意大利杏仁餅乾 Amaretti

        嘩，卒之都完成咗大製作呢個 project 喇！！ 我哋幾個都真係攰到死呢！等埋 Louisa 今晚去到宴會場地影完相，之後 send 番俾我先至 post 上嚟 blog 度，遲啲再同大家分享啦！

        由於呢兩日整嘅婚宴回禮餅個麵糰只係需要蛋黃，所以剩咗勁多蛋白，咁食完飯之後，當 Louisa 同 Winnie 繼續做埋包裝時，Louisa 就俾個食譜我，叫我自己試吓整呢個 Amaretti，因為又易整、又好食，但最重要就係只用蛋白，唔用蛋黃，咁就可以銷咁啲蛋白啦！

材料：
杏仁粉      175 克
糖霜          125 克
糖              50 克
泡打粉      1/8 茶匙
梳打粉      1/8 茶匙
蛋白          2 隻

- 將所有粉類同糖過篩，混合均勻。

- 加入蛋白，用膠刮拌勻。

- 用匙羹將杏仁蛋白混合物逐少勺上已鋪入爐防黏紙嘅烤盤上。

- 放入已預熱至 160 °C 嘅焗爐內焗 25 分鐘。

- 將杏仁餅乾放上架上攤凍即可。

 

其實呢個 Amaretti 係意大利式嘅 Macaron，所以食落口真係熟口熟面，
不過做法就簡單好多喇，而且個人覺得 Amaretti 仲好食啲 o添！

 

總共整咗兩大盒餅乾，一盒當然係自己要啦，另一盒就整俾 Winnie。

Notes：
- 喺原食譜裡面，175 克杏仁粉中，有 50 克係用北杏磨成杏仁粉。

- 原食譜係用 75 克糖，不過 Louisa 就話俾我聽，跟足原食譜份量的話會好甜，所
  以我就減咗 25 克糖，不過依然都幾甜。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

大馬站煲

        上幾個星期，同 Louisa 一齊去咗煤氣烹飪中心度跟 Annie 學整脆皮燒腩，之後就將嚿又大又靚嘅燒肉拎番屋企做餸，點知之後第二日，老豆食完盆菜後又拎多嚿燒肉返嚟，攪到啲燒肉多到依家都未食得哂，咁啱老豆噚日又拎咗啲韭菜返嚟，咁就啱喇，買嚿豆腐返嚟就可以整大馬站煲。

        大馬站，真係好耐都無食過喇，印象中好似係小學時期媽咪整過之後，到依家都未食過，一提起，就即刻流哂口水喇！ 有韭菜嘅香味、有蝦醬嘅惹味、亦有爆香燒腩嘅好味，加埋一齊，真係好味到暈！！今晚又再次追尋番呢個兒時回味嘅味道。

好好味呀，同媽咪整嘅差唔多味喎！

材料：
豆腐
燒腩
韭菜
蒜片
薑片

調味料：
蝦醬
紹酒
糖

- 豆腐用抹手紙包住，之後用重物壓喺上面，將多餘水份迫出；韭菜洗乾淨後切段。

- 燒熱油，將豆腐兩面煎至金黃，盛起備用。

- 落蒜片同薑片爆香，跟住落埋蝦醬一齊爆。

- 當蝦醬都爆出香味之後就落埋燒腩，灒酒，兜炒幾下之後，將豆腐回鑊。

- 加入適量水，落糖，用中慢火炆至水份略為收乾。

- 另燒熱砂鍋，落油，爆炒韭菜至八成熟後，將燒腩、豆腐連汁加入，煮滾後即可。

Notes：
- 豆腐最好買實豆腐，因為比較硬淨，煎嘅時候無咁易爛。

- 糖嘅份量可因應蝦醬嘅鹹度而調節，所以最好試一試味。

- 惹醬汁太多的話，可用粟粉水埋薄芡。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

雜乾果合桃裸麥包 Assorted Dried Fruit & Walunt Rye Bread

         早前 Louisa 個 friend 去完台灣，買咗包裸麥粉俾我，原本我同 Louisa 諗住喺佢屋企即刻整包包食，點知佢原來無酵母喺屋企，咁我就唯有拎返袋粉返屋企先整。

