蔥油餅

        唔知點解，一向都鍾情於北方食品，饅頭、餃子、麵條……，尤其係蔥油餅，連 Winnie都知道我呢個 "辟好"。其實正確嚟講應該係鍾意食用麵粉整嘅嘢食，西方嘅麵包、蛋糕、pasta我都好鍾意 o架！

        今日Louisa唔得閒上堂，咁我得閒喺屋企就試吓整蔥油餅喇。

        我就係跟住呢本《麵麵俱到》學整蔥油餅 o架喇！

 

麵糰材料：
中筋麵粉      800克
鹽                  8克
滾水              400毫升
凍水              240毫升
乾麵粉          適量

蔥油餡材料：
食油              半碗
麻油              1湯匙
鹽                  適量
蔥花              適量
胡椒粉          適量

        先將鹽同麵粉混合好，之後沖入滾水，用筷子迅速攪拌成鬆散粉粒，跟住就加入凍水搓成麵糰，冚上保鮮紙靜止 20分鐘後，再搓成光滑嘅麵糰，然後放入雪櫃雪凍 6個鐘頭或以上；另外燒熱油同麻油，加入其餘蔥花餡材料拌勻備用。

        將雪過嘅麵糰分割成每個重100克嘅小麵糰，然後用已撲上乾粉擀麵棍擀成薄圓餅皮。

        之後喺上面搽上蔥花餡、撒上乾麵粉。

 

        將餅皮捲成長條狀，然後再捲成螺旋狀，靜止 20分鐘。

        然後用擀麵棍擀成直徑約15厘米嘅麵餅，放落已燒熱油嘅平底鑊度煎至兩面微黃色，加入1湯匙水，冚上鑊蓋，煎到水乾後再加入半湯匙油，繼續煎到兩面金黃色，趁熱拍鬆就攪掂。

        唔知點解，我唔可以好似本書幅圖咁拍鬆塊蔥油餅呢？有無高人可以指點迷津呀？

 

        加埋碗鹹豆漿就成為咗一份豐富而味美嘅北方晚膳喇！

 

Note:

1. 食譜上寫住最好前一晚整好麵糰，然後放入雪櫃雪過夜，可以令到麵糰嘅延展性更加好。我自己就朝早搓好麵糰，放入雪櫃雪到挨晚攞番出嚟分割。

    不過今日可能因為天氣熱，所以個麵糰喺雪櫃拎出 o黎之後，表面好多濕氣，攪到舊麵糰好腍好濕，要不停咁撒粉喺枱面、擀麵棍上同個麵糰本身。下次試吓唔雪，睇吓會唔會好啲！

2. 加水一齊煎可以做到外脆內軟。

鹹豆漿

        今日又做自家製豆漿喇，不過今次唔係整甜豆漿，而係淡豆漿 ( 即無糖豆漿 )，點解？因為想試吓整鹹豆漿囉！印象中，我記得媽咪都好似整過一次 o架！不過印象就真係好模糊喇，唔係好記得咩味道 lu！

 

材料：
淡豆漿
榨菜
蝦米
蔥

調味料：
麻油
老抽
白醋

        榨菜洗淨表面紅色醃料後，切細粒、浸水約 20-30分鐘以減低鹹味；蝦米洗淨後用熱水浸軟備用；蔥洗乾淨後切成蔥花。

        先將榨菜、蝦米同蔥花放入湯碗內豆，加入調味料拌勻，然後將煲滾咗嘅豆漿舀入碗內，拌勻即可享用，就係咁簡單！

        有豆漿嘅清甜、蝦米嘅鹹香、榨菜嘅爽脆，加埋蔥花香味，Hm……好好味呀！飲慣甜豆漿，呢個鹹豆漿就別有風味。

 

Note:

