2016年6月22日星期三

與素友見面

        同人出街食飯,一定係只會我就人口味,叫佢選擇自己想食嘅嘢,從來都唔使人去就我,因為其實我乜都係咁食,又唔太計較好味與否,總之食得落肚就得㗎喇!我成日都提住喺口唇邊,呢個世界仲有啲人係連飲啖乾淨清水都係一種奢侈,真係唔好食得咁 "招積"!!我唯一唔食嘅嘢就係有臊 / 羶味食物,偏偏呢類食物就涵蓋甚廣,牛肉啦、奶類製品啦、羊啦、鴨啦、鵝啦 ……… 而且我由細到大都唔係食肉獸,飲食習慣都以蔬菜為主,所以攪到成日俾人話我揀飲擇食、偏食,後來喺「素食青年」群組度見到好多素友分享類似經驗,先知道原來其實都係一種對飲食習慣嘅歧視,好多素友都覺得好煩惱,甚至有諗過放棄食素,因為真係受唔住身邊人嘅 "指控"。呢個世界真係好多人唔識得尊重同包容人,永遠都硬係要將自己嗰套加喺人身上,做得到就認同你,做唔到呢?呵呵,咁你就慘囉,注定一世俾人話!!難怪輔導姑娘都同我講話我無錯,只係世人問題。所以我都習慣咗自己就人好過要人就我,如果咁啱嗰日係要食齋的話,我就一定唔會應約,費事煩,人家知道你要食齋,就好自然話會就我,但其實對方係唔鍾意食素的話,食得唔開心、唔暢快咁去就我的話,咁就無謂啦!
 
        最近喺群組度識咗個素友,大家都好啱傾之餘,原來仲住埋同一區,噚日就約咗嚟見面,素友帶咗我去市中心間「友間齋舖」食 tea 兼傾偈,今次就唔使互相遷就對方口味都可以食得舒服,食得開心,同埋又再一次證明,搵人傾偈真係要搵番同人星球嘅人先好傾,真係舒服好多,可以講到真心嗰句出嚟!
 
 
餐廳開正喺商場正門口位置,非常就腳方便。
 
 
 
 
 
 
餐廳裝修簡單,感覺好舒服,唯一係冷氣比較大!
 
 
 
 
 
 
我哋叫咗兩樣嘢 share 嚟食,先嚟個冬蔭功餃子,我同素友
都唔係好 buy 個味道,因為偏酸又唔夠辣,
不過酸精食到就一定會好鍾意!
 
 
 
 
 
 
跟住嚟個星洲炒米,呢個反而唔錯,米粉炒得
乾身又爽口,最重要係完全唔覺
油膩,同埋份量都好足。 
 





咖啡都值得一讚,真係幾好,唔係我最憎嘅茶餐廳
style,聽素友講好似係即磨咖啡。
 
 
 
 
 
        埋單計數,每人 $37,貴定平我就唔識 comment 喇,因為我真係極少出街食嘢,迫住要出街食的話都只會幫襯快餐店,仲要係等到 tea time 先食,窮人要慳錢嘛!不過最重要係食物質素唔差,以幫舖交租咁計,依個價錢我都覺得可以接受。
 
 
 

4 則留言:

  1. 我是垃圾桶,食咩都無所謂,就下人都無所謂。

    回覆刪除
    回覆
    1. 我都係覺得就到人咪就囉!

      刪除
  2. 人本來就係獨立個體,思想各有各不同,但真係好多人好鍾意主宰別人嘅思想。

    回覆刪除
    回覆
    1. 係囉,Man Man 妳講得無錯,人人都有唔同觀點同立場,應該學識彼此尊重同諒解,唔好夾硬要人跟你嗰套去做至得㗎嘛,否則就唔使分你、我、他啦!!

      刪除