        因為呢幾日比較忙，無乜時間諗整邊隻裸麥包，於是就做番上次跟雪媽媽個食譜整果個合桃乾果裸麥包，反正 Louisa 都讚好食。不過今次就改咗乾果料，仲跟番雪媽媽個食譜裡面個做型嚟整 o添！

材料：
高筋麵粉                            160 克
裸麥粉                                 90 克
水                                        160 毫升
即用酵母                             4 克
鹽                                         2 克
糖                                         20 克
橄欖油                                 12 克
合桃                                     35 克
紅莓乾                                 15 克
杏脯乾                                 15 克
提子乾                                 20 克 

- 合桃沖洗乾淨，用抹手紙索乾水份，放入焗爐內，用 180 °C 焗 8 - 10 分鐘至
  香，攤凍後與杏脯乾一齊切碎；所有果乾用少量 rum 酒浸軟。

- 將所有粉類材料、酵母、油、鹽同糖倒入食物處理器內混合，加水搓成光滑麵
  糰。

- 拎出麵糰，將麵糰滾圓並黏緊收口，放喺已搽油或灑粉嘅兜內，然後用保鮮紙冚
  住，發酵約 45 分鐘。

- 當第一次發酵完成後，將麵糰排氣，然後將麵糰拎到枱面上分割成 4 小份，將小
  麵糰滾圓後，冚上保鮮紙鬆弛 10分鐘。

 

- 用擀麵棍將麵糰擀平成長方形，放上合桃及乾果後捲起、收口。

 

- 將麵糰略為拉長，圍住 4 吋戚風模嘅中軸一圈，然後將其中一端包住另一端，握
  緊收口。

- 將麵糰連戚風模中軸放喺已經鋪上入爐防黏紙嘅焗盤上，冚上保鮮紙作最後發
  酵。

- 當麵糰發酵到大約兩倍大時，就灑上少少高筋麵粉喺麵糰上面。

- 用利刀喺麵糰上面割幾刀，放入已預熱至 200 °C嘅焗爐內焗 25 - 30分鐘至熟。

 

因為只得兩個戚風模，所以剩低嘅麵糰就咁搓埋一嚿就算！

呢包就係專程喺台灣帶返嚟嘅裸麥粉喇！

Notes：
- 材料份量亦可利用一個直徑 3 吋嘅鋼圈做出一個大麵包。

- 乾果及果仁配搭可因應個人口味改變。

- 戚風模中軸或鋼圈需預先搽上油作麵糰防黏之用。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

翠玉瓜鬆餅 Zucchini Muffin

        最初見到呢個食譜時，好吸引我呀！因為原食譜係寫住「意大利青瓜鬆餅」，咁我就即刻諗到兩個問題：第一，點解指定要用意大利青瓜呢，有咩特別，同一般青瓜有咩唔同？第二就係，青瓜咁易出水，乜真係可以用嚟整蛋糕咩？於是我就上網搵吓資料，原來意大利青瓜個意文寫法係 zucchini，同翠玉瓜個英文完全一模一樣，再搵吓相睇，點知幾乎同翠玉瓜一模一樣咁滯，只係比翠玉瓜深綠色啲，同埋有啲品種係黃色。咁所以我就知道其實係可以用翠玉瓜代替，同埋唔駛怕有水出啦，因為翠玉瓜根本唔會化水！加上發覺原來有好多網友都整過翠玉瓜蛋糕，所以我先大膽一試咋！

Winnie 嘅台灣手信

        嗯，居然復活節都有福袋收，乜唔係淨係新年先有嘅咩！？

        其實呢袋係 Winnie 去完台灣旅行帶俾我嘅手信嚟嘅，真係好豐富呢！有唔同牌子嘅凰梨酥啦、麻糬啦，仲有鐵蛋 o添。最有心思嘅係有兩罐素肉醬呀，因為 Winnie 知道我每個月都有茹素嘅日子，真係好鍾意呢！完全符合哂呢篇 blog 所屬嘅 catagory — 物重情更重！

        Thank you very much, Winnie!!

