猶太麵包配蜜糖藍莓忌廉芝士醬 Bagel with Honey & Blueberry Cream Cheese

        上一次整嗰個 bagel 麻麻哋，今次跟另一個食譜整，效果非常理想，我仲整埋個蜜糖藍莓豆腐 cream cheese 伴食㖭！

豆腐忌廉芝士 Tofu Cream Cheese

        喺圖書館度借咗一本叫做《不使用砂糖的自然派 sweet 甜點》嘅食譜，作者 Patricio Garcia de Paredes 細個嘅時，媽咪患咗癌病，醫生囑咐要小心飲食，唔好食太多加工食品，自此之後，作者就開始鑽研食材，盡量唔用雞蛋、精製糖同奶類製品，而呢本食譜正正就係教大家點樣去用一啲天然食材去取代以上三種材料。

        食譜當中有一個叫做豆腐忌廉芝士，係用豆腐嚟仿製 cream cheese，作者話喺美國一啲專賣 bagel 嘅餐廳都會有齊 "真、假" 兩種 cream cheese 俾客人選擇，而豆腐 cream cheese 亦都頗受歡迎，因為比起真正 cream cheese 健康得多。至於一向唔鍾意食奶類製品嘅我，當然對此好有興趣啦！

        呢個豆腐 cream cheese 做法非常簡單，主要材料就只係得豆腐同檸檬汁，之後就可以基於呢個基本嘅豆腐 cream cheese 再加入不同材料，做出不同口味。

薑蔥魚肉腐皮卷

        禮拜二出去探伯伯同伯娘時，又試順便去埋「樹記」買嘢，今次買咗鮮腐皮、乾腐皮同枝竹。

        今次我醒目喇，問清楚嗰位叔叔點樣保存呢啲豆類製品，佢教我：鮮腐皮放冰格、枝竹就千祈唔好放入櫃，一定要掛起佢，個膠袋仲要唔好紮埋口，要疏氣先至唔會發霉；乾腐皮就放入雪櫃，一個禮拜內食咗佢。完全收到哂喇，希望唔好都係照樣發霉啦，發過霉嘅豆類製品真係炆極都唔腍、煮極都唔爛！

        塊乾腐皮咁唔擺得，今晚就即刻用佢嚟整腐皮卷先！

材料：
乾腐皮      2 張
鯪魚肉     半斤
薑
蔥

醃料：
鹽
糖
生抽
紹酒
胡椒粉

調味料：
糖
紹酒
魚露
粟粉

- 薑洗淨切絲；蔥洗乾淨後部份切成蔥花，其餘切段；鯪魚肉用醃料醃好，拌入蔥花。

- 腐皮用濕布抹乾淨，之後切去四周圓邊，再每張剪開 4份。

- 將鯪魚肉平均分成 8份，分別放上腐皮上，包好後用水搽一搽收口位置。

- 腐皮卷收口向下排放碟上，隔水蒸 10 分鐘至熟。

- 另起油鑊，爆香薑蔥，灒酒，之後加入糖同魚露調味。

- 最後用粟粉水埋薄芡，將芡汁淋上腐皮卷上即成。

蒸好之後腐皮變得通透，見到哂裡面啲魚肉，賣相好靚呢！

 

原本平平無奇嘅魚肉腐皮卷，淋上薑蔥芡汁後，
完全係另一種風味。

Notes：
- 蒸好嘅腐皮卷會有少少黐碟情況出現，可以預先喺碟上薄薄抹一層油。

- 如果鍾意的話，蒸好嘅腐皮卷可以再煎番香脆嚟食。

- 修煎出嚟嘅腐皮邊可以用嚟煲腐竹糖水。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

自家製檸檬醬 Homemade Lemon Curd

        以前見到有食譜用 lemon curd 嚟整嘢食，我都好想試，但係諗吓又要買多樽醬返屋企就即刻興緻大減！

        原來自己整檸檬醬都唔太難，材料簡單，做法容易，鍾意橘類水果嘅我當然要試整啦！不過，除咗檸檬之外，牛油佔嘅比例都唔少，如果我頂唔順的話 ……… 唔緊要，一於將牛油份量縮減，都係接受唔到的話，呢樽醬一定會有人承受嘅！！

