Kestrel's Blog

2009年2月6日星期五

金粒伴金方

個餸名係咪好有應節 feel 呢？新正頭食佢寧捨夠哂好意頭！而且又易煮，可以話係懶人菜中嘅表表者。

材料：
午餐肉
忌廉粟米蓉

先將午餐肉切粗方粒，放平底鑊內煎香及金黃色，我自己就用白鑊煎，一滴油都無落，因為午餐肉本身都幾肥。煎好後，倒罐忌廉粟米蓉落去煮，可以唔駛加調味，因為牛餐肉本身已經夠鹹，粟米蓉又夠哂甜，將粟米蓉煮番熱就得 o架啦！

2009年2月5日星期四

全麥合桃南瓜籽包

今次繼續試吓美心新輕樂系列麵包：全麥合桃南瓜籽包。

由於係用全麥粉做，所以比較硬身，與同系列嘅黑麥小紅莓提子包質感差唔多，一樣咁煙韌，唯獨是黑麥小紅莓提子包就有酸甜嘅乾果味，而全麥合桃南瓜籽包就充滿住果仁嘅香口感，各有特色，各自各精彩。

睇嚟美心嘅新輕樂系列麵包係相當受歡迎，因為每次如果我比較晏落街買餸，呢個系列嘅麵包就會賣哂，全部變成吉架！今次我去買呢包全麥合桃南瓜籽包都係剩番 last 一包咋！

淮山茨實三子節瓜湯

材料：
節瓜
淮山
茨實
杞子
栗子
蓮子
陳皮
大棗
鹽

節瓜刮皮、洗淨，原隻唔駛切；淮山、茨實、杞子、蓮子、大棗先用熱水浸軟，之後洗淨備用；栗子放焗爐內焗至爆殼及裂開裡面層衣，然後去殼、去衣；陳皮用熱水浸軟後，去瓤、洗淨備用。將所有材料一齊放入滾水內煲，飲前加鹽調味。

2009年2月4日星期三

魚露蝦醬蒸豬肉

今次醃豬肉時用咗粵式蝦醬同泰式魚露，所以又一 fusion 菜式。

材料：
枚頭瘦肉
蒟蒻芋絲
蔥花

醃料：
魚露
蝦醬
蒜茸
辣椒
糖
粟粉
麻油
紹酒

豬肉洗乾淨後切片，用醃料醃好，最後加粟粉同麻油；芋絲用清水洗淨，然後舖好喺碟上，再將已經醃好嘅肉片鋪喺芋絲上面。水滾後，放入鍋內蒸熟，到差唔多蒸好之前就灑上蔥花，蒸多約 1分鐘時間就完成，係咪好 easy 呢！

用芋絲墊底比用粉絲更加好，不但咬落爽口，又唔會好似粉絲咁過腍，更加唔會勁索汁料，攪到太濃味。

香蕉朱古力鬆餅 Banana & Chocolate Chips Muffin

因為逢最期二晚教完 Louisa 兩母子之後，都會喺佢屋企食埋晚飯，所以朝早就比較得閒，於是噚日就試吓開爐焗蛋糕，話哂都叫做第一次，所以就揀咗個最簡單易做嘅 Muffin 入手。

第一次焗蛋糕就梗係要孝敬媽咪啦！

今次我整嘅朱古力香蕉 Muffin，個食譜係出自潘行莊編著嘅《夢幻朱古力》。

材料：
香蕉                4隻(壓爛)
牛油溶液        2/3 杯
雞蛋                1隻
雲喱拿香油    1/4 茶匙
麵粉                200克
糖                    100克
發粉                1湯匙
鹽                    少許
朱古力豆        1杯

以上材料份量可做 12個 Muffin

先預熱焗爐至 200℃，將香蕉茸、牛油溶液、雞蛋同雲喱拿香油拌勻，之後篩入麵粉、糖、發粉同鹽，攪拌均勻後，再加埋朱古力豆，再次拌勻後就可以將麵糊倒落紙杯度，放入焗爐焗 20-25分鐘至熟，拎出嚟放喺放涼架上略為攤凍就可以食喇！

依，點解我整果個好似無佢咁多裂紋嘅？

因為呢次係第一次焗蛋糕，我怕唔係好識控制溫度，一係就唔熟，一係就焗燶咗，所以我另外整幾個細啲嘅 size 做試驗。

味道就一定唔會差得去邊 o架喇，不過蛋糕裡面就比較濕，但就唔係唔熟，同我平時買嚟食個啲有少少分別，唔知係因為用香蕉係會咁樣濕濕哋，定係我無用牛油，而用咗橄欖油，會有咁嘅分別，同埋個表面都比較乾，我諗下次我要整番個原味嚟試吓先得。其實我所用嘅份量全部都減半，唯獨是雞蛋無用半隻 (因為懶，唔想做分一半雞蛋呢個動作 )，唔知又會唔會因為咁而太過濕呢？另外，用一半份量整，理應做到 6個 Muffin，但係我覺得啲麵糊好似唔夠做囉，最多只做到 4 至 5個，唔通我買啲紙杯太大個！？