1. 我參考過好多教自製豆漿嘅食譜或者書，黃豆同水嘅比例多數都係每 300克黃豆( 即半斤 ) 就加10杯水。

2. 材料係依照「維他純豆漿」包裝盒上嘅食譜。

3.  自己亦有喺網上搵過資料，原來製作鹹豆漿最重要嘅材料係白醋，因為佢會同豆漿產生化學作用而令豆漿有少少凝固狀態。

參考資料： http://www.kyms.com.tw/recipe-17.htm

香芹木耳炒芋絲

材料：
中芹
木耳絲
雞蛋
芋絲 (蒟蒻)
蒜茸

醃料：
糖
鮮醬油

調味料：
糖
蠔油
紹酒
麻油

        將芋絲逐件解開、沖水，瀝乾水後落醃料醃好備用；木耳絲先用暖水浸軟，洗淨後汆水，瀝乾備用；中芹洗乾淨後切絲；雞蛋打成蛋液備用。

        燒熱油，先落蛋液煎成蛋皮，盛起切絲備用；之後爆香蒜茸，落芋絲及木耳絲炒熱，灒酒，加埋蛋絲同芹菜絲一齊炒，落調味，灑上麻油，兜勻後即可上碟。

        簡簡單單的一道素菜，又健康、又好味。

酸辣韭菜橙香鯪魚餅

材料：
韭菜
鯪魚肉
橙皮茸

醃料：
糖
鹽
生抽
粟粉
胡椒粉

調味料：
糖
鹽
紹酒
鎮江醋
青咖喱醬

        鯪魚肉先落醃料，拌勻後加入粟粉，最後加入橙皮茸，醃約半個鐘；韭菜洗乾淨後切段備用。

        撈咗橙皮茸嘅鯪魚肉，未煎已經好似有金黃色。

 

        首先燒熱油，落魚肉煎熟成鯪魚餅，盛起後切件。跟住就炒韭菜，炒至半熟時，加少少水冚蓋焗一焗腍身，之後將鯪魚餅回鑊並灒酒，落調味料，兜勻之後就食得，開飯囉！

        鯪魚餅充滿淡淡嘅清新橙香味，加埋韭菜、鎮江醋同青咖喱，完全係一種從未試過嘅新配搭、新口味、新嘗試，你都不仿試試。

OK 汁洋蔥豬扒

材料：
急凍巴西枚頭
白洋蔥
紫洋蔥

醃料：
鹽
糖
生抽
老抽
紹酒
雞粉
黑椒粉
羅勒 (Basil)

調味料：
鹽
糖
OK 汁

        豬扒解凍洗淨後用醃料醃好；洋蔥去皮後洗淨、切幼條備用。燒熱油，放豬扒落鑊，先用大火將豬扒煎封，保留肉汁，後轉慢火繼續煎，可加少少水並冚蓋焗一焗，咁樣啲豬扒會易熟啲，呢招係喺通少度偷師學番嚟嘅。豬扒煎熟後先盛起，如果仲有肉汁留喺度的話，就可以直接放洋蔥落鑊炒香，之後加入調味料，兜勻之後就可以將洋蔥連汁一齊舀上豬扒度，咁就完成喇。

        OK 汁味道略酸，不過幾醒胃 o架，主要係用番茄醬、海棗醬、蘋果醬、葡萄醬、柑桔粉同檸檬粉嚟做，所以可落多啲糖調味。

        記得之前請 Winnie、Gordon、阿聰、Li Kien同 Danny去我新屋度玩時，我負責整嘢食，當然，梗係要媽咪幫吓手啦！因為當時我仲有媽咪可以依賴嘛。咁我就跟媽咪一齊去街市買材料，其中一樣就係豬扒喇，佢教我要買枚頭豬扒，因為比較腍，即使煮過 "龍" 都唔會太韌太嚡，所以我今次都記得買枚頭嚟整。由於今次係我第一次煎豬扒，所以唔係好識控制火路，有啲比較薄身嘅就煎得較為過火，但食落口果然真係無咁嚡喎！

法式小餐包 French Minute Bun

       今日淨係朝早教一個學生，夜晚老豆又唔喺屋企食，唔駛煮飯，見咁得閒，就諗住 "郁手" 焗蛋糕，但係諗起今日係十五，要食齋噃，所以整唔到蛋糕，因為我想食得清啲，連蛋都唔食，反正一個月都係兩次度啫，所以就諗起整麵包喇，因為唔駛落蛋嘛！都好，反正成日都得個 "諗" 字，遲遲都未郁手試做，今日難得夾啱哂時間，就 "的" 起心肝，"迫" 自己行出第一步！(因為我成日都覺得整麵包比整蛋糕困難同辛苦，又怕整唔成，浪費材料 )

