2011年7月31日星期日

薑蔥魚肉腐皮卷

        禮拜二出去探伯伯同伯娘時,又試順便去埋「樹記」買嘢,今次買咗鮮腐皮、乾腐皮同枝竹

        今次我醒目喇,問清楚嗰位叔叔點樣保存呢啲豆類製品,佢教我:鮮腐皮放冰格、枝竹就千祈唔好放入櫃,一定要掛起佢,個膠袋仲要唔好紮埋口,要疏氣先至唔會發霉;乾腐皮就放入雪櫃,一個禮拜內食咗佢。完全收到哂喇,希望唔好都係照樣發霉啦,發過霉嘅豆類製品真係炆極都唔腍、煮極都唔爛!

        塊乾腐皮咁唔擺得,今晚就即刻用佢嚟整腐皮卷先!



材料:
乾腐皮      2 張
鯪魚肉     半斤


醃料:


生抽
紹酒
胡椒粉


調味料:

紹酒
魚露
粟粉


- 薑洗淨切絲;蔥洗乾淨後部份切成蔥花,其餘切段;鯪魚肉用醃料醃好,拌入蔥花。


- 腐皮用濕布抹乾淨,之後切去四周圓邊,再每張剪開 4份。


- 將鯪魚肉平均分成 8份,分別放上腐皮上,包好後用水搽一搽收口位置。


- 腐皮卷收口向下排放碟上,隔水蒸 10 分鐘至熟。


- 另起油鑊,爆香薑蔥,灒酒,之後加入糖同魚露調味。


- 最後用粟粉水埋薄芡,將芡汁淋上腐皮卷上即成。



蒸好之後腐皮變得通透,見到哂裡面啲魚肉,賣相好靚呢!


 



原本平平無奇嘅魚肉腐皮卷,淋上薑蔥芡汁後,
完全係另一種風味。


Notes
- 蒸好腐皮卷會有少少黐碟情況出現,可以預先喺碟上薄薄抹一層油。


- 如果鍾意的話,蒸好腐皮卷可以再煎番香脆嚟食。


- 修煎出嘅腐皮邊可以用嚟煲腐竹糖水。


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


7 則留言:

  1. 原來要唔好紮實個袋...我成日覺得整腐皮卷好晒時間GA...
    [版主回覆08/01/2011 01:05:00]        係呀,記住唔好紮實個袋,一定要俾佢通風 o架!         都唔係好 嘥時間 啫,好過 要我開油鑊!!

    回覆刪除
  2. 你個腐皮卷蒸架?我 like 炸 or 煎多啲囉!
    [版主回覆08/01/2011 01:04:00]        我同妳相反,我唔係咁好煎炸食物,蒸 嘅清清 哋仲易入口!

    回覆刪除
  3. 乜咁創意無限呀....好唔好食架..
    [版主回覆08/01/2011 01:02:00]        有幾多創意呀,同茶樓 啲鮮竹卷差唔多,我改用魚肉咋嘛!         梗係好食啦 ,因為根本完全食原味咁滯,唔會俾廚藝影響。

    回覆刪除
  4. 我通常都係食煎既腐皮卷架.............. 你呢個又另一番風味wor~!!!!!!!!!!!!!!!!!
    [版主回覆08/02/2011 03:44:00]        好多人都係鍾意食煎,但我不嬲都唔好煎炸食物。

    回覆刪除
  5. 我鍾意啊!
    [版主回覆08/03/2011 20:38:00]        鍾意就要整至得 o架喎!

    回覆刪除
  6. [树記]腐皮,煲糖水,正啦!我常常用.
    [版主回覆08/03/2011 20:37:00]        大家都係識貨之人喎!

    回覆刪除
  7. 鍾意就要整.......我都想~~
    [版主回覆08/07/2011 02:10:00]        妳整少 啲手 作仔咪得囉!

    回覆刪除