題外話：噚晚喺 Louisa 屋企食果餐晚飯真係好豐富，相信係我咁大個仔第一次有人煮餐咁 "豪" 嘅俾我食，佢話因為知道我去食飯，所以特別煮好啲。真係名符其實嘅海鮮餐，除咗碟菜之外，全部都係海鮮，有炸東星班、清蒸大花蟹 ( 我諗成隻蟹有我前臂咁長 )、頭抽炒中蝦同梅酒煮蜆。碟碟都係佢親自下廚整，唔係菲傭整 o架 ( 碟菜好似係菲傭炒 )！而且仲第一次食到上海米，仲好食過日本米呀！都唔係好貴，只賣 $8 斤，下次搭佢買返屋企煮。

2009年2月2日星期一

簡易生炒糯米飯

早前喺圖書館借咗本教整粥、粉、麵、飯嘅書，係喺都市閒情教煮餸嘅 Annie Wong 寫嘅，今日我就跟佢個食譜煮咗呢個糯米飯，不過材料就有所增減。

材料：
糯米
臘腸
蝦米
冬菇
蔥花

調味料：
生抽
老抽
紹酒
鹽

食譜係參考自黃婉瑩 (Annie Wong ) 嘅《粥粉麵飯》。

- 糯米預先洗淨，用水蓋面浸兩個鐘。

- 臘腸蒸熟後切細粒；蝦米洗乾淨，用熱水浸軟備用，冬菇用水浸軟，洗乾淨後切粒。

- 將浸好咗嘅糯米舖平喺碟上面，蒸約 30 分鐘至熟。

- 糯米蒸熟後將飯打鬆，攤凍備用。

- 燒熱油鑊，爆香臘腸、冬菇同蝦米，灒少少紹酒。

- 之後加入糯米飯同調味料一齊炒勻，灑上蔥花後，快手兜炒幾吓就完成。

確實係一個簡易版本嘅生炒糯米飯，據我所知，正宗嘅做法係將啲糯米由生炒到熟，都幾花功夫，依家就預先將佢蒸熟，真係慳番唔少功夫同時間。不過都幾辛苦，因為啲飯好黏，好難將佢炒散，真係炒到手軟㗎！後尾加咗少少水就好炒好多喇，當堂容易散開。

今日好似唔係好啱時候食糯米飯喎，因為天氣暖番，不過唔緊要，反正煲咗白果薏米腐竹糖水，係比較寒涼，食番個糯米飯戥番勻佢囉，嘻嘻！

老豆食咗兩啖後就即刻話好食，都算無枉費我出盡 "九牛二虎之力" 去炒！

Notes：
- 根據 Annie 所講，最好灑 2 - 3 湯匙水落糯米度，幫助煮熟透，所以我就加番之前浸
蝦米嘅水落去。

- 由於臘腸本身都已經好多油，所以爆臘腸時可以用少啲油。

白果薏米腐竹糖水

一個簡單易做又好味嘅湯水，原來都有食療價值。我睇番中醫師何樹勛博士寫嘅《保健湯水》都有教煲呢個湯水，可以治哮喘、利小便、去水腫、清熱除痰，生薏米仲可以抗癌療癌㖭！不過冬天都係唔好飲太多，一來糖水本身較寒涼，二來因為去水利尿，冬天就要成日去廁所！

材料：
白果
薏米
腐竹
冰糖
雞蛋

- 白果先剝殼，然後去衣、去芯；薏米洗淨後用水浸約半個鐘；腐竹洗乾淨，用水
浸軟。

- 煲滾水後，先放白果同薏米煲一陣間。

- 之後放埋浸軟咗嘅腐竹，再煲多一陣，見腐竹滾爛後，就可以放番落真空煲度。

- 到食之前半個鐘拎番出嚟煲番滾，然後加冰糖。

- 當所有冰糖都煮溶哂時，就可以打雞蛋入糖水度，蛋煮熟後就攪掂。

2009年2月1日星期日

好似唔係我嘅錯嚟 o架喎！！

初五果日我照常開工，仲由朝教到晚 o添！一早係屯門教咗一個，之後去將軍澳，再跟住去九龍灣，最後一站就係廣播道。雖然只係四個地方、五個學生，但由於浪費咗好多時間係交通上面，所以都差唔多用哂成日時間。

當我去到尾二果站時，發覺有個未接來電，原來係最後一站個學生家長打俾我，於是我就覆番佢電話，佢問我可唔可以早啲到，我話唔得，因為仲要教多個學生先至去佢度，咁佢就問我幾點到，我話 6:30pm 到，點知佢同我講：「依家過年時節，你應該問吓我駛唔駛調時間呀嘛，佢兩個細嘅又唔識同我講，咁依家唔駛出街啦！一陣間每人淨係上 45分鐘算啦，下次記得同我講聲！」之後 bye 都無聲就收咗線。

大佬，妳明知自己要出街就早啲同我改時間啦，臨上堂前兩個鐘唔夠先打嚟問，我話唔可以早到仲好似係我唔啱咁，叫我下次記得同佢講聲。佢兩個仔有幾細呀，一個中一，一個中三啦，唔好話佢哋 "闊佬懶理"！唔怪得之媽咪成日都話上門教琴係無咁受尊重，人哋只係當你係佢屋企其中一個鐘點工人，叫我有機會就自己開琴行，唉，我有咁富貴就好囉！如果媽咪喺度，我就可以同佢 "呻" 兩句，佢安慰我兩句就無乜事，依間雖然唔係話好唔開心，但係咪就好似個 "此刻心情" icon 咁…… 無奈囉！