        咁驚失敗，咁就當然要揀隻用料最少、又容易做嘅麵包嚟試做啦，我噚晚睇咗好幾本書，卒之揀咗雪媽媽教嘅法式小餐包。

        細細個嘅法包仔，好 cute好得意呀！

 

        呢本雪媽媽嘅《自家製麵包》係上年書展時 Winnie 幫我買，因為果陣時已經 plan 定會買依家個微波爐，所以本書要等到依家有焗爐先之有用。

材料：
高筋麵粉                              130克
低筋麵粉                              50克
乾酵母 (Instant Yeast)         2.5克
鹽                                          2克
溫水                                      100克       

        先將酵母溶於溫水 (約 32-38 ℃)內，拌勻、靜止10分鐘；將所有材料倒入不銹鋼盤內，加入酵母水，用手搓成粉糰，之後取出放上枱面，繼續搓至麵糰光滑，拉開麵糰時出現薄膜為至，然後就可以將麵糰滾圓並黏緊收口。

        將滾圓咗嘅麵糰放喺搽咗油嘅不銹鋼盤內，然後用保鮮紙冚住發酵，大約 45 分鐘度。

        第一次發酵完成，個麵糰發大咗差唔多兩倍，原本只係得我個拳頭咁大咋，依家就成個西瓜仔咁大。

 

        手指沾上高筋麵粉，插入麵糰後如果個窿無即時收縮，就代表第一次發酵完成喇。之後就用拳頭打扁個麵糰，將裡面嘅空氣排出，然後將麵糰拎到枱面上分割成六小份，再次滾圓並冚上保鮮紙鬆弛 10分鐘。

        之後將麵糰仔用手掌壓平、壓薄，然後捲起成欖核狀，放喺已經舖上牛油紙嘅焗盤上，用保鮮紙冚住作最後發酵。發酵到大約兩倍大時，就用刀輕輕喺麵糰表面割一刀。

        你睇，左下角個麵糰仔幾肥幾樣衰！所以焗完之後唔俾佢影大合照。

        用噴水壺將麵糰表面噴濕，然後就可以放入預熱咗 200 ℃嘅焗爐內焗 15 - 20分鐘，最緊要記住，當開始焗至 7分鐘後，就要再噴多一次水，咁先至可以做到法包脆硬嘅表面。我個焗爐因為有蒸氣功能，所以唔駛打開爐門噴水，一按制就攪掂，好方便呀！呢個亦係我之所以會捨得買嘅其中一個原因。

        焗緊嘅時候已經不斷聞到麵包香，到熱辣辣出爐時又點忍得住口呢，梗係即時拎個嚟食啦！一拎上手時都幾驚呀，因為真係好硬，好驚成舊麵包都 "硬掘掘" 食唔到，好彩只係表面硬，咬落去就好軟熟，同街賣嘅差唔多，只係比較 "寡" 咗啲，可能落唔鹽啦！

        卒之成功喇！好開心呀！  試過今次得咗就唔會再驚喇，下次再挑戰第二款包囉！

        不過整麵包真係幾辛苦，搓到好鬼死攰 o架，好彩搓緊嘅時候已經不斷聞到發酵緊嘅香氣，好似葡萄酒咁味 o架，就係聞到呢隻香味先至支持到我有心機、有動力繼續搓落去，因為以我依家風都吹得起嘅身形，真係幾吃力 o架！但當麵包出爐時就覺得幾辛苦都值得嘅，不過我諗我好少會整麵包俾人食囉，整得咁辛苦梗係留番俾自己歎啦！

火腿雞絲湯麵

材料：
扁上海麵
雞胸肉
火腿
小棠菜
薑片
蒜茸

醃料：
鹽
糖
生抽
雞粉
紹酒
胡椒粉

調味料：
鹽
糖
蠔油
雞粉 / 清雞湯
栗粉
紹酒
麻油

        雞胸肉洗乾淨，用醃料醃好；火腿切絲備用；小棠菜洗乾淨、開邊；上海麵煮熟後，盛起、過冷河備用。

        煲滾水，放入薑片，加入雞粉同少少糖做湯底。將雞肉放湯底內烚熟，之後盛起、用手撕成雞絲備用。跟住就放入小棠菜灼熟，盛起後就加入已過冷河嘅上海麵煮番熱。與此同時，燒熱油鑊，爆香蒜茸後，就可以放雞絲同火腿絲落鑊炒香，灒酒、兜炒一陣之後，就加入蠔油同糖拌勻，之後用粟粉水埋芡，最後加幾滴麻油，拌勻後就可以舀起，放於麵上，再舀入湯，一碗香噴噴、熱辣辣嘅火腿雞絲湯麵就完成喇。

