2015年10月21日星期三

水瓜 & 浦瓜

        今朝一早起身過去同 RyanRylie 兩兄妹上堂,教完之後順便喺佢哋住個屋苑街市度買埋餸先返屋企。經過菜檔見到兩款好少見嘅瓜,印象中屋企附近個屋邨街市未重建之前都只係見過一、兩次有得賣,但我自己就真係完全未食過喇!我問菜檔阿姐呢兩款係咩瓜,原來一隻叫水瓜,另一隻就叫做浦瓜,阿姐話可以炒又可以滾湯,見價錢又唔係貴,兩款都係賣 $7 斤,所以各買一隻試試。
 
        講開啲少見嘅瓜,我記得細個時媽咪間中都會買一隻叫白瓜嚟炒餸,好似依家唔見有得賣嘅!?
 
 

上面嗰隻係水瓜,而下面嗰隻就係浦瓜,兩隻瓜
都好輕秤,居然夾埋一斤都無,只係 $6 咋!
 
 
 
 
 
 
另外買多隻紫洋蔥,再加埋屋企食剩嘅椰菜,落埋 XO 醬一齊炒,
浦瓜食落有點似食節瓜,但就相對比較腍;至於水瓜,無論
口感定係味道都極似絲瓜,依家絲瓜都賣唔平,
買水瓜嚟代替都得,仲唔使刨皮咁麻煩㖭!
 
 




之前都有 blog 友話過我去菜檔買菜仲有蔥送咁好,依家菜檔真係無蔥送咩
今次我喺呢個街市嘅菜檔都一樣有得送喎!買 $6 嘢就送咗下面嗰棵
比較粗啲嘅蔥,返到屋企先發現,原來去另一檔買咗 $16
都送咗上面嗰一大紮蔥,多到整蔥油餅都用唔哂啦!
 

 

8 則留言:

  1. 我上次在香港買菜都有蔥送喎。不過就無你送咁多,哈哈!

    回覆刪除
    回覆
    1. 係囉,其實依家都好多菜檔仲有蔥送呀!

      刪除
  2. 買菜送蔥呢家野,多或少係睇檔主而定,如果在大時大節的話,又可能唔送喎﹗
    所以唔可以一概而論,哈哈....

    回覆刪除
    回覆
    1. 唔會喇,過時過節我都一樣會照買餸,咪又一樣送蔥!唔送蔥嘅菜檔係賣平價蔬菜囉。

      刪除
  3. 買菜送蔥.....都係得你一半咋
    水瓜就係無角GE絲瓜
    浦瓜 印象中同葫蘆瓜差唔多

    水瓜 浦瓜我都好少買,次次行街市 呢兩款都都叫我唔好買佢,唔好食佢......哈哈

    回覆刪除
    回覆
    1. 我平時去開嘅街市都只係送一棵蔥,估唔到學生住個屋苑街市菜檔會咁寬綽呢!

      嗯,乜原來水瓜即係無角絲瓜呀,唔怪得之咁似啦!葫蘆瓜我都未食過喎,擺風水嘅乾葫蘆就用過! :D

      Ghosy Lei,妳係咪去童話王國買餸㗎!?哇哈哈哈哈 ……… =))

      刪除
  4. 我買菜都有蔥送,不過通常都要$10以上,同埋無你咁多囉~~~
    哩兩種瓜見過,但唔知咩味又唔識煮,無買過呢,但聽你講完覺得可以一試水瓜:)

    回覆刪除
    回覆
    1. 咁即係其實好多菜檔都仲有蔥送啦!

      兩款瓜都唔差,試食無妨。

      刪除