用豬肉會煲出油來。

    回覆刪除
    回覆
    1. 係㗎,所以我唔煲肉湯除咗係唔想食肉之外,就係懶洗煲呢!! ^^"

      刪除
  2. 有人說..種子類食物如豆類,發了芽更有益處更好呢﹗ 所以豆類煮前都要先浸。

    回覆刪除
    回覆
    1. 係?原來發過芽更加好㗎,真係要多謝妳跟我分享呢個資訊哦! : )

      刪除
  3. 我覺得煲素湯落D果仁就甜好多~~

    回覆刪除
    回覆
    1. 係㗎,不過會出油,而我又懶到爆,唔想用洗潔精洗煲,做得少啲得少啲,所以比較少落果仁煲! ^^"

      刪除
  4. 出咗芽仲食唔食得咖?

    回覆刪除
    回覆
    1. 我唔理喇,照食,如果唔係咪好浪費,而且我又會少咗樣餸!不過樓上位 blog 友話發過芽仲有益喎!

      刪除
    2. 係呀﹗ 不過[薯仔]例外。

      刪除
    3. 我都有啲啲驚發芽係有毒呢!!

      刪除