香蕉經典朱古力蛋糕 Gâteau classique au chocolat & banane

    今日比較忙，多嘢做到連 lunch 都無食到，所以夜晚餐飯就提早咗成粒鐘食，正因為咁樣，所以食完飯就有時間整吓甜品。其實個人都有啲攰 o架，因為逢星期日朝早都要五點零六點起身，一路做嘢撐到夜晚，所以就揀個易整啲嘅甜品，之唔係經典朱古力蛋糕囉！

    經典朱古力蛋糕真係百吃不厭，係我嘅 "賣飛佛" 呀！不過今次就試吓跟 Vanlily 個方法，加入香蕉，做成香蕉經典朱古力蛋糕，睇下食法又會係點！

    今次仲試咗用兩種唔同濃度嘅朱古力去整，分別係 72% 同 85%，各佔一半。不過我覺得稍為苦咗啲，應該 85% 朱古力用 1/4 就夠喇。好彩加咗香蕉，咁先至無咁苦咋！ 

似唔似兩粒大衫鈕呀？

 

其中一個送俾學生 Louise，因為今日麻煩咗佢幫我同 Winnie 做跑腿呀！

 

    有興趣整嘅朋友可以參考 Vanlily 個食譜。另外，亦可以參考吓我之前整嘅兩款經典朱古力蛋糕：

1. 橙香經典朱古力蛋糕    

2. 經典薄荷朱古力蛋糕

    你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

燕麥包 Oatmeal Bread

        長假期今日正式開始，所以今朝早唔駛去老人中心教唱歌，晏晝教完 Ryan 之後就返屋企無嘢做，所以 plan 咗今日整麵包。

        已經隔咗好耐無整包包喇，所以都係整番個 "熟手包" 先，起碼個腦都叫做有啲印象嘛！咁整邊個呢？我揀番 Rachel 個燕麥包呀，因為始終都係比較鍾意食歐陸包多啲，而且呢個包又真係好好食，特別鍾意一粒粒燕麥嘅煙韌口感，正！我仲記得上次喺 Louisa 屋企同 Winnie 一齊整時，Genevieve 鍾意到不停口咁食呢！