豉椒味菜蜆肉炒河

        係咪見到個標題覺得好出奇呢，居然用蜆肉炒河粉？

        事緣係咁嘅，一心打算整鮮魷炒河，點知行勻成個街市都無魷魚賣，得一千零一檔有，但係佢啲魷魚勁靚囉，又大隻又新鮮，我驚秤完之後佢話要收我幾十蚊，唔通到時嫌貴唔要咩！咁咪轉身走入「大昌」睇吓有無急凍魷魚啦，點知都係無，咁見到有急凍蜆肉喎，咪順手攞包囉！

材料：
急凍蜆肉
鹹酸菜
青椒
洋蔥
河粉
紅椒乾
蒜茸

調味料：
鹽
糖
生抽
紹酒
蒜茸豆豉醬
粟粉
麻油

- 蜆肉解凍，洗淨後汆水；鹹酸菜洗淨、切件，用清水浸 10 分鐘，瀝乾後加糖醃
  好。

- 青椒洗乾淨後去蒂去瓤，之後切細件；洋蔥去衣，沖洗後切細件。

- 河粉預先用手鬆散開；紅椒乾洗淨切碎。

- 燒熱油，落河粉兜炒，加鹽、糖及生抽調味，兜勻後盛起。

- 再燒熱油，除蜆肉外，將其餘材料全部落鑊爆炒，灒酒。

- 加入豆豉醬及糖，兜勻，用粟粉開水埋芡，之後加入蜆肉煮至滾。

- 熄火後灑上麻油兜勻，將材料舀上河粉上即成。

賣相都唔差 o架！

 

味道？當然正啦，惹味又醒胃呀！

 

星期六大暑嗰日因為有隔夜湯飲，所以無買到去濕料煲冬瓜水，
咁今晚就用扁豆、赤小豆嚟煲冬瓜甜粥去濕補數啦！

Notes：
- 蜆肉切勿汆水太耐，否則會將所有鮮味溶於水內，肉質亦會變得太韌。

- 鹹酸菜用清水浸過後可減低鹹味。

        亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

全麥豆渣饅頭

        農曆新年過後我都無去探過伯伯同伯娘喇，所以我約好咗聽日會上去探佢哋。

        自從我開始識得整嘢食之後，每次我都會整啲嘢拎過去俾佢哋試吓，不過始終老人家對西點都唔係太好，記得伯娘曾經問過我攞饅頭食譜叫工人試整，而我自己又好耐都無整饅頭，好，就決定整饅頭啦！不過今次我試咗用老麵嚟整，睇吓成品質地會唔會比直接法有改善，而且仲加咗全麥粉同豆渣一齊整 o添！

老麵

材料：
低筋麵粉      32 克
高筋麵粉      32 克
糖                  6 克
即用酵母      1 克
泡打粉          1 克
水                  約 28 毫升

- 將所有材料混合搓成麵糰。

- 麵糰滾圓後捏緊收口，放入已灑粉嘅兜內發酵 3 個鐘或以上即可。

主麵糰

材料：
低筋麵粉      100 克
高筋麵粉      100 克
全麥粉          30 克
老麵              100 克
豆渣              30 克
糖                  20 克
鹽                  1.5 克
水                  約 100 毫升

- 老麵預先切細件；其餘材料攪拌均勻。

- 老麵與粉料混合搓成光滑麵糰。

- 麵糰滾圓後放入已灑粉嘅兜內發酵 15 分鐘。

- 用擀麵棍將麵糰擀薄，之後捲成長條形。

- 麵糰平均切開成細麵糰，每個重 30 克，鬆弛 15 分鐘。

- 將麵糰放上已墊牛油紙嘅蒸籠內，隔水蒸 8 - 10 分鐘至熟。

用老麵整真係軟熟好多，不過唔知係咪因為落咗豆渣嘅關係，
入口有少少黏。

 

