2015年5月14日星期四

維修

        上個禮拜開始,喺正我間房個頭殼頂搭咗個棚喺度,都唔知做乜,後尾開信箱先發現原來管理處放咗張 notice,呢幾個禮拜要維修外牆。其實早就應該要整啦,見到啲紙皮石同石屎都爆哂出嚟好耐,我成日都好驚有朝一日會跌落嚟打爆我個窗啲玻璃兼跌落街砸傷途人。
 
 

天氣開始越來越熱先嚟整外牆,攪到我都唔敢開窗,仲要拉埋窗簾,
費事工人到我房內情況嘛,所以間房變得又焗又暗,唯有
趁工人收咗工或唔開工嘅時段先開窗唞吓氣咋!

 
 
 
 
 
        講開維修,我哋個屋苑卒之都俾房屋署抽中做強制性驗窗同驗樓,過多幾個月後就會發出正式信件,到時唔做都唔得。驗樓就唔理得咁多喇,都係等業主立案法團開會傾好哂之後就跟大圍做啦,至於驗窗就要自己跟進喇!唉,永遠都係越窮就越見鬼,又會兩樣同時間一齊嚟嘅,都唔知到時又要出幾多血喇!!
 
 
 

4 則留言:

  1. 係呀, 睇新聞講,依家香港的大廈,做維修的價錢好貴,億億聲。

    回覆刪除
    回覆
    1. 其實嗰啲係各承建商 "合作" 大包圍易啲中標,之後就開天殺價,實行劏啲業主一頸血,好無良!!

      刪除
  2. 大維修真係好煩咖,出錢不在講,最煩係成日要開會,有D人又不懷好意,想抽水,又D又唔想出錢,樣樣都投反對票,攪到鬧上差館,因阻延維修進度,法團又要請律師告那些人,出錢又係我們D業主,總之一個字"煩"。

    回覆刪除
    回覆
    1. 唔好話維修啦,早前我個屋苑因為實行最低工資而要加管理費,都可以攪到要警察到場先收到科,呢次要驗樓都應該又嚟一鑊甘,我都煩到爆呀!!

      刪除