不同種類酵母用量之調整

常用嘅酵母主要有 3 種，分別係新鮮酵母、乾酵母同即用乾酵母。

我曾經睇過一本書講，其實用邊種酵母整麵包都無所謂，只係在乎個人習慣，但有一點要留意嘅係，唔同酵母嘅用量都有所不同，書中列出咗唔同酵母用量之間嘅換算作為參考：

- 即用酵母用量 = 鮮酵母用量 X 0.4

- 乾酵母用量 = 鮮酵母用量 X 0.5

舉例說，如果食譜係用鮮酵母，而用量係 10 克的話，改用即用酵母時，其用量為：

    10 克 X 0.4 = 4 克

若改用乾酵母的話，用量需調整為：

    10 克 X 0.5 = 5 克

希望以上同大家分享嘅酵母用量換算方法幫到鍾意整麵包嘅朋友啦！

不同種類酵母用量之調整

           常用嘅酵母主要有 3 種，分別係新鮮酵母、乾酵母同即用乾酵母。

       我曾經睇過一本書講，其實用邊種酵母整麵包都無所謂，只係在乎個人習慣，但有一點要留意嘅係，唔同酵母嘅用量都有所不同，書中列出咗唔同酵母用量之間嘅換算作為參考：

- 即用酵母用量 = 鮮酵母用量 X 0.4

- 乾酵母用量 = 鮮酵母用量 X 0.5

舉例說，如果食譜係用鮮酵母，而用量係 10 克的話，改用即用酵母時，其用量為：

    10 克 X 0.4 = 4 克

若改用乾酵母的話，用量需調整為：

    10 克 X 0.5 = 5 克

希望以上同大家分享嘅酵母用量換算方法幫到鍾意整麵包嘅朋友啦！

熱情果乳酪檸檬罌粟籽蛋糕 Passion Fruit Yogurt Lemon Poppy Seed Cake

        今日整到呢個咁正、咁好食嘅蛋糕，真係要多謝哂 blog 友毛豆呀，因為係佢教我整 o架！而且，我之前因為要整柑橘橙皮果醬，所以買咗兩個檸檬，用咗一個，另一個都唔知點用好！

       我都唔想買兩個咁無聊 o架，不過依家啲街市同超市賣嘢都係 $10 幾個、$10 幾棵、$10 幾斤、$10 幾件 ……，仲無得揀 o添！如果你要買一個就特貴，咁咪唯有 "順應民意" 囉。原本 $10 四個檸檬，生果檔個阿姐已經好好人，我買兩個都係收番我 $5 咋！

        咁啱 Gordon 早排 send e-mail 問我關於 Bonnie Yves 啲果醬，我問佢係咪想買，如果係嘅，不如我幫佢整好過，咁所以咪再用咗半個檸檬嚟整柑橘橙皮果醬俾佢囉！咁都仲用剩半個 o架，點好？點知俾我見到毛豆整呢個蛋糕好吸引，而且我又好鍾意 citrus food，仲可以用埋果半個檸檬，正！於是我就問佢有無食譜，咁佢就 share 個食譜俾我。哈，咁啱只係需要半個檸檬咋，真係剛剛遇著啱啱，咁就可以銷埋最後半個檸檬喇！ 

將麵糊入爐之後，一邊清洗用具，一邊聞到好香嘅檸檬味，
真係引死人呀！

材料：
牛油                  80 克
糖                      50 克
鹽                      1/4 茶匙
雞蛋                  2 隻
檸檬皮茸          1 個份量
檸檬汁              1/2 個份量
罌粟籽              4 茶匙
低筋麵粉          150 克
泡打粉              1 茶匙
梳打粉              1/4 茶匙
熱情果乳酪      150 克

以上材料份量可做 7cm X 12 cm X 4 cm 蛋糕 3 件。

食譜參考自 blog 友毛豆嘅 Lemon Poppy seeds yogurt cake 。

- 先將所有粉類同鹽混合好，之後過篩 3 次；牛油室溫放軟。

- 牛油加糖用電動打蛋器打至發白。

- 雞蛋分次加入牛油霜內，拌勻。

- 加入檸檬皮茸、檸檬汁及罌粟籽拌勻。

- 將粉類分 3 次篩入，其間分兩次加入乳酪，其次序為粉類 — 乳酪 — 粉類 — 乳酪
  — 粉類。

- 拌好之後，將麵糊倒入模內，放入已預熱至 200°C 嘅焗爐，焗約 18 - 20分鐘即
  成。

 

焗到好脹卜卜呀！學毛豆話齋，落咗乳酪蛋糕真係鬆軟好多，
而且檸檬味好香濃，真係啱哂我呢個 citrus 精呀！！

 

一片丹麥麵包加幾件檸檬蛋糕，再加一杯肉桂咖啡，就成為咗
我今個晏晝嘅 tea-lunch 喇！

Notes：
- 原食譜係用 2 - 3 湯匙罌粟籽，可隨個人喜好增減。

- 可用任何味道乳酪，亦可用原味乳酪。

- 攪拌麵糊時要盡量快手及輕手，以免麵糊起筋，令蛋糕唔鬆軟。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！