又試偷懶，無準確咁量好細麵糰重量，所以大細不一！

 

Notes：
- 如果有中筋麵粉的話，可直接用相同份量取代高、低筋麵粉。

- 如果無全麥粉的話，可用 15 克高筋麵粉加 15 克低筋麵粉代替，亦可直接用 30 克
  中筋麵粉。

- 製作老麵亦可將麵糰直接放入雪櫃慢發酵 3 - 5 日，發酵好嘅老麵可以放上冰格儲
  存，到用時預早解凍即可。

- 唔想用老麵整的話，可用直接法製作，食譜請參考《 饅頭 》。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

紅豆糯米卷

        每次喺屯門一間齋舖食嘢時，我都會點豆沙糯米卷嚟食，好鍾意佢嗰種香甜軟糯嘅口感同味道。但其實自己整應該唔會太難，一於試試吧！順便可以清埋盒紅豆餡。

材料：
糯米粉      100 克
澄麵          2 湯匙
糖              30 克
水              180 毫升   
紅豆餡      約 100 克
椰絲          適量

- 將麵粉、澄麵、糖同水放入大碗內拌勻。

- 將粉漿倒入已墊牛油紙嘅長形盤內，隔水蒸 10 分鐘，拎出放涼備用。

- 將紅豆餡均勻塗抹喺糯米皮上，之後捲起，再灑上適量椰絲，即可切件享用。

飯後一杯鐵觀音加甜品，好滿足！

 

低估咗個盤嘅厚度，攪到個糯米皮太厚，難捲之餘又唔靚仔，
下次同等份量分兩次蒸就應該啱啱好喇！

Notes：
- 糯米粉內加入澄麵，可以令到蒸好嘅糯米皮較為挺身之餘，又可增加透明感。

- 紅豆餡可用現成品，亦可用中式豆沙代替。

- 捲糯米皮時幾得戴上即棄膠手套，因為非常黐手。

- 切件時，可先用保鮮紙包住把刀先切，咁就可以避免黐刀。
          

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

雙重粟米鬆餅 Double Corn Muffin

        最近搵到個 muffin 食譜幾得意，係用罐頭忌廉粟米蓉嚟整，不過就唔知味道係甜定鹹。見做法簡單，又喺好奇心嘅驅使下，今日就試整咗喇！

材料：
低筋麵粉              200 克
粟米粉                  100 克
泡打粉                  1 茶匙
梳打粉                  1/4 茶匙
鹽                          1/4 茶匙
黑椒粉                   少許
糖                           2 湯匙
橄欖油                   50 毫升
粟米蓉                   300 克
雞蛋                       2 隻
馬蘇里拉芝士       適量

- 所有粉類過篩 3 次後，將黑椒粉、鹽同糖加入均勻混合，備用。

- 雞蛋拂打成蛋液，將油同粟米蓉加入拌勻。

- 將粟米蛋液倒入粉類材料中，用膠刮快手拌勻。

- 將麵糊倒入紙模內，灑上適量芝士碎。

- 放入已預熱至 180 °C 嘅焗爐內焗約 20 - 25 分鐘至熟。

以上材料份量可做中 size 鬆餅 12 個。

食譜係出自劉明燕嘅《 Homemade 特級甜品 1 》。

都唔識得形容呢個 muffin 係鹹定甜，甜中帶鹹，鹹中又帶甜！

 

成日都覺得用液體油整嘅 muffin 始終唔及用牛油霜整嘅 muffin 咁鬆身，
唔知定係今次我又偷懶無用電動打蛋器攪拌麵糊而出事呢！？

 

Notes：
- 原食譜係用自發粉及粟米油 60 毫升。

- 攪拌麵糊時一定要輕手及快手，以免因攪拌過度而產生筋性，影響成品唔夠鬆軟。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