P.S.  湯底味道唔駛太濃，因為煮雞絲同火腿絲時加入的調味已經足夠，如果唔係，味道就會太濃。

肉桂焦糖蘋果蛋糕 Caramel Cinnamon & Apple Cake

        係呀，又整多次呢個肉桂焦糖蘋果蛋糕呀，因為屋企又有蘋果剩呀嘛！今次再整最主要目的並唔係做實驗，而係為媽咪而整嘅，同埋今次係整埋俾阿馳同 Louisa 試食。

        今次個做法同上次一模一樣，只係將部份白糖改用黃糖 (brown sugar)，因為試過上次整出嚟非常之甜，所以就試吓部份改用黃糖，果然無咁甜，同埋焗果陣聞到香好多。之不過今次就無用長糕盤，改咗用蛋糕錫紙，但問題就嚟啦，焗完之後啲牛油流哂出錫紙外，攪到 "油淋淋"，好鬼煩，唔知係咪因為個容器太細，蛋糕又澎脹得太高，攪到啲油都滿到瀉呢？

媽咪嘅童年情意結

        呢幾個密氣樽喺 IKEA買番嚟嘅，都買咗好一段日子喇，啲香草都買咗好耐，其實已經用緊 o架喇，不過因為自己懶，無用樽裝起佢，每次用完就咁用橡筋扎住佢就算。前日教琴前比較得閒，無乜嘢做，卒之 "的" 起心肝，攞啲樽出嚟逐個逐個洗乾淨，抹乾佢，之後就裝起哂啲香草，以後用起上嚟就方便得多。

        裝起之後，發覺好靚、好別緻，"的的骰骰"，好 cute 好得意，於是就同佢哋影番張沙龍掟上 blog 度。

 

        擺咗喺調味架上仲覺得好 "prof " o添！媽咪見到就一定開心死！

        點解媽咪見到就一定會好開心？因為其實佢係對呢款樽有個情意結。媽咪細個嘅時候係住喺上環嚒囉街，樓下有間舊式嘅冰室，伯伯好多時都會帶佢落去果度買雪糕、買糖食，果度啲糖果全部都用呢種樽裝住嘅，當然 size 就梗係比我呢款大得多啦。五顏六色嘅糖果裝咗喺呢啲玻璃樽度，對於當時物質無依家咁豐富嘅年代，小朋友見到已經好吸引 o架喇，所以媽咪就算大個咗之後都留低好深刻印象。

        直到好多年前，有次我同佢一齊行 IKEA 時，我哋就見到有呢隻迷你版嘅玻璃樽賣，就喺果刻媽咪話番俾我聽佢呢段童年回憶，所以我就二話不說咁買嚟送俾佢。返到屋企媽咪就用嚟裝住佢啲小首飾，到依家我都仲有 keep住。

        由於啲首飾都係色彩繽紛，所以驟眼睇落都幾似啲糖果 o架！

        由於早前屋企裝修，要換過啲新傢具，所以我就用咗 credit card 啲積分嚟換領 IKEA coupon 用嚟買嘢，你知啦，用剩咗嘅餘額係無得找續 o架嘛，所以我就將個餘數用咗嚟買 1 set 呢隻玻璃樽，貪佢夠密氧，用嚟裝住啲香草唔怕會走味。

       

焗蕃薯

        今日晏晝又做 "實驗"，試吓用焗爐嚟焗蕃薯。

        我先將蕃薯洗乾淨、瀝水 ( 但毋須刻意抹乾，因為表面濕潤啲，焗出嚟會無咁乾 )。之後用錫紙包好，然後放入焗爐 ( 須預熱 )，用 200度火焗約半個鐘就攪掂。

        你睇，都幾 OK o架！雖然無街邊用炭爐煨果啲咁香，但係效果都唔錯噃！又腍又甜，好好食。