紅咖喱雞薄餅 Red Curry Chicken Pizza

        又係清貨時間，用埋放喺冰格樽紅咖喱醬，不過又唔想就咁用嚟煮餸咁普通，一於攪攪新意思，用佢嚟整 pizza。

麵糰材料：
高筋麵粉                195 克
水                            105 克
即用酵母                 2 克
糖                            10 克
鹽                             2 克
橄欖油                    10 克
粟米粉                    適量

餡料：
雞扒                         1 塊
金不換                     適量
紅咖喱醬                 適量
粟粉                         少許
Mozzerella 芝士      適量

醃料：
鹽
糖
紹酒
胡椒粉

- 除橄欖油同粟米粉外，將所有麵糰材料混合搓至起筋，之後加入橄欖油搓成麵糰。

- 枱面灑上乾粉，將麵糰放上，繼續搓揉及摔打成光滑麵糰。

- 將麵糰滾圓，放入已灑粉嘅兜內，冚好保鮮紙，發酵 40 分鐘。

- 雞扒洗乾淨、去皮，切去多餘脂肪後切粒，用醃料醃好；金不換洗乾淨，備用。

- 將麵糰排氣，之後再次滾圓，同樣放入兜內並冚好保鮮紙，鬆弛 20 分鐘。

- 燒熱油，爆香咖喱醬，之後加入雞肉略炒至五成熟，盛起。

- 咖喱醬留煲內，加入小量水煮開，之後加入粟粉水煮至濃稠。

- 麵糰再次排氣，並用擀麵棍擀薄成圓形麵皮。

- 雙手拎起麵皮，一邊轉動、一邊將麵皮拉闊、擴大。

- 將麵皮放上已掃油及灑上粟米粉嘅烤盤上，然後用手將麵皮向烤盤四周推開。

- 喺麵皮最外圍約 1 厘米闊位置掃上橄欖油。

- 將咖喱醬放上麵皮中間，然後用匙羹以劃圓圈方式將咖喱醬搽勻。

- 放上部份芝士，之後放上其餘餡料，最後再次灑上芝士。

- 將烤盤放入已預熱至 200 °C 嘅焗爐內焗 15 - 20 分鐘即成。

以上材料份量可做直徑 10 吋薄餅一個。

辣辣哋嘅紅咖喱，再加上金不換獨有嘅香氣，
營造出一個東南亞風味 pizza。

 

食完又辣又濃味嘅 pizza，食番碗冰涼嘅西米綠豆沙，爽呀！！

Notes：
- 於烤盤上灑上粟米粉，除可做到防黏之外，亦可令到批底更加香脆。

- 麵皮邊緣掃油，可以令到薄餅邊香脆，所以切勿將紅咖喱醬搽埋上去。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

印尼沙律配黃薑飯

        每年夏天，都總會至少整一次印尼沙律 Gado-Gado，皆因個花生沙律醬實在好食，非常惹味，喺炎熱天氣之下，原本無乜胃口都即刻變得胃口大增！

        記得第一次食呢個 Gado-Gado 係喺 Gordon 屋企食，因為佢媽咪係印尼華僑，好多時都會煮啲地道印尼菜。當時一食之下就即刻愛上，而且好鍾意佢嘅材料可以自由配搭，想用乜材料都得，最緊要係自己鍾意。
 

        今晚除咗整 Gado-Gado 之外，仲煮埋個黃薑飯伴食㖭！       

 

杏仁咖啡曲奇 Almond Coffee Cookie

        心血來潮，近排突然好想食咖啡曲奇，今日晏晝等緊麵包發酵時就整咗杏仁咖啡曲奇。

材料：
杏仁條                  50 克
低筋麵粉              200 克
可可粉                  5 克
即溶咖啡粉          10 克
固體菜油              100 克
糖霜                      85 克
鹽                          少許

- 杏仁條 放入焗爐內用 140 °C 焗 10 分鐘至顏色金黃及香味出。

- 麵粉同可可粉過篩 3 次；咖啡粉用少量熱水溶解。

- 固體菜油加入糖霜及鹽，用電動打蛋器打成忌廉狀後，將咖啡溶液逐少加入混合。

- 篩入粉類拌勻，加入杏仁條，輕手搓成麵糰。

- 將麵糰搓成長條形，用牛油紙包好，放入冰格雪約 1 個鐘至硬身。

- 將雪硬麵糰拎出，切成每片厚約 1/2 厘米嘅薄片，放上已鋪牛油紙嘅烤盤上。

- 放入已預熱至 190 °C 嘅焗爐內焗約 12 - 15 分鐘至熟。

- 出爐後曲奇直接於烤盤上攤凍即可。

以上材料份量可做 6 厘米 X 6 厘米曲奇約 15 塊。

呢個曲奇同之前整嘅咖啡腰果曲奇其實同出一徹，不過今次做法就改成
將咖啡溶液加入糖油混合物內，方便過直接篩入粉內，而且因為
用熱水預先開成溶液，咖啡味更加出。

 

今次用咗 「UCC 117」咖啡粉嚟整曲奇，咖啡味非常香濃。

 

Notes：
- 盡量以最少嘅熱水將咖啡粉溶解，否則麵糰會因水份過多而難以搓成形。

- 用固體菜油代替牛油整曲奇，成品會比較鬆脆，但就少咗牛油香味。

- 搓麵糰時，若發覺麵糰太乾而難以成糰，可酌量加入水份搓勻。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

糖醋排骨

        早前喺 Louisa 屋企整過幾次無錫排骨，突然間諗起原來好耐無整糖醋排骨喇，對上一次整已經係 09 年年尾嘅事。本來早排已經想整 o架喇，但係屋企樽鎮江醋用剩好少，肯定唔夠用，就連之前包餃子食時，啲醋都唔夠用，後尾都係用住日式柚子醋頂住先咋，但查實柚子醋只係加入橘子類果汁嘅醬油咋！ 

        早一、兩個星期，Winnie 話想整擔擔麵，但係又唔想為咗用得嗰少少就走去買成支鎮江醋，咁我就同佢講，叫佢幫我買咗之後自己倒起 1/3 嚟用囉，咁就真係一家便宜兩家著喇！皆因喺佢屋企附近間糧油雜貨批發店買嘢真係平好多，所以我每次買嘢之前都必定會叫佢去格價先，一支鎮江醋可以買平過超市幾蚊，雖然只係幾蚊雞，但計番個 percentage 就差距好大喇，差唔多平 25%，因為佢係一間批發之餘，又唔駛好似超市咁要俾上架費嘛！

上次整糖醋排骨係用一字排，今次我就用腩排整，啖啖肉呢！

 

有過煮無錫排骨嘅經驗，知道落多啲紹酒，煮出嚟嘅排骨會特別香，
所以今次我用少咗水，加多咗紹酒，果然香味比上次濃好多！

 

咪睇見呢度細細碗，查實已經買咗差唔多 $40 腩排 o架喇！
唉，真係百物騰貴呀！

 

        諗番起第一次整糖醋排骨時，我就深深咁體會到煮餸同整包餅蛋糕好唔同。整包餅蛋糕一定要有準確嘅材料份量比例，跟足方法做，否則好易失敗；相反，煮餸就唔好盡信食譜，因為就算唔跟食譜去做都唔會失敗，最多都係唔好味。第一次整糖醋排骨時就跟足食譜調味料份量去整，煮完出嚟簡直可以話係難食，問題未必出係個食譜度，而係可能各人口味唔同，食譜個調味份量未必會啱自己。

        煮餸時最好就係一邊煮、一邊試味，調出最適合自己嘅味道。所以你哋會發覺，我同大家分享嘅包餅蛋糕食譜，一定會法清楚列明材料份量，但餸菜食譜我就只會列出材料及調味料，唔會寫明份量，因為希望大家可以依自己口味調配出最啱心水嘅味道。

        想要食譜嘅朋友就參考番《糖醋排骨菜飯》嗰篇